1. ¿Mbaʼeichagua vendisiónpa jahupyty ñaime haguére Jehová organisasiónpe?

 AJÉPA tuichaite mbaʼe ikatu haguére ñaime Jehová organisasiónpe koʼã ára pahápe. Amás día ko múndope ivaive la situasión, péro Jehová rupive ñande jareko ñane ermáno ha ermanakuéra oĩva ñanepytyvõ hag̃uáicha (Sal. 133:1). Jehová omeʼẽ voi ñandéve pe gía ñaikotevẽva jaiko hag̃ua vyʼápe ñane famíliandi (Efes. 5:33–6:1). Avei haʼe ñanemoarandu ikatu hag̃uáicha jareko pe trankilida ha jaiko vyʼápe.

2. ¿Mbaʼépa tekotevẽ jajapo ha mbaʼérepa?

² Upéicharõ jepe ñañehaʼãmbaite vaʼerã ani hag̃ua ñañentrega ha jasegi hag̃ua jaservi Jehovápe ñande pyʼaite guive. ¿Mbaʼérepa? Pórke sapyʼánte ikatu ñanembopochy la ótro heʼi ha ojapóva. Ikatu avei ñañedesanima ñande voi jajavy jave, koʼýte jafalla jey jeýramo la mísma kósape. Ko artíkulo ñanepytyvõta jasegi hag̃ua jaservi Jehovápe koʼã situasiónpe: 1) Peteĩ ermáno ñaneofende jave, 2) ñane ména térã ñane rembireko ñanedesepsiona jave, ha 3) ñañedesepsiona jave ñandejehegui voi jajavy haguére. Ko artíkulope ñaanalisáta káda káso. Avei jahecháta mbaʼépa ikatu ñaaprende unos kuánto ehémplo bíblicogui.

ÑANEOFENDE JAVE PETEĨ ERMÁNO TÉRÃ ERMÁNA

3. ¿Mbaʼe situasión ijetuʼúvapa ombohovái jepi Jehová siervokuéra?

³ Situasión ijetuʼúva. Sapyʼánte peteĩ ermáno lája ikatu ñanemorrenega. Ótro ikatu ojapo térã heʼi álgo ñanembopochýva térã nañandetrataporãi. Sapyʼánte umi ansianokuéra avei ojavy. Koʼã provléma káusare ikatu oĩ oñepyrũva oduda Jehová organisasióngui. Ha osegi rangue oservi Jehovápe ermanokuérandi “peteĩ ñeʼẽme”, ikatu odesidi noñeʼẽvéinte umi ombopochy vaʼekuéndi chupekuéra térã ndohovéinte rreunionhápe (Sof. 3:9). ¿Péro oĩ porãpa upéva? Jahechamína mbaʼépa ikatu  ñaaprende peteĩ ehémplo oĩvagui la Bíbliape ikatúva ñanepytyvõ.

4. ¿Mbaʼe mbaʼe ijetuʼúvapa ombohovái vaʼekue apóstol Pablo?

⁴ Ehémplo oĩva la Bíbliape. Apóstol Pablo oreko vaʼekue enkuénta umi ermanokuéra iñimperfektoha. Por ehémplo haʼe oñepyrũrõ guare oho pe kongregasión oĩvape Jerusalénpe, oĩ vaʼekue umi odudáva chugui (Hech. 9:26). Upéi oĩ vaʼekue oñeʼẽ vaíva hese oheja vai hag̃ua chupe (2 Cor. 10:10). Apóstol Pablo ohecha vaʼekue avei peteĩ ansiánope odesidi vai, ha upe situasión ikatu vaʼekue ombopochy hetápe (Gál. 2:​11, 12). Avei Páblope tuichaiterei odesepsiona vaʼekue Marcos, peteĩva umi omoirũ vaʼekue chupe (Hech. 15:​37, 38). Pablo ikatu vaʼekue omboykéntema umi ombopochy vaʼekuépe chupe. Péro upéva rangue haʼe osegi omombaʼe umi ermánope ha oservi Jehovápe fiélmente. ¿Mbaʼépa la oipytyvõ vaʼekue Páblope?

5. ¿Mbaʼépa oipytyvõ vaʼekue apóstol Páblope osegi hag̃ua ohayhu ermanokuérape? (Colosenses 3:​13, 14). (Ehecha pe taʼanga).

