¿Releépa raʼe umi rrevísta Ñemañaha osẽ vaʼekue ko áñope? Ehechamína ikatúpa nemanduʼa koʼã mbaʼére:

¿Mbaʼéichapa Jehová otrata kuñanguérape?

Jehová ndoapoʼíri chupekuéra ha ndahaʼéi ku ohayhuvéva kuimbaʼekuérape. Jehová ohendu ermanakuérape ha oñeinteresa la oñandúvare ha oipyʼapývare chupekuéra. Avei ojerovia ermanakuéra ojapotaha ivolunta (w24.01, páh. 15, 16).

Efesios 5:7 heʼi: “Aníkena pejeheʼa hesekuéra”, ¿mbaʼéichapa ikatu jasegi ko konsého?

Apóstol Pablo ñandeavisa vaʼekue ani hag̃ua jajeheʼa umi nañanepytyvõmoʼãivare ñaneñeʼẽrendu hag̃ua Jehovápe. Ñañatendeterei vaʼerã pórke ikatu jahasa tiémpo algúnondi umi rred sosiál rupive, ha ndahaʼéi katuete en persóna añónte (w24.03, páh. 22, 23).

¿Mbaʼeichagua informasión japúpa tekotevẽ ñamboykete?

Ñañatende vaʼerã oimérõ peteĩ ermáno térã ermána okomparti álgo opensáva ñanemokyreʼỹtaha, péro ndorrevisái siértopa hína la ojeʼéva. Avei ñañatende vaʼerã og̃uahẽ jave korréo algún extráñogui térã oĩ jave umi apóstata oikuaaséva guaʼu la Biblia heʼíva (w24.04, páh. 12).

¿Mbaʼépa jaikuaa ha mbaʼépa ndajaikuaái Jehová ohusga lájatagui Salomónpe, ha umi hénte omano vaʼekue Sodoma ha Gomórrape ha pe Dilúviope?

Ndajaikuaái Jehová ohundípa rakaʼe chupekuéra pára siémpre. Péro jaikuaa haʼe orekoha enkuénta heta mbaʼe ha oiporiahuverekoitereiha la héntepe (w24.05, páh. 3, 4).

¿Mbaʼérepa ikatu jaʼe Jehová haʼeha peteĩ “Ita Guasu”? (Deut. 32:4).

Pórke Jehová ñandeprotehe. Avei ikatu jajerovia hese haʼe okumpli rupi siémpre ipromesakuéra. Ha jaikuaa Jehová núnka nokambiamoʼãiha umi kualida porã orekóva ha umi mbaʼe ojaposéva (w24.06, páh. 26-28).

¿Mbaʼépa nepytyvõta rejepokuaa hag̃ua ne kongregasión pyahúpe?

Ejerovia Jehováre, haʼe nepytyvõta yma oipytyvõ haguéicha isiervokuérape. Ani ekompara ne kongregasión pyahu ne kongregasión yma guarére. Embaʼapókena ne kongregasión pyahúpe ha eñehaʼã ereko hag̃ua amígo pyahu (w24.07, páh. 26-28).

¿Mbaʼépa ñanemboʼe umi mbohapy ehémplo oĩva Mateo kapítulo 25-pe?

Pe ehémplo oñeʼẽva umi ovecha ha kavaráre ohechauka tekotevẽha jajerovia ha ñandefiél. Pe ehémplo oñeʼẽva umi kuñataĩ iñarandúva ha umi oñembotavývare omboʼe jajeprepara porã vaʼerãha. Ha pe ehémplo oñeʼẽva umi vosa henyhẽvare plátagui ohechauka iñimportanteha ñandeguápo (w24.09, páh. 20-24).

¿Mboýpa ijyvate vaʼekue pe entráda itechopáva oĩva Salomón témplope?

Unos kuánto manuskríto yma guarépe 2 Crónicas 3:​4-pe heʼi pe entráda itechopáva ijyvate hague “120 codo”, upéva hína 53 métro. Péro oĩ avei umi manuskríto ikatúvare ñakonfia heʼívante “20 codo”, upéva hína 8 métro 90 sentímetro. Upéva isentidove jarekóvo enkuénta mboýpa iñanambusu vaʼekue pe témplo pare (w24.10, páh. 31).

¿Mbaʼépa ohechaukase la Biblia heʼívo peteĩ siérvo ministeriál ‘peteĩnte hembireko vaʼerãha’? (1 Tim. 3:12).

Peteĩ siérvo ministeriál omendáva peteĩnte hembireko vaʼerã ha ni mbaʼevéicharõ nomoakãratĩri vaʼerã hembirekópe. Avei ohechauka hag̃ua ifielha hembirekópe, ndoikomoʼãi onovillea ótro kuñáre (w24.11, páh. 19).

¿Mbaʼérepa jaʼekuaa Juan 6:53 noñeʼẽiha pe Séna del Señór rehe?

Juan 6:​53-pe Jesús heʼi vaʼekue tekotevẽha ojeʼu hete ha huguy. Koʼã mbaʼe haʼe heʼi vaʼekue Galiléape, áño 32-pe. Upépe oĩ kuri hetaiterei judío ndojeroviáiva gueteri hese. Péro Jesús omoñepyrũrõ guare pe Séna del Señór un áño upe rire, sólamente oñeʼẽ vaʼekue umi ogovernátavandi yvágape (w24.12, páh. 10, 11).