Che anase vaʼekue el 22 de diciembre de 1929-pe, peteĩ lugár héravape Noville. Péva haʼe vaʼekue peteĩ komunida oĩháme 9 gránha, pe siuda de Bastoña ypýpe. Upe sónape oñehenói las Ardenas, opytáva Bélgicape. Chemitãme ore roreko vaʼekue peteĩ gránha ha koʼag̃aite peve avyʼa chemanduʼávo umi mbaʼe rohasa vaʼekuére upépe che tuakuérandi. Che ermáno imitãvéva héra Raymond ha hendive roñamími vaʼerã umi vaka ha roipytyvõ che tuakuérape kokuépe. Ore komunidápe enterovéva rojogueraha porã vaʼekue. Upévare oĩrõ álgien oikotevẽva, pyaʼe rokuʼe roñopytyvõ hag̃ua.

Che tuakuéra, hérava Emile ha Alice, katóliko vaʼekue. Haʼekuéra ohómi misahápe káda domingo. Péro áño 1939 rupi og̃uahẽ oúvo pe roikohápe unos kuánto prekursór. Haʼekuéra ou kuri Inglatérragui ha oporandu che túape noñanotaséipa orresivi hag̃ua pe rrevísta Consolación (koʼág̃a haʼéva rrevísta ¡Pepáyke!). Che túa oleévo umi rrevísta pyaʼe voi opilláma siertoha la heʼíva, upévare oñepyrũma olee ibíblia ha ndohovéima misahápe. Upéi umi ore vesíno ikalidaite vaʼekue oñepyrũmi oñemoĩ mbarete che túare. Haʼekuéra ojopy che túape osegi hag̃ua kómo katóliko. Upévare heta vése ojodiskuti hikuái hendive.

Ambyasyeterei kuri ahechávo mbaʼeichaitépa ojopy hikuái che túape. Upévare la ajerure asy kuri Ñandejárape toipytyvõmi chupe ha upérõ guare la añemboʼe kuri Ñandejárape, amombeʼu haguéicha peẽme iñepyrũme. Upéi saʼi saʼípe umi ore vesinokuéra ndojopyvéima papápe. Upéva chembovyʼaiterei ha ohechauka porã chéve Jehová haʼeha pe ohendúva “umi hénte ñemboʼe”.

El 10 de mayo de 1940, umi nazi oike Bélgicape. Upévare hetaiterei hénte osẽmante pe paísgui. Ore rosẽ avei Bélgicagui ha roho sur gotyo Fránciape. Rohokuévo heta vése rojapeligra kuri pórke rohasámante  vaʼerã umi lugár oñorairõhárupi hína umi soldádo alemán ha francés.

Roju jeýrõ guare ore gránhape ropilla heta mbaʼe oñemonda hague orehegui. Ore rymba jagua Bobi añoite la oĩ vaʼekue upépe orerresivi hag̃ua. Ahasa rire entéro koʼã mbaʼe añeporandu vaʼekue: “¿Mbaʼéreiko oĩ gérra ha hetaite sufrimiénto?”.

Upe épokape tuichaiterei oremokyreʼỹ vaʼekue peteĩ ansiáno ha prekursór hérava Emile Schrantz. a Haʼe oexplika porã oréve mbaʼérepa oĩ hetaite sufrimiénto ha orresponde avei chéve hetave mbaʼe aikuaase vaʼekue. Péicha añepyrũ vaʼekue añemoag̃uive Jehováre ha ahechakuaa haʼe ñanderayhuetereiha.

Pe gérra opa mboyvéma voi, che família ojeheʼavéma umi ermánore. Ha agosto de 1943-pe ermáno José-Nicolas Minet ou ore gránhape ojapo peteĩ diskúrso. Upérõ haʼe oporandu: “¿Mávapa ojevautisase?”. Che túa ha che rohupi la ore po. Upérõ rojevautisa peteĩ rrioʼi oĩvape ore gránha ypýpe.

Upéi diciembre de 1944-pe pe ehérsito alemán ojapo pe hiʼúltimo atáke imbaretevéva ojapo vaʼekue pe segunda gérra mundiál aja. Upe atáke ifamóso voi ha oñehenói chupe “batalla de las Ardenas”. Ore roiko rupi ag̃ui pe oikohágui upe ñorairõ, tekotevẽmante rokañy 1 mes rupi ore róga sótanope. Peteĩ día asẽ amongaru hag̃ua umi ore rymbakuéra ha hoʼami peteĩ bómba pe lugár okehápe hikuái, omboveve ningo pe técho. Namombyryiete chehegui oĩ kuri peteĩ soldádo americano ha haʼe osapukái chéve: “¡Ejeity yvýpe!”. Ha che adipara aha ijypýpe añemombo pe yvýpe ha haʼe omoĩ che akã ári pe ikásko cheprotehe hag̃ua.

