Anase vaʼekue áño 1927-pe peteĩ puévlo opytávape ag̃ui Chicágogui (Illinois, Estados Unidos). Che tuakuéra 5 ifamília vaʼekue: Jetha, Don, upéi anase che ha upéi ou Karl ha Joy. Enterovetéva roservise vaʼekue Jehovápe ore pyʼaite guive. Che ermána Jéthape oñeinvita vaʼekue oho hag̃ua pe segunda kláse de Galaádpe áño 1943-pe. Don oho oservi Betel de Brooklyn, Nueva Yórkpe áño 1944-pe. Karl oho Betélpe 1947-pe ha Joy avei oñepyrũ oservi upépe 1951-pe. Che ermanokuéra ha che tuakuéra ehémplo tuicha chemokyreʼỹ ajapove hag̃ua Jehová servísiope.

Che túa ha che sy siémpre oleémi vaʼerã la Biblia ha ohayhueterei Ñandejárape. Ha oremichĩete guive haʼekuéra oremboʼe rohayhu vaʼerãha Ñandejárape. Péro papa ou ndoikuaasevéi mbaʼeve rrelihióngui oho rire Európape kómo soldádo oñorairõ hag̃ua pe primera gérra mundiálpe. Che sy katu ovyʼaiterei che túa nomanói haguére gerrahápe ha ou jey haguére ógape. Upévare heʼi chupe: “Karl, jaha jeýna tupaópe. Yma jaha vaʼekue voi oñondive”. Papa katu heʼi chupe: “Ikatu rogueraha péro ndaikemoʼãi nendive upépe”. Mama oporandu chupe mbaʼérepa heʼi upéva. Ha che túa heʼi chupe: “Pe gérra aja ahecha mbaʼéichapa umi líder rrelihióso elmímo rrelihiongua ovendesi umi soldádo oñorairõvape ore kóntrape, péro oréve avei orevendesi. Upéicharõ, ¿mbaʼéicha piko Ñandejára ovendesíta mokõivévape?”.

Peteĩ vuéltape mama oho aja tupaópe, mokõi testígo de Jehová og̃uahẽ oúvo ógape. Haʼekuéra oofrese papápe mokõi lívro hérava Luz. Umi lívro omyesakã la heʼíva Apocalipsis. Che túape ogustaiterei umi lívro, upévare oasepta. Upéi mama ohechárõ guare umi lívro oñepyrũ avei olee. Peteĩ díape haʼe ohecha diáriope oñeinvitaha entéro umi persóna orekóvape umi mokõi lívro oho hag̃ua ostudia la Biblia. Ha haʼe odesidi oho. Og̃uahẽrõ guare upe lugárpe, peteĩ kuñakarai oñatende hese. Che sy ohechauka chupe peteĩva umi lívro ha oporandu pe kuñakaraípe: “¿Koʼápe piko la ojestudia koʼã lívro?”. Pe kuñakarai heʼi chupe: “Si che memby, ehasa katu”. Upéi pe ótra semánape che ermanokuéra ha che rohóma avei che sýndi upépe. Upe guive siémprema roho káda semána.

Peteĩva umi rreuniónpe pe ermáno omoakãva, ojerure chéve alee hag̃ua Salmo 144:15. Upe téxtope heʼi umi oadoráva Jehovápe ovyʼaitereiha. Upéva opokoiterei vaʼekue cherehe, péro oĩ vaʼekue ótro téxto chegustáva. Por ehémplo 1 Timoteo 1:11 heʼi Jehová haʼeha ‘Ñandejára ovyʼáva’. Efesios 5:1 avei heʼi ‘ñahaʼanga vaʼerãha Ñandejárape’. Upépe ahechakuaa  siémpre avyʼa vaʼerãha ikatu haguére aservi che Apoharépe ha aagradese vaʼerã chupe ikatu haguére ajapo upéva. Umi mokõi mbaʼe aaprendéva siémpre iñimportanteterei chéve g̃uarã.

