1. ¿Mbaʼépa ikatu oĩ opensáva Jehová siervokuéra apytépe?

 ¡AJÉPA javyʼaite jaikuaávo Jehová oguerohoryha ipuévlope! La Biblia heʼi voi: “Jehová oguerohory ipuévlope” (Sal. 149:4). Péro sapyʼánte oĩ umi oñedesanimáva ha oñepyrũva oduda Jehovápa oguerohory hína chupe. Yma oĩma vaʼekue Jehová siervokuéra sapyʼánte oñedesanimáva ha oñeñandu vaʼekue avei péicha (1 Sam. 1:​6-10; Job 29:​2, 4; Sal. 51:11).

2. ¿Máva mávapepa Jehová oguerohory?

² La Biblia ohechauka porã ñande ñaneimperféktoramo jepe, Jehová ikatuha ñandeguerohory. ¿Mbaʼépa ikatu jajapo upearã? Jajerovia vaʼerã Jesucrístore ha jajevautisa (Juan 3:16). Péicha jahechauka umi hénte renondépe ñañarrepentíma hague ñande pekadokuéragui ha ñaprometéma hague Ñandejárape jajapotaha ivolunta (Hech. 2:38; 3:19). Jehová ningo ovyʼaiterei ñandereheve ohechávo jajapoha koʼã mbaʼe jaiko hag̃ua iñamigoitéramo. Jasegíramo ñañehaʼãmbaite ñakumpli pe promésa jajapo vaʼekue ñañemeʼẽrõ guare chupe, Jehová ñandeguerohorýta ha ñandeguerekóta iñamigoitéramo (Sal. 25:14).

3. ¿Mbaʼépa jahecháta ko artíkulope?

³ ¿Péro mbaʼérepa ikatu oĩ umi opensáva Jehová ndoguerohoryiha chupe? ¿Mbaʼéichapa Jehová ohechauka ñandeguerohoryha? ¿Ha mbaʼépa ñanepytyvõta ñaime hag̃ua segúro Jehová ñandeguerohoryha? Jahechamína koʼã mbaʼe.

¿MBAʼÉREPA OĨ OPENSÁVA JEHOVÁ NDOGUEROHORYIHA CHUPE?

4, 5. Ñapensáramo ñandejehe ndajavaleiha mbaʼeverã, ¿mbaʼéguipa ikatu ñaime segúro?

⁴ Heta ningo oĩ ñande apytépe imitã guive opensáva ndovaleiha mbaʼeverã (Sal. 88:15). Peteĩ ermáno hérava Adrián heʼi: “Siémpre apensa vaʼekue ndavaleiha mbaʼeverã. Chemanduʼa  chemitãme añemboʼémi hague Jehovápe ha ajerure chupe che família oikomi hag̃ua pe paraísope. Péro che aime vaʼekue segúro namereseiha aime upépe”. Ótro ermáno hérava Toni, orekóva ituakuéra ndahaʼéiva Testígo, omombeʼu: “Che tuakuéra núnka ndeʼíriva chéve cherayhuha ha ijorgullosoha chereheve. Upévare apensa vaʼekue núnka voi nameʼẽmoʼãiha chupekuéra gústo”.

⁵ Sapyʼánte ikatu ñañandu ndajavaleiha mbaʼeverã. Péro ñanemanduʼa vaʼerã Jehovaite voi ñanemoag̃ui hague ijehe (Juan 6:44). Haʼe ohecha umi mbaʼe porã jarekóva, ñande ndajahechakuaáiramo jepe ñandejehe umíva. Haʼe oikuaa porãve ñandehegui mbaʼeichagua persónapa ñande (1 Sam. 16:7; 2 Crón. 6:30). Upévare ndajadudái vaʼerã haʼe heʼi jave ñanderehe ñandevaliosoha chupe g̃uarã (1 Juan 3:​19, 20).

6. ¿Mbaʼéichapa apóstol Pablo oñeñandu vaʼekue opensávo ipekadokuéra yma guarére?

