1. ¿Mbaʼépa Jehová omboʼe vaʼekue Abrahánpe?

 OJAPÓMA heta tiémpo Ñandejára ojevale hague peteĩ ánhel rehe heʼi hag̃ua Abrahánpe ohunditaha Sodoma ha Gomorra. Abrahánpe ijetuʼueterei kuri ontende hag̃ua upéva, ojerovia mbaretéramo jepe Ñandejárare. Haʼe oporandu voi: ‘¿Rehundíta piko umi ihústova umi iñañávandi? ¿Pe Hués ohusgáva ko yvy kompletoite piko ndojapomoʼãi iporãva?’ (Gén. 18:​23-33). Jehová ipasiénsia vaʼekue ha oipytyvõ iñamígo Abrahánpe ontende hag̃ua peteĩ mbaʼe iñimportantetereíva: Ñandejára arakaʼeve nohundimoʼãi umi hénte ihústovape. La Abrahán oaprende vaʼekue upérõ ñanevenefisia ha ñanekonsola ñandéve avei koʼag̃aite peve.

2. ¿Mbaʼérepa ikatu ñaĩ segúro Jehová oporohusga jave siémpre ihústo ha oporoporiahuverekoha?

² ¿Mbaʼérepa ikatu ñaĩ segúro Jehová oporohusga jave siémpre ihústo ha oporoporiahuverekoha? Pórke ñande jaikuaa ‘Jehová ohechaha umi hénte korasõme oĩva’ (1 Sam. 16:7). La Biblia heʼi voi Jehová añoite oikuaa porãha “káda yvypóra korasõ”. ¡Ajépa tuichaite mbaʼe upéva! (1 Rey. 8:39; 1 Crón. 28:9). Jehová ningo iñarandueteve ñandehegui, upévare ikatu sapyʼánte nañantendepái mbaʼérepa haʼe odesidi álgo. Apóstol Pablo heʼi vaʼekue voi Jehováre: “Ñande ndaikatúi jaikuaapa umi mbaʼe haʼe odesidíva” (Rom. 11:33).

3, 4. ¿Mbaʼépa ikatu sapyʼánte ñañeporandu, ha mbaʼépa jahecháta ko artíkulope? (Juan 5:​28, 29).

³ Jaikuaáramo jepe Jehová siémpre ihustoha, sapyʼánte ikatu jaikuaase avei la Abrahán oikuaase vaʼekue. Ikatu oime  ñañeporandu: ¿Oikove jeýnepa umi persóna Jehová ohundi vaʼekue, umíva apytépe umi oiko vaʼekue Sodoma ha Gomórrape? ¿Oĩnepa algúno koʼãvagui orresusitátava ‘umi iñinhústova apytépe’? (Hech. 24:15).

⁴ ¿Mbaʼépa ñande jaikuaa pe rresurreksióngui? Jahechami jeýna upéva. Ndaʼareguasúi ojeexplika porãve ñandéve mbaʼépa heʼise oĩtaha orresusitáva “oikove hag̃ua” ha oĩtaha orresusitáva “ojehusga hag̃ua” (elee Juan 5:​28, 29). a Upéva rupive oñentende porã hetave mbaʼe. Umíva jahecháta jahávo ko artíkulope, ha pe oúvape ñaanalisáta mbaʼéichapa Jehová oporohusga. Upearã jahecháta mbaʼépa ñande ndajaikuaái ha mbaʼépa umi mbaʼe si jaikuaáva.

¿MBAʼÉPA NDAJAIKUAÁI?

5. ¿Mbaʼépa anteve heʼi vaʼekue ñane puvlikasionkuéra umi hénte oñehundi vaʼekuére Sodoma ha Gomórrape?

⁵ Ñane puvlikasionkuéra heʼi vaʼekue ndorresusitamoʼãiha umi hénte Jehová voi ohundi vaʼekue. Por ehémplo umi oiko vaʼekue Sodoma ha Gomórrape. Péro pe esklávo de konfiánsa oñemboʼe heta ha ostudia porãve rire ko téma, ohechakuaa ndaikatuiha jaasegura ko mbaʼe. ¿Mbaʼérepa jaʼe upéva?

6. a) Emombeʼu unos kuánto ehémplo ohechaukáva Jehová ohusgáma hague umi iñinhústovape. b) ¿Mbaʼépa ñande ndajaikuaái?

