1. ¿Mbaʼépa apóstol Pablo opensa vaʼekue umi siérvo ministeriál rehe?

 UMI siérvo ministeriál ojapo peteĩ traváho iñimportantetereíva kongregasiónpe. Apóstol Pablo omombaʼeterei vaʼekue koʼã ermáno ojerovia mbaretévape. Por ehémplo, oskrivírõ guare umi kristiáno oĩva Filípospe osaluda vaʼekue umi ansiánope, péro avei osaluda umi siérvo ministeriálpe (Filip. 1:1).

2. ¿Mbaʼéichapa oñeñandu peteĩ ermáno hérava Luis oservívo de siérvo ministeriál?

² Entéro umi ermáno, tahaʼe ijedáva térã imitãva ovyʼaiterei oservívo de siérvo ministeriál kongregasiónpe. Por ehémplo Dévanpe oñenombra vaʼekue siérvo ministeriál orekópe 18 áño. Péro peteĩ ermáno hérava Luíspe katu oñenombra siérvo orekórõ guare mas de 50 áño. Ko ermáno omombeʼu la oñandúva ha heʼi: “Avyʼaiterei ikatu haguére aservi ermáno ha ermanakuérape kongregasiónpe, haʼekuéra hetáma ohechauka chéve cherayhuha. Ha koʼág̃a aservívo de siérvo ministeriál che avei ikatu ahechauka ahayhuha chupekuéra”. Hetaiterei siérvo ministeriál oñeñandu avei péicha.

3. ¿Mbaʼe mbaʼépa ñambohováita ko artíkulope?

³ Ikatu oime nde haʼéma peteĩ ermáno ojevautisáva péro neʼĩra gueteri reservi kómo siérvo ministeriál. Upévare epensamíntena, ¿ndépa ikatu avei emoĩ pe méta reservi hag̃ua de siérvo ministeriál? ¿Mbaʼépa ikatu nemomýi rehupyty hag̃ua upéva? ¿Ha mbaʼeichagua kualidápa heʼi la Biblia reguereko vaʼerãha rehupyty hag̃ua pe méta? Ko artíkulope ñambohováita koʼã mbaʼe. Péro primero jahecháta mbaʼeichagua traváhopa ojapo umi siérvo ministeriál kongregasiónpe.

¿MBAʼÉICHAPA UMI SIÉRVO MINISTERIÁL OIPYTYVÕ KONGREGASIÓNPE?

4. ¿Mbaʼeichagua traváhopa ojapo umi siérvo ministeriál kongregasiónpe? (Ehecha pe taʼanga).

⁴ Peteĩ siérvo ministeriál haʼe peteĩ ermáno ojevautisámava. Umi ansiáno onombra koʼã ermánope espíritu sánto rupive ojapo  hag̃ua heta mbaʼe iñimportánteva kongregasiónpe. Algúno siérvo ministeriál oñenkarga ani hag̃ua ofalta ermanokuérape território opredika hag̃ua, ha avei pono ofalta puvlikasionkuéra. Oĩ siérvo oipytyvõva omopotĩ ha ojejapo hag̃ua mantenimiénto Salón del Réinope. Avei algúno oservi de akomodadór, térã oñatende pe ekípo de áudio ha vidéore rreunión aja. Entéro koʼã traváho oñenkarga umi siérvope oporopytyvõ hag̃ua. Péro la iñimportanteveha koʼã ermáno haʼe kuimbaʼe ojerovia mbaretéva. Haʼekuéra ohayhueterei Jehovápe ha oiko haʼe oipotaháicha, avei umi siérvo ipyʼaite guive ohayhu umi ermáno ha ermánape (Mat. 22:​37-39). ¿Mbaʼéichapa peteĩ ermáno ojevautisáva ikatu oñehaʼã oservi de siérvo ministeriál?

5. ¿Mbaʼépa ojapo vaʼerã peteĩ ermáno oñehaʼãva hína oservi hag̃ua de siérvo ministeriál?

⁵ La Bíbliape oĩ entéro umi rrekisíto tekotevẽva okumpli peteĩ ermáno oiko hag̃ua chugui siérvo ministeriál (1 Tim. 3:​8-10, 12, 13). Upévare ikatu hag̃uáicha reservi de siérvo ministeriál reikuaa porã vaʼerã umi rrekisíto oĩva la Bíbliape, ha upéi rembaʼapo jejopy vaʼerã reguereko hag̃ua umi kualida oñekotevẽva. Péro primero iñimportanteterei eñeporandu: “¿Mbaʼépa la chemomýiva hína aservi hag̃ua de siérvo ministeriál?”.