⁶ Ñande apytépe ikatu oĩ umi oiko mboyve chugui Testígo ojapo vaʼekue heta mbaʼe vai, ha umíva omoñeñandu vai chupe koʼág̃a peve (1 Ped. 4:3). Oĩ avei umi heta áñorema oservíva Jehovápe ha osegíva olucha pono ojapo umi mbaʼe vai oitiráva chupe. ¿Ha mbaʼéichapa nde reñeñandu? ¿Epensámavapa sapyʼánte Jehová ndaikatumoʼãiha voínte neperdona? Oiméramo upéicha, nekonsoláta reikuaávo oĩ hague ótro Jehová siérvo ifiélva oñeñandu vaʼekue avei péicha. Por ehémplo apóstol Pablo oñandu vaʼekue ivaietereiha la isituasión opensávo umi mbaʼe ndojapoporãivare (Rom. 7:24). Jaikuaa ningo Pablo oñarrepenti hague umi ipekádogui ha ojevautisa. Upéicharõ jepe haʼe osegi vaʼekue opensa ijehe haʼeha “pe michĩvéva umi apóstol apytépe”. Ha heʼi avei umi pekadór apytépe haʼeha “pe ipekádo vaive vaʼekue” (1 Cor. 15:9; 1 Tim. 1:15).

7. ¿Mbaʼépa opromete ñandéve Jehová ñañarrepentíma guive?

⁷ Ñande Ru yvagapegua ningo opromete ñaneperdonataha ñañarrepentíma guive (Sal. 86:5). Upévare ñambyasýramo ñande pyʼaite guive japeka haguére, ndaipóri jaduda hag̃ua Jehová katuete okumplitaha iñeʼẽ ha ñaneperdonataha (Col. 2:13).

8, 9. ¿Mbaʼépa ñanepytyvõta anivéma hag̃ua ñapensa ndovaleiha voi la jajapóva Jehová ñandeguerohory hag̃ua?

⁸ Enterove ningo jajapose opa ikatúva jaservi porã hag̃ua Jehovápe. Péro ikatu oĩ opensáva la ojapóva guive ndovalemoʼãiha ikatu hag̃uáicha Jehová oguerohory chupe. Peteĩ ermána hérava Amanda heʼi: “Che apensámi vaʼerã aservi hag̃ua Jehovápe che pyʼaite guive, tekotevẽha ajapo hetave mbaʼe. Upévare añehaʼã ajapo heta mbaʼe, ndachepuʼakamoʼãiramo jepe hese. Ha ndaikatúi jave akumpli la ajapose vaʼekue, añedesepsionaite voi chejehegui, ha apensa Jehová opensaha cherehe upéicha avei”.

⁹ ¿Mbaʼépa ñanepytyvõta anivéma hag̃ua ñapensa ndovaleiha voi la jajapóva ikatu hag̃uáicha Jehová ñandeguerohory? Ñanemanduʼákena Jehová ndahaʼeiha peteĩ Dios iñexihénteva, ha nohaʼarõiha ñandehegui jajapo la ndaikatumoʼãiva. Haʼe ovaloraiterei la jajapóva chupe g̃uarã, haʼéma guive ñande pyʼaite guive tamichĩ jepe raʼe la jajapóva. Ñapensamíntena umi oservi vaʼekuére Jehová ipyʼaite guive. Por ehémplo apóstol Pablo ombaʼapo jejopy vaʼekue heta áñore, mombyrymbyry oviaha ha omoñepyrũ heta kongregasión. Péro upéi okambia la isituasión ha ndaikatuvéima opredika yma guaréicha. ¿Heʼisépa raʼe upéva Jehová ndovyʼaveimaha la haʼe ojapóvare? Nahániri. Pablo osegi vaʼekue ojapo opa ikatúva ha Jehová ovendesi chupe (Hech. 28:​30, 31). Upéicha avei la jajapóva Jehovápe  g̃uarã ikatu okambia kon el tiémpo. Péro la iñimportánteva chupe g̃uarã ndahaʼéi voi mbaʼépa jajapo hína síno mbaʼérepa. Jahechamína mbaʼéichapa Jehová ohechauka ovyʼaha ñandereheve.