⁶ La Biblia omombeʼu heta káso Jehová ohusga haguépe umi iñinhústovape. Por ehémplo: 1) Jehová ohundi vaʼekue pe dilúviope hetaiterei héntepe ha osalva Noé ha ifamíliape añónte, 2) haʼe ojevale vaʼekue umi israelítare ohundi hag̃ua umi 7 nasión oiko vaʼekue pe Tiérra Prometídape, ha 3) haʼe ojevale vaʼekue peteĩ ánhel rehe ohundi hag̃ua 185.000 soldádo asíriope peteĩ pyharépe (Gén. 7:23; Deut. 7:​1-3; Is. 37:​36, 37). Koʼã kásope, ¿heʼípa la Biblia Jehová okondena hague káda uno umi persónape omano hag̃ua pára siémpre? ¿Ohechaukápa la Biblia koʼã persóna ndorresusitamoʼãveimaha? Nahániri. ¿Mbaʼérepa jaʼe upéva?

7. Ñañeʼẽvo umi hénte oñehundi vaʼekuére pe dilúviope ha Canaánpe, ¿mbaʼépa ñande ndajaikuaái? (Ehecha pe taʼanga).

⁷ Umi ehémplo jahecha vaʼekuépe ndajaikuaái mbaʼéichapa Jehová ohusga rakaʼe káda uno umi héntepe. Ndajaikuaái avei haʼekuéra orekópa rakaʼe la oportunida oikuaávo Jehovápe ha oñarrepenti. Por ehémplo la Biblia oñeʼẽvo pe dilúvio tiémpore, si omombeʼu Noé ‘opredika hague umi mbaʼe ihústova’ (2 Ped. 2:5). Péro ndeʼíri Noé ojapo aja pe árka tuichaitéva oñehaʼã hague avei opredika káda uno umi hénte oikóvape ko yvy ape ári. Upéicha avei, ñande ndajaikuaái orekópa raʼe la oportunida oikuaávo Jehovápe enterove umi hénte aña oiko vaʼekue Canaánpe ikatu hag̃uáicha okambia.

8. Ñañeʼẽvo umi hénte oñehundi vaʼekuére Sodoma ha Gomórrape, ¿mbaʼépa ñande ndajaikuaái?

⁸ ¿Mbaʼépa ikatu jaʼe umi hénte oiko vaʼekuére Sodoma ha Gomórrape? Ijapytepekuéra oiko vaʼekue peteĩ kuimbaʼe ihústova hérava Lot. Péro ñande ndajaikuaái haʼe opredikápa raʼe enterove umi héntepe. Legálmente umi hénte hembiapo vaieterei vaʼekue, ¿péro enterovetépa oikuaa raʼe mbaʼépa oĩ porã ha mbaʼépa oĩ vai? Ñanemanduʼa la Biblia omombeʼuha oĩ hague peteĩ hénte aty oviolasemoʼãva Lot visitakuérape, ha umi hénte apytépe oĩ vaʼekue “itujáva ha imitãva” (Gén. 19:4; 2 Ped. 2:7). Jehová ningo peteĩ Dios oporoporiahuverekóva, ¿ikatúpa upéicharõ ñaĩ segúro haʼe okondena hague káda uno umi héntepe ani hag̃ua orresusita? Ñande ndaikatúi jaasegura upéva. Siérto, Jehová heʼi vaʼekue Abrahánpe  ndaipóri hague ni 10 kuimbaʼe ihústova upe siudápe (Gén. 18:32). Upéicharõ ikatu jaʼe Jehová ojapo porã hague ohundírõ guare umi héntepe la ojapo vaʼekuére, ¿péro ikatúpa ñaĩ segúro ni peteĩva voi ijapyteguikuéra ndorresusitamoʼãiha umi ‘iñinhústova apytépe’? Ñande ndajaikuaái upéva.

9. Ñañeʼẽvo Salomónre, ¿mbaʼépa ñande ndajaikuaái?

