Papa ha mama ikatóliko hatã vaʼekue, péro oaprendérõ guare la Bíbliape Ñandejára heraha Jehová oiko chuguikuéra testígo de Jehová. Papa ningo karpintéro vaʼekue ha ojapómi vaʼerã Jesús raʼanga, péro upéi ohejaite upéva. Upéva rangue ojapo peteĩ párte ore rógagui pe primer Salón del Reino oĩva San Juan del Móntepe, péva ningo peteĩ puevloʼi opytáva Manílape, haʼéva Filipinas kapitál.

Che anase vaʼekue áño 1952-pe ha ensegída che tuakuéra oñepyrũ chemboʼe aikuaa hag̃ua Jehovápe. Haʼekuéra ombostudia vaʼekue avei umi 4 che ermáno majórpe ha umi mbohapy che ermána majórpe. Akakuaa aja che túa chemokyreʼỹ vaʼekue alee hag̃ua un kapítulo la Bíbliagui káda día, ha haʼe ostudia chendive heta puvlikasión. Sapyʼapyʼánte che tuakuéra oinvitámi vaʼerã umi superintendéntepe ha umi rrepresentánte de Betélpe opyta hag̃ua ore rógape. Orembovyʼa ha oremokyreʼỹeterei vaʼekue umi experiénsia omombeʼúva oréve koʼã ermáno. Upéicha rupi ore romotenondese avei Jehová servísio.

Che tuakuéra ojerovia mbarete vaʼekue Jehováre ha péicha omoĩ chéve hikuái peteĩ ehémplo iporãitereíva. Mama ou vaʼekue hasykatu ha upéi omano, upe rire che túa ha che romoñepyrũ ore prekursorádo oñondive áño 1971-pe. Péro 1973-pe arekórõ guare 20 áño che túa ou omano avei. Omano rire chehegui che tuakuéra apyta vaieterei ha añeñandu cheaño peteĩ. Péro pe esperánsa oĩva la Bíbliape ‘chepytyvõ ajepytaso mbarete hag̃ua ha ani hag̃ua ni michĩmi aduda’. Upévare nañentregái ha añemoag̃uive Jehováre (Heb 6:19). Papa omano riremi, añeasigna aha hag̃ua de prekursór espesiál peteĩ ísla oĩvape mombyry hérava Coron opytáva Palawánpe.

Arekópe 21 áño ag̃uahẽ Corónpe. Che ningo akakuaa vaʼekue siudaháre, upévare añesorprende ahechárõ guare upe íslape ndaiporiguasuiha elektrisida ni água korriénte ha saʼiha umi móto ha áuto. Oĩramo jepe unos kuánto ermáno, ndaipóri vaʼekue peteĩ prekursór chemoirũ hag̃ua, ha sapyʼánte apredika vaʼerã cheaño. Pe primer méspe ahechagaʼueterei che hénte ha che amigokuérape.  Pyharekue che resay che rováre amaña umi estrélla ojajaipávare yvágape, upérõ ahejaséntema voi che asignasión aha jey hag̃ua ógape.

Péicha jave amombeʼupaitémi vaʼerã la añandúva Jehovápe. Avei chemanduʼa umi mbaʼe chemokyreʼỹvare alee vaʼekue la Bíbliape ha umi puvlikasiónpe. Pyʼỹinte ou vaʼekue che akãme la heʼíva Salmo 19:​14, ha ahechakuaa Jehová haʼetaha “che Salvadór ha che Ita Guasu” ajepyʼamongetárõ umi mbaʼe ogustávare chupe, por ehémplo umi mbaʼe haʼe ojapóvare ha umi ikualida porãre. Pe rrevísta La Atalaya onohẽ vaʼekue peteĩ artíkulo hérava “Usted nunca esta solo”. a Upe artíkulo tuicha chepytyvõ vaʼekue ha alee joʼa joʼa. Upéi aĩrõ guare cheaño añandu vaʼekue upe moméntope aĩha Jehová ndive ha aaprovecha añemboʼe, astudia ha ajepyʼamongeta hag̃ua.

Ag̃uahẽ riremi Corónpe añenombra ansiáno. Che añoite vaʼekue la ansiáno upérõ, upévare éntre semána otoka vaʼekue chéve adirihi pe Eskuéla Jaipurukuaa Hag̃ua la Biblia, pe Aty Ñanemboʼéva Japredika Hag̃ua, pe Estúdio de lívro de la kongregasión ha pe Ñemañaha Ñehesaʼỹijo. Avei otoka vaʼekue chéve ajapo pe diskúrso púvliko káda semána, upérõ guare nachetiempovéi vaʼekue añeñandu hag̃ua cheaño.