¿MBAʼÉICHAPA JEHOVÁ OHECHAUKA OVYʼAHA ÑANDEREHEVE?

10. ¿Mbaʼéichapa Jehová heʼi ñandéve ñanderayhuha? (Juan 16:27).

¹⁰ La Biblia rupive. Jehová ningo oheka voi oportunida ohechauka hag̃ua ohayhuha isiervokuérape ha oguerohoryha chupekuéra. La Biblia omombeʼu voi 2 vése Jehová heʼi hague Jesúspe haʼe haʼeha Itaʼýra ohayhuetéva ha oguerohorýva (Mat. 3:17; 17:5). ¿Ndépa reipota avei Jehová heʼi ndéve ndeguerohoryha? Jehová ningo noñeʼẽi ñandéve yvága guive, péro si oñeʼẽ ñandéve la Biblia rupive. Jalee jave mbaʼéichapa Jesús oñeʼẽ vaʼekue mborayhúpe idisipulokuérape, haʼetévaicha voi Jehová heʼíva ñandéve umíva (elee Juan 16:27). Jesús ningo ojoguaiterei Itúape. Haʼe heʼi vaʼekue ohayhuha idisipulokuéra ifiélvape, iñimperféktoramo jepe hikuái. Jalee jave upéva ikatu ñañeimahina Jehová heʼiha hína ñandéve voi (Juan 15:​9, 15).

11. Jahasa jave umi situasión ijetuʼúva, ¿mbaʼérepa upéva ndeʼiséi Jehová nañandeguerohoryveimaha? (Santiago 1:12).

¹¹ Ojapóva rupive ñanderehehápe. Jehová ningo ñanepytyvõseterei voi, por ehémplo haʼe omeʼẽ ñandéve umi mbaʼe ñaikotevẽva. Péro sapyʼánte haʼe opermiti jasufri oiko haguéicha yma Job rehe (Job 1:​8-11). Aníkena ñapensa Jehová nañandeguerohoryveimaha jahasa haguére umi situasión ijetuʼúvare. Upéva rangue, ñapensa vaʼerã upéicha jave jarekoha la oportunida jahechauka hag̃ua mbaʼeichaitépa jahayhu Ñandejárape ha ñakonfiaha hese (elee Santiago 1:12). Ha jahasa asy jave jahecháta mbaʼeichaitépa Jehová ñanderayhu ha ñanepytyvõ ñaaguanta hag̃ua.

12. ¿Mbaʼépa ñaaprende Dimitri ehémplogui?

¹² Jahechamína la ohasa vaʼekue peteĩ ermáno hérava Dimitri, oikóva Ásiape. Haʼe operde kuri itraváho ha ndaikatuvéi ombaʼapo heta mésere. Upémarõ haʼe odesidi osẽve predikasiónpe, ha péicha ohechauka ojeroviaha Jehováre. Upéi ohasáma heta mése ha haʼe ndotopái gueteri itraváho pyahurã, upéi ou hasykatu ha opyta tupápe. Amo ipahápe haʼe ou opensa nokumpliporãiha irresponsavilida ifamiliakuérandi ha oiméne hag̃ua Jehová  ipochy raʼe hendive. Upéi peteĩ pyharépe, itajyraʼi oimprimi peteĩ óhare la heʼíva Isaías 30:15: “Tuicha penembaretevéta pepytáramo pyʼaguapýpente ha pejerovia”. Upéi itajyraʼi ogueraha omeʼẽ chupe ha heʼi: “Pápi, nderevyʼái jave nemanduʼamíkena ko téxtore”. Dimitri oñemeʼẽ enkuénta Jehová rupive ifamília osegiha oreko ijaorã, hoʼumi vaʼerã ha lugár oiko hag̃ua. Haʼe heʼi: “Che apytánte vaʼerã kuri pyʼaguapýpe ha ajerovia Jehováre”. Oiméramo nde rehasa avei peteĩ situasión ijetuʼúva, ikatu reime segúro Jehová ojepyʼapyha nderehe ha omeʼẽtaha ndéve la fuérsa reikotevẽva reaguanta hag̃ua.