Pe gérra rire ikatúma kuri rojeheʼa meme umi ermáno oĩvare peteĩ kongregasión pe siuda de Liéjape, opytáva 90 kilometrokuéra ore rógagui. Tiémpo rire, rorekóma avei kuri peteĩ grúpo pe ore roikohápe Bastóñape. Upéi añepyrũ ambaʼapo pe lugár ojekovrahápe umi impuésto, ha upérõ avei añepyrũ kuri astudia derécho. Tiémpo rire ambaʼapo kuri de sekretário peteĩ eskrivánondi. Áño 1951-pe roorganisa kuri peteĩ aty guasu un diagua Bastóñape ha upérõ oho voi 100 persónarupi. Umíva apytépe peteĩ prekursóra iguapaitereíva hérava Elly Reuter. Haʼe oviaha vaʼekue 50 kilómetro visikléta ári ou hag̃ua pe aty guasúpe. Ensegída voi rojoayhueterei ko ermánandi ha roñekompromete  romenda hag̃ua. Upérõ guare chupe oñeinvita kuri oho hag̃ua pe eskuéla de Galaádpe, Estados Unídospe. Péro haʼe oskrivímante pe sentrál mundiálpe ha oexplika ndaikatumoʼãiha oasepta pe invitasión. Upe tiémpope ermáno Knorr kuri la ogiáva ñane organisasión ha haʼe orresponde chupe amo gotyove ikatuha hína oho pe eskuéla de Galaádpe iménandi. Upéi romenda febrero de 1953-pe.

Upe áñope voi Elly ha che roho pe asambléa héravape “Sociedad del Nuevo Mundo”, ojejapo vaʼekue Nueva Yórkpe, pe estádio de los Yánkeespe. Roĩ aja upépe aikuaa peteĩ ermánope. Haʼe heʼi chéve omeʼẽtaha chéve peteĩ traváho agana porãtahápe. Péro upearã ava vaʼerã Estados Unídospe. Roñemboʼe Jehovápe upe témare ha upéi Elly ha che rodesidi ndoroaseptamoʼãiha upe traváho. Péicha ikatu jeýta roho Bélgicape, Bastóñape roapoja hag̃ua peteĩ grúpo oĩháme 10 puvlikadór rupi. Al ótro áño Jehová tuichaiterei orevendesimi ha che rembireko ou hyeguasu. Péicha onase che raʼyʼi Serge. Rombyasyetereíramo jepe, 7 mése upe rire haʼe ou hasyete ha omano orehegui. Upérõ yvýre ropyta ha heta roñemboʼe Jehovápe. Péicha haʼe oremombarete ha omeʼẽ oréve esperánsa pórke roikuaa ore família orresusita jeytaha.

Octubre de 1961-pe akonsegi kuri peteĩ traváho ndoʼupáiva chehegui che tiémpo. Péicha ikatu kuri amoñepyrũ che prekursorádo. Upe diaitépe voi cherenoimi pe siérvo de sukursál Belgicapegua ha oporandu chéve ndaserviséipa kómo siérvo de sirkuíto (koʼág̃a oñehenóiva superintendénte de sirkuíto). Upéi che aporandu chupe: “¿Ndaikatuichéne piko rojapo raẽ la ore prekursorádo?”. Ha ojeʼe chéve ikatuha. Upémarõ roservi de prekursór 8 mésere ha upéi roñepyrũ roservi pe sirkuítope septiembre de 1962-pe.

Dos áño upe rire, roñeinvita rombaʼapo hag̃ua Betélpe, Brusélaspe, ha upépe roñepyrũ roservi octubre de 1964-pe. Upe asignasiónpe rorresivimi hetaiterei vendisión. Áño 1965-pe ermáno Knorr ovisita Betel de Bélgica ha tuichaiterei añesorprende pórke upe riremi añenombra siérvo de sukursál. Upéi Elly ha che roñeinvita roho hag̃ua pe kláse 41 de Galaádpe. Péicha oñekumpli la ermáno Knorr heʼi vaʼekue 13 áño upe mboyve. Rojegradua rire pe eskuéla de Galaádpe, roju jey Betel de Bélgicape.

