1. ¿Mbaʼépa heta persóna opensa pe jeikove opaveʼỹvare?

 HETA persóna oñehaʼã okaru porã ha ojapo meme ehersísio hesãi hag̃ua, péro nopensái upe haguére oikovetaha pára siémpre. Ikatu oĩ opensáva upéva imposivleha, térã heʼi hikuái ndaigustomoʼãiha pórke hasypátama ijedaiterei vove. Péro Jesús nontendekái vaʼekue ndaigustomoʼãiha jaiko pára siémpre oñeʼẽrõ guare upe esperánsare Juan 3:16 ha 5:​24-pe.

2. ¿Mbaʼépa omboʼe Juan kapítulo 6? (Juan 6:​39, 40).

² Peteĩ vuéltape Jesús ombohetave umi pan ha umi piraʼi omongaru hag̃ua hetaiterei persónape. a Upérõ ojehecharamoiterei la haʼe ojapo vaʼekue, ha la heʼi vaʼekue al día sigiénte katu ojehecharamovéntema. Umi hénte Jesús omongaru vaʼekue oho hapykuéri Capernaúm peve, opytáva ag̃ui Galiléagui. Upépe haʼe heʼi chupekuéra umi omanóva ikatuha orresusita ha oikove pára siémpre (elee Juan 6:​39, 40). Epensamíntena umi ne hénte ha ne amigokuéra omano vaʼekuére. La Jesús heʼi vaʼekue ohechauka hetaiterei hénte omanóva ikatuha oikove jey, ha nde ha umi rehayhúva ikatuha peiko pára siémpre. Péro heta héntepe ijetuʼu ontende hag̃ua umi ótra kósa Jesús heʼi vaʼekue Juan kapítulo 6-pe. Jahechamína la heʼi vaʼekue.

3. Ohechaukaháicha Juan 6:​51, ¿mbaʼépa heʼi vaʼekue Jesús ijehe?

³ Jesús ojapo rire peteĩ milágro omongaru hag̃ua hetaiterei  héntepe, haʼekuéra imanduʼa pe maná Jehová omeʼẽ vaʼekuére umi ituakuéra ypykuépe. La Biblia heʼi voi pe manáre haʼe hague pe “aliménto” térã pe “pan oúva yvágagui” (Sal. 105:40; Juan 6:31). Oñeñeʼẽ rupi pe manáre Jesús oaprovecha omboʼe umi héntepe peteĩ mbaʼe iñimportantetereíva. Ñandejára omeʼẽ vaʼekue pe maná peteĩ milágro rupive, péro umi hoʼu vaʼekue lomímonte kon el tiémpo omano (Juan 6:49). Jesús heʼi vaʼekue haʼe haʼeha “pe pan verdadéro oúva yvágagui”, “pe pan Ñandejára omeʼẽva” ha “pe pan omeʼẽva vída etérna” (Juan 6:​32, 33, 35). Péro Jesús ha pe maná idiferenteterei vaʼekue. Jesús voi heʼi vaʼekue: “Che hína pe pan oguejýva yvágagui ha omeʼẽva vída, oĩramo hoʼúva ko pan oikovéta pára siémpre” (elee Juan 6:51). Upémarõ umi judío oñekonfundipaite. Haʼekuéra nontendéi mbaʼérepa Jesús heʼi haʼeha pe pan oúva yvágagui, hiʼarive heʼi upe “pan” iporãiteveha pe maná Ñandejára omeʼẽ vaʼekuégui. Upéi Jesús heʼi chupekuéra: “Pe pan hína che rete”. ¿Mbaʼépa la heʼise vaʼekue Jesús? Iñimportánte jaikuaa mbaʼépa haʼe omboʼese vaʼekue, pórke péicha jaikuaáta mbaʼéichapa ikatu jaikove pára siémpre umi jahayhúvandi. Jahechamína mbaʼépa la Jesús omboʼese vaʼekue.