13. ¿Mávarepa Jehová ikatu ojevale oikuaauka hag̃ua ñandéve ñandeguerohoryha, ha mbaʼéichapa ojapo upéva?

¹³ Ñane ermanokuéra rupive. Jehová ojevale ñane ermanokuérare oikuaauka hag̃ua ñandéve ovyʼaha ñandereheve. Por ehémplo ikatu ojevale ótrore ñanemokyreʼỹ hag̃ua ñaikotevẽve jave. Upéicha oiko vaʼekue peteĩ ermána oĩvare Ásiape iprovléma hetárõ guare. Haʼe operde itraváho ha ou tuicha hasy. Upéi iména ojapo álgo ivaietereíva ha ndaikatuvéima oservi de ansiáno. Ijetuʼueterei kuri la ohasáva ko ermána, ha upévare haʼe heʼi: “Nantendéi kuri mbaʼépa la oikopáva, apensa kuri oiméne hag̃ua ajapo raʼe álgo ivaíva ha Jehová ipochyha chendive”. Upéi ko ermána ojerure asy Jehovápe ohechauka porãmi hag̃ua chupe osegiha gueteri ohayhu chupe. ¿Ha mbaʼéichapa Jehová okontesta chupe iñemboʼe? Pe ermána omombeʼu: “Umi ansiáno oñeʼẽ chendive ha chepytyvõ ahechakuaa hag̃ua Jehová osegiha gueteri cherayhu”. Tiémpo rire, ko ermána ojerure jey Jehovápe oipytyvõmi hag̃ua chupe. Haʼe heʼi: “Upe diaitépe voi arresivimi peteĩ kárta iporãitereíva oguerukáva chéve umi ermanokuéra kongregasionpegua. Ha aleévo umi mbaʼe heʼíva ahechakuaa Jehová cherendu  hague”. Jehová pyʼỹinte oikuaauka ñandéve ñandeguerohoryha umi mbaʼe porã heʼíva rupive ñandéve ñane ermanokuéra (Sal. 10:17).

14. ¿Mbaʼéichapa avei Jehová ohechauka ñanderayhuha?

¹⁴ Jehová ohechauka avei ñandeguerohoryha ojevalévo umi ermanokuérare omeʼẽ hag̃ua ñandéve konsého. Por ehémplo, yma Jehová ojevale vaʼekue apóstol Pablo rehe oskrivi hag̃ua 14 kárta umi kristianokuérape. Umívape haʼe mborayhúpe omeʼẽ vaʼekue chupekuéra konsého imbaretéva. ¿Mbaʼérepa Jehová oipota vaʼekue Pablo omeʼẽ umichagua konsého? Pórke Jehová ningo ‘ñande Túa ñandekorrehíva ñanderayhúgui’ (Prov. 3:​11, 12). Upéicharõ, oñemeʼẽ jave ñandéve konsého la Biblia rupive, upéva ohechauka Jehová ñanderayhuha ha ndahaʼéi nañandeguerohoryveimaha (Heb. 12:6). ¿Mbaʼe ótra kósapa ohechauka avei Jehová ñandeguerohoryha?

UMI MBAʼE OHECHAUKÁVA AVEI JEHOVÁ ÑANDEGUEROHORYHA

15. ¿Mávapepa Jehová omeʼẽ ijespíritu sánto, ha mbaʼépa oasegura ñandéve upéva?

¹⁵ Jehová omeʼẽ ijespíritu sánto umi haʼe oguerohorývape (Mat. 12:18). Ikatu ñañeporandu: “¿Ahechaukápa che rekovépe umi mbaʼe porã oúva espíritu sántogui?”. Por ehémplo, ekomparáramo mbaʼéicha vaʼekuépa nde reikuaa mboyve Jehovápe ha koʼág̃a, ¿rehechakuaápa nepasiensiaveha? Añetehápe amáske ojekuaa nderehe umi mbaʼe porã oúva pe espíritu sántogui, ikatu reimeve segúro Jehová ovyʼaha ndereheve (ehecha pe rrekuádro “ Umi mbaʼe porã oúva Ñandejára espíritugui haʼe hína. . . ”).

