1, 2. a) ¿Moõ guivépa Pablo oskrivi umi Efesoguápe ha mbaʼérepa? b) ¿Mbaʼe mbaʼépa ñaanalisáta?

 RÓMAPE, oĩ aja préso peteĩ ógape, Pablo omokyreʼỹse vaʼekue iñermanokuérape. Ha ndaikatúi rupi osẽ ovisita iñermanokuérape, oskrivi chupekuéra kárta. Peteĩva koʼã kárta, haʼe oskrivi kuri umi Efesoguápe, éntre áño 60 ha 61-rupi (Efes. 1:1; 4:1).

² Haimete 10 áño oskrivi mboyve koʼã kárta, Pablo oiko vaʼekue Éfesope. Ha areʼi opyta vaʼekue upépe ikatu hag̃uáicha opredika umi notísia porã ha oporomboʼe (Hech. 19:​1, 8-10; 20:​20, 21). Haʼe ohayhueterei vaʼekue iñermanokuéra upepeguápe ha oipytyvõse chupekuéra osegi hag̃ua oservi Jehovápe fiélmente. Péro, ¿mbaʼérepa haʼe oñeʼẽ umi kristiáno unhídope pe pytũmbýre? ¿Mbaʼérepa heʼi haʼekuéra ikatuha oporohesape? ¿Ha mbaʼépa ñande ikatu ñaaprende la haʼe heʼi vaʼekuégui? Ñakontestamína koʼã pregúnta.

OSẼ HIKUÁI PE PYTŨMBÝGUI

3. ¿Mbaʼépa Pablo heʼi vaʼekue ikártape oskrivírõ guare umi Efesoguápe?

³ Pablo heʼi vaʼekue umi kristiáno Efesoguápe: “Peteĩ tiémpope peẽ peime vaʼekue pytũmbýpe, péro koʼág̃a peporohesape” (Efes. 5:8). Jaleévo koʼã mbaʼe Pablo heʼi vaʼekue jahechakuaa umi Efesogua tuichaiterei okambia hague. Ñaanalisamína koʼág̃a mbaʼérepa Pablo heʼi rakaʼe umi Efesogua oĩ hague ‘peteĩ tiémpope pytũmbýpe’.

4. ¿Mbaʼérepa ikatu jaʼe pe rrelihión japu oreko hague umi Efesoguápe pytũmbýpe?

⁴ Pe rrelihión japu oreko vaʼekue chupekuéra pytũmbýpe. Koʼã kristiáno Efesogua, oikuaa mboyve pe añetegua, oguerovia  vaʼekue heta mbaʼe ndasiértoiva ha orahaiterei vaʼekue enkuénta umi aguería. Umi hénte oiko vaʼekue upépe ohómi vaʼerã pe témplo de Ártemispe oadora hag̃ua umi taʼanga. Ko témplo ikonosidoiterei vaʼekue opárupi. Ha umi hénte upe tiempopegua opensa vaʼekue voi ko témplo haʼeha peteĩva umi iporãvéva oñemopuʼã vaʼekue ko múndope. Umi artesáno upepegua ojapómi vaʼerã voi Ártemis ha pe témplo raʼanga, ikatu hag̃uáicha ovende, ha péicha oganámi hikuái heta pláta (Hech. 19:​23-27). Ha upéva ári jey, upe lugárpe oiko vaʼekue heta pajeséro (Hech. 19:19).

5. ¿Mbaʼérepa ikatu jaʼe umi Efesogua oĩ hague pytũmbýpe hekovai rupi?