Pe kongregasión ag̃uive oĩva orehegui Chicágope opyta 32 kilómetro. Upéicharamo jepe siémpre roho rreunionhápe ha che asegi aaprende hetave mbaʼe la Bíbliagui. Peteĩ vuéltape chemanduʼa Jéthape oñemeʼẽ hague okomenta hag̃ua rreunionhápe. Ahendúrõ guare la haʼe heʼíva ikomentáriope apensa: “Chéko aikuaa kuri avei la rrespuésta, ¿mbaʼére ndahupíri avei raʼe la che po?”. Upévare upe guive añepyrũma avei ajeprepara rreunionrã ha apreparáma avei la che komentariorã. Péro la iñimportanteveha, che ha che ermanokuéra roñepyrũma roñemoag̃uive Jehováre. Upéi áño 1941-pe ajevautisa.

Chemanduʼa porãiterei peteĩ asambléa ojejapo vaʼekuére Cleveland, Ohíope áño 1942-pe. Upérõ ore ha hetave família ropyta roakampa ag̃ui pe lugár ojejapohágui pe asambléa. Avei ohendu pe prográma teléfono rupive hetaiterei ermáno ha ermána oĩva mas de 50 siudápe Estados Unídospe. Upe tiémpope pe segunda gérra mundiál oñepyrũma ha upérõ oĩ oñemoĩ mbaretevéva Testigokuérare. Upévare pyharekue umi ermáno oestasiona la iveíkulo pe kampaménto jerére. Enterovetéva oñemoĩ de akuérdo káda veíkulope oĩ hag̃ua peteĩ opytáva de guárdia pe pyhare pukukue. Péicha oĩramo algún provléma umi ermáno omyendýta la ilús oenkandila hag̃ua umi oúvape oataka hag̃uáicha, ha ombopu vaʼerã avei ivosína. Péicha ojeavisáta umi ermánope pyaʼe oñopytyvõmba hag̃ua. Upérõ apensa vaʼekue: “Jehová puévlo entéro mbaʼépe g̃uarãnte voi ojeprepara porãiterei”. Péro ndoikói kuri mbaʼevete ivaíva ha che trankiloite ake.

Heta tiémpo upe rire chemanduʼávo pe asambléare ahechakuaa che sy núnka ndohechaukái hague ni michĩmi okyhyjeha térã ojepyʼapyetereiha. Haʼe ipyʼaite guive ojerovia vaʼekue Jehováre ha iñorganisasiónre. Núnka ndacheresaraimoʼãi iñehémplo porãitégui.

Upe asambléa mboyvemi che sy oñepyrũ iprekursorádo rregulár. Upévare haʼe ojapysaka porã umi diskúrso oñeʼẽva pe servísio de tiémpo komplétore. Rohokuévo ógape haʼe heʼi vaʼekue oréve: “Che ningo asegise aservi de prekursóra. ¿Péro mbaʼéicha piko añatendéta ñande rógare ha ajapóta avei la che prekursorádo?”. Upévare haʼe oporandu oréve ikatúpa roipytyvõ chupe ogapýpe, ha ore roʼe chupe ke si. Upe guive káda únope onkarga omopotĩ hag̃ua peteĩva térã mokõi koty rorambosa mboyve. Upéi roho rire eskuélape haʼe ohómi orrevisa ipotĩpa ha oĩmbápa entéro mbaʼe hendápe porã, ha upéi ae oho predikasiónpe. Che sy hembiapoiterei vaʼekue, upéicharõ jepe okuida porãiterei orerehe. Rog̃uahẽ rire eskuélagui rokaru hag̃ua, siémpre oĩ orendive. Sapyʼánte rosẽmi vaʼerã predikasiónpe che sýndi rog̃uahẽ rire eskuélagui. Upéva tuicha orepytyvõ vaʼekue rontende hag̃ua mbaʼeichaitépa ombaʼapo umi prekursór.

Arekórõ guare 16 áño añepyrũ che prekursorádo rregulár. Upe tiémpope che túa ndahaʼéi vaʼekue gueteri Testígo, péro lomímonte haʼe oikuaase vaʼekue mbaʼépa che ajapo predikasiónpe. Peteĩ pyharépe amombeʼu chupe heta añehaʼãha atopa hag̃ua peteĩ persóna ostudiaséva chendive la Biblia, péro ndatopái avave. Mokõivévante rokirirĩ ha upéi aporandu chupe: “¿Nderestudiaséi piko chendive?”. Che túa oñemoĩ opensa sapyʼaite ha upéi heʼi chéve:  “Legálmente ndaikuaái mbaʼérepa ndaikatuichéne astudia nendive”. Upéicha rupi che primer estudiánte de la Biblia haʼe vaʼekue che túa. Amombaʼeterei vaʼekue ningo upéva.