⁵ Pablo ohayhu vaʼekue umi ermanokuérape. Upévare haʼe ndoikói vaʼekue opensa meme mbaʼépepa ojavy raʼe hikuái iñimperfékto haguére, síno oreko enkuénta umi mbaʼe porã ojapóva hikuái. Avei Pablo oporohayhu rupi ikatu vaʼekue oporoperdona heʼi haguéicha Colosenses 3:​13, 14-pe (elee). Por ehémplo, jahechami mbaʼéichapa oipytyvõ vaʼekue chupe upéva Marcos kásope. Pablo ojapórõ guare pe primer viáhe opredika hag̃ua, Marcos oheja rei vaʼekue chupe. Upéicharõ jepe haʼe ndopytái vaʼekue ipyʼaro hese. Tiémpo rire Pablo oskrivi vaʼekue peteĩ kárta pe kongregasión oĩvape Colósaspe, ha upe kártape oguerohory Márcospe ha heʼi hese ‘tuichaiterei okonsola’ hague chupe (Col. 4:​10, 11). Ha oĩrõ guare préso Rómape, Pablo ojerure vaʼekue Marcos ohomi hag̃ua oipytyvõ chupe (2 Tim. 4:11). Péicha jahechakuaa Pablo nopensái hague umi ermánore naipohãveimaha ha operdona hague chupekuéra. ¿Mbaʼépa ikatu ñaaprende Pablo ehémplogui?

6, 7. ¿Mbaʼépa ñanepytyvõta jasegi hag̃ua jahayhu ñane ermanokuérape iñimperféktoramo jepe? (1 Juan 4:7).

⁶ ¿Mbaʼépa ñaaprende? Jehová ningo oipota jasegi jahayhu ñane ermáno ha ermanakuérape (elee 1 Juan 4:7). Oiméramo peteĩ ermáno térã ermána nañandetratái raʼe peteĩ kristiáno ojapo vaʼerãháicha, aníkena ñaimoʼã ojapo hague a propósito síno ñapensa oñehaʼãha avei ojapo la iporãva (Prov. 12:18). Jehová ningo ohayhu isiervokuéra ifiélvape  iñimperféktoramo jepe. Ha jajúramo jajavy katu Jehová ndopytái ipyʼaro ñanderehe, síno osegi ñandeguereko iñamígoramo (Sal. 103:9). Ajépa iñimportantete jasegi Jehová ehémplo ha ñaperdona ñande rapichakuérape (Efes. 4:32–5:1).

⁷ Ñanemanduʼákena avei hiʼag̃uimbaitemaha ohóvo pe fin. Upévare jasegi vaʼerã ñaime en unida ñane ermanokuérandi. Amo gotyove ikatu voi hína jajepersegi ha jajegueraha kárselpe. Oikóramo koʼã mbaʼe koʼýte ñaikotevẽta ñane ermanokuérare (Prov. 17:17). Jahechamína la oiko vaʼekue peteĩ ansiáno héravare José, a oikóva Espáñape. Ndojaposéi haguére servísio militár ojegueraha kárselpe chupe ha unos kuánto ermánope. José omombeʼu: “Kárselpe roimemba rupi oñondivepa peteĩ lugárpente, ndahasyiete kuri oremorrenega hag̃ua ótro ermáno. Upévare roñoaguanta ha roñoperdonámante vaʼerã ore pyʼaite guive. Upéva orepytyvõ rosegi hag̃ua roime en unida ha roñangareko hag̃ua ojuehe. Upépe ningo ojerepa orerehe umi ótro préso ndahaʼéiva Testígo. Chemanduʼa peteĩ jey alastima hague la che jyva ha oñevendapa chéve ani hag̃ua amonguʼe. Péicha rupi ndaikatúi ajapo heta mbaʼe chejehegui, upévare peteĩ ermáno chepytyvõ ojohéivo chéve la che ao ha hetave mbaʼépe. Péicha ojehechauka chéve mborayhu tee aikotevẽve jave”. Upéicharõ jahechakuaa iñimportantetereiha ñasolusiona oimeraẽ provléma jarekóva ñane ermanokuérandi.

ÑANE MÉNA TÉRÃ ÑANE REMBIREKO ÑANEDESEPSIONA JAVE

8. ¿Mbaʼeichagua situasión ijetuʼúvapa ombohovái umi omendáva?

