1, 2. ¿Mbaʼeichagua invitasiónpa Jehová omeʼẽ isiervokuéra ifiélvape?

 PETEĨ persóna oporandúramo ndéve mbaʼépa Jehová ndéve g̃uarã, ¿mbaʼépa eréne chupe? Katuete eréta: “Jehová ningo che Jára, che Túa ha che amígo”. Ha ikatu voi ou ne akãme hetave mbaʼe ikatúva ere hese. Péro eñeporandumína, ¿ndépa eréne avei hese haʼeha pe “ogajára” nderresivíva hógape?

² Rréi David okompara vaʼekue pe amista Jehová orekóva isiervokuérandi, pe amista orekóvare peteĩ ogajára ivisitakuérandi. David oporandu vaʼekue voi: “Jehová, ¿mbaʼeichagua persónapa nde rerresivíta opyta hag̃ua nde rógape? ¿Máva piko ikatu oiko ne montáña sagrádape?” (Sal. 15:1). Koʼã versíkulo ohechauka Jehová ikatuha ñandeguereko hógape, upéva heʼise haʼe ikatuha ñandeguereko iñamígoramo. ¡Ajépa tuichaite mbaʼe upéva!

JEHOVÁ OIPOTA JAPYTA HÓGAPE

3. ¿Mávape raẽvetépa Jehová orresivi hógape ha mbaʼéichapa oñeñandu vaʼekue mokõivéva?

³ Jehová okrea mboyve mbaʼeve, oĩ vaʼekue haʼeñoite, péro upéi okrea Jesúspe. Upe guive haʼete ku Jehová oinvitáva Jesúspe opyta hag̃ua hendive hógape. La Biblia heʼi voi Jehová ovyʼaiterei hague Jesús reheve ha Jesús avei ‘ovyʼa oĩ haguére hendive’ (Prov. 8:30).

4. Ohasávo el tiémpo, ¿máva mávapepa Jehová oinvita avei opyta hag̃ua hógape?

⁴ Upéi Jehová okrea umi anhelkuérape ha oinvita avei chupekuéra  opyta hag̃ua hógape. Koʼã ánhel ningo haʼe avei ‘Ñandejára raʼy’ ha ovyʼa oĩvo Jehovándi (Job 38:​7, nóta; Dan. 7:10). Peteĩ tiémpore, Jehová oñamiga vaʼekue sólamente umi oikóvare hendive yvágape. Péro okrea rire yvyporakuérape, oñepyrũma avei oñamiga umi oadorávare chupe ko yvy ape ári. Péicha haʼete vaʼekue ku oinvitáva avei chupekuéra hógape. Por ehémplo, Enoc, Noé, Abrahán ha Job. Koʼã persónare ojeʼe vaʼekue haʼeha Ñandejára amígo térã oikoha “Ñandejára tee oipotaháicha” (Gén. 5:24; 6:9; Job 29:4; Is. 41:8).

5. ¿Mbaʼépa ikatu ñaaprende pe profesía oĩvagui Ezequiel 37:​26, 27-pe?

⁵ Amedída ohasa el tiémpo, Jehová osegi vaʼekue oinvita iñamigokuérape opyta hag̃ua hógape (elee Ezequiel 37:​26, 27). Por ehémplo, jalee rire ko profesía oĩva Ezequiélpe, jahechakuaa Jehová oñamigaseha umi oadorávare chupe. Haʼe opromete voi ojapotaha “peteĩ kompromíso de paz hendivekuéra”. Upéva ohechauka og̃uahẽtaha peteĩ tiémpo oĩtaha unído umi orekóva esperánsa oho hag̃ua yvágape ha umi opytátava ko yvy ape ári. Jehová ojapóta kuri chuguikuéra “peteĩ ovecha atýnte” (Juan 10:16). ¡Ha upéva oñekumpli hína koʼág̃a!

JEHOVÁ OKUIDA ÑANDEREHE ÑAIME ÑAIMEHÁPE

6. ¿Mbaʼépa ojapo vaʼerã peteĩ persóna opyta hag̃ua Jehová rógape ha moõpa oiko vaʼerã upearã?