¿MBAʼÉPA NEMOMÝI RESERVI HAG̃UA DE SIÉRVO MINISTERIÁL?

6. ¿Mbaʼépa la nemomýi vaʼerã reservi hag̃ua ermanokuérape? (Mateo 20:28). (Ehecha pe taʼanga).

⁶ Jesucristo ningo pe ehémplo iporãvéva, pórke ojapo entéro mbaʼe ohayhúgui Itúape ha umi héntepe. Upéva la omomýi vaʼekue chupe ombaʼapo jejopy hag̃ua, ha ojapo hag̃ua umi traváho isensillovéva jepe oservi hag̃ua ótrope (elee Mateo 20:28; Juan 13:​5, 14, 15). Oimérõ ndéve nemomýi avei pe mborayhu, ikatu reĩ segúro Jehová nevendesitaha ha nepytyvõtaha oiko hag̃ua ndehegui siérvo ministeriál (1 Cor. 16:14; 1 Ped. 5:5).

7. ¿Mbaʼérepa naiporãi reservise de siérvo reipotáguinte umi ótro nemombaʼeguasu?

⁷ Ko múndope oñemombaʼe jepi umi hénte oñemoimportántevape, péro Jehová organisasiónpe ndaupeichaiete. Peteĩ ermáno oporohayhúva Jesús ojapo haguéicha, ndoikomoʼãi omandase umi ermanokuérare ni nopensamoʼãi haʼe iñimportanteveha ótrogui. Epensamíntena la ikatúvare oiko oñenombráramo  kongregasiónpe peteĩ ermáno oñemoimportántevape. Provávlemente upéi pe ermáno ndojaposemoʼãi umi traváho isensillovéva okuida hag̃ua Jehová ovechakuéra mimíre, pórke haʼe opensáta umi traváho ndahaʼeiha chupe g̃uarã (Juan 10:12). Jehová novendesimoʼãi umi oñehaʼãvape ohupyty priviléhio oipotáguinte ótro omombaʼeguasu chupe (1 Cor. 10:​24, 33; 13:​4, 5).

8. ¿Mbaʼe konséhopa omeʼẽ vaʼekue Jesús ijapostolkuérape?

⁸ Sapyʼánte umi omoirũva Jesúspe oipota vaʼekue umi priviléhio, péro la omomýiva chupekuéra naiporãi vaʼekue. Ñañeʼẽmína Santiago ha Juan kásore. Haʼekuéra ningo haʼe vaʼekue Jesús apóstol, ha peteĩ jeýpe ojerure vaʼekue Jesúspe peteĩ lugár iñimportánteva Irréinope. Jesús katu ndofelisitaiete chupekuéra pe ohupytysévare. Upéva rangue heʼi umi 12 apóstolpe: “Pe iñimportanteséva pende apytépe, oiko vaʼerã pene sirviénteramo. Ha pe oipotáva pe primer lugár, pendeservi vaʼerã enterovépe peteĩ esklávoicha” (Mar. 10:​35-37, 43, 44). Umi ermáno ohupytyséva peteĩ priviléhio oporoservi hag̃ua, haʼe hína peteĩ vendisión iporãitereíva kongregasiónpe g̃uarã (1 Tes. 2:8).

¿MBAʼÉPA NEPYTYVÕTA RESERVISE HAG̃UA DE SIÉRVO MINISTERIÁL?

9. ¿Mbaʼépa nepytyvõta reservise hag̃ua de siérvo?

⁹ Katuete ningo rehayhu Jehovápe ha reservise ótrope. Upéicharõ jepe ikatu ndahaʼéi la ndegustapáva hína umi traváho ojapóva umi siérvo. Oimérõ upéicha, ¿mbaʼépa ikatu nepytyvõ reservise hag̃ua de siérvo ministeriál? Epensamína mbaʼeichaitépa revyʼáta reservívo ne ermáno ha ne ermanakuérape. Jesús ningo heʼi porã vaʼekue: “Javyʼaiteve ñameʼẽvo, ñandéve oñemeʼẽ rangue” (Hech. 20:35). Haʼe ojapo vaʼekue upéva ha ovyʼaiterei oporoservívo, ha nde katuete avei revyʼáta reservívo ótrope.

10. ¿Mbaʼéichapa Jesús ohechauka vaʼekue ovyʼaha oporoservívo? (Marcos 6:​31-34).