Igustoiterei vaʼekue apredika Corónpe, ha kon el tiémpo unos kuánto che estudiánte ojevautisa vaʼekue. Péro avei oĩ vaʼekue umi situasión ijetuʼúva. Sapyʼánte tekotevẽ vaʼekue aguata médio día ag̃uahẽ hag̃ua pe territóriope, ha ag̃uahẽvo upépe ndaikuaái vaʼekue ni moõpa akéta. Ore kongregasiónpe otoka vaʼekue avei oñatende heta ísla michĩvévare. Upévare pyʼỹinte tekotevẽ vaʼekue ahasa pe mar pochy lánchape, ha hiʼarive che ndaytakuaái vaʼekue. Péro entéro koʼã situasiónpe ahechakuaa mbaʼéichapa Jehová okuida cherehe. Upéi ahechakuaa Jehová chepreparánte hague ambohovái hag̃ua umi situasión ijetuʼuvéva pe asignasión cheraʼarõvape hína.

Año 1978-pe añeasigna aha hag̃ua Papúa Nueva Guinéape, upéva opyta nórte gotyo Austráliagui. Papúa Nueva Guinea ningo haʼe peteĩ país oĩháme heta montáña, ha la tuichakue katu ojogua Espáñape. Añesorprende vaʼekue aikuaárõ guare upépe oikoha 3 millón de persónarupi, ha haʼekuéra oñeʼẽ mas de 800 idióma. Haʼetépe katu la majoría umi hénte oñeʼẽ vaʼekue pidgin de Nueva Guinea, oñehenóiva jepi avei tok pisin.

Añeasigna vaʼekue un tiémpore peteĩ kongregasión oñeñeʼẽhápe inglés pe kapitál héravape Port Moresby. Péro upéi ava peteĩ kongregasión oñeñeʼẽhápe tok pisin, ha añepyrũ astudia upe idióma. Añepyrũ vaʼekue apraktika la aaprendéva predikasiónpe, ha upéva tuicha chepytyvõ aaprende pyaʼeve hag̃ua upe idióma. Upéicha rupi un tiémpo riremínte ikatúma kuri ajapo diskúrso púvliko tok pisínpe. Tuicha añesorprende vaʼekue añeasignárõ guare de superintendénte de sirkuíto, pórke upérõ neʼĩra gueteri ohasa un áño ag̃uahẽ hague Papúa Nueva Guinéape. Upémarõ añepyrũ avisita umi kongregasión oñeñeʼẽhápe tok pisin ha aviaha umi departaménto tuichaicha oĩvare upe paíspe.

Umi kongregasión oĩ vaʼekue mombyry ojuehegui, upévare tekotevẽmante kuri aorganisa heta asambléa de sirkuíto umi sónape, ha heta aviaha vaʼekue. Primerorã añeñandu vaʼekue cheaño pórke ndaikuaái upe país, oñeñeʼẽ ótro idiómape ha oĩ heta kostúmbre idiferénteva. Hiʼarive upe paíspe oĩ vaʼekue heta montáña ha ndaipóri vaʼekue tape,  upévare aviahámante vaʼerã kuri peteĩ avionéta vaikuépe haimete káda semána. Sapyʼánte cheañoite vaʼekue la aviaháva pe avionétape. Legálmente chemongyhyjeterei vaʼekue umi viáhe ha chemomanduʼa jey aviahárõ guare lánchape.

Saʼi vaʼekue la orekóva teléfono, upévare añekomunikámante vaʼerã umi kongregasióndi kárta rupive. Heta vése che raẽve jey ag̃uahẽ umi kárta amondo vaʼekuégui. Upémarõ añepyrũmi vaʼerã aheka moõpa oĩ umi ermáno. Péro káda ke atopa hesekuéra, umi ermáno ohechaukámi vaʼerã chéve omombaʼetereiha ag̃uahẽ haguére hendapekuéra. Upépe ahechakuaa vaʼekue ovaleha la péna oimeraẽ sakrifísio ajapóva, añandu vaʼekue mbaʼeichaitépa Jehová chepytyvõ ha upéva chemoag̃uive hese.

Chemanduʼa pe primera rreunión ahárõ guare pe ísla héravape Bougainville. Upépe peteĩ matrimónio oñemboja cherehe, opukavy ha oporandu chéve: “¿Nemanduʼáiko orerehe?”. Upépe chemanduʼa apredika hague chupekuéra ag̃uahẽ ramoitépe pe siuda héravape Port Moresby. Upéi añepyrũ vaʼekue ambostudia chupekuéra la Biblia, ha upéi peteĩ ermáno opyta oñatende hesekuéra. ¡Aviasído pe matrimónio ojevautisáma raʼe! Upéva ningo peteĩ vendisión tuichaiterei Jehová omeʼẽva chéve umi 3 áño aĩrõ guare Papúa Nueva Guinéape.