⁶ La Biblia ojeskriviha tiémpope umi hénte oikómi óga kárpape. Upépe haʼekuéra oikémi opytuʼu hag̃ua térã oñemoʼã hag̃ua pe kuarahýgui ha pe amágui. Isensillomíramo jepe la hogakuéra koʼã persóna orresivi porã vaʼekue la ivisitakuérape ha okuida hesekuéra. Jehová upeichaite avei ojapo. Ñañemeʼẽ guive chupe haʼe ñaneinvita avei japyta hag̃ua hógape (Sal. 61:4). Ñaimévo Jehová rógape, haʼe omeʼẽ ñandéve hetaiterei mbaʼe ñamombarete hag̃ua ñande jerovia ha opermiti ñandéve jajeheʼa umi persóna haʼe oinvita vaʼekuére avei hógape. Entéro persóna, tahaʼe haʼéva la lugár oikoha, ikatu opyta Jehová rógape. Oiméramo rehóma raʼe ótro paíspe ha retopa ermanokuérare, por ehémplo peteĩ asambléa espesiálpe, katuete rehechakuaáne raʼe haʼekuéra ovyʼaitereiha oĩ haguére avei Jehová rógape. Jaservíramo Jehovápe fiélmente, haʼe ñaneinvita ñaĩ hag̃ua hógape, tahaʼe haʼéva la lugár jaikoha (Apoc. 21:3).

7. ¿Mbaʼérepa ikatu jaʼe Jehová siervokuéra omanóma vaʼekue oĩtiha Jehová rógape? (Ehecha pe taʼanga).

⁷ ¿Ha mbaʼépa ikatu jaʼe Jehová siervokuéra  omanóma vaʼekuére? ¿Ikatúnepa jaʼe haʼekuéra oĩtiha Jehová rógape? Si, ¿mbaʼérepa jaʼe upéva? Jehovápe g̃uarã haʼekuéra haʼete ku oikovéva gueteri pórke haʼe imanduʼa porãiterei hesekuéra. Jesús heʼi vaʼekue voi: “Umi omano vaʼekue oikove jeytaha, Moisés heʼíma vaʼekue voi upéva imanduʼárõ guare pe rreláto oiko vaʼekuére pe yvyramataʼi hatĩmbáva ypýpe. Upérõ Moisés heʼi Jehováre haʼeha ‘Abrahán, Isaac ha Jacob Jára’. Upéicharõ, haʼe hína umi persóna oikovéva Jára, ndahaʼéi umi omano vaʼekue Jára. Ñandejárape g̃uarã enterove haʼekuéra oikove gueteri” (Luc. 20:​37, 38).

UMI VENDISIÓN HA RRESPONSAVILIDA JAREKÓVA JEHOVÁ RÓGAPE

8. ¿Mbaʼe vendisiónpa ohupyty Jehová amigokuéra oĩ rupi hógape?

⁸ Ñaĩmévo ñande rógape ikatu japytuʼu ha ñañemoʼã pe kuarahy akúgui térã amágui. Ha ñaimévo Jehová rógape, haʼe ikatu avei okuida ñanderehe ikatu hag̃uáicha jasegi jaiko iñamígoramo ha ani hag̃ua japerde la esperánsa. Japytáramo Jehová ykére, Satanás ndaikatumoʼãi ojapo mbaʼeve ñandeperhudikátava pára siémpre (Sal. 31:23; 1 Juan 3:8). Pe múndo pyahúpe Jehová osegíta okuida iñamigokuérare, osegi hag̃ua oiko iñamígoramo ha ani hag̃ua omano (Apoc. 21:4).

9. ¿Mbaʼépa Jehová ohaʼarõ ojapo umi oĩva hógape?