¹⁰ Jahechamína mbaʼéichapa Jesús ohechauka vaʼekue ovyʼaha oporoservívo (elee Marcos 6:​31-34). Peteĩ jeýpe Jesús ha ijapostolkuéra ikaneʼõitereíma kuri, upévare oho hikuái peteĩ lugár ndaiporihápe avave opytuʼumi hag̃ua. Péro heta hénte opuntea hesekuéra, ha haʼekuéra jey og̃uahẽ raẽ Jesús ha ijapostolkuéragui. Umi hénte oipotaiterei kuri Jesús omboʼe chupekuéra, péro Jesús ha ijapostolkuéra ‘naitiémpoiti kuri ni okaru hag̃ua’. Upévare haʼe heʼikuaa kuri umi héntepe ndaikatumoʼãiha upe moméntope omboʼe chupekuéra. Térã ikatu kuri avei Jesús omboʼe chupekuéra peteĩ térã mokõi mbaʼénte, ha upéi omondopántema umi héntepe. Péro, ¿ojapópa rakaʼe upéva Jesús? Nahániri, haʼe ohayhueterei rupi umi héntepe “oñepyrũ omboʼe chupekuéra heta mbaʼe”, ha hiʼarive oho hese ‘kaʼaruete peve’ (Mar. 6:35). Haʼe omboʼe chupekuéra ndahaʼéi oikuaágui ojapómante vaʼerãha upéva. Síno haʼe omboʼese voi umi héntepe “ombyasyeterei” ha ohayhúgui chupekuéra. Jahechakuaa Jesús ovyʼaiterei hague oporoservívo.

11. ¿Mbaʼe ótra kósapa Jesús ojapo vaʼekue oipytyvõ hag̃ua umi héntepe? (Ehecha pe taʼanga).

¹¹ Jesús omboʼérõ guare umi héntepe ohecha avei mbaʼe ótra kósapa ikatu ojapo hesehapekuéra. Por ehémplo haʼe omeʼẽ chupekuéra hoʼumi vaʼerã, ha ojerure umi disípulope orreparti hag̃ua pe tembiʼu (Mar. 6:41). Ojapóvo péicha haʼe omboʼe idisipulokuérape mbaʼéichapa oporoservi vaʼerã. Avei péicha ohechauka koʼãichagua traváho ojejapóva ojeservi hag̃ua ótrope iñimportanteha, ha umi siérvo ministeriál ojapo jepi avei umichagua traváho. Ñapensamína mbaʼeichaitépa oiméne umi apóstol ovyʼa ombaʼapóvo oñondivepa Jesús ndive orreparti hag̃ua pe tembiʼu, ha ohechávo ‘enterovénte hoʼuha hyg̃uatãha meve’ (Mar.  6:42). Jaikuaaháicha Jesús hetave vése ohechauka vaʼekue omotenondeha hapichápe ijupe rangue. Haʼe ojapo voi upéva oikove aja pukukue ko yvy ape ári (Mat. 4:23; 8:16). Jesús ovyʼaiterei vaʼekue omboʼe jave umi héntepe, péro avei ipyʼarory vaʼekue oñatendévo hesekuéra, ha omeʼẽvo umi héntepe la oikotevẽva. Nde avei katuete revyʼáta reservíramo de siérvo ministeriál rehaʼarõʼỹre mbaʼeve ndejupe g̃uarã.

12. ¿Mbaʼérepa nañapensái vaʼerã saʼietereiha la ikatúva jajapo kongregasiónpe?

¹² Ikatu oime repensa nde ndahaʼeiha la ndevaletereíva peteĩ mbaʼépe, péro aníkena reñedesanima. Katuete ningo ereko umi kualida porã nepytyvõtava ndedeprovécho hag̃ua kongregasiónpe. Eleemína la heʼi vaʼekue apóstol Pablo 1 Corintios 12:​12-30-pe, ha upéi eñemboʼe Jehovápe ehechakuaa hag̃ua mbaʼéichapa ko téxto ikatu nepytyvõ. Pablo ohechauka vaʼekue entéro oservíva Jehovápe iñimportanteha, ha oñekotevẽha káda únore kongregasiónpe. Ikatu oime rehechakuaa ofaltaitiha ndéve rekumpli umi rrekisíto reservi hag̃ua de siérvo ministeriál. Oimérõ upéicha, ¡aníkena reñentrega! Upéva rangue eñehaʼãmbaitékena ejapo la ikatumíva guive eservi hag̃ua Jehovápe ha umi ermánope. Ikatu reĩ segúro umi ansiáno nderekotaha enkuénta omeʼẽ hag̃ua ndéve umi asignasión ikatútava rejapo (Rom. 12:​4-8).

13. ¿Mbaʼérepa jaʼekuaa ikatuha eservi de siérvo ministeriál?