⁵ Hekovai rupi oĩ hikuái pytũmbýpe. Éfeso ikonosidoiterei vaʼekue pórke umi hénte upepegua hekovaieterei ha notĩri ojapo hag̃ua la ivaíva. Haʼekuéra naiprovlemaiete vaʼekue ijuru kyʼa hag̃ua, tahaʼe umi teátrope térã ojejapo jave umi fiésta rrelihiósa (Efes. 5:3). Koʼã hénte ningo ndoikuaavéima vaʼekue “mbaʼépa iporã ha mbaʼépa ivai”. Griégope ko fráse heʼise voi “noñanduveimaha mbaʼeve” (Efes. 4:​17-19). Chupekuéra nomolestavéima kuri ikonsiénsia ojapo rire álgo ivaíva. Ha nopensaiete voi upéi orrendi vaʼerãha kuénta Jehovápe koʼã mbaʼére. Péicha vaʼekue hikuái oikuaa mboyve mbaʼépa oĩ porã ha mbaʼépa oĩ vai Jehová renondépe. Upévare Pablo heʼi haʼekuéra oĩ hague “pytũmbýpe ha oñemomombyry pe jeikove oúvagui Ñandejáragui”.

6. ¿Mbaʼérepa Pablo heʼi vaʼekue umi Efesoguápe koʼág̃a oporohesapeha hikuái?

⁶ Péro oĩ vaʼekue unos kuánto oikóva Éfesope osẽva pe pytũmbýgui. Pablo heʼi vaʼekue hesekuéra: “Koʼág̃a peporohesape peservi rupi ñande Ruvichápe” (Efes. 5:8). Ha osẽ rire pe pytũmbýgui, haʼekuéra oñepyrũma oiko Jehová Ñeʼẽme heʼiháicha. Upéva haʼete vaʼekue peteĩ lus ogiáva haperãkuéra (Sal. 119:105). Avei omboyketéma pe tekovai ha ndogueroviavéima umi mbaʼe oaprende vaʼekue pe rrelihión japúpe. Koʼã kristiáno pyahu oipota vaʼekue Jehová oguerohory chupekuéra, upévare oadora chupe añoiténte ha oñehaʼã ‘ohaʼanga chupe’ (Efes. 5:1).

7. ¿Mbaʼérepa ikatu jaʼe oĩha heta ojogua vaʼekue umi Efesoguápe?

 ⁷ Jaikuaa mboyve pe añetegua, pe rrelihión japu ha pe tekovai hetápe ñandereko vaʼekue pytũmbyetépe. Por ehémplo, heta oĩva ñande apytépe ymave orrespeta vaʼekue umi arete oúva pe rrelihión japúgui. Ha oĩ vaʼekue avei umi hekovaíva. Péro jaikuaa rire pe añetegua, ñañepyrũma ñakambia, jaikóma Jehová oipotaháicha ha upéi jahecháma la venefísio (Is. 48:17). Upearã jasegi vaʼerã ñañemomombyry umi mbaʼe ñandereko vaʼekuégui pytũmbýpe. Péichamante ikatúta ‘jaiko umi oĩva lus rendýpe oikoháicha’. Upéva sapyʼánte ijetuʼu hína. ¿Mbaʼépa ikatu ñanepytyvõ?

ANI JAIKO PYTŨMBÝPE

8. Heʼiháicha Efesios 5:​3-5, ¿mbaʼépa omboyke vaʼerã kuri umi Efesogua?

⁸ (Elee Efesios 5:​3-5). Ani hag̃ua ni mbaʼevéicharõ oiko pytũmbýpe, umi kristiáno Efesogua omboykete vaʼerã kuri entéro mbaʼe ndogustáiva Jehovápe. Jaikuaa haʼekuéra ndahekovaíri vaʼerãha upearã. Péro ndahaʼéi upévante, haʼekuéra ni noñeʼẽi vaʼerã umi mbaʼe tieʼỹre. Pablo omomanduʼa chupekuéra omboykéramo añoite koʼã mbaʼe ikatutaha oike “Ñandejára Rréinope, Cristo ogovernahápe”.

9. ¿Mbaʼérepa ñañatendeterei vaʼerã ani hag̃ua jajapo mbaʼeve ñandegueraháva pe tekovaípe?

