1. ¿Mbaʼépa repensa umi enseñánsa verdadérare?

 JEHOVÁ siervokuéra ningo ñamombaʼeterei umi enseñánsa verdadéra oĩva Ñandejára Ñeʼẽme ha jajerovia ñantende porã rupi umíva (Rom. 10:17). Ñaĩ segúro Jehová omoñepyrũ hague pe kongregasión kristiána ikatu hag̃uáicha “ojoko ha omopyenda hína pe añetegua” (1 Tim. 3:15). Ha vyʼápe ñaneñeʼẽrendu umi ñandegiávape, haʼekuéra ñanemboʼe pe añetegua oĩva la Bíbliape ha ñandegia ikatu hag̃uáicha jajapo Ñandejára volunta (Heb. 13:17).

2. Heʼiháicha Santiago 5:​19, ¿mbaʼe pelígropa oĩ?

² Ikatu oime jaaseptáma raʼe umi enseñánsa verdadéra ha jahechakuaáma ñaikotevẽha Ñandejára organisasión ñandegia. Upéicharõ jepe ikatu gueteri hína ñasẽ pe añetegua rapégui (elee Santiago 5:19). Satanáspe hiʼãiterei jaju nañakonfiavéi la Biblia heʼívare. Avei oipota jaduda pe gía omeʼẽvagui ñandéve Ñandejára organisasión (Efes. 4:14).

3. ¿Mbaʼérepa tekotevẽterei ñaneñeʼẽrendu pe añeteguápe? (Efesios 6:​13, 14).

³ (Elee Efesios 6:​13, 14). Koʼẽrõitéma Satanás oipurúta umi japu haʼetéva voi la siértova ombotavy hag̃ua entéro umi tetãme ha péicha oñemoĩ hag̃ua hikuái Jehová kóntrape (Apoc. 16:​13, 14). Jaikuaa avei amedída ke jaha hese, Satanás oñehaʼãtaha ipy ha ipópe ombotavy hag̃ua Jehová puévlope (Apoc. 12:9). Upévare ñande ñaaprende vaʼerã jahechakuaa hag̃ua ojeʼe jave ñandéve la verda ha ojeʼe jave ñandéve japu. Avei tekotevẽterei ñaneñeʼẽrendu pe añeteguápe (Rom. 6:17; 1 Ped.  1:22). Jajapómante vaʼerã koʼã mbaʼe ani hag̃ua ñañehundi pe jehasa asy guasúpe.

4. ¿Mbaʼe mbaʼépa jahecháta ko artíkulope?

⁴ Ko artíkulope jahecháta mokõi kualida ñanepytyvõtava jahechakuaa hag̃ua pe añetegua oúva la Bíbliagui, ha jasegi hag̃ua Ñandejára organisasión gía. Upéi jahecháta mbohapy konsého ñanepytyvõtava jasegi hag̃ua ñaneñeʼẽrendu umi enseñánsa verdadérape.

UMI KUALIDA ÑANEPYTYVÕTAVA

5. ¿Mbaʼéichapa jarrespetáramo Jehovápe ñanepytyvõta jaikuaa hag̃ua mbaʼépa hína la verda?

⁵ Jarrespeta Jehovápe. Jarrespeta Jehovápe heʼise jahayhuetereiha chupe ha ni mbaʼevéicharõ ndajajaposeiha mbaʼeve ndogustáiva chupe. Ñande jaipotaiterei haʼe ñandeguerohory, upévare ñañehaʼã jahechakuaa hag̃ua mbaʼépa ivai ha mbaʼépa iporã, mbaʼépa japu ha mbaʼépa la verda (Prov. 2:​3-6; Heb. 5:14). Jareko vaʼerã enkuénta la ogustáva jepi la héntepe ndogustaiha Jehovápe. Upévare aníkena jakyhyje rupi la héntegui jaju ndajahayhuvéi Jehovápe.

6. ¿Mbaʼérepa ikatu jaʼe umi 10 espía ndeʼíri hague la verda?