⁹ La Biblia omombeʼu avei oĩ hague umi hénte ihústova upéi oñepyrũva ojapo umi mbaʼe ivaíva. Por ehémplo jareko rréi Salomón káso. Haʼe oikuaa porã vaʼekue Jehovápe, oadora porã chupe ha orresivi heta vendisión. Péro kon el tiémpo Salomón oadora umi dios fálsope. Upéva ombopochyeterei vaʼekue Jehovápe ha pe puévlo kompletoite osufri vaʼekue heta áñore Salomón káusare. Haʼe omanórõ guare, la Biblia heʼi hese ‘opytuʼu hague ituakuérandi’. Péicha ojeʼe vaʼekue avei rréi David omanórõ guare. Ha jaikuaaháicha, haʼe ifiél vaʼekue Jehovápe (1 Rey. 11:​5-9, 43; 2 Crón. 9:​31, nóta). Péro la Biblia heʼi haguérente Salomón opytuʼu hague ituakuérandi, ndeʼiséi haʼe oikove jeytaha katuete. Upéicharõ jepe, ikatu oĩ opensáva Salomón oikove jeytaha pórke Romanos 6:7 heʼi: “Peteĩ persóna omano vove ja oñeperdonáma chupe ipekadokuéra”. Siérto ningo upéva, péro ndeʼiséi enterove omano vaʼekue oikove jeytaha katuete. Amo ipahápe ningo ndahaʼéi peteĩ persóna omano haguérente orekómava pe derécho orresusitávo. Pe rresurreksión peteĩ rregálo oúva Ñandejáragui, noñemeʼẽiva oimeraẽvapente. Jehová omoingove jeýta umi persónape omeʼẽ hag̃ua chupekuéra la oportunida oservi hag̃ua chupe pára siémpre (Job 14:​13, 14; Juan 6:44). ¿Orresivítapa Salomón upe rregálo? Ñandejáramante oikuaáta upéva, ñande nahániri. Péro si jaikuaa Jehová katuete ojapotaha la oĩ porãva.

¿MBAʼÉPA SI JAIKUAA?

10. ¿Mbaʼéichapa Jehová oñeñandu oporohusga jave? (Ezequiel 33:11). (Ehecha pe taʼanga).

¹⁰ (Elee Ezequiel 33:11). Jehová omombeʼu ñandéve mbaʼéichapa haʼe oñeñandu oporohusga jave. Ezequiel oskrivi haguéicha, apóstol Pedro avei heʼi vaʼekue Jehová ‘ndoipotaiha avave oñehundi’ (2 Ped. 3:9). Koʼã téxto ningo tuicha ñanetrankilisa, pórke jaikuaa Jehová ndojagarramoʼãiha ohundi reíntema peteĩ persónape pára siémpre. Haʼe ningo oiporiahuverekoiterei la héntepe ha ohechaukáta upeichaha ikatúma guive.

11. ¿Máva mávapa ndorresusitamoʼãi, ha mbaʼéichapa jaikuaa upéva?

¹¹ La Biblia si heʼi ñandéve oĩha unos kuánto ndorresusitamoʼãiva. b Por ehémplo Jesús ontendeka vaʼekue Judas Iscariote ndorresusitamoʼãiha (Mar. 14:21; Juan 17:12). c Judas oikuaa porã vaʼekue la ojapóva rupive oñemoĩtaha direktoite Jehováre ha Itaʼýrare, péro lomímonte ojapo (Mar. 3:29). d Péicha avei, Jesús heʼi vaʼekue oĩha unos kuánto líder rrelihióso oñemoĩ vaʼekue hese ndorresusitamoʼãiva (Mat. 23:33; Juan 19:11). e Ha apóstol Pablo oavisa vaʼekue umi apóstata noñarrepentíriva ndorresusitamoʼãiha (Heb. 6:​4-8; 10:29).

12. Emombeʼu umi ehémplo ohechaukáva Jehová oporoporiahuverekoha.

¹² Péro jaʼéma haguéicha Jehová oiporiahuverekoiterei la héntepe ha “ndoipotái avave oñehundi”. ¿Mbaʼéichapa Jehová ohechaukáma oiporiahuvereko hague umi opeka vaietereívape?  Por ehémplo, rréi David ou vaʼekue tuicha opeka. Haʼe oñentremete tembireko ahénore ha oporojuka, péro upéi David oñarrepenti ha Jehová operdona chupe (2 Sam. 12:​1-13). Avei rréi Manasés ojapo vaʼekue heta mbaʼe vai hetaiterei tiémpore. Ivaietereíramo jepe la ikáso, Jehová oiporiahuvereko ha operdona vaʼekue Manaséspe, pórke haʼe oñarrepenti ipyʼaite guive (2 Crón. 33:​9-16). Koʼã ehémplo ñanemomanduʼa Jehová ohecháma guive ikatuha oiporiahuvereko ha operdona peteĩ persónape, haʼe ojapoha upéicha. Jehová omoingove jeýta umi persóna ohechakuaávape hembiapo vai hague ha oñarrepentívape.

13. a) ¿Mbaʼérepa Jehová oiporiahuvereko vaʼekue umi ninivítape? b) ¿Mbaʼépa tiémpo rire Jesús heʼi vaʼekue umi ninivítare?