⁹ Ñande avei ñañatende porã vaʼerã ani hag̃ua jajapo “umi mbaʼe ndovaléiva mbaʼeverã ha oĩva pytũmbýpe” (Efes. 5:11). Jaikuaa porã ningo peteĩ persóna oikóramo ohecha ha ohendu umi mbaʼe tieʼỹ, térã oñeʼẽramo pe tekovaíre, ifasilve upéi ojapo hag̃ua ivaíva (Gén. 3:6; Sant. 1:​14, 15). Por ehémplo, peteĩ paíspe heta ermáno okrea peteĩ grúpo peteĩ rred sosiálpe oñomensahea hag̃ua hikuái. Primerorã oñeʼẽ hikuái Jehováre ha umi mbaʼe omboʼévare la Biblia. Péro upéi oñepyrũma oñeʼẽ hikuái umi mbaʼe ndogustáivare Jehovápe. Tiémpo rire, pe rrelasión sexuál añoitérentema voi oñeʼẽ hikuái. Upéi, heta koʼã ermáno apytégui orrekonose ou hague hekovai oñeʼẽterei haguére umi mbaʼe tieʼỹre.

10. ¿Mbaʼéichapa Satanás oñehaʼã ñanembotavy? (Efesios 5:6).

¹⁰ Satanás múndo oñehaʼã ñanembotavy. Upévare oipota jaguerovia ni michĩmi ndaivairiha umi mbaʼe ikyʼa ha itieʼỹva Jehovápe g̃uarã (2 Ped. 2:19). Péro upéva nañanesorprendéi ñandéve. Ymaite guivéma ningo Satanás oñehaʼã okonfundipa la héntepe anivéma hag̃ua opilla mbaʼépa oĩ porã ha mbaʼépa oĩ vai (Is. 5:20; 2 Cor. 4:4). Upévare umi pelíkulape, télepe ha Internétpe tódo el tiémpo oñeñeʼẽ umi mbaʼe ndogustáivare Jehovápe. Satanás oipota ñapensa umi mbaʼe ikyʼáva ha pe tekovai haʼeha álgo normál. Péro ndahaʼéi upévante la oipotáva, oipota avei ñapensa jaikóramo péicha javyʼavetaha ha nañandeperhudikamoʼãiha (elee Efesios 5:6).

11. Jahechaháicha Angela kásope, ¿mbaʼérepa iñimportantete jasegi pe konsého oĩva Efesios 5:​7-pe? (Ehecha pe taʼanga).

¹¹ Satanás oipota jajeheʼa umi nañanepytyvõmoʼãivare ñaneñeʼẽrendu hag̃ua Jehovápe. Upévare Pablo heʼi vaʼekue umi Efesoguápe ani hag̃ua oñamiga umi ojapóvare ivaíva. Heʼi voi chupekuéra: “Aníkena pejeheʼa hesekuéra” (Efes. 5:7). Koʼág̃a katu ñande ñañatendevéntema vaʼerã chuguikuéra. ¿Mbaʼérepa jaʼe upéva? Pórke koʼág̃a ikatu jahasa tiémpo algúnondi umi rred sosiál rupive, ha ndahaʼéi katuete en persóna añónte. Jaikuaaháicha, upe pelígro ndaipóri vaʼekue umi Efesogua tiémpope. Peteĩ ermána oikóva Ásiape, hérava Angela, a omombeʼu mbaʼeichaite  pevépa ikatu ipeligróso umi rred sosiál. Haʼe heʼi: “Umi rred sosiál peteĩ ñuhã. Mbeguekatúpe ha repillaʼỹre ikatúma rekambia rehóvo la repensa lája. Che ni ndajepreokupavéi kuri areko haguére amígo ndorrespetáiva la Biblia heʼíva. Ha amo ipahápe añepyrũma vaʼekue apensa ndaivairiha jajapo umi mbaʼe Jehovápe ndogustáiva”. Haʼetépe ningo umi ansiáno oipytyvõ mborayhúpe Ángelape okambia hag̃ua tekotevẽhápe. Haʼe heʼi avei: “Koʼág̃a namoingevéima che akãme umi mbaʼe osẽva rred sosiálpe, síno añekonsentra umi mbaʼe oúvare Jehovágui”.