Rostudia oñondive pe lívro hérava “La verdad os hará libres”. Rostudiavévo rohóvo ahechakuaa che túa chepytyvõha astudia porãve hag̃ua la Biblia ha chekatupyryve hag̃ua aporomboʼévo. Por ehémplo peteĩ pyharépe roleepa rire peteĩ párrafo papa heʼi chéve: “Antende la heʼíva ko lívro, ¿péro mbaʼéicha nde reikuaa siertoha la heʼíva?”. Legálmente chesorprende upéva. Ha upémarõ haʼe chupe: “Koʼag̃aite ndaikuaái mbaʼépa haʼéta ndéve, péro ág̃a jastudia jey vove akontestáta ndéve”. Ha upeichaite ajapo. Atopa unos kuánto téxto bíblico ohechaukáva siertoha la rostudia vaʼekue. Upe guive astudiave ha péicha ajeprepara porã ore estudiorã. Koʼã mbaʼe chepytyvõ aikuaa porãve hag̃ua la Biblia heʼíva ha che túa avei ou ojerovia mbarete. Upéi ojapo umi mbaʼe oaprendéva ha ojevautisa áño 1952-pe.

Arekópe 17 áño ava ógagui. Upe tiémporupi avei Jetha oñepyrũ oservi de misionéra, a ha Don katu oho Betélpe. Mokõivévante ovyʼaiterei iñasignasiónpe ha upéva tuichaiterei chemokyreʼỹ. Upévare amondo che solisitu Betélpe ha avei aha hag̃ua Eskuéla de Galaádpe. Upéi aheja Jehovápe todesidi moõpa aservíta. ¿Mbaʼépa oiko upéi? Áño 1946-pe añeinvita aha hag̃ua Betélpe.

Ojapo 75 áño aservi hague Betélpe ha arresivíma diferénte asignasión, upévare aaprendéma heta mbaʼe. Por ehémplo aimprimikuaa hag̃ua umi lívro ha ajapo hag̃ua kontavilida. Avei chemboʼe hikuái ajoguakuaa hag̃ua umi mbaʼe oñekotevẽva Betélpe ha amondo hag̃ua ótro paíspe heta mbaʼe iñimportánteva. Péro oĩ álgo iñimportantevéva. Betélpe aaprende heta mbaʼe la Bíbliagui pe adorasión matutína ha umi diskúrso rupive, ha upéva chegustaiterei.

Heta mbaʼe aaprende avei pe che ermáno héravagui Karl. Haʼe oñepyrũ oservi Betélpe áño 1947-pe. Karl ostudiakuaaiterei la Biblia ha oporomboʼekuaa. Peteĩ vuéltape areko kuri peteĩ diskúrso ha ajerure chupe tachepytyvõmi. Amombeʼu che ermánope ambyaty hague hetaiterei informasión, péro ndaikuaapavéima kuri mbaʼéichapa amohendapáta umíva. Haʼe sólamente oporandu chéve: “¿Mbaʼépa pe téma prinsipál nde diskúrsope?”. Ensegída apillaitéma la heʼiséva chéve. Che aipurúnte vaʼerã pe informasión omyesakã porãva pe téma ha umi ótro amboykénte vaʼerã. Núnka ndacheresaraivéima upévagui.