Chéngo asẽ vaʼekue Coróngui áño 1978-pe, ha upe mboyve aikuaa vaʼekue peteĩ ermána ijukýva ha iguapaitereívape hérava Adel. Haʼe ojapo vaʼekue la iprekursorádo rregulár, omongakuaa umi mokõi imemby héravape Samuel ha Shirley, ha hiʼarive oñatende isy ijedávare. Upéi mayo de 1981-pe aha jey Filipínaspe amenda hag̃ua Adel rehe. Romenda rire roservi de prekursór rregulár ha roñatende oñondive ore famíliare.

Chefamíliarõ jepe, áño 1983-pe añeasigna jey de prekursór espesiál ha ko vuéltape añemondo pe ísla héravape Linapacan oĩva Palawánpe. Che família kompletoite ndive rova upe lugár ndaiporihápe ni peteĩ Testígo. Un áño haguépe omano Adel sy, péro rogueropuʼaka upe situasión pórke rosegi orerembiapo heta predikasiónpe. Upéi roñepyrũ rostudia heta héntendi ha ifáltama katu oréve peteĩ Salón del Reino michĩva. Upémarõ oretéma voi romopuʼã ore Salonrã. Ojapórõ guare 3 áño rog̃uahẽ hague upépe, rovyʼaiterei rohechávo oho hague konmemorasionhápe 110 persóna. Heta umívagui kon el tiémpo ojevautisa ore rosẽ riréma upe íslagui.

Áño 1986-pe añeasigna pe ísla héravape Culion. Upe rire Adélpe avei oñenombra prekursóra espesiál. Upe ísla rog̃uahẽ haguépe oĩ vaʼekue peteĩ kolónia oĩháme umi hénte orekóva lépra. Primerorã ijetuʼu vaʼekue oréve ropredika hag̃ua chupekuéra, hetekuéra oñembyaipa anga pe lépra káusare. Péro umi ermáno upepegua heʼi oréve umi hénte orekoha la itratamiénto ha upévare ijetuʼuetereiha ova hag̃ua orerehe upe mbaʼasy. Algúno koʼã hénte hasýva oho peteĩ ermána rógape umi rreunionrã. Ensegidamínte ore avei rojepokuaáma ha igústoma oréve rokomparti pe esperánsa oĩva la Bíbliape hendivekuéra. Haʼekuéra ningo oñandu Ñandejára ha umi hénte omboykeha chupekuéra. Upévare orembopyʼakyrỹi rohechávo mbaʼéichapa umi hénte hasykatúva ovyʼa oikuaávo koʼẽrõitéma hesãi jeytamaha (Luc. 5:​12, 13).

 ¿Mbaʼéichapa ore família ojepokuaa pe íslape? Adel ha che roinvita vaʼekue mokõi ermána imitãvape oho hag̃ua avei orendive ikatu hag̃uáicha ore família ojeheʼa hesekuéra. Samuel, Shirley ha umi mokõi ermána imitãva ovyʼaiterei vaʼekue opredikávo umi héntepe. Haʼekuéra ombostudia vaʼekue heta mitãme ha Adel ha che katu rombostudia umi mitã tuakuérape. Peteĩ tiémpope en totál rombostudia vaʼekue 11 famíliape. Upe riremínte umi estudiánte oprogresa porã ha ikatúma romoñepyrũ peteĩ kongregasión pyahu.

Ñepyrũrã che añoite vaʼekue la ansiáno upépe. Upévare pe sukursál ojerure chéve ajapo hag̃ua pe rreunión éntre semanagua Culiónpe oĩháme 8 puvlikadór. Upe rire ajapo vaʼerã avei pe rreunión peteĩ várrio héravape Marily, oĩháme 9 puvlikadór. Upe lugárpe oñeg̃uahẽ varkoʼípe 3 órape. Upéi che famíliandi roguata vaʼerã heta órare peteĩ sóna oĩhárupi heta montáña rojapo hag̃ua umi kúrso bíblico rorekóva peteĩ várrio héravape Halsey.

Kon el tiémpo heta hénte oñepyrũ vaʼekue oadora Jehovápe umi várrio héravape Marily ha Halsey. Upéicha rupi romopuʼã umi Salón del Reino koʼã mokõi lugárpe. Oiko haguéicha pe ísla héravape Linapacan, umi ermáno ha umi oñeinteresáva la Bíbliare omeʼẽ heta umi materiál pe konstruksiónpe g̃uarã ha avei ombaʼapo upépe. Pe Salón oĩva Márilype ija vaʼekue 200 persóna ha ikatu vaʼekue oñembotuichave. Upévare upépe rojapómi vaʼerã umi asambléa.