⁸ Situasión ijetuʼúva. Entéro matrimónio ningo oreko provléma. La Biblia heʼi porã voi ‘umi omendáva heta iprovlemataha’ (1 Cor. 7:28). ¿Mbaʼérepa? Pórke ne ména térã ne rembireko ningo iñimperfékto, penediferénte ojuehegui ha pendegusta diferénte kósa. Ikatu voi peẽ diferénte paisgua ha pereko ótro kostúmbre. Tiémpo rire ikatu ehechakuaa ne ména térã ne rembireko orekoha umi defékto nderehechakuaái vaʼekue peimérõ guare de nóvio. Entéro koʼã mbaʼe ikatu hína ogueru provléma. Ikatu mokõivéva naperrekonoséi pejavyha ha peñepyrũ pejokulpa ojupe, peñehaʼã rangue pesolusiona la provléma. Upéicha rupi pepensa iporãvetaha pejesepara térã pejedivorsiánteramo. ¿Péro upévapa hína la solusión? b Jahechamína koʼág̃a mbaʼéichapa Abigaíl noñentregái vaʼekue iprovléma hetáramo jepe imatrimóniope.

9. ¿Mbaʼe situasión ijetuʼúvapa ombohovái vaʼekue Abigaíl?

⁹ Ehémplo oĩva la Bíbliape. Abigaíl omenda vaʼekue Nabal rehe. La Biblia heʼi hese Nabal haʼe hague peteĩ kuimbaʼe ijarhél ha oporotrata vaíva (1 Sam. 25:3). Oiméne ijetuʼu rakaʼe Abigaílpe oiko hag̃ua peichagua persónandi. ¿Orekópa raʼe Abigaíl oportunida oheja hag̃ua iménape? Si. Peteĩ jey David, haʼétava upéi Israel rréi, oho ojuka hag̃uáicha Nabálpe ijarhél haguére chupe ha umi kuimbaʼe omoirũvape chupe (1 Sam. 25:​9-13). Upérõ Abigaíl ikatúnte kuri osẽ oho, ha oheja Davídpe ojuka Nabálpe. Upéva rangue, haʼe okonvense Davídpe ani hag̃ua ojuka la iménape (1 Sam. 25:​23-27). ¿Mbaʼérepa Abigaíl ojapo rakaʼe upéicha?

10. ¿Mbaʼérepa Abigaíl noñentregái vaʼekue iprovléma hetáramo jepe imatrimóniope?

¹⁰ Abigaíl ohayhu vaʼekue Jehovápe ha  orrespeta la opensáva pe matrimóniore. Katuete oikuaáne rakaʼe Jehová heʼi vaʼekue omomendárõ guare Adán ha Évape (Gén. 2:24). Abigaíl oikuaa porã vaʼekue Jehovápe g̃uarã sagradoha pe matrimónio. Ha haʼe ohayhu rupi Jehovápe, oñehaʼãmbaite osalva iménape ha enterove umi hogayguápe. Haʼe pyaʼe ohecha kuri mbaʼépa ikatu ojapo ani hag̃ua David ojuka Nabálpe. Avei oĩ kuri dispuésta ojerurévo diskúlpa peteĩ mbaʼe vai haʼe ndojapói vaʼekuére. Katuete ningo Jehová ohayhuetereíne rakaʼe Abigaílpe ipyʼaguasu ha isakrifikáda haguére. ¿Mbaʼépa umi omendáva ikatu oaprende Abigaíl ehémplogui?

11. a) ¿Mbaʼépa Jehová oipota ojapo umi omendáva? (Efesios 5:33) b) ¿Mbaʼépa reaprende Carmen ehémplogui? (Ehecha pe taʼanga).