¹³ Ikatu ñanemanduʼa avei mbaʼeichaitépa Jehová oiporiahuvereko vaʼekue umi ninivítape. Ñandejára heʼi vaʼekue Jonáspe: “Ahendúma mbaʼeichaitépa iñaña hikuái”. Péro umi ninivita oñarrepentírõ guare Jehová operdona chupekuéra. Ni Jonás ndoiporiahuverekói umi héntepe Jehová ojapo haguéicha. Jonás ipochyeterei voi, ha upévare Ñandejára omomanduʼa chupe umi ninivita ‘nodiferensiakuaái hague iporãva ivaívagui’ (Jon. 1:​1, 2; 3:10; 4:​9-11). Tiémpo rire Jesús oipuru vaʼekue ko káso omboʼe hag̃ua mbaʼeichaite pevépa Jehová ihústo ha oporoporiahuvereko. Jesús heʼi vaʼekue umi ninivita oñarrepenti vaʼekue ‘opuʼã jeytaha pe Día de huísiope’ (Mat. 12:41).

14. ¿Mbaʼépa heʼise umi ninivita orresusitataha ojehusga hag̃ua?

¹⁴ ¿Mbaʼépa hína pe ‘Día de huísio opuʼã jeytahápe’ umi ninivita? Jesús heʼi vaʼekue amo gotyove oĩtaha umi ‘orresusitáva ojehusga hag̃ua’ (Juan 5:29). Upérõ haʼe oñeʼẽ hína kuri igoviérno de 1.000 áñore. Upe tiémpope oñemoingove jeýta “umi ihústova ha iñinhústovape” (Hech. 24:15). Umi iñinhústova ‘orresusitáta ojehusga hag̃ua’. Upéva heʼise Jehová ha Jesús ohechataha iñeʼẽrendúpa hikuái ha ojapópa umi mbaʼe oaprendéva. Upéicharõ, peteĩ ninivita orresusitáva ndoadoraséiramo Jehovápe, haʼe nopermitimoʼãi chupe osegi oikove (Is. 65:20). Péro enterove umi odesidíva oadorataha Jehovápe fiélmente, orekóta pe oportunida oikove hag̃ua pára siémpre (Dan. 12:2).

15. a) ¿Mbaʼérepa ndajaʼéi vaʼerã ni peteĩva voi umi Sodoma ha Gomorrapegua ndorresusitamoʼãiha? b) ¿Mbaʼéichapa ñantende vaʼerã la heʼíva Judas 7? (Ehecha pe rrekuádro “ ¿Mbaʼépa heʼise vaʼekue Judas?”).

 ¹⁵ Jesús heʼi umi orrechasa vaʼekue chupe ha iñenseñánsa ojecha vaivetaha “pe Día de huísiope” umi Sodoma ha Gomorraguágui (Mat. 10:​14, 15; 11:​23, 24; Luc. 10:12). ¿Oexaherápa raʼe upérõ Jesús? ¿Ohechaukaséntepa rakaʼe umi hénte itiempopegua hembiapo vaive hague umi hénte Sodoma ha Gomorraguágui? Posívlemente nahániri hína. Ñanemanduʼa vaʼerã haʼe heʼi hague avei umi ninivita opuʼã jeytaha pe ‘Día de huísiope’, ha upéva ndahaʼéi vaʼekue peteĩ exaherasión reínte. Mokõive kásopente Jesús oñeʼẽ vaʼekue ‘pe Día de huísiore’ ha heʼise vaʼekue la mísma kósa. Ñanemanduʼamína avei la Jesús heʼi vaʼekuére Juan 5:​29-pe. Haʼe heʼi vaʼekue oĩtaha ‘orresusitáva ojehusga hag̃ua’. Ha koʼãva apytépe oikéta hína “umi ojapo vaʼekue ivaíva”. Jaikuaa ningo umi ninivita hembiapo vai hague umi hénte Sodoma ha Gomorrapeguáicha avei. Péro koʼãva ndorekói vaʼekue oportunida oñarrepenti hag̃ua oreko haguéicha umi ninivita. Upéicharõ, provávlemente oĩ hína esperánsa umi hénte Sodoma ha Gomorraguápe g̃uarã. Ikatu hína algúno jepe ijapyteguikuéra orresusita. Ha ñande ikatu jareko la oportunida ñaipytyvõvo chupekuéra oikuaa hag̃ua Jehová ha Jesúspe.