¹³ Epensamína avei mbaʼérepa ikatu hína oiko ndehegui siérvo ministeriál. Heta umi kualida la Biblia heʼíva oreko vaʼerãha peteĩ siérvo ministeriál, amo ipahápe orekontearã voi entéro kristiáno. Por ehémplo, enterove oservíva Jehovápe oñemoag̃ui vaʼerã hese, ovyʼa vaʼerã oporoservívo, ha oiko vaʼerã Ñandejára oipotaháicha. Upévare ikatu jaʼe erekomaha la majoría umi kualida tekotevẽva oreko peteĩ siérvo ministeriál. Péro, ¿mbaʼe mbaʼépa avei peteĩ ermáno oreko vaʼerã enkuénta?

¿MBAʼE MBAʼÉPA TEKOTEVẼ REJAPO?

14. ¿Mbaʼépa heʼise peteĩ siérvo ministeriál ‘iñakãguapy vaʼerãha’? (1 Timoteo 3:​8-10, 12).

¹⁴ Jahechamína unos kuánto rrekisíto oñeñeʼẽvare 1 Timoteo 3:​8-10, 12-pe (elee). Peteĩ siérvo ministeriál “iñakãguapy vaʼerã”. Ko palávra “akãguapy” ojetradusívo ikatu avei ojeʼe pe persóna iserioha, ha ojerrespetaha chupe oñekomporta porã haguére. Péva ningo ndeʼiséi ndaikatumoʼãiha núnka repuka ni rejediverti (Ecl. 3:​1, 4). Péro tekotevẽterei ejagarra ensério entéro umi rresponsavilida  erekóva. Oikóramo ndehegui peteĩ ermáno de konfiánsa, umi ermáno kongregasionpegua nderrespetáta rekumpli porã rupi ne asignasionkuéra.

15. a) ¿Mbaʼéichapa peteĩ siérvo ohechaukáta ‘ndoikoiha hovamokõi’? b) ¿Mbaʼéichapa peteĩ siérvo ohechaukáta ‘ndohekaiha okonvenítavante chupe iplatarayhúgui’?

¹⁵ Peteĩ siérvo ministeriál “ndovaléi hovamokõi”. Upéva heʼise nesinséro vaʼerãha ha ikatu vaʼerãha oñekonfia nderehe. Ekumpli vaʼerã la eréva ha ndereikói vaʼerã reporombotavy (Prov. 3:32). Umi siérvo avei “ndoikói vaʼerã itarovaite oheka umi mbaʼe chupekuéra okonvenítavante iplatarayhúgui”. Upéva heʼise tekotevẽha neonrrádo rejapo jave negósio ha reipuru lájape pláta. Avei ndovaléi rejaprovecha umi ermanokuérare egana hag̃ua pláta.

16. a) Peteĩ siérvo hoʼúramo vevída, ¿mbaʼépa oreko vaʼerã enkuénta? b) ¿Mbaʼépa heʼise ‘nekonsiénsia potĩha’?

¹⁶ Umi siérvo ministeriál “ndoʼurasái vaʼerã vevída”. Upéicharõ ndereikói vaʼerã remokõ rasa, ni nanekonosídoi vaʼerã reʼueterei haguére. Avei ‘nekonsiénsia potĩ vaʼerã’. Upéva heʼise reikoha Jehová oipotaháicha. Neimperféktoramo jepe, ikatu ndepyʼaguapy reikuaágui erekoha peteĩ amista iporãva Ñandejárandi.

17. ¿Mbaʼéichapa peteĩ ermáno ikatu ohechauka ikatupyrýtapa ojapo hag̃ua peteĩ traváho? (1 Timoteo 3:10). (Ehecha pe taʼanga).