Áño 1993-pe umi mitã okakuaapárõ guare añepyrũ aservi de superintendénte de sirkuíto che rembirekóndi Filipínaspe. Upéi áño 2000-pe aha pe Eskuéla de Entrenamiénto Ministeriálpe. Upépe chembokatupyry vaʼekue hikuái aservi hag̃ua de instruktór upe eskuélape g̃uarã. Che añandu vaʼekue ndaikatumoʼãiha akumpli porã upe asignasión, péro Adel siémpre chemokyreʼỹ. Haʼe chemomanduʼa vaʼekue Jehová omeʼẽtaha chéve pe fuérsa aikotevẽva akumpli hag̃ua upe asignasión pyahu (Filip. 4:13). Adel oikuaa porã vaʼekue Jehová oporopytyvõha pórke haʼe okumpli kuri oikóvo iñasignasión hasykatúramo jepe.

Áño 2006-pe aservírõ guare kómo instruktór, roikuaa Adel orekoha pe mbaʼasy hérava Parkinson.  Ni ndororoviaséi kuri la oikóva orerehe. Upéi añeʼẽ che rembirekóndi ha haʼe chupe nokonvenivéipa rohejánterõ ore asignasión ikatu hag̃uáicha che akuida porã hese. Péro Adel heʼi chéve: “Nahániri, ehekánte peteĩ doktór oñatende porãtava cherehe ha aikuaa porã Jehová ñanepytyvõtaha jasegi hag̃ua ñakumpli ñane asignasión”. Upéi 6 áñore Adel osegi iservísiope ojeplageaʼỹre isituasiónre. Haʼe ndaikatuvéirõ guare oguata lomímonte osegi opredika sílla de rruédape. Ha ijetuʼuetereírõ guare chupe oñeʼẽ, lomímonte okomenta uno térã 2 palávra jepe rreunionhápe. Adel omano meve áño 2013-pe pyʼỹinte umi ermáno ha ermána omondómi chupe mensáhe oagradese hag̃ua Adélpe omeʼẽ haguére ehémplo porãite. Che rembirekomi iguapaitéva ha oporohayhúva chemoirũ porã vaʼekue mas de 30 áñore. Péro haʼe omanórõ guare chehegui añembyasy ha añeñandu jey cheaño peteĩ.

Adel oipota vaʼekue asegi che asignasiónpe ha ajapo upéva. Añehaʼã rupi cherembiapo heta saʼivéma añeñandu cheaño. Áño 2014 guive 2017 peve añeasigna avisita hag̃ua umi kongregasión oñeñeʼẽhápe tagalo umi país ojeproivihápe ñane rembiapo. Upe rire avisita umi kongregasión tagalo oĩva Taiwán, Estados Unidos ha Canadápe. Áño 2019-pe katu amboʼe pe Eskuéla de Evanhelisadór ojejapóvape ingléspe India ha Tailándiape. Avyʼaiterei ningo akumplipávo koʼã asignasión, ha ikatu haʼe tuicha añeñandu porãveha añemeʼẽmbaitévo Jehová servísiope.

Káda asignasión pyahúpe kon el tiémpo ahayhueterei umi ermáno ha ermánape. Upévare siémpre ijetuʼu chéve aheja chupekuéra. Péicha jave aaprende vaʼekue tekotevẽha ajerovia Jehováre che pyʼaite guive. Siémpre ahecháva mbaʼéichapa haʼe chepytyvõ ha upéicha rupi ifasilve chéve aasepta vyʼápe umi kámbio oñepresentáva kon el tiémpo. Koʼág̃a aservi de prekursór espesiál Filipínaspe ha avyʼaitereíma che kongregasión pyahúpe. Umi ermáno imbaʼeporã chendive ha cherayhu, ha upévare ahecha chupekuéra che família teéicha. Avei avyʼaiterei Samuel ha Shirley reheve, pórke ahecha mbaʼéichapa haʼekuéra osegi ojerovia mbarete isýicha (3 Juan 4).

Legálmente ahasáma heta mbaʼe ijetuʼúva, por ehémplo otoka vaʼekue chéve ahecha mbaʼeichaitépa che rembireko ohasa asy ha upéi omano. Avei che situasión heta vésema okambia ha tekotevẽ vaʼekue ajepokuaa jey umi mbaʼe pyahúre. Péro entéro koʼã mbaʼépe ahecha Jehová ‘noĩriha mombyry ñandehegui’ (Hech. 17:27). “Jehová jyva ningo nambykýi” oipytyvõ ha osalva hag̃ua isiervokuérape oĩramo jepe umi lugár mombyryvehápe (Is. 59:1). Jehová ningo che Ita Guasu ha oĩ che ykére chemitã guive koʼág̃a peve, upévare aagradeseterei chupe. Ha legálmente núnka naiméiva cheaño.