12. ¿Mbaʼépa jajapo vaʼerã jasegi hag̃ua jarrespeta la Jehová heʼíva?

¹² Ko múndo osegíta heʼi joʼa joʼa pe tekovai ndahaʼeiha mbaʼeve ivaíva. Péro ñande jalucha vaʼerã ani hag̃ua ñanembotavy pórke jaikuaa japuha upéva (Efes. 4:​19, 20). Iporãta ñañeporandúramo: “¿Ajeheʼápa tekotevẽkueténte che kompañéro de eskuéla, de koléhio térã che travahopeguáre? ¿Ndaikóipa ahasaiterei tiémpo peteĩ persóna ndorrespetáivandi Jehová heʼíva? ¿Chepyʼaguasúpa ha adefende pe añetegua umi hénte heʼírõ jepe chefanatikoitereimaha?”. Avei jareko vaʼerã enkuénta ótra kósa. La Biblia heʼi 2 Timoteo 2:​20-22-pe ñañatende vaʼerãha mávarepa jajeheʼa kongregasiónpe voi. Ñanemanduʼákena naenterói ñanepytyvõtaha jasegi hag̃ua jaservi Jehovápe fiélmente.

“PESEGÍKENA PEIKO UMI OĨVA LUS RENDÝPE OIKOHÁICHA”

13. ¿Mbaʼépa heʼise jaiko vaʼerãha “umi oĩva lus rendýpe oikoháicha”? (Efesios 5:​7-9).

¹³ Apóstol Pablo heʼi vaʼekue umi Efesoguápe ani hag̃ua oiko pytũmbýpe ha osegi hag̃ua oiko “umi oĩva lus rendýpe oikoháicha” (elee Efesios 5:​7-9). ¿Mbaʼépa heʼise upéva? Heʼise ñañekomporta vaʼerãha peteĩ kristiáno teéicha tódo el tiémpo. Oĩ unas kuánta kósa ñanepytyvõtava upearã. Por ehémplo, tekotevẽ jalee ha jastudia porã la Biblia ha umi puvlikasión oñeʼẽva hese. Jastudiakuévo, koʼýte ñañatende vaʼerã Jesús omboʼe vaʼekuére ha iñehémplore. Amo ipahápe ningo Jesús hína “pe lus ohesapéva ko múndo” (Juan 8:12; Prov. 6:23).

14. ¿Mbaʼéichapa ikatu ñanepytyvõ pe espíritu sánto?

 ¹⁴ ¿Mbaʼe ótra kósapa avei ñanepytyvõta? Ñaikotevẽ avei Ñandejára espíritu sántore jasegi hag̃ua jaiko “umi oĩva lus rendýpe oikoháicha”. ¿Mbaʼérepa? Pórke ijetuʼueterei ningo jasegi ñanepotĩ Jehová renondépe ko múndo ikyʼaitévape (1 Tes. 4:​3-5, 7, 8). Pe espíritu sánto ikatu ñanepytyvõ ani hag̃ua ñapensa umi hénte ko mundopegua opensaháicha, pórke haʼekuéra heʼíva ndohoiete Ñandejára opensa lájare. Pe espíritu sánto ñanepytyvõta avei ‘ñandehústo ha jaiko hag̃ua tape porãre’ (Efes. 5:9).

15. ¿Mbaʼépa jajapo vaʼerã Jehová omeʼẽ hag̃ua ñandéve ijespíritu sánto? (Efesios 5:​19, 20).

¹⁵ Jehová omeʼẽ hag̃ua ñandéve ijespíritu sánto jajerure vaʼerã chupe ñañemboʼe jave. Jesús heʼi vaʼekue Ñandejára omeʼẽtaha “espíritu sánto umi ojerurévape chupe” (Luc. 11:13). Avei jarresivi pe espíritu sánto ñamombaʼeguasu jave Jehovápe umi ermanokuérandi rreunionhápe (elee Efesios 5:​19, 20). Pe espíritu sánto tuichaiterei ikatu ñanepytyvõ jaiko hag̃ua Jehová oipotaháicha.