Astudia haguére derécho, heta áñorema ikatu aipytyvõ Jehová siervokuérape odefende hag̃ua pe derécho legál orekóva oadora hag̃ua chupe, tahaʼe jepe raʼe Európape térã oimehápe (Filip. 1:7). Ambaʼapo rupi péicha, añemongetáma heta autoridándi oĩva umi país ojeproivihápe ñane rembiapo. Upévare añeʼẽma umi autorida oĩvandi mas de 55 paíspe. Haʼe rangue umi autoridápe umi mbaʼe aikuaáva umi léigui, añepresentávo chupekuéra haʼe: “Che hína Ñandejára siérvo”. Che siémpre aheja Jehová tachegia koʼã situasiónpe, pórke che aikuaa porã pe rréi ha hués ‘korasõ haʼeteha ysyry oĩva Jehová pópe ha odirihíva haʼe oipotaha gotyo’ (Prov. 21:1).

Por ehémplo oĩ peteĩ mbaʼe ahasa vaʼekue núnka ndacheresaráiriva. Peteĩ jey tekotevẽ vaʼekue  añemongeta peteĩ oĩvandi pe parlaménto européope. Hetaiterei vése ajerure añemongeta hag̃ua pe karaíndi, péro hasypeterei akonsegi. Haʼe primeroite voi heʼi chéve: “Cinco minútonte ameʼẽ ndéve”. Upépe añakãity ha añepyrũ añemboʼe. Haʼe omaña porã cherehe pórke nontendéi la oikóva ha oporandu chéve: “¿Mbaʼéiko la ejapóva?”. Upépe che amaña hese ha haʼe: “Aagradese hína Ñandejárape pórke nde ningo isirviénte”. Ha haʼe heʼi chéve: “¿Mbaʼe la ereséva?”. Upépe ahechauka chupe Romanos 13:4. Upe karai oñesorprende ahechauka haguére chupe peteĩ téxto pórke haʼe protestánte raʼe. Upéi ropyta roñemongeta média órare voi ha igustoiterei la ore rreunión. Heta mbaʼe porã rokonsegi ha upéva ári, haʼe osẽ heʼi chéve orrespeta ha omombaʼetereiha pe tembiapo ojapóva umi testígo de Jehová.

Heta áñorema Jehová siervokuéra oĩva Európape oñepresenta umi trivunál renondépe odefende hag̃ua umi derécho orekóva. Por ehémplo oĩ jave oipeʼaséva chuguikuéra ifamília, okreáva chupekuéra provléma umi impuéstore, ndojaposéi haguére pe servísio militár, noñentremetéi haguére polítikare térã hetave mbaʼére. Che avyʼaiterei ikatu haguére che resa teérupi ahecha mbaʼéichapa Jehová oipytyvõ isiervokuérape ogana hag̃ua koʼã káso. Umi testígo de Jehová oganáma mas de 140 káso pe Tribunal Europeo de Derechos Humánospe.

Cúbape umi Testígo ndaikatúi vaʼekue oservi Jehovápe lívremente. Péro áño 1990 rupi, ambaʼapo ermáno Philip Brumley, pe sentrál mundialpegua ha ermáno Valter Farneti ndive, Italiapegua. Ore heta rombaʼapo roipytyvõ hag̃ua koʼã ermánope. Che amondo peteĩ kárta pe embaháda cubana oĩvape Bélgicape ikatu hag̃uáicha aha añemongeta pe enkargádo oĩvandi upépe. Ore roñemongeta porãse kuri hendive, pórke oĩ rupi heta mbaʼe noñentendeporãivante la umi ermáno Cubapegua ndaikatúi oservi lívremente Jehovápe. Heta vése roñerreuni, péro ñepyrũrã norokonsegíri mbaʼeve.

Upéi roñemboʼe Jehovápe ha rojerure permíso romondo hag̃ua 5.000 Biblia umi ermáno oĩvape Cúbape. Umi Biblia og̃uahẽ ha ojerrepartipaite umi ermánope. Péva ohechauka oréve Jehová ovendesiha hína umi mbaʼe rojapóva. Upéi rojerure jey la permíso péro koʼág̃a romondoséma 27.500 Biblia. Ha oñemeʼẽ jey oréve la permíso. Péicha enterove ermáno ha ermána oĩva Cúbape orekótama kuri káda uno la ibibliarã. Upéva chembovyʼaiterei kuri.

Heta vése aha vaʼekue Cúbape ha saʼi saʼípe oñesolusiona kuri ohóvo umi provléma legál orekóva umi Testígo. Ha péicha aviaha rupi heta vése upe paíspe, amo ipahápe ajogueraha porãma umi ombaʼapóvandi pe goviérnope.

Áño 1994-pe ivaieterei kuri la situasión Ruándape, pórke oĩ kuri hetaiterei ivioléntova ha ojukáva umi oĩvape pe trívu tútsipe. Upérõ guare ojejuka mas de 1 millón persónape. Ñambyasýramo jepe umíva apytépe ojejuka avei kuri unos kuánto ñane ermáno ha ermánape. Péro pyaʼe voi oñeasigna unos kuánto ermánope oraha hag̃ua la oñekotevẽtava oñepytyvõ hag̃ua umi ermánope upe paíspe.

Rog̃uahẽrõ guare umi ermánondi pe kapitálpe, Kigálipe, rotopami pe ofisína de traduksión ha pe depósito oñeñongatuha umi puvlikasión oñembopara hague válape. Upéi umi ermáno omombeʼu oréve oĩ hague ermáno ha ermána ojejuka vaʼekue machétepe. Péro omombeʼu avei oréve mbaʼeichaitépa umi ermáno ohechauka ojoayhuha. Por ehémplo, rojotopa kuri peteĩ ermáno pe trívu tutsipeguándi ojesalva vaʼekue pórke oipytyvõ chupe peteĩ família pe trívu hutupegua okañy hag̃ua peteĩ yvykuápe 28 díare. Upéi rojapo Kigálipe peteĩ rreunión rokonsola hag̃ua umi mas de 900 ermáno ha ermána oĩ vaʼekuépe upépe.

Upéi rohasa Záirepe (haʼéva koʼág̃a República Democrática del Congo). Roho roheka umi ermánope umi kámpo de rrefuhiádope pe siuda de Goma ypýpe, pórke oĩ hetaiterei okañy vaʼekue Ruándagui. Umíva oĩ kuri pe siuda de Goma ypýpe. Ñepyrũrã ndorotopái umi ermánore. Upémarõ roñemboʼe Jehovápe orepytyvõmi hag̃ua rotopa hag̃ua hesekuéra. Upéi ou sapyʼa peteĩ persóna ore ládo ha roporandu chupe oikuaápa algún testígo de Jehovápe ha haʼe heʼi oréve haʼe haʼeha Testígo. Upéi heʼi avei oreguerahataha oĩháme umi ermáno pe Komite de Sokorropegua. Roñembyaty umi ermáno oĩvandi pe komitépe ha heta roñomokyreʼỹ. Upéi rojapo peteĩ rreunión umi 1.600 rrefuhiádo oĩvandi upépe, ikatu hag̃uáicha romokyreʼỹ ha rokonsola chupekuéra. Rolee peteĩ kárta omondóva chupekuéra pe Kuérpo Governánte ha upéva opokoiterei hesekuéra. Peteĩ pártepe pe kárta heʼi: “Ore roñemboʼe meme penderehe ha roĩ segúro Jehová napenderejareimoʼãiha”. Ha siertoite ningo la heʼi vaʼekue pe Kuérpo Governánte pórke koʼág̃a g̃uarã, oĩma mas de 30.000 Testígo Ruándape vyʼápe oservíva Jehovápe.

Roĩ rire oñondive haimete 58 áñore, 2011-pe omano chehegui Elly, che rembireko ahayhuetéva. Heta vése añemboʼe Jehovápe amombeʼupaite hag̃ua chupe mbaʼéichapa añeñandu ha haʼe siémpre chekonsola. Avei tuichaiterei chekonsola añeʼẽ jave che vesinokuérandi umi notísia porã oñeʼẽvare Ñandejára Rréinore.

Koʼág̃a arekóramo jepe mas de 90 áño, che asegi gueteri apredika káda semána. Ha avyʼaiterei avei ikatu haguére aipytyvõ pe Departamento de Asuntos Legálespe ko sukursál de Bélgicape. Péicha ikatu akomparti hendivekuéra umi mbaʼe ahasáma vaʼekue ha ikatu avei amokyreʼỹ umi betelita imitãvévape.

Ojapóma ningo 84 áñorupi primera ves añemboʼe hague Jehovápe. Upe guive amoñepyrũ Jehovándi peteĩ amista iporãitereíva ha amáske aha hese añandu añemoag̃uiveha che Járare. Aagradeseterei ningo Jehovápe haʼe siémpre ohendu haguére che ñemboʼe (Sal. 66:19). b