Umi roservíva Betélpe rovyʼa hag̃ua ore servísiope, roñehaʼãmbaite vaʼerã avei ropredika. Péicha ikatúta  roreko umi experiénsia oremokyreʼỹva. Por ehémplo chemanduʼa peteĩ kaʼaruete rohórõ guare ropredika peteĩ sóna héravape Bronx, Nueva Yórkpe. Peteĩ ermáno ha che roho rovisita peteĩ kuñakarai oheja vaʼekuépe umi rrevísta Ñemañaha ha ¡Pepáyke! Roñepyrũ hag̃ua roʼe chupe: “Ko kaʼaru rokomparti hína la héntendi peteĩ mensáhe iporãva oĩva la Bíbliape”. Pe kuñakarai heʼi oréve: “Peñeʼẽtarõ chéve la Bíbliare, peg̃uahẽ katu”. Rolee hendive unos kuánto téxto bíblico oñeʼẽva Ñandejára Rréinore ha pe múndo pyahúre. Upéi rohechakuaa ogustaiterei hague upéva pe kuñakaraípe, pórke pe sigiénte semána roho jeýrõ guare haʼe oreraʼarõma unos kuánto iñamigokuérandi. Kon el tiémpo ko kuñakarai ha iménagui oiko testígo de Jehová.

Che adesidíma kuri amendaseha, péro ohasa raẽ 10 áño aikuaa hag̃ua che rembirekorãme. ¿Mbaʼépa chepytyvõ vaʼekue atopa hag̃ua peteĩ tembireko ikatupyrýva? Añemboʼe meme vaʼekue Jehovápe, ha ajepyʼamongetámi vaʼerã mbaʼépa ajapose amenda rire.

Ohasa rire pe asambléa ojejapo vaʼekue pe Estádio de los Yánkeespe áño 1953-pe, aikuaa peteĩ ermána héravape Mary Aniol. Haʼe oho vaʼekue pe segunda kláse de Galaádpe che ermánandi. Upéi oñepyrũ oservi de misionéra oñondive elmímo lugárpe. Mary kyreʼỹme omombeʼu chéve mbaʼéichapa la iñasignasión pe Caríbepe, ha oñeʼẽ chéve umi kúrso bíblico orekóvare upépe. Rojokuaavévo rohóvo rohechakuaa mokõivévante rosegiseha roservi de tiémpo kompléto. Upéi rojoayhúma rohóvo ha romenda abril de 1955-pe. Heta vésema ahecha Mary haʼeha peteĩ rregálo Jehová omeʼẽva chéve, haʼe ningo omoĩ chéve peteĩ ehémplo iporãitereíva. Tahaʼe haʼéva pe asignasión oñemeʼẽva chupe haʼe vyʼápe ojapo. Mary ombaʼapo jejopy, oñeinteresa ipyʼaite guive hapicháre ha omotenonde meme Ñandejára Rréino (Mat. 6:33). Haʼe chemoirũ porã vaʼekue aservírõ guare de superintendénte de sirkuíto 3 áñore, ha 1958-pe roñeinvita roho hag̃ua roservi Betélpe.

Heta mbaʼe aaprende vaʼekue che rembirekógui. Por ehémplo romenda ramóme rodesidi vaʼekue roleetaha la Biblia oñondive, ha roleémi vaʼerã káda día 15 versíkulorupi. Rolee rire peteĩ párte, roñepyrũ roñemongeta umi téxtore ha roanalisa mbaʼéichapa ikatu rojapo la heʼíva upépe. Mary heta vése omombeʼúmi vaʼerã chéve la oaprende vaʼekue Galaádpe, térã oservírõ guare de misionéra. Upéva tuicha chepytyvõ vaʼekue chearanduve hag̃ua, ajapo porãve hag̃ua umi diskúrso ha amokyreʼỹkuaave hag̃ua umi ermánape (Prov. 25:11).

Che rembireko ahayhuetéva ningo omano chehegui áño 2013-pe. Ahechaseterei jeýmango chupe pe múndo pyahúpe. Péro ajedesidietéma upe aja asegitaha aaprende heta mbaʼe, ha ajeroviataha Jehováre che pyʼaite guive (Prov. 3:​5, 6). Avyʼaiterei apensa jave umi mbaʼe ojapótavare Ñandejára puévlo múndo pyahúpe. Upe tiémpope ñane “Mboʼehára Ijojahaʼỹva” ñanemboʼéta heta mbaʼe ipyahúva ha jaikuaavéta chupe. Aagradeseterei ningo Jehovápe chemboʼe haguére heta mbaʼe ha ohechauka haguére cherayhuha namereséiramo jepe.