¹¹ ¿Mbaʼépa ñaaprende? Jehová oipota umi omendáva orrespeta imatrimónio ha osegi oñondive, ijetuʼúramo jepe ojogueraha porã iména térã hembirekóndi. Jehová oiméne ovyʼa ohechávo umi omendáva oñehaʼãmbaiteha osolusiona iprovlemakuéra, ojotrata mborayhúpe ha ojorrespeta (elee Efesios 5:33). Jahechamína peteĩ ermána hérava Carmen ehémplo. Omenda rire, amo 6 áño haguépe, oñepyrũ vaʼekue ostudia la Biblia testígo de Jehovándi ha ojevautisa. Haʼe omombeʼu: “Che ménape ndogustaiete vaʼekue la adesidíva. Oñepyrũ iselóso Jehovágui, chejaʼo ha cheamenasa cherejataha”. Upéicharõ jepe Carmen noñentregái, haʼe oñehaʼãmbaite ohechauka hag̃ua ohayhu ha orrespetaha iménape 50 áño aja. Haʼe heʼi: “Ohasávo la tiémpo antende porãve mbaʼéichapa oñeñandu che ména, ha aaprende mbaʼéichapa ikatu atrata porãve chupe. Aikuaa kuri la matrimónio sagradoha Jehovápe g̃uarã. Upévare añehaʼãmbaite rosegi hag̃ua oñondive, ha núnka nañehaʼãiva aheja hag̃ua che ménape pórke che ahayhu Jehovápe”. c Upéicharõ, ijetuʼúramo la situasión ne matrimóniope, ikatu reime segúro Jehová oĩtaha nde ykére ha nepytyvõtaha ani hag̃ua reñentrega.

ÑAÑEDESEPSIONA JAVE ÑANDEJEHEGUI VOI

12. ¿Mbaʼe situasión ijetuʼúvapa ikatu ñambohovái jajúramo japeka vai?

¹² Situasión ijetuʼúva. Ikatu ningo ñapensa ñandejehe nañanepohãveimaha japeka vaieterei haguére. La Biblia heʼi voi japeka haguére ikatuha ñañembyasy ñane korasõite guive ha ‘ñañeñandu vaieterei’ (Sal. 51:17). Upéva la oiko vaʼekue peteĩ ermáno héravare Robert. Haʼe ningo heta áñore oñehaʼã kuri oiko peve chugui siérvo ministeriál. Péro upéi ou opeka vaieterei ha ohechakuaa otraisiona  hague Jehovápe. Haʼe heʼi: “Añeñandu vaieterei ningo. Haʼete voi hoʼáva che ári peteĩ kárga ipohyietereíva. Upéi chepyʼajerepa, añepyrũ cherasẽ ha añemboʼe Jehovápe. Chemanduʼa apensa hague Ñandejára núnka nohendusemoʼãveimaha che ñemboʼe. Mbaʼe piko si che ajúva tuichaiterei afalla hendive”. Upéicharõ, jajúramo japeka vai, ikatu ñañeñandu vaieterei rupi ñapensa Jehová ndoikuaasemoʼãveimaha ñandehegui mbaʼeve, ha ndaiporiha mbaʼérepa jasegi jaservi chupe (Sal. 38:4). Oiméramo ñañeñandúma upéicha, jahecháta peteĩ Jehová siérvo yma guare osegi hague oservi chupe oúramo jepe opeka vaieterei.

13. ¿Mbaʼe ivaietereívapa ojapo vaʼekue Pedro, ha mbaʼéichapa og̃uahẽ raʼe upévape?

¹³ Ehémplo oĩva la Bíbliape. Jesús omano mboyve, pe último pyhare, apóstol Pedro heta vése ofalla ha amo ipahápe tuichaiterei ou opeka. Primero haʼe ojeroviaiterei vaʼekue ijehe, oasegura voi haʼe osegitaha ifiél umi ótro apóstol ohejapáramo jepe Jesúspe (Mar. 14:​27-29). Upéi pe hardín de Getsemanípe, ojejeruréramo jepe chupe oñatende porã hag̃ua, jey jey opyta oke (Mar. 14:​32, 37-41). Upéi peteĩ hénte aty oúrõ guare ojagarra hag̃ua Jesúspe, haʼe oheja rei chupe (Mar. 14:50). Amo ipahápe, ¿mbaʼépa oiko hese? Onega oikuaaha Jesúspe 3 vése, ha ohura voi 3 vése upéva (Mar. 14:​66-71). ¿Mbaʼéichapa orreaksiona Pedro ohechakuaárõ guare tuichaiterei opeka hague? Yvýre ningo opyta, oñeñandu vaieterei ha hasẽ soro (Mar. 14:72). Mbaʼeichaitépa oiméne oñeñandu vai rakaʼe upéi ohechárõ guare la iñamígo Jesúspe ojejukaha peteĩ yvyráre. ¡Katuete oiméne oñandu raʼe ndovaleiha mbaʼeverã!