⁹ Jaʼéma haguéicha Jehová ñaneinvita hógape pórke ñanderekose iñamígoramo. Upéva ningo peteĩ invitasión ndaijojaháiva, ¿ajépa? ¿Péro mbaʼépa jajapo vaʼerã jasegi hag̃ua japyta Jehová rógape? Epensamíntena, peteĩ persóna neinvitáramo hógape, katuete reikuaaséta mbaʼépa ogusta térã ndogustái chupe. Por ehémplo, peteĩ persóna neinvitáramo rehasa hag̃ua hógape, upéva ndeʼiséi ikatumaha eike entéro umi ótro kotýpe. Upéicha avei, ñaimévo Jehová rógape, iñimportánte jaikuaa mbaʼéichapa haʼe oipota ñañekomporta. Jahayhúramo Jehovápe jajaposéta opa ikatúva haʼe ‘ñandeguerohory hag̃ua entéro mbaʼépe’ (Col. 1:10). Jehová ñane amígo, péro haʼe ñande Jára ha ñande Túa avei. Upévare haʼe omerese jarrespeta chupe (Sal. 25:14). Aníkena ñanderesarái upévagui, upéicha siémpre jarrespetáta chupe ñande pyʼaite guive. Avei ndajajaposemoʼãi mbaʼeve omoñeñandu vaítava chupe. Upéva rangue siémpre ‘ñaneumíldeta jaguatávo Ñandejára ndive’ (Miq. 6:8).

JEHOVÁ OTRATA PETEĨCHAPA UMI ISRAELÍTAPE

10, 11. ¿Mbaʼépa ohechauka Jehová otrata hague peteĩchapa umi israelítape pe desiérto de Sinaípe?

¹⁰ Jehová otrata peteĩchapa umi persóna oinvitávape hógape (Rom. 2:11). Ñantende porãve hag̃ua upéva ikatu ñaanalisa mbaʼéichapa haʼe otrata vaʼekue umi israelítape pe desiérto de Sinaípe.

¹¹ Jehová olivera rire ipuévlope Egíptogui, oasigna vaʼekue unos kuántope oservi hag̃ua de saserdóte pe tavernákulope. Oñeasigna vaʼekue avei umi levítape ojapo hag̃ua umi tembiapo oñekotevẽva pe tavernákulope. Péro ñapensamíntena, ¿Jehovápa okuida porãve rakaʼe umi saserdóte ha umi levítare oiko haguérente ag̃ui pe tavernákulogui? ¡Nahániri! Jehová peteĩchapa okuida vaʼekue enterovévare.

12. ¿Mbaʼépa ñanepytyvõ jahechakuaa hag̃ua Jehová oporotrataha peteĩchapa? (Éxodo 40:38). (Ehecha pe taʼanga).

¹² Jehová omeʼẽ vaʼekue enterove israelítape pe oportunida oñamiga hag̃ua hese. Haʼe ndorekói vaʼekue enkuénta mbaʼe asignasiónpa oreko hikuái térã oikópa ag̃ui térã mombyry pe tavernákulogui. Por ehémplo, Jehová  ojasegura vaʼekue enterove umi israelita ikatutaha ohecha pe arai ha pe tatarendy oĩva pe tavernákulo ári (elee Éxodo 40:38). Ha ohecháre hikuái pe arai okuʼeha haʼekuéra ikatúma vaʼekue ombyaty la ikosakuéra, odesarma pe hóga kárpa ha oñepyrũma oviaha pe puévlondi. Umi oiko mombyryvéva jepe pe tavernákulogui ikatu vaʼekue ohecha pe arai okuʼeha (Núm. 9:​15-23). Enterovéva ikatu vaʼekue avei ohendu umi mokõi trompéta de pláta ipu jave. Péicha oikuaa vaʼekue hikuái ojepreparáma vaʼerãha okontinua hag̃ua iviáhe (Núm. 10:2). Jahechaháicha, enterovéva umi israelita ikatu vaʼekue oñamiga Jehováre, tahaʼe umi oikóva ag̃ui pe tavernákulogui térã mombyry chugui. Jehová ningo enterovévape oinvita vaʼekue opyta hag̃ua hógape ha la iñinvitadokuéra oikuaa vaʼekue haʼe ogia ha oprotehetaha chupekuéra. Upeichaite avei koʼág̃arupi, tahaʼe haʼéva la lugár jaikoha, Jehová lomímonte ikatu ohechauka ñanderayhuha ha okuidaha ñanderehe.

KOʼAG̃AITE PEVE JEHOVÁ OPOROTRATA PETEĨCHAPA

13. ¿Mbaʼéichapa Jehová ohechauka koʼág̃arupi otrataha enterovépe peteĩchapa?