⁶ Jakyhyjetereíramo la héntegui, ikatu hína jaju jarovia peteĩ mbaʼe ndahaʼéiva siérto. Ñanemanduʼamína umi 12 espía israelítare. Koʼã kuimbaʼe oúva diferénte trívugui, oñemondo ovichea hag̃ua pe yvy Jehová opromete vaʼekue omeʼẽtaha umi israelítape. Umi espía apytégui, 10 okyhyjeterei vaʼekue umi cananéogui. Upéicha rupi ijetuʼu vaʼekue chupekuéra ohechauka hag̃ua ohayhuha Jehovápe. Haʼekuéra heʼi umi ótro israelítape: “¿Mbaʼéichaiko jaháta ñañorairõ umi héntendi? Haʼekuéra ningo imbareteve ñandehegui” (Núm. 13:​27-31). Siérto ningo, umi cananeo imbareteve vaʼekue umi israelítagui, ¿péro siértopa raʼe la umi israelita ndaikatumoʼãi ipuʼaka umi cananéore? Nahániri, haʼekuéra heʼi upéva pórke hesaráima hikuái Jehovágui.  Umi 10 espía opensave vaʼerã kuri la Jehová oipotávare ojapo umi israelita. Haʼekuéra ojepyʼamongeta vaʼerã kuri la Jehová ojapo vaʼekuére hesehapekuéra ramoiténte. Ojapórire péicha, umi 10 espía ohechakuaáta kuri umi cananeo ndahaʼeiha mbaʼeve ñakomparátarõ Jehová pe Todopoderósore. Josué ha Caleb katu idiferentete vaʼekue umi espía ndojeroviáivagui. Koʼã mokõi kuimbaʼe oipota vaʼekue Jehová oguerohory chupekuéra ha heʼi hikuái pe puévlope: “Jehová ñandeguerohorýramo, katuete ñandegueraháta upe yvy opromete vaʼekuépe” (Núm. 14:​6-9).

7. ¿Mbaʼépa ikatu jajapo jarrespeta hag̃ua Jehovápe ñande pyʼaite guive? (Ehecha pe taʼanga).

⁷ Jarrespeta hag̃ua Jehovápe ñande pyʼaite guive, tekotevẽ ñañehaʼã ñambovyʼa chupe entéro mbaʼe jadesidívape (Sal. 16:8). Elee jave la Bíbliape la oiko vaʼekue yma, eñeporandumína: “Che aimérire pe situasiónpe, ¿mbaʼépa ajapo vaʼerãmoʼã?”. Por ehémplo, eñeimahinami umi 10 espía heʼívo umi israelítape ndaikatuiha ipuʼaka umi cananéore, ¿eroviátapa raʼe chupekuéra ha reñepyrũta rekyhyje avei? ¿Térãpa rehechaukáne raʼe rehayhuetereiha Jehovápe ha rembovyʼaseha chupe? Umi israelita ningo ndohechakuaái vaʼekue Josué ha Caleb heʼi hague la verda, upéicha rupi operde hikuái la oportunida oikévo pe Tiérra Prometídape (Núm. 14:​10, 22, 23).

8. ¿Mbaʼe kualidápa tekotevẽterei jareko, ha mbaʼérepa?

⁸ Ñaneumíldekena. Jehová oikuaauka la verda umi iñumíldevape (Mat. 11:25). Ñande jahechaukáma ñaneumildeha ñaaprendérõ guare umi enseñánsa verdadéra (Hech. 8:​30, 31). Péro ikatu gueteri jaju ñañemombaʼeguasu hína. Ñandéve g̃uarã umi konsého oĩva la Bíbliape ha Jehová organisasión heʼíva iporãiterei. Péro jajúramo ñañemombaʼeguasu ikatu ñapensa la ñande jaʼéva ovalenteha avei ha ikatuha jajegia upévare.

9. ¿Mbaʼépa ikatu jajapo jasegi hag̃ua ñaneumílde?

⁹ Jasegi hag̃ua ñaneumílde, tekotevẽ ñanemanduʼa ñande ndahaʼeiha mbaʼeve ñañekomparátarõ Jehováre (Sal. 8:​3, 4). Avei ikatu jajerure Jehovápe ñaneumílde hag̃ua ha jaasepta hag̃ua umi mbaʼe haʼe ñanemboʼeséva. Jehová ñanepytyvõta ani hag̃ua jaiko ñamotenonde la ñande ñapensávante, upéva rangue ñamombaʼevéta la haʼe opensáva. Ha Jehová pensamiénto ikatu jaikuaa Iñeʼẽ ha iñorganisasión rupive. Jalee jave la Biblia ikatu jaheka umi pruéva ohechaukáva Jehová oipotaitereiha ñaneumílde ha ndogustaiha chupe peteĩ persóna oúramo oñemombaʼeguasu ha ojerovia ijehénte. Koʼýte eñatende vaʼerã esegi hag̃ua neumílde oñemeʼẽrõ ndéve peteĩ priviléhio erekovetahápe autorida térã oĩvétaramo la ndekuaáva.

MBAʼÉICHAPA IKATU JASEGI ÑANEÑEʼẼRENDU PE AÑETEGUÁPE

10. ¿Máva mávarepa Jehová ojevaléma ogia hag̃ua ipuévlope?