14. ¿Mbaʼépa oipytyvõ vaʼekue Pédrope ani hag̃ua oñentrega ha osegi hag̃ua oservi Jehovápe? (Ehecha pe taʼanga ).

¹⁴ Apóstol Pedro noñentregái vaʼekue ha osegi oservi Jehovápe. ¿Mbaʼe mbaʼépa oipytyvõ vaʼekue chupe? Haʼe noñemohaʼeñói, síno oho umi ótro disípulo rendápe ha haʼekuéra katuete oiméne okonsola raʼe chupe (Luc. 24:33). Upéi Jesús orresusita rire ojaparese Pédrope, oiméne omokyreʼỹségui raʼe chupe (Luc. 24:34; 1 Cor. 15:5). Upe rire Jesús ndahaʼéi vaʼekue okulpáva Pédrope la ojapo vai vaʼekuére, síno heʼi ko iñamígope orekotaha hetave rresponsavilida (Juan 21:​15-17). Pedro oikuaa vaʼekue tuichaiterei opeka hague. Upéicharõ jepe haʼe noñentregái vaʼekue. ¿Mbaʼérepa? Pórke haʼe oĩ vaʼekue segúro Jesús nopensaiha hese haʼe naipohãveimaha. Avei umi ermanokuéra osegi vaʼekue oipytyvõ chupe. ¿Mbaʼépa ikatu ñaaprende Pedro ehémplogui?

15. ¿Mbaʼéguipa Jehová oipota ñaime segúro? (Salmo 86:5; Romanos 8:​38, 39). (Ehecha pe taʼanga).

 ¹⁵ ¿Mbaʼépa ñaaprende? Jehová oipota ñande ñaime segúro haʼe ñanderayhuha ha oĩha ñaneperdona hag̃uáicha (elee Salmo 86:5; Romanos 8:​38, 39). Jaikuaa ningo peteĩ persóna oúva opeka oñeñandu vaietereiha, ha upéva ndaivaíri. Péro núnka nañapensái vaʼerã Jehová nañanderayhuveimaha ha ndaikatumoʼãiha voi ñaneperdona. Upéva rangue, ensegída jaheka vaʼerã ajúda. Robert, pe ermáno ñañeʼẽ hague párrafo 12-pe omombeʼu: “Che aju vaʼekue apeka aimoʼãgui chejehegui reínte ajeitaha pe chestirávagui”. Péro haʼe ohechakuaa vaʼekue tekotevẽha oñeʼẽ ansianokuérandi. Haʼe heʼi: “Añeʼẽrõ guare umi ansianokuérandi, haʼekuéra chepytyvõ avei ahechakuaa hag̃ua Jehová osegiha cherayhu. Ahechakuaa avei haʼekuéra nopensaiha cherehe nachepohãveimaha. Umi ansianokuéra ohechauka chéve Jehová ndacherejareíri hague”. Robert kásoicha avei, ñande ikatu ñaime segúro Jehová ñanderayhuetereiha. Jaikuaa porã haʼe ñaneperdonataha ñañarrepentíramo, jaheka ajúda ha ñañehaʼãmbaite anivéma hag̃ua jajapo upe mbaʼe vai jajapo vaʼekue (1 Juan 1:​8, 9). Ñande ndajadudáiramo Jehová ñanderayhuha ha ñaneperdonasetereiha, ñanepytyvõta ani hag̃ua ñañentrega jajúramo jafalla térã japeka.

16. ¿Mbaʼérepa nde rejedesidi resegitaha reservi Jehovápe?

¹⁶ Jehová ningo ovaloraiterei entéro mbaʼe jajapóva jaservi hag̃ua chupe koʼã ára pahápe. Haʼe ñanepytyvõta ani hag̃ua ñañentrega ñañedesepsionáramo jepe. Ikatu jasegi jahayhu ñane ermanokuérape ha ñaperdona chupekuéra ñaneofende jave. Jahechauka Jehovápe jahayhuha ñande pyʼaite guive ha jarrespetaha pe matrimónio ñañehaʼãmbaitévo ñasolusiona oimehaichagua provléma. Péro jajúramo japeka vai, jajerurékena Jehovápe ajúda, jahechakuaa haʼe ñanderayhu ha ñaneperdonaha ha jasegi jaservi chupe. Upévare, “siémprekena jajapo iporãva” jaikuaágui Jehová tuichaiterei ñanevendesitaha upe haguére (Gál. 6:9).