¹³ Koʼág̃arupi oĩ heta ermáno ha ermána oikóva ag̃ui pe sentrál mundiálgui térã peteĩ sukursálgui, ha algúno katu ombaʼapo voi upépe. Upéicha rupi, ndahasýi chupekuéra g̃uarã oipytyvõ hag̃ua umi mbaʼe ojejapóvape koʼã lugárpe. Avei oreko hikuái oportunida oñamiga hag̃ua umi ermáno odirihívare ñane rembiapo ko yvy ape ári. Oĩ avei heta oservíva Jehovápe de tiémpo kompléto espesiál, por ehémplo umi superintendénte de sirkuíto. Péro jaikuaaháicha, ndahetái oĩ la orekóva koʼãichagua oportunida. Oiméramo nde ndereguerekói koʼãichagua priviléhio, aníkena nderesarái Jehová ohayhuha entéro umi oinvita vaʼekuépe hógape. Ha haʼe ni peteĩvape nomboykéi, oñeinteresa guei káda únore (1 Ped. 5:7). Jehová ningo ogia ha oprotehe ipuévlo kompletoitépe ha avavépe nombofaltamoʼãi  umi mbaʼe oikotevẽva oñemoag̃ui hag̃ua hese.

14. ¿Mbaʼépa ohechauka avei Jehová otrataha enterovépe peteĩchapa?

¹⁴ ¿Mbaʼépa ohechauka avei Jehová otrataha enterovépe peteĩchapa? Haʼe ningo ojasegura entéro persóna oĩva ko yvy ape ári tontende la Biblia heʼíva. Ñandejára Ñeʼẽ ningo ojeskrivi vaʼekue mbohapy idiómape: hebreo, arameo ha griego. Koʼág̃arupi, oĩramo jepe la ikatúva olee la Biblia koʼã idiómape, ¿heʼisépa upéva haʼekuéra ikatuha oñemoag̃ui porãve Jehováre? Nahániri, ndahaʼéi upéicha (Mat. 11:25).

15. ¿Mbaʼérepa ikatu jaʼe Jehová nomboykeiha avavépe? (Ehecha pe taʼanga).

¹⁵ Jehová ñandeguerohory hag̃ua, natekotevẽi ñandeestúdio porã ni jaikuaa umi idióma ojeskrivi haguépe la Biblia. Haʼe ningo ndoipurúi Iñeʼẽ omoarandu hag̃ua umi ijestúdio porãvapente, síno omoarandu hag̃ua enterovépe, tahaʼe jepe raʼe umi ijestudioʼívape. La Biblia ningo ojetradusíma hetaiterei idiómape, upévare entéro persóna oĩva ko yvy ape ári ikatu oikuaa la Biblia omboʼéva ha oñamiga Jehováre (2 Tim. 3:​16, 17).

EÑEHAʼÃKENA JEHOVÁ TANDEGUEROHORY SIÉMPRE

16. ¿Mbaʼépa jajapo vaʼerã Jehová osegi hag̃ua ñandeguerohory? (Hechos 10:​34, 35).

¹⁶ ¿Mbaʼépa repensa Jehová neinvita haguére repyta hag̃ua hógape? ¡Ajépa tuichaite mbaʼe upéva! Haʼe ningo pe ivuenovéva, oporohayhuvéva ha pe imbaʼeporãvéva. Jehová ñanderresivi hógape tahaʼe haʼéva pe lugár jaikoha. Haʼe ndorekói enkuénta mbaʼépa jajapo vaʼekue ymave, mbaʼeichagua estúdio jareko, ñande pire kolór, ñandeeda ni ñandépa kuña térã kuimbaʼe. Sólamente oreko enkuénta ñaneñeʼẽrendúpa chupe (elee Hechos 10:​34, 35).

17. ¿Moõpa oñemombeʼuve ñandéve mbaʼépa jajapo vaʼerã japyta hag̃ua Jehová rógape?

¹⁷ Salmo 15:​1-pe, David oporandu vaʼekue: “Jehová, ¿mbaʼeichagua persónapa nde rerresivíta opyta hag̃ua nde rógape? ¿Máva piko ikatu oiko ne montáña sagrádape?”. Jehová ojevale vaʼekue David rehe orresponde hag̃ua koʼã porandu pe Salmo 15-pe. Upévare pe artíkulo oúvape jahecháta mbaʼe mbaʼépa jajapo vaʼerã ikatu hag̃uáicha Jehová osegi ñandeguerohory.