16. Heʼiháicha 1 Tesalonicenses 2:​4, ¿mávapepa Jehová onkarga omombeʼu hag̃ua umi notísia porã, ha mbaʼéichapa upéva nemoñeñandu ndéve?

¹⁶ ¿Mávapepa Jehová onkarga omombeʼu hag̃ua umi notísia porã? Umi haʼe oguerohorývape (elee 1 Tesalonicenses 2:4). Por ehémplo peteĩ ermána hérava Jocelin oñemeʼẽ kuri enkuénta upéva upeichaha. Peteĩ díape haʼe ikoʼẽ ndovyʼaieterei. Haʼe omombeʼu: “Chekangy kuri ha apensa ndavaleiha mbaʼeverã. Péro ajapo rupi che prekursorádo asẽmante vaʼerã kuri upe díape. Upémarõ añemboʼe ha aha”. Upe pyharevépe Jocelin oñemongeta Mari ndive, ko kuñakarai iñamavleterei ha oasepta ostudia la Biblia. Upe rire, unos kuánto mése haguépe, Mari omombeʼu Jócelinpe oñemboʼe hague hína  kuri Ñandejárape oipytyvõmi hag̃ua chupe, ha upe pyharevépe haʼe og̃uahẽ hague hógape. ¿Mbaʼépa omboʼe Jócelinpe la oiko vaʼekue? Haʼe omombeʼu: “Haʼetévaicha la Jehová heʼíva hína chéve: ‘Che roguerohory’”. Jaikuaa ningo ndahaʼeiha enterove ñanerendu porãtava predikasiónpe, péro ikatu ñaime segúro Jehová ovyʼataha ñandereheve ohechávo ñamombeʼuha umi notísia porã.

17. ¿Mbaʼépa ñanemboʼe la heʼi vaʼekue Vicki pe rreskátere? (Salmo 5:12).

¹⁷ Jehová ningo oipuru pe rreskáte umi haʼe oguerohorýva rehehápe (1 Tim. 2:​5, 6). Péro jajeroviáramo jepe pe rreskátere ha jajevautisáma, ¿mbaʼépa ikatu jajapo jasegíramo ndajagueroviapái Jehová ñandeguerohoryha? Ñanemanduʼákena ndaikatuiha siémpre ñakonfia la ñande ñañandúvarente, péro si ikatu ñakonfia Jehováre. Ñandejára renondépe umi ojeroviáva pe rreskátere ihústo hína, ha opromete voi ovendesitaha chupekuéra (elee Salmo 5:12; Rom. 3:26). Peteĩ ermána hérava Vicki heʼi tuichaiterei oipytyvõ hague chupe ojepyʼamongeta pe rreskátere. Peteĩ día heta opensa rire Jesús sakrifísiore, ohechakuaa sapyʼa ko mbaʼe: “Jehová heta tiémporema ipasiénsia cherehe. Upéicharõ jepe haʼete haʼéva kuri chupe aikóvo: ‘Nde ningo ndaikatumoʼãi voínte cherayhu. Nde Raʼy sakrifísio nachepytyvõi reperdona hag̃ua che pekádo’”. Péicha jahecha jajepyʼamongetáramo pe rreskátere ko ermána ojapo haguéicha, jahechakuaáta avei Jehová ñanderayhuha ha ñaiméta segúro haʼe ñandeguerohoryha.

18. ¿Mbaʼéguipa ndajadudái vaʼerã jasegíramo jahayhu Jehovápe?

¹⁸ Ñañehaʼãmbaitéramo jepe jasegi umi konsého oñemeʼẽva ko artíkulope, ikatu gueteri sapyʼánte ñañedesanima ha jaduda Jehovápa ñandeguerohory hína. Upéva oikóramo ñanderehe, ñanemanduʼákena haʼe oguerohoryha “umi osegívape ohayhu chupe” (Sant. 1:12). Upéicharõ jasegíkena ñañemoag̃ui Jehováre ha ñañatende mbaʼéichapa haʼe ohechauka hína ovyʼaha ñandereheve. Aníkena núnka ñanderesarái Jehová ‘noĩriha mombyry ñandehegui’ (Hech. 17:27).