Oñeporandúva jepi
Salmo 12:7 heʼi: “Nde reñangarekóta hesekuéra”, ¿mbaʼérepa ikatu jaʼe upépe oñeñeʼẽha umi ‘iñinoséntevare’ (versíkulo 5)?
Umi ótro versíkulo oĩva ko kapítulope ontendeka oñeñeʼẽha umi héntere.
Salmo 12:1-4-pe primerorã heʼi ‘ndaiporiveimaha ni peteĩ persóna ikatúvare ñakonfia’. Koʼág̃a jahechami la heʼíva Salmo 12:5-7:
“Péro Jehová heʼi: ‘Umi iñinoséntevape oñemaltrata,
umi imboriahúva osufri,
upévare che aipytyvõta chupekuéra.
Che aipeʼáta chupekuéra umi hénte aña poguýgui’.
Jehová ñeʼẽ iporã ha ipotĩ,
ojogua pe pláta oñerrefináva tatakuápe, oñemopotĩva 7 vése.
Jehová, nde reñangarekóta hesekuéra.
Nde reprotehéta káda únope ko henerasión guive ha resegíta reprotehe chupekuéra opa árare”.
Versíkulo 5 ohechauka mbaʼépa Ñandejára ojapóta umi ‘iñinosénteva’ rehehápe: ‘Oipeʼáta chupekuéra umi hénte aña poguýgui’.
Versíkulo 6 heʼi ‘Jehová ñeʼẽ iporã ha ipotĩha ha ojoguaha pe pláta oñerrefinávape’. Entéro kristiáno ñapensa añete péicha Jehová ñeʼẽre (Sal. 18:30; 119:140).
Koʼág̃a jarekomi enkuénta la heʼíva Salmo 12:7: “Jehová, nde reñangarekóta hesekuéra. Nde reprotehéta káda únope ko henerasión guive ha resegíta reprotehe chupekuéra opa árare”.
Versíkulo 6-pe oñeñeʼẽ rupi ‘Jehová ñeʼẽre’, heta traduksión ontendeka versíkulo 7 heʼiseha Ñandejára oñangarekoha iñeʼẽre. Ha legálmente Ñandejára hetáma okuida la Bíbliare umi iñenemigokuéragui, pórke haʼekuéra oñehaʼã oproivi ha ohundi Ñandejára Ñeʼẽ (Is. 40:8; 1 Ped. 1:25).
Péro avei siérto hína la heʼíva versíkulo 5. Jehová hetáma oipytyvõ ha osalva umi ‘iñinosénteva oñemaltratávape’, ha osegíta ojapo upéva (Job 36:15; Sal. 6:4; 31:1, 2; 54:7; 145:20).
Péro, ¿mbaʼe rehepa legálmente oñeñeʼẽ versíkulo 7-pe?
Ñaanalisa porãvo ko Salmo ikatu ñantende oñeʼẽha hína umi héntere.
Salmo 12:1 omombeʼu oĩha hénte ombotavýva umi oservívape Jehovápe fiélmente. Upéi ojeʼe Ñandejára ndohejareimoʼãiha umi oikóvape oporombotavy. Ko Salmo oasegura ñandéve Jehová oipytyvõtaha isiervokuérape pórke ‘iñeʼẽ iporã ha ipotĩ’.
Upévare jaʼekuaa pe versíkulo 7 heʼívo Jehová ‘oñangarekoha hesekuéra ha oproteheha káda únope’, oñeñeʼẽha umi hénte ‘iñinosénteva oñemaltratávare’.
Jaleéramo ko versíkulo umi kópia hebrea yma guarépe jahechakuaáta avei upépe oñeñeʼẽha umi persónare. Avei ko versíkulo ojetradusi ypýrõ guare griégope, 2 vése ojepuru pe palávra “orerehe” ha péicha ohechauka oñeñeʼẽha umi ‘iñinosénteva oñemaltratávare’. Avei versíkulo 7 heʼi ‘ko henerasión guive’ Jehová oprotehetaha ‘káda uno’ umi iñinoséntevape oĩ rupi umi hénte iñañáva (Sal. 12:7, 8). Peteĩ traduksión idióma araméope versíkulo 7-pe heʼi péicha: “SEÑÓR, nde reprotehéta umi ihústovape, nde reñangarekóta hesekuéra umi hénte añágui koʼág̃a guive ha pára siémpre”. Koʼã traduksión omeʼẽ ñandéve hetave pruéva ohechaukáva Salmo 12:7-pe noñeñeʼẽiha ‘Jehová ñeʼẽre’.
Entéro koʼã mbaʼére ikatu jaʼe ko Sálmope ojeaseguraha ñandéve Ñandejára oñangarekotaha umi ‘iñinoséntevare’.
