Paul: Noviembre de 1985-pe roviaha hína kuri Libériape, oĩva África Occidentálpe. Upérõ rovyʼaiterei pórke upéva ore primera asignasión kómo misionéro. Ore avión opyta sapyʼaite Senegálpe ha Anne heʼi chéve: “Una órantema ofalta ñag̃uahẽ hag̃ua Libériape”. Peichaháguinte rohendu peteĩ anúnsio heʼíva: “Umi ohóva Libériape toguejy la iñavióngui, pórke upe lugárpe oĩ peteĩ gólpe de estádo ha ndaikatúi peho upépe”. Upévare 10 día aja ropyta unos kuánto misionérondi Senegálpe. Roĩ aja upépe rohendu umi notísia heʼíva kamionádare oĩha umi teʼongue Libériape. Pe goviérno oproivi la héntegui osẽ hógagui pyharekue ha ojejuka umi nokumplírivape pe léi.

Anne: Paul ha che ningo siémpre roñatende porãiterei ha rojekuida. Che katu che mitãkuñaʼíme oĩ vaʼekue otalláva cherehe ha chembodéhova pórke siémpre aiko vaʼekue kyhyjepópe, akrusa hag̃ua kálle jepe akyhyje. Péro rohoseterei vaʼekue Libériape, jepe upe lugár ipeligróso.

Paul: Anne ha che rokakuaa vaʼekue Inglatérrape, oéste gotyo, 8 kilómetronte ojuehegui. Mokõivéva romoñepyrũ vaʼekue ore prekursorádo rregulár rotermina riremi ore koléhio, pórke che tuakuéra ha Anne sy oremokyreʼỹeterei vaʼekue upearã. Haʼekuéra ovyʼaiterei roipurúta haguére ore rekove roservi hag̃ua de tiémpo kompléto. Arekópe 19 áño añeinvita aservi hag̃ua Betélpe. Upéi Anne ha che romenda ha haʼe ou avei oservi Betélpe áño 1982-pe.

Anne: Rovyʼaiterei vaʼekue Betélpe, péro avei siémpre rohoseterei roservi oĩvehápe nesesida. Betélpe oĩ vaʼekue heta ermáno anteve oservíva kómo misionéro, ha roreko vaʼekue la oportunida rombaʼapóvo hendivekuéra. Iñehemplokuéra oremokyreʼỹ vaʼekue roservi hag̃ua de misionéro. Upéicha rupi, 3 áñore káda pyhare roñemboʼe Jehovápe upévare. Áño 1985-pe rovyʼaiterei roñeinvita haguére pe Eskuéla de Galaádpe kláse 79-pe. Upéi roñeasigna roho hag̃ua Libériape oĩva África Occidentálpe.

Paul: Ikatu jeýrõ guare ojeho Libériape, ore rojagarra pe primer avión osẽva. Upépe rohechakuaa mbaʼeichaitépa ojeiko vaʼekue kyhyjepópe ha upérõ ojeproivi gueteri la héntegui osẽ hógagui pyharekue. Umi hénte ohendu haguérente peteĩ áuto hyapu hatãha oñepyrũma osapukái ha odiparapa. Rolee vaʼekue umi Salmo káda pyhare orepyʼaguapy hag̃ua. Ijetuʼúramo  jepe la situasión, oregusta vaʼekue la ore asignasión. Upe tiémpope Anne oservi vaʼekue kómo misionéra en el kámpo ha che katu Betélpe. Upépe ambaʼapo vaʼekue ermáno John Charuk ndive. a Ko ermánogui aaprende vaʼekue heta mbaʼe pórke haʼe ontende porãiterei la ohasáva umi ermáno ha ermána.

Anne: Pyaʼeterei rovyʼa Libériape pórke upépe umi ermanokuéra oporohayhukuaa ha ifiél Jehovápe. Ensegídama voi rojepokuaa hesekuéra ore família teéicha. Umi ermáno upepegua omeʼẽ oréve konsého ideprovechoitereíva ha oremokyreʼỹ. Avei upépe igustoiterei vaʼekue japredika. Chemanduʼa umi ogajárape ndogustái hague epyta hógape sapyʼaitemínte. Kállere katu reikokuévo rehendu mbaʼéichapa la hénte oñeʼẽ la Bíbliare. Upévare ndahasyiete vaʼekue eñemboja hendapekuéra eñemongeta hag̃ua hendivekuéra. Ore roguereko vaʼekue hetaiterei estudiánte de la Biblia, upévare ijetuʼu vaʼekue oréve roñatendepa hesekuéra. ¡Peichagua provléma ningo la igústova jareko!

Paul: Cuatro áñore ikatu vaʼekue roiko trankilomie pe paíspe, péro 1989-pe la hénte opuʼãmba ojuehe ha oñepyrũ peteĩ gