1, 2. ¿Mbaʼépa hína umi “mbaʼe iporãva” ojapóva umi ansiáno kongregasiónpe?

 OIMÉRÕ ojapóma un tiémpo reservi hague de siérvo ministeriál, ikatu hína oime eñehaʼã eguereko hag̃ua umi kualida oñekotevẽva oiko hag̃ua ndehegui ansiáno. ¿Ndépa rejapose umi “mbaʼe iporãva” ojapóva umi ansiáno kongregasiónpe? (1 Tim. 3:1).

² ¿Mbaʼe mbaʼépa ojapo umi ansiáno? Haʼekuéra opredika kyreʼỹme, ombaʼapo jejopy okuida porã hag̃ua umi ermánore ha oporomboʼe hag̃ua. Avei omombarete pe kongregasiónpe umi mbaʼe heʼi ha ojapóva rupive. Upévare voi la Biblia heʼi koʼã ansiáno iguapoitévare haʼeha peteĩ ‘rregálo’ kongregasiónpe g̃uarã (Efes. 4:8).

3. ¿Mbaʼéichapa peteĩ ermánogui ikatu oiko ansiáno? (1 Timoteo 3:​1-7; Tito 1:​5-9).

³ ¿Mbaʼéichapa ikatu oiko ndehegui ansiáno? Eservi hag̃ua de ansiáno ndahaʼéi ku ehorõguáicha rekonsegi hag̃ua peteĩ traváho. Ko múndope sapyʼánte ndevalérõ peteĩ mbaʼépente pe patrón oipotaháicha, ikatúma oñemeʼẽ ndéve pe traváho. Péro reservi hag̃ua de ansiáno ndaikatúi ndevale epredika ha eporomboʼe hag̃uánte, síno tekotevẽ rekumpli hetave rrekisíto oĩva la Bíbliape, ha umíva jatopa 1 Timoteo 3:​1-7 ha Tito 1:​5-9-pe (elee). Ko artíkulope jahecháta algúno umi rrekisíto oñemensionáva koʼã téxtope. Ñaanalisáta mbaʼépa ikatu ojapo peteĩ ermáno oñeñeʼẽ porã hag̃ua hese, mbaʼéichapa ikatu omoakã porã hogapy, ha mbaʼépa ikatu oipytyvõ chupe oservi porã hag̃ua kongregasiónpe.

OÑEÑEʼẼ PORÃ VAʼERÃ NDEREHE

4. ¿Mbaʼépa ndeʼíri vaʼerã umi hénte nderehe?

⁴ Oiko hag̃ua ndehegui ansiáno, ‘umi hénte ndorekói vaʼerã mbaʼeve ivaíva heʼi vaʼerã nderehe’. Upéva heʼise kongregasiónpe  oñeñeʼẽ porãha nderehe nekondúkta porã haguére, ha avave ndaikatúi ndeakusa rejapo hague álgo ivaíva. Avei ‘umi hénte noĩriva kongregasiónpe oñeʼẽ porã vaʼerã nderehe’. Jaikuaa ningo umi ndoservíriva Jehovápe ikatuha okritika nderehe umi mbaʼe regueroviávare. Péro avave ndodudái vaʼerã nde haʼeha peteĩ persóna de konfiánsa ha ikondúkta porãva (Dan. 6:​4, 5). Upévare eñeporandumína: “¿Oñeʼẽ porãpa cherehe umi ermáno kongregasionpegua, ha avei umi ndoservíriva Jehovápe?”.

5. ¿Mbaʼéichapa ikatu rehechauka ‘rejaposeha voi iporãva’?

⁵ ‘Rejapose vaʼerã voi iporãva’. Upéicha rehecháta umi kualida porã orekóva umi ótro, ha refelisitáta chupekuéra upévare. Avei revyʼaitereíta reipytyvõvo ótrope, ha nderejapomoʼãi tekotevẽkueténte síno ehecháta voi mbaʼépa ikatu rejapove (1 Tes. 2:8). ¿Mbaʼérepa umi ansiáno ojapose vaʼerã voi iporãva? Péicha haʼekuéra oipuru meméta itiémpo oñangareko porã hag̃ua umi ermánore, ha oñatende porã hag̃ua iñasignasiónre (1 Ped. 5:​1-3). Umi ansiáno hetaiterei itraváho, péro chupekuéra g̃uarã ovale la péna oimeraẽ sakrifísio tekotevẽva ojapo oipytyvõ hag̃ua ótrope (Hech. 20:35).

6. ¿Mbaʼéichapa peteĩ ermáno ikatu ohechauka ‘opororresivi porãha’? (Hebreos 13:​2, 16). (Ehecha pe taʼanga).

⁶ Nde rehechaukáta ‘repororresivi porãha’ rejapóvo iporãva ótro rehehápe. Ha umíva apytépe oĩ vaʼerã avei umi ndahaʼéiva ne amigoite (1 Ped. 4:9). Peteĩ diksionário bíblico heʼi peteĩ kuimbaʼe opororresivi porãva imbaʼeporãha umi ndoikuaáivandi jepe, ha ovyʼa ikatu haguére orresivi chupekuéra hógape. Upévare eñeporandumína: “¿Ohechakuaápa enterovéva apororresivi porãha?” (elee Hebreos 13:​2, 16). Peteĩ kuimbaʼe opororresivi porãva imbaʼeporã umi ovisitávandi chupe. Umíva apytépe umi imboriahúvandi ha umi ombaʼapo jejopývandi Jehová servísiope, por ehémplo umi superintendénte de sirkuíto ha umi diskursánte oporovisitáva (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Mbaʼéichapa umi ansiáno ikatu ohechauka ndoikoiha “iplatarayhu”?

⁷ Umi ansiáno “ndovaléi iplatarayhu”. Upéva heʼise umi mbaʼerepy ndahaʼeiha la iñimportantevéva ndéve g̃uarã. Tahaʼe ndepláta térã nemboriahu, nde ‘emotenonde meme Ñandejára Rréino’ (Mat. 6:33). Avei reipuru ne tiémpo,  ne mbaretekue ha umi mbaʼe reguerekóva emombaʼeguasu hag̃ua Jehovápe, eñangareko hag̃ua ne famíliare, ha eservi hag̃ua kongregasiónpe (Mat. 6:24; 1 Juan 2:​15-17). Upévare eñeporandumína: “¿Mbaʼeichaite pevépa iñimportánte chéve g̃uarã pe pláta? ¿Añekontentámapa ahupytýma guive umi mbaʼe aikotevẽva, térãpa siémpre aipota potave pláta ha mbaʼerepy?” (1 Tim. 6:​6, 17-19).

8. ¿Mbaʼéichapa ikatu rehechauka ‘rejejokokuaaha entéro mbaʼépe’?

⁸ ‘Rejejokokuaáramo entéro mbaʼépe’ nderehasamoʼãi la rrája mbaʼevetépe. Por ehémplo ndereikomoʼãi rekaru rasa térã reʼu rasa vevída. Avei reñemondéta ha rejarregláta hekópe porã, ha reiporavo porãta ne diversionrã. Péicha ndereikomoʼãi umi hénte ko mundopegua oikoháicha (Luc. 21:34; Sant. 4:4). Nde rejejokokuaáramo rerreaksionáta trankílo porãnte oĩramo jepe ndetrata vaíva. Avei ‘ndovaléi rekaʼu’, ha avave ndaikatúi vaʼerã heʼi nderehe reikoha remokõiterei. Upévare eñeporandumína: “¿Ahechaukápa aiko lájare ajejokokuaaha entéro mbaʼépe?”.

9. ¿Mbaʼéichapa peteĩ ermáno ohechauka ‘iñakãguapyha’ ha ‘oikoha hekópe’?

⁹ Umi ansiáno “iñakãguapy vaʼerã”. Upéva heʼise káda situasiónpe eanalisa porã vaʼerãha mbaʼépa heʼi la Biblia. Rejepyʼamongeta porã rupi umi konsého oĩvare la Bíbliape nearandu ha redesidi porã. Upévare nderejapurái redesidíntema hag̃ua peteĩ mbaʼe, síno rejaseguráta reguereko raẽ entéro umi informasión reikotevẽva (Prov. 18:13). Upéicha ikatúta redesidi porã ha rehechaukáta repensaha Jehová opensaháicha. Avei tekotevẽ ‘reiko hekópe’, péicha eñeorganisa porãta ha rejapóta entéro mbaʼe itiempoitépe ha hiʼoraitépe. Enterovévante ohechakuaa vaʼerã nde haʼeha peteĩ ermáno de konfiánsa ha esegiha umi instruksión oñemeʼẽva. Reguerekóramo entéro umi kualida oñemensiona vaʼekue katuete oñeñeʼẽ porãitereíta nderehe. Jahechamína koʼág̃a umi rrekisíto oĩva la Bíbliape tekotevẽva okumpli umi ansiáno omoakã porã hag̃ua hogapy.

EMOAKÃ PORÃ VAʼERÃ NDE ROGAPY

10. ¿Mbaʼéichapa peteĩ ermáno ohechaukáta ‘omoakã porãha hogapy’?

¹⁰ Oimérõ nde remenda ha erekóma ne família, iñimportánte oñeñeʼẽ porã avei hesekuéra. Péicha ikatúta ekumpli umi rrekisíto oiko hag̃ua ndehegui ansiáno, upévare nde ‘remoakã porã vaʼerã nde rogapy’. Entéronte ohechakuaa vaʼerã nde retrataha mborayhúpe ne famíliape, ha redesidiha umi mbaʼe ou porãtava chupekuéra. Umíva apytépe nde rejapo vaʼerã pe estúdio de família, ha reipytyvõ vaʼerã chupekuéra oho hag̃ua rreunionhápe ha osẽ hag̃ua opredika. ¿Mbaʼérepa umi omoakãva hogapy tekotevẽ ojapo koʼã mbaʼe? Apóstol Pablo heʼi vaʼekue voi: “Peteĩ kuimbaʼe ndoikuaáiramo mbaʼéichapa omoakãta hogapy, ¿mbaʼéicha piko oñangarekóta Ñandejára kongregasión rehe?” (1 Tim. 3:5).

11, 12. Peteĩ ermáno oserviséramo de ansiáno, ¿mbaʼérepa iñimportantete ifamiliakuéra oñekomporta lája? (Ehecha pe taʼanga).

¹¹ Oiméramo nde reguereko ne família haʼéva gueteri menór de eda, haʼekuéra “iñeʼẽrendu ha ojeporta porã vaʼerã”. Nde rehekomboʼe vaʼerã chupekuéra mborayhúpe. Jaikuaa ningo umi mitã ovyʼa ha ohuga vaʼerãha, ha upéva iporãiterei. Péro nde rehekomboʼe porã rupi chupekuéra, haʼekuéra iñeʼẽrendúta, opororrespetáta ha ojeporta porãta. Avei tekotevẽ rejapo ikatumíva guive reipytyvõ hag̃ua ne famíliape oreko hag̃ua peteĩ amista Jehovándi, oiko hag̃ua la Biblia heʼiháicha, ha oprogresa hag̃ua ojevautisa peve.

¹² “Ifamiliakuéra ojerovia vaʼerã ha ndojeʼéi vaʼerã hesekuéra oikoha iñakãre ni irreveldeha”. Ikatu oime peteĩ túa oreko ifamília ojevautisámava  térã oprogresáva ojevautisa hag̃ua, péro upéi pe mitã ojapo peteĩ mbaʼe ivaíva ha opeka. Péicha jave ojehecha vaʼerã pe túa okorrehi ha ohekomboʼe porãpa raʼe ifamíliape. Oimérõ ndojapói raʼe upéva, provávlemente nokumplíri hína umi rrekisíto oservi hag̃ua de ansiáno (Ehecha La Atalaya 15 de octubre de 1996, páhina 21, párrafo 6, 7).

ESERVI PORÃ KONGREGASIÓNPE

13. ¿Mbaʼéichapa ikatu rehechauka ‘nereñemohatãiha nde erévapente’ ha ‘nandekaprichosoiha’?

¹³ Umi ermáno oguerekóva umi kualida porã ideprovechoiterei kongregasiónpe. Peteĩ ermáno ‘noñemohatãiva haʼe heʼívapente’ oipytyvõ oĩ hag̃ua pyʼaguapy ermanokuéra apytépe. Avei ohendu umi ótro heʼíva ha oñehaʼã ontende la opensáva hikuái. Epensamína: Ojejapóramo peteĩ rreunión, ha la majoría umi ansiáno odesidi peteĩ mbaʼe ndohóiva la Biblia kóntrape, ¿ndépa reapojáta la haʼekuéra heʼíva, jepe reipota raʼe ojejapo ótra kósa? ‘Nandekaprichósoiramo’ ndereikomoʼãi ere jey jey tojejapo umi mbaʼe ndéve ndegustaháichante, pórke reikuaa porã iñimportantetereiha ehendu umi ótro heʼíva (Gén. 13:​8, 9; Prov. 15:22). Ni mbaʼevéicharõ ‘ndereikói vaʼerã ejodiskutise, ni nandepochyreíri vaʼerã’. Upéva heʼise ndereikomoʼãiha ndearhél térã neñeʼẽ pohýi, síno upéva rangue siémpre neamávle ha reporotrata porãta. Nde haʼe rupi peteĩ persóna ‘ipyʼaguapýva’, tuicha ikatu reipytyvõ peteĩ situasión ijetuʼúvape enterovévante ojeraha porã hag̃ua (Sant. 3:​17, 18). Reñeʼẽramo pyʼaguapýpe ikatu reipytyvõ umi ótrope oĩ hag̃ua trankílo, ha ikatu voi reipytyvõ umi oñemoĩ mbaretévape nderehe Testígo haguére (Juec. 8:​1-3; Prov. 20:3; 25:15; Mat. 5:​23, 24).

14. a) ¿Mbaʼépa ohechaukase la Biblia heʼívo pe oservítava de ansiáno ndahaʼéi vaʼerãha “peteĩ disípulo pyahu”? b) ¿Mbaʼéichapa peteĩ ermáno ikatu ohechauka ‘ifielha Ñandejárape’?

¹⁴ Peteĩ ermáno “oservítava ansiánoramo ndahaʼéi vaʼerã peteĩ disípulo pyahu”. Reservi hag̃ua de ansiáno natekotevẽi ojapo hetaiterei áñoma rejevautisa hague, péro si tekotevẽ ohasa pe tiémpo oiko hag̃ua ndehegui peteĩ kristiáno ojerovia mbaretéva. Reñenombra  mboyve ansiáno, rehechauka vaʼerã rejoguaha Jesúspe. ¿Mbaʼéichapa? Neumíldevo ha rehaʼarõkuaávo Jehová omeʼẽ peve ndéve hetave asignasión (Mat. 20:23; Filip. 2:​5-8). Nde ikatu hína rehechauka ‘ndefielha’ rejepytaso mbaretévo Jehová ykére, reikóramo haʼe oipotaháicha ha resegíramo umi instruksión haʼe omeʼẽva iñorganisasión rupive (1 Tim. 4:15).

15. ¿Tekotevẽpa peteĩ ansiáno ikatupyryeterei ojapo jave peteĩ diskúrso? Emyesakã.

¹⁵ La Biblia heʼi porãiterei umi oservíva de ansiáno “ivale vaʼerãha oporomboʼe hag̃ua”. ¿Heʼisépa upéva umi idiskursokuéra katuete iñimpresionánte vaʼerãha? Nahániri. Oĩ ningo hetaiterei ansiáno okumplipaitéva umi rrekisíto, péro noĩri hikuái umi ivalevéva apytépe ojapo jave la diskúrso. Upéicharamo jepe, haʼekuéra ojapo porãiterei la itraváho oporomboʼe jave predikasiónpe ha ojapo jave umi visíta de pastoréo (ekompara 1 Corintios 12:​28, 29 ha Efesios 4:11 heʼívare). Upéicharõ natekotevẽi ndekatupyryeterei rejapo jave peteĩ diskúrso, péro siémpre remehora vaʼerã pe reporomboʼe lája. ¿Mbaʼéichapa ikatu rejapo upéva?

16. ¿Mbaʼéichapa ikatu esegi ndekatupyryve remboʼe hag̃ua? (Ehecha pe taʼanga).

¹⁶ ‘Oñakarama hatã vaʼerã Ñandejára ñeʼẽ jajeroviávare’. Esegi hag̃ua ndekatupyryve reipuru vaʼerã la Biblia reporomboʼe jave ha emeʼẽ jave konsého. Upearã restudia porã vaʼerã la Biblia ha umi puvlikasionkuéra (Prov. 15:28; 16:23). Restudia jave, reñatende porã vaʼerã mbaʼéichapa umi puvlikasión omyesakã peteĩ téxto, upéi reipuru hag̃ua hendápe porã. Avei remboʼe jave iñimportanteterei repoko umi nerendúva korasõre. Ikatu hína resegi ndekatupyryve reporomboʼe jave rejeruréramo konsého umi ansiáno iñexperiénsiavape (1 Tim. 5:17). Umi ansiáno avei ‘omokyreʼỹ’ vaʼerã umi ermánope, péro sapyʼánte tekotevẽta avei ‘oporokorrehi’. Tahaʼe haʼeháicha, haʼekuéra siémpre oporotrata porã vaʼerã. Nembaʼeporãramo, reporohayhúramo ha reipurúramo la Biblia reporomboʼe hag̃ua katuete remehoráta. Péicha resegíta Jesús ehémplo, haʼe hína pe Mboʼehára Ikatupyryvéva (Mat. 11:​28-30; 2 Tim. 2:24).

 ESEGÍKENA EPROGRESA

17. a) ¿Mbaʼéichapa peteĩ siérvo ministeriál ikatu osegi oprogresa? b) ¿Mbaʼépa umi ansiáno oguereko vaʼerã enkuénta orrekomendáta jave peteĩ ermánope oservi hag̃ua de ansiáno? (Ehecha pe rrekuádro “ Oñerrekomendáta jave peteĩ ermánope oservi hag̃ua de ansiáno”).

¹⁷ Ikatu ningo oĩ umi siérvo ministeriál opensáva ni núnka ndaikatumoʼãiha ohupyty umi rrekisíto oñekotevẽva oiko hag̃ua chugui ansiáno. Oimérõ nde reñeñandu upéicha, aníkena nderesarái ni Jehová ni iñorganisasión nohaʼarõiha nde ndeperfékto (1 Ped. 2:21). Avei nemanduʼákena pe espíritu sánto ikatuha nepytyvõ rehupyty hag̃ua umi rrekisíto oñekotevẽva (Filip. 2:13). Eñeporandumína: “¿Oĩpa algúna kósa tekotevẽhápe amehora?”. Oimérõ upéicha ikatu reñemboʼe Jehovápe, eheka umi informasión reikotevẽva ha ejerure konsého peteĩva umi ansiánope.

18. ¿Mbaʼépa iporãta ojapo entéro umi siérvo ministeriál?

¹⁸ Entéro jaservíva Jehovápe, tahaʼe umi siérvo térã umi oservímava de ansiáno, ñañehaʼã vaʼerã jaguereko hag̃ua umi kualida oñemensionáva ko artíkulope (Filip. 3:16). ¿Ndépa reservi hína de siérvo ministeriál? Oimérõ upéicha, ¡esegíkena eprogresa! Ejerurékena Jehovápe tanembokatupyry ndedeprovechove hag̃ua chupe ha avei kongregasiónpe (Is. 64:8). Jehová tanevendesi reñehaʼãmbaite haguére rehupyty umi rrekisíto oñekotevẽva oiko hag̃ua ndehegui ansiáno.