16. Jehová odesidíta vove mávapepa omoingove jeýta, ¿mbaʼépa si jaikuaa? (Jeremías 17:10).

¹⁶ (Elee Jeremías 17:10). Ko versíkulo ohechauka porã mbaʼépa la ñande jaikuaáva: Jehová siémpre ohesaʼỹijoha “yvypóra korasõ” ha oipyguaraha “yvypóra pensamiénto ipypukuvéva”. Jehová odesidíta vove mávapepa omoingove jeýta, “haʼe opagáta káda únope asegún pe hape” siémpre voi ojapoháicha. Jehová oporokondenáta tekotevẽramo, péro ohecháramo ikatuha oporoporiahuvereko, siémpre ojapóta upéicha. ¡Upévare núnka ndajaʼéi vaʼerã peteĩ persóna ndorresusitamoʼãiha oimérõ la Biblia ndoasegurái upeichataha!

PE HUÉS OHUSGÁVA KO YVY KOMPLETOITE OJAPÓTA IPORÃVA

17. ¿Mbaʼépa oikóta umi hénte omano vaʼekuégui?

¹⁷ Adán ha Eva omoirũ vaʼekue Satanáspe ha opuʼã Jehová kóntrape. Upe guive hetaiterei héntema omano. Pe ñemano ningo ñane ‘enemígo’  ñanembohasa asyvéva (1 Cor. 15:26). ¿Mbaʼépa oikóta entéro umi hénte omano vaʼekuégui? Peteĩ grúpo michĩva, oĩháme 144.000 Jesucristo segidór ifiélva, orresusitáta yvágape ha núnka mas nomanomoʼãvéi (Apoc. 14:1). Avei hetaiterei hénte ifiélva ha ohayhúva Jehovápe oikove jeýta ‘umi ihústova apytépe’. Haʼekuéra oikóta pára siémpre ko yvy ape ári osegíramo iñeʼẽrendu Cristo goviérno de 1.000 áño aja ha pe pruéva finál aja avei (Dan. 12:13; Heb. 12:1). Umi 1.000 áño aja avei, ‘umi iñinhústova’ orekóta la oportunida oikuaávo Jehovápe ha oadorávo chupe fiélmente. Koʼãva apytépe oĩta hína umi núnka ndoservíri vaʼekue Jehovápe ha “ojapo vaʼekue ivaíva” (Luc. 23:​42, 43). Péro oĩ avei algúno iñañaitereíva ha ojedesidietéva voi oñemoĩ Jehová kóntrape. Ha upévare haʼe odesidi koʼãva ndorresusitamoʼãiha ni mbaʼevéicharõ (Luc. 12:​4, 5).

18, 19. a) ¿Mbaʼérepa ikatu ñaĩ segúro Jehová ohusga porãtaha umi omano vaʼekuépe? (Isaías 55:​8, 9). b) ¿Mbaʼépa jahecháta pe artíkulo oúvape?

¹⁸ ¿Ikatúpa ñande jaaseguraite voi Jehová oporohusga jave siémpre ojapoha la iporãva? ¡Si, ni ndajadudái! Abrahán ontende porã vaʼekue upéva. Jehová ningo hína “pe Hués ohusgáva ko yvy kompletoite”. Haʼe iñarandu, núnka ndojavýi ha oporoporiahuvereko. Avei Jehová ombokatupyrýma Itaʼýrape oporohusga hag̃ua ha oheja ikárgope upéva (Juan 5:22). Jehová ha Jesús oikuaa mbaʼépa oñandu ha opensa káda persóna (Mat. 9:4). Upévare haʼekuéra ohusga jave peteĩ persónape, siémpre ojapóta iporãva.

¹⁹ Jajedesidíkena siémpre ñakonfiataha Jehováre ha entéro mbaʼe haʼe odesidívare. Ñarrekonose ningo ñande ndaikatuiha japorohusga porã, péro Jehová si (elee Isaías 55:​8, 9). Avei jaikuaa ñande Rréi Jesús ihústo ha oporoporiahuverekoha Itúa ojapoháicha. Upévare jahejapaitékena Jehová ha Itaʼýra kárgope ohusga hag̃ua la héntepe (Is. 11:​3, 4). ¿Péro mbaʼéichapa Jehová ha Jesús ohusgáta la héntepe pe jehasa asy guasu aja? ¿Mbaʼépa ñande ndajaikuaái ha mbaʼépa si jaikuaa? Pe artíkulo oúvape oñekontestáta koʼã pregúnta.