PE PAN OMEʼẼVA VÍDA HA HETE

4. ¿Mbaʼérepa oĩ vaʼekue umi oñemondýiva ha ipochýva Jesús heʼívare?

⁴ Oĩ vaʼekue umi oñemondýiva ha ipochýva Jesús heʼi haguére omeʼẽtaha hete “umi hénte oĩva ko múndope oikove hag̃ua”. Ikatu oime opensa raʼe hikuái Jesús oipotaha haʼekuéra hoʼu peteĩ umáno roʼo (Juan 6:52). Upéi Jesús heʼi álgo oiméne tuichaitevéntema omondýiva chupekuéra. Haʼe heʼi: “Ndapeʼúiramo pe Yvypóra Raʼy roʼo ha ndapeʼúiramo huguy, ndaikatumoʼãi peikove” (Juan 6:53).

5. ¿Mbaʼérepa ikatu ñaĩ segúro Jesús ndojeruréi hague umi héntepe hoʼu hag̃ua huguy?

⁵ Noé tiémpopema voi Ñandejára oproivi vaʼekue ojeʼu tuguy (Gén. 9:​3, 4). Upéi Ñandejára oproivi jey la mísma kósa omeʼẽrõ guare iléi umi israelítape. Upérõ ojeʼe vaʼekue oimeraẽ hoʼúva tuguy ‘ojejuka vaʼerãha’ (Lev. 7:27). Jesús omboʼe vaʼekue ojejapo vaʼerãha Moisés léi heʼíva (Mat. 5:​17-19). Upévare ikatu jaʼe Jesús ni mbaʼevéicharõ ndojeruremoʼãi hague umi judíope hoʼu hag̃ua hoʼo ni huguy. Añetehápe Jesús omboʼese vaʼekue umi héntepe mbaʼépa ojapo vaʼerã ohupyty hag̃ua “jeikove opaveʼỹva” (Juan 6:54).

6. ¿Mbaʼérepa ikatu jaʼe Juan 6:​53-pe Jesús omoĩnte hague peteĩ ehémplo?

⁶ Ñantende porãiterei Jesús oipuru haguénte peteĩ ehémplo omboʼe hag̃ua umi judíope. Haʼe ojapóma vaʼekue voi upéva oñeʼẽrõ guare pe kuña samaritánape. Upérõ Jesús heʼi vaʼekue: “Oimeraẽ hoʼúva pe y che ameʼẽtava, núnka ndaijuheimoʼãvéima. Pe y ameʼẽtava chupe haʼetéta peteĩ yvu omeʼẽva y oporomoingovéva pára siémpre” (Juan 4:​7, 14). b Upérõ Jesús ndeʼiséi vaʼekue pe samaritana oikovetaha pára siémpre hoʼu haguérente y peteĩ pósogui. Upéicha avei oñeʼẽrõ guare umi héntepe Capernaúmpe ndeʼiséi vaʼekue haʼekuéra oikovetaha pára siémpre hoʼúramo hete ni huguy.

¿MBAʼÉREPA IDIFERÉNTE LA JESÚS HEʼI VAʼEKUE ÓTRA VUÉLTAPE?

7. ¿Mbaʼépa algúno heʼi Juan 6:53 rehe?

⁷ Oĩ hénte rrelihiósa heʼíva Juan 6:​53-pe Jesús oexplika hague mbaʼépa ojejapo vaʼerã  pe Séna del Señórpe. ¿Mbaʼére heʼi hikuái upéva? Pórke la Jesús heʼi vaʼekue pe Séna del Señórpe ojogua lénto la haʼe heʼi vaʼekuépe Juan 6:​53-pe (Mat. 26:​26-28). Koʼã persóna heʼi enterove oĩva pe Séna del Señórpe hoʼu vaʼerãha pe pan ha pe víno oñembohasáva. ¿Siértopa la heʼíva hikuái? Iñimportánte ñaanalisa porã upéva, pórke káda áño ko múndo tuichakuére oñembyaty ñanendive heta hénte ogueromanduʼa hag̃ua pe Séna del Señór. Jahechamína mbaʼépepa idiferénte la heʼíva Juan 6:53 la Jesús heʼi vaʼekuégui omoñepyrũrõ guare pe Séna del Señór.

8. ¿Mbaʼépepa idiferénte la oñemombeʼúva Juan 6-pe ha la oikóva oñepyrũrõ guare pe Séna del Señór? (Ehecha pe taʼanga).

⁸ Jahechamína mbaʼérepa ikatu jaʼe idiferenteha la omombeʼúva umi mokõi téxto. Primero, jareko vaʼerã enkuénta arakaʼépa ha moõpa Jesús heʼi vaʼekue la jatopáva Juan 6:​53-56-pe. Upérõ Jesús oñeʼẽ hína kuri heta judíope Galiléape áño 32-pe. Upérõ ofalta gueteri kuri un áño Jesús omoñepyrũ hag̃ua pe Séna del Señór Jerusalénpe. Segundo, ñanemanduʼami mávapepa Jesús oñeʼẽ hína kuri. La majoría umi hénte oĩva Galiléape oipotánte Jesús omeʼẽ chupekuéra hoʼu vaʼerã. Chupekuéra g̃uarã ndahaʼéi la iñimportantevéva oaprende Ñandejáragui (Juan 6:26). Upéicha rupi Jesús omboʼérõ guare álgo hasýva oñentende hag̃ua, algúno ou ndojeroviavéi hese ha oĩ umi odesidíva nomoirũvéintema chupe (Juan 6:​14, 36, 42, 60, 64, 66). Péro idiferentete la oiko vaʼekue  un áñorupi upe rire. Áño 33-pe Jesús omoñepyrũ vaʼekue pe Séna del Señór, upérõ oĩ vaʼekue hendive umi 11 ijapóstol ifiélva. Haʼekuéra omoirũ vaʼekue Jesúspe nontendepáirõ jepe umi mbaʼe haʼe omboʼéva. Umi apóstol ndojoguái vaʼekue la majoría umi hénte oĩvape Galiléape, pórke haʼekuéra oĩ segúro Jesús haʼe hague Ñandejára Raʼy oúva yvágagui (Mat. 16:16). Upévare Jesús ofelisita vaʼekue ijapostolkuérape ha heʼi chupekuéra: “Peẽ ndapecherejái ni ahasárõ guare umi situasión ijetuʼúva” (Luc. 22:28). Koʼã mokõi mbaʼe ohechaukáma ñandéve Juan 6:53 noñeʼẽiha pe Séna del Señór rehe. Péro oĩ hetave mbaʼe oaseguráva ñandéve upéva.

¿MBAʼÉICHAPA IDEPROVÉCHO NDÉVE LA JESÚS OMBOʼE VAʼEKUE?

9. ¿Mávarepa oñeʼẽ Jesús pe Séna del Señórpe?

⁹ Pe Séna del Señórpe Jesús ombohasa vaʼekue pan ilevaduraʼỹva ijapostolkuérape, ha heʼi chupekuéra upéva orrepresentaha hete. Upéi ombohasa chupekuéra víno peteĩ kópape ha heʼi chupekuéra upéva orrepresentaha huguy, ha ‘huguy rupive ojejapoha peteĩ kompromíso’ (Mar. 14:​22-25; Luc. 22:20; 1 Cor. 11:24). La Jesús heʼi vaʼekue upe kompromísore iñimportanteterei. Ko kompromíso pyahu ndojejapói enterove yvypórandi, síno ko kompromíso ojapo Jehová pe “Israel rogaygua ndive” añoite. Umíva hína umi ogovernátava Jesús ndive “Ñandejára Rréinope” (Heb. 8:​6, 10; 9:15). Umi apóstol nontendepái vaʼekue upérõ mbaʼépa heʼise pe kompromíso. Péro tiémpo riremínte oñeunhíta kuri chupekuéra espíritu sánto rupive oike hag̃ua pe kompromíso pyahúpe. Péicha haʼekuéra ikatúta oĩ Jesús ndive yvágape (Juan 14:​2, 3).

10. ¿Mbaʼérepa avei idiferénte la Jesús heʼi vaʼekue Galiléape ha la heʼi vaʼekue pe Séna del Señórpe? (Ehecha pe taʼanga).

¹⁰ Jareko vaʼerã enkuénta pe Séna del Señórpe Jesús oñeʼẽ hague umi ‘ovecha mbovymívapente’. Ko grúpo michĩvape oike raẽ Jesús apostolkuéra ifiélva. Haʼekuéra oĩ vaʼekue Jesús ndive pe pyhare haʼe omoñepyrũrõ guare pe Séna del Señór (Luc. 12:32). Jesús ojerure vaʼekue chupekuéra hoʼu hag̃ua pe pan ha pe víno. Kon el tiémpo oĩvéta kuri oikéva ko grúpo michĩvape, ha haʼekuéra avei hoʼu vaʼerã pe pan ha pe víno ogueromanduʼávo pe Séna del Señór. Umi oĩva ko grúpo michĩvape orekóta hendag̃ua Jesús ndive yvágape. Péicha jahecha idiferénte hague la oikóva pe Séna del Señórpe ha la oiko vaʼekue Galiléape. Pe Séna del Señórpe Jesús oñeʼẽ vaʼekue peteĩ grúpo michĩvarente, péro Galiléape haʼe oñeʼẽ vaʼekue hetaiterei héntepe.

11. ¿Mbaʼérepa jaʼekuaa la Jesús heʼi vaʼekue Galiléape ndahaʼéi hague unos kuántope g̃uarãnte?

¹¹ Jesús oñeʼẽrõ guare umi héntepe Galiléape áño 32-pe, la majoría umi persóna oipotánte kuri Jesús omeʼẽ chupekuéra pan hoʼu hag̃ua. Péro haʼe oñehaʼã vaʼekue omboʼe chupekuéra oĩha peteĩ mbaʼe ideprovechovétava chupekuéra, pórke upéva rupive haʼekuéra ikatúta oikove pára siémpre. Jesús heʼi vaʼekue umi omanóva ikatuha orresusita pe ára pahápe oikove hag̃ua pára siémpre. Upérõ Jesús noñeʼẽi vaʼekue peteĩ vendisión ohupytýtavare unas kuánta persónante ojapo haguéicha pe Séna del Señórpe. Upéva rangue, Galiléape haʼe oñeʼẽ vaʼekue peteĩ mbaʼe iporãitereívare ikatúva ohupyty entéro persóna. Upévare Jesús heʼi vaʼekue: “Oĩramo hoʼúva ko pan oikovéta pára siémpre. Pe pan hína che rete, ha che ameʼẽta umi  hénte oĩva ko múndope oikove hag̃ua” (Juan 6:51).

12. Jesús heʼi haguéicha, ¿mbaʼéichapa ojehupyty pe jeikove opaveʼỹva?

¹² Jesús oñeʼẽrõ Galiléape, ¿heʼisépa raʼe entéro persóna ikatutaha oikove pára siémpre ojapoʼỹre mbaʼeve? Nahániri, haʼe heʼi vaʼekue ohupytytaha upe vendisión sólamente umi hoʼúva pe pan. Upéva heʼise umi hénte tekotevẽha ohechauka ojeroviaha Jesúsre. Oĩ hénte heʼíva ijehe kristianoha, ha opensáva ovaletereimaha heʼi haguérente Jesús haʼeha isalvadór ha ojeroviaha hese (Juan 6:29). Péro tekotevẽ ningo jajapo ótra kósa. Amo ipahápe, heta umi oĩ vaʼekue Galiléape ñepyrũrã ojerovia Jesúsre, péro upéi oheja chupe hikuái. ¿Mbaʼérepa oiko vaʼekue upéva?

13. ¿Mbaʼépa ojapo vaʼerã umi hénte añetehápe oiko hag̃ua chuguikuéra Jesús disípulo?

¹³ La majoría umi hénte Jesús omongaru vaʼekue osegi vaʼekue omoirũ chupe haʼe omeʼẽ aja chupekuéra la oipotáva. Koʼã hénte oipota vaʼekue Jesús osegi oporomonguera, oporomongaru ha omboʼe umi mbaʼe ogustávante chupekuéra. Péro Jesús ohechauka porã koʼã héntepe ndoúi hague ko yvy ape ári omeʼẽ hag̃uánte chupekuéra la oipotáva. Haʼe ou vaʼekue omboʼe hag̃ua la héntepe mbaʼépa ojapo vaʼerã oiko hag̃ua chuguikuéra idisípulo. Umi hénte tekotevẽ kuri oho Jesús rendápe, upéva heʼise oasepta vaʼerãha la omboʼéva ha iñeʼẽrendu vaʼerãha chupe (Juan 5:40; 6:44).

14. ¿Mbaʼépa jajapo vaʼerã ñanevenefisia hag̃ua Jesús rete ha huguy?

¹⁴ Jesús omboʼe porãiterei vaʼekue umi héntepe  tekotevẽha ojerovia. ¿Péro mbaʼe rehepa la ojerovia vaʼerã? Jesús omeʼẽ hague sakrifísioramo hete ha huguy ikatu hag̃uáicha haʼekuéra ohupyty jeikove opaveʼỹva. Iñimportanteterei kuri umi judío ojerovia la ojehupytýtavare Jesús sakrifísio rupive, ha ñande avei koʼág̃a jajerovia vaʼerã péicha (Juan 6:40). Upéicharõ la Jesús heʼi vaʼekue Juan 6:​53-pe ohechauka tekotevẽha jajerovia Jesús sakrifísiore jaikove hag̃ua pára siémpre. Hetaiterei persóna ikatu hína ohupyty ko vendisión ijojahaʼỹva (Efes. 1:7).

15, 16. ¿Mbaʼépa ñanemboʼe Juan kapítulo 6?

¹⁵ La heʼíva Juan kapítulo 6 iñimportanteterei enterovépe g̃uarã. Upépe ojekuaa Jesús ohayhuetereiha la héntepe. Haʼe oĩrõ guare Galiléape omonguera umi hasývape, oñeʼẽ Ñandejára Rréinore ha ojasegura umi hénte oreko hag̃ua la hoʼumi vaʼerã (Luc. 9:11; Juan 6:​2, 11, 12). Péro iñimportanteveha, upérõ haʼe omboʼe vaʼekue haʼe haʼeha “pe pan omeʼẽva vída etérna” (Juan 6:​35, 48).

¹⁶ Jesús heʼi vaʼekue orekoha “ótro ovechakuéra”. Umíva ndoʼúi pe pan ni pe víno ojegueromanduʼa jave káda áño pe Séna del Señór (Juan 10:16). Péro lomímonte tuicha ovenefisia chupekuéra Jesús rete ha huguy. Upearã ohechauka vaʼerã hikuái ojeroviaha Jesús sakrifísiore (Juan 6:53). Péro umi hoʼúva pe pan ha pe víno ohechauka oĩha pe kompromíso pyahúpe ha ogovernataha hikuái Ñandejára Rréinope. Péicha jahecha la heʼíva Juan kapítulo 6 iñimportanteha umi unhídope g̃uarã ha avei umi ‘ótro ovechakuérape’. Upe kapítulo ñanemboʼe tekotevẽha jajerovia ikatu hag̃uáicha jaikove pára siémpre.