¹⁷ “Tekotevẽ avei ojehecha raẽ ikatupyrýtapa hikuái ojapo hag̃ua upe traváho”. Upéva heʼise rehechaukáma hague rekumpli porãha umi rresponsavilida oñemeʼẽva ndéve. Upéicharõ umi ansiáno omeʼẽ jave ndéve peteĩ asignasión, ejapókena heʼi hagueichaite ndéve hikuái. Avei resegi vaʼerã umi instruksión omeʼẽva ñane organisasión. Ejasegura porãkena rentende porãha mbaʼépa la rejapótava, ha arakaʼépa rejapopa vaʼerã upe asignasión. Reñehaʼãmbaitérõ ejapo porã la ojejeruréva ndéve, umi ermáno ha ermána ohechakuaáta mbaʼeichaitépa eprogresa rehóvo, ha omombaʼetereíta hikuái upéva. Ansianokuéra, penemanduʼákena tekotevẽtereiha oñembokatupyry umi ermáno ojevautisávape (elee 1 Timoteo 3:10). ¿Oĩpa ne kongregasiónpe ermáno vautisádo orekóva éntre 10 ha 14 áño térã imitãvéva? ¿Ojepokuaápa ostudia la Biblia ha ojeprepara porã rreunionrã? ¿Okomenta memépa hikuái rreunionhápe ha pyʼỹintepa osẽ opredika? Oimérõ upéicha, emeʼẽkena chupekuéra umi asignasión ikatútava okumpli asegún la ijeda ha isituasión. Péichamanteko umi ermáno imitãva ikatúta ohechauka “ikatupyrýtapa hikuái ojapo hag̃ua upe traváho”. Kon el  tiémpo koʼã ermáno ikatu okumplipa umi rrekisíto oservi hag̃ua de siérvo ministeriál orekópe éntre 17 ha 19 áño.

18. ¿Mbaʼépa heʼise ‘ndaipóri vaʼerãha mbaʼeve ivaíva ojeʼéva’ umi siérvore?

¹⁸ ‘Ndaipóri vaʼerã mbaʼeve ivaíva ojeʼéva’ umi siérvo ministeriál rehe. Upéva heʼise ndaipóri vaʼerãha avave ikatúva heʼi nderehe rejapo hague peteĩ mbaʼe ivaietereíva. Jaikuaa ningo sapyʼánte ikatuha ojeakusa reiete umi kristiánope. Yma Jesúsre voi ojeʼe vaʼekue heta japu, ha haʼe oavisa porã idisipulokuérape oikotaha avei hesekuéra upéva (Juan 15:20). Péro resegíramo nekondúkta potĩ Jesús ojapo haguéicha, entéronte kongregasiónpe nderrespetáta (Mat. 11:19).

19. ¿Mbaʼépa ohechaukase la Biblia heʼívo peteĩ siérvo ‘peteĩnte hembireko vaʼerãha’?

¹⁹ Umi siérvo ministeriál “peteĩnte hembireko vaʼerã”. Jehová omoñepyrũrõ guare pe matrimónio omomenda vaʼekue peteĩ kuimbaʼe peteĩ kuñáre. Upévare peteĩ kristiáno omendátarõ ojegia vaʼerã la Jehová heʼívare pe matrimóniore (Mat. 19:​3-9). Peteĩ ermáno ni mbaʼevéicharõ nomoakãratĩri vaʼerã hembirekópe (Heb. 13:4). Péro upéva ndeʼiséi sólamente omboyketaha pe tekovai, síno ohechauka hag̃ua ifielha hembirekópe, ndoikomoʼãi avei onovillea ótro kuñáre (Job 31:1).

20. ¿Mbaʼéichapa peteĩ ermáno omoakã vaʼerã hogapy?

²⁰ Umi siérvo “omoakã porã vaʼerã ifamiliakuérape ha hogapy”. Oimérõ nde ereko ne família ekumpli porã vaʼerã umi rresponsavilida erekóva nde rogapýpe. Upearã ejapo meme vaʼerã pe estúdio de família. Avei pyʼỹinte omeʼẽháicha nde posivilida esẽ vaʼerã epredika káda uno nde rogayguándi. Eipytyvõkena umi mitãme oiko hag̃ua chuguikuéra Jehová amígo (Efes. 6:4). Peteĩ ermáno oñangareko porãva ifamíliare, ohechauka ikatuha oñangareko porã avei pe kongregasiónre (ekompara 1 Timoteo 3:5 heʼívare).

21. Oimérõ nde ndahaʼéi gueteri siérvo ministeriál, ¿mbaʼépa ikatu rejapo?

²¹ Oimérõ nde ndahaʼéi gueteri siérvo ministeriál, por favór, eñemboʼéna Jehovápe ha estudia porã ko artíkulo. Eanalisa porãkena umi rrekisíto okumpli vaʼerã umi siérvo ministeriál, ha embaʼapo jejopy ehupyty hag̃ua nde avei umíva. Eñehaʼãkena ehayhuve hag̃ua Jehovápe ha ne ermanokuérape, péicha nde pyʼaite guive eserviséta chupekuéra (1 Ped. 4:​8, 10). Esegíkena embaʼapo kongregasiónpe g̃uarã ha péicha katuete revyʼáta. ¡Jehová tanevendesi embaʼapo jejopy haguére oiko hag̃ua ndehegui siérvo ministeriál! (Filip. 2:13).