16. ¿Mbaʼépa ñanepytyvõta jadesidi porã hag̃ua? (Efesios 5:​10, 17).

¹⁶ Jadesidíta jave álgo iñimportánteva, jahecha vaʼerã ‘mbaʼépa hína Jehová oipota jajapo’ ha upéi ñañehaʼãmbaite jajapo upéva (elee Efesios 5:​10, 17). Jaheka jave umi konsého oĩva la Bíbliape jahechauka jaikuaaseha mbaʼépa Ñandejára opensa la jajapótavare. Ha jasegívo umi konsého katuete jadesidi porãvéta.

17. ¿Mbaʼéichapa ikatu ‘jaipuru porã ñane tiémpo’? (Efesios 5:​15, 16). (Ehecha pe taʼanga).

¹⁷ Pablo omokyreʼỹ avei umi kristiáno Efesoguápe oipuru porã hag̃ua itiémpo (elee Efesios 5:​15, 16). “Pe aña”, haʼéva hína ñane enemígo Satanás, oipotaiterei ñanerembiapo heta ko múndope pórke ndoipotái jareko tiémpo jaservi hag̃ua Ñandejárape (1 Juan 5:19). Ñañemeʼẽʼỹre enkuénta ikatu hína jaiko pláta, umi estúdio térã traváho  rapykuérintema ha ndajahekavéi mbaʼéichapa ikatu jaservi porãve Jehovápe. Jaikóramo upéicha, jahechaukáta ñapensaha umi hénte ko mundopegua opensaháicha. Añetehápe, umi mbaʼe ndaivaíri katuete, péro ndaikatúi jaiko ñamotenonde umíva ñande rekovépe. Jaiko hag̃ua oikoháicha “umi oĩva lus rendýpe” tekotevẽ ‘jaipuru porã ñane tiémpo’. Upéva heʼise ñamotenonde vaʼerãha umi mbaʼe iñimportantevéva.

18. ¿Mbaʼépa ojapo Donald oipuru porãve hag̃ua itiémpo?

¹⁸ Jahekákena oportunida jaservi porãve hag̃ua Jehovápe. Upéva ojapo vaʼekue peteĩ ermáno hérava Donald, oikóva Sudáfricape. Haʼe heʼi: “Añepyrũ apensa che situasiónre ha ajerure asy Jehovápe chepytyvõ hag̃ua ajapove hag̃ua iservísiope. Ajerure chupe atopa hag̃ua peteĩ traváho omeʼẽvétava chéve tiémpo apredika hag̃ua. Jehová chepytyvõ rupi atopa peteĩ traváho oikoitéva, ha upéi che rembireko ha che roñepyrũ roservi de tiémpo kompléto”.

19. ¿Mbaʼéichapa ikatu jasegi jaiko “umi oĩva lus rendýpe oikoháicha”?

¹⁹ Pe kárta Pablo omondo vaʼekue umi Efesoguápe katuete oipytyvõne raʼe chupekuéra osegi hag̃ua ifiél Jehovápe. Péro avei koʼág̃a ikatu ñanepytyvõ ñandéve. Jahecháma haguéicha, upe kárta ñanepytyvõ jaiporavo porã hag̃ua ñane diversión ha ñane amigorã. Avei ñanemokyreʼỹ jastudia meme hag̃ua la Biblia ikatu hag̃uáicha ñanderesape entéro mbaʼe jajapóvape. Ha ñanemomanduʼa ñaikotevẽha pe espíritu sántore jahechauka hag̃ua umi kualida porã. Jasegíramo umi konsého Pablo omeʼẽ vaʼekue, ikatúta jadesidi umi mbaʼe ombovyʼáva Jehovápe. Jajapóvo entéro koʼã mbaʼe, ndajaikomoʼãi pytũmbýpe síno jasegíta ‘japorohesape jaservi rupi’ Jehovápe.