¹⁰ Jasegíkena ñakonfia Jehová organisasión heʼívare. Yma Israel tiémpope Jehová ojevale vaʼekue Moisés rehe ha upéi Josuére omeʼẽ hag̃ua instruksión ipuévlope (Jos. 1:​16, 17). Entéro mbaʼe osẽ porã vaʼekue umi israelítape, haʼekuéra orrekonose aja umi kuimbaʼe haʼe hague Jehová rrepresentánte. Heta tiémpo upe rire, oñepyrũrõ guare oĩ pe kongregasión kristiána, umi 12 apóstol oñenkarga vaʼekue oporogia hag̃ua (Hech. 8:​14, 15). Upéi upe grúpo tuichave ohóvo ha oĩma pype umi ansiáno Jerusalenpegua. Umi kristiáno oheja vaʼekue koʼã kuimbaʼe ogia chupekuéra, “upéicha rupi umi kongregasión osegi ojerovia mbareteve ha káda día heta hetave hikuái” (Hech. 16:​4, 5). Ñane tiémpope avei Jehová  ñanevendesi jasegi jave umi instruksión omeʼẽva iñorganisasión. ¿Péro mbaʼéichapa oñeñandúta Jehová ndajarrespetáiramo umi haʼe omoĩvape ñandedirihi hag̃ua? Jaikuaa hag̃ua upéva, jahechamína la oiko vaʼekue umi israelítare oho aja hikuái pe Tiérra Prometídape.

11. ¿Mbaʼépa oiko vaʼekue yma umi oñemoĩ vaʼekuére Moisés kóntrape? (Ehecha pe taʼanga).

¹¹ Umi israelita oviaha hína kuri og̃uahẽ hag̃ua pe Tiérra Prometídape. Upeichahágui unos kuánto kuimbaʼe omanda guasúva odesafia Moiséspe, ha oñepyrũ oñeʼẽ vai hikuái pe rresponsavilida Jehová omeʼẽ vaʼekuére chupe. Haʼekuéra heʼi: “Enterovete israelita ningo hekopotĩ [ndahaʼéi Moisés añónte], ha Jehová oĩ ijapytepekuéra” (Núm. 16:​1-3). Siérto ningo la “enterovete israelita” hekopotĩ hague Jehovápe g̃uarã, péro haʼe oiporavo vaʼekue Moiséspe ogia hag̃ua ipuévlope (Núm. 16:28). Umi opuʼã vaʼekue Moisésre oñeʼẽ vaírõ guare hese, legálmente oñeʼẽ vai hína kuri Jehováre. Haʼekuéra oipota vaʼekue oñemeʼẽve chupekuéra autorida ha oñemombaʼeguasuve chupekuéra, ha oñepyrũ omotenondeve upéva la Jehová oipotáva rangue. Ñandejára ohundi vaʼekue umi ojerrevela vaʼekuépe ha enterove umi oapoja vaʼekuépe chupekuéra (Núm. 16:​30-35, 41, 49). Koʼág̃a avei Jehovápe ndogustaiete oĩramo ndorrespetáiva umi mbaʼe ojedesidíva iñorganisasiónpe.

12. ¿Mbaʼérepa ikatu jasegi ñakonfia Jehová organisasiónre?

¹² Ñande ñañehaʼã vaʼerã jasegi hag̃ua ñakonfia Jehová organisasiónre. Sapyʼánte ojehecha tekotevẽha ñakambiaʼimi ñantende lája álgo heʼíva la Biblia térã jajapo lája peteĩ mbaʼe Jehová servísiope. Péicha jave, umi ñandedirihíva ndokyhyjéi ojapo hag̃ua la kámbio oñekotevẽva (Prov. 4:18). Haʼekuéra ojapo upéva pórke ojaposeterei la Jehovápe ogustáva. Umi ñandegiáva ojasegura entéro mbaʼe odesidíva ojejapoha heʼiháicha Ñandejára Ñeʼẽ. Upépe ningo oĩ “umi enseñánsa iporãva oĩva  ehémploramo”, ha Jehová puévlo siémpre ojegia umívare.

13. ¿Mbaʼépa hína umi “enseñánsa iporãva oĩva ehémploramo”, ha mbaʼéichapa umíva ñanepytyvõta?

¹³ Jasegíkena “umi enseñánsa iporãva oĩva ehémploramo” (2 Tim. 1:13). “Umi enseñánsa iporãva oĩva ehémploramo” haʼe hína umi enseñánsa oúva Crístogui jatopáva Ñandejára Ñeʼẽme (Juan 17:17). Koʼã enseñánsa omopyenda hína entéro mbaʼe jagueroviáva. Jehová organisasión ñanemboʼe siémpre jajasegura hag̃ua entéro mbaʼe jagueroviáva nokontradesiriha koʼã enseñánsa porãitépe. Jajapo aja upéva, katuete jarresivíta heta vendisión.

14. ¿Mbaʼéichapa algúno kristiáno ou vaʼekue ndojegiavéi ‘umi enseñánsa iporãvare’?

¹⁴ ¿Mbaʼépa ikatu oiko ndajajegiavéirõ ‘umi enseñánsa iporãvare oĩva ehémploramo’? Jahechamína peteĩ mbaʼe oiko vaʼekue yma. Síglo primérope unos kuánto kristiáno oñepyrũ vaʼekue omombeʼu peteĩ mbaʼe ndasiértoiva. Haʼekuéra heʼi Jehová ára og̃uahẽma hague. Ikatu oime oĩ rakaʼe peteĩ kárta heʼíva upeichamaha, ha ojeʼe oskrivi hague apóstol Pablo. Ojaseguraʼỹre siértopa la ojeʼéva, oĩ kuri unos kuánto kristiáno Tesalónicape ogueroviaitéva la ojeʼéva ha omombeʼu jey katu ótrope. Noñembotavymoʼãi kuri chupekuéra la imanduʼárire hikuái apóstol Pablo omboʼe vaʼekuére oĩ aja hendivekuéra (2 Tes. 2:​1-5). Pablo oakonseha vaʼekue umi ermánope ani hag̃ua ogueroviapa rei la ohendúva upérupi. Ha oipytyvõ hag̃ua chupekuéra, opakuévo pe isegúnda kárta heʼi umi kristiáno Tesalonicapeguápe: “Che, Pablo, che porupiete askrivi ko salúdo. Péicha siémpre askrivi kompletoite umi che kartakuéra, peikuaa hag̃ua chete askrivi hague” (2 Tes. 3:17).

15. ¿Mbaʼépa ikatu jajapo ani hag̃ua jaguerovia umi japu haʼetévaicha voi la siértova? Emombeʼu peteĩ ehémplo (Ehecha pe taʼanga).

¹⁵ ¿Mbaʼépa ikatu ñaaprende la Pablo heʼi vaʼekuégui umi kristiáno Tesalonicaguápe? Ikatu sapyʼánte ñahendu álgo okontradesíva la ñande ñaaprende vaʼekue la Bíbliape, térã oñemombeʼu peteĩ istória osorprendetereíva enterovépente. Péicha jave tekotevẽterei ñanearandu ha ñapensa porã. Por ehémplo,  oĩrõ guare pe Unión Soviética, umi oñemoĩva Jehová puévlo kóntrape omog̃uahẽ umi ermánope peteĩ kárta oúva guaʼu pe sentrál mundiálgui. Upe kártape oñemokyreʼỹ umi ermánope omoñepyrũ hag̃ua peteĩ organisasión apartete. Haʼetévaicha voi ningo la siértova upe kárta heʼíva, péro nombotavýi hikuái umi ermáno ijerovia mbaretévape. Umi ermáno ohechakuaa upe kárta heʼíva okontradesiha la omboʼéva la Biblia. Koʼág̃arupi avei umi oñemoĩva pe añetegua kóntrape, sapyʼánte ikatu oipuru Internet térã umi rred sosiál ñanekonfundi ha ñandedividi hag̃ua. Ani hag̃ua pyaʼete ‘oñekambia ñandehegui ñapensa lája’, tekotevẽ ñaanalisa porã la ñahendúva térã la jaleéva. Upearã jajasegura vaʼerã nokontradesíripa hína umi enseñánsa porãite Jehová ñanemboʼe vaʼekue (2 Tes. 2:2; 1 Juan 4:1).

16. Heʼiháicha Romanos 16:​17, 18, ¿mbaʼépa jajapo vaʼerã oĩramo omosarambíva álgo ndasiértoiva?

¹⁶ Ñañemoag̃ui memékena umi ifiélvare Jehovápe. Ñandejára oipota jaservi chupe ñane ermanokuérandi en unida. Jajegiáramo umi enseñánsa verdadérare ikatúta jasegi unído ermanokuérandi. Oĩramo álgien omosarambíva umi informasión ndasiértoiva, ikatu oseparapa umi ermáno kongregasionpegua. Upévare Jehová heʼi ‘ndovaleiha jajeheʼa’ umichaguáre. Pórke ñañemoag̃uíramo hesekuéra, ikatu ñañepyrũ jarovia umi japu ha jajei pe añetegua rapégui (elee Romanos 16:​17, 18).

17. ¿Mbaʼépa jahupytýta jahechakuaárõ mbaʼépa hína la verda ha jajegiárõ upévare?

¹⁷ Jahechakuaávo mbaʼépa hína la verda ha jajegiáramo upévare, ñande jerovia siémpre imbaretéta ha jasegíta ñaĩ Jehová ykére (Efes. 4:​15, 16). Avei ndajagueroviamoʼãi umi enseñánsa ha japu Satanás omosarambíva ha ñaĩta segúro pórke Jehová okuidáta ñanderehe pe jehasa asy guasu aja. Upévare, jasegíkena ñaneñeʼẽrendu pe añeteguápe, ‘péicha Ñandejára omeʼẽva pyʼaguapy ñanevendesíta’ (Filip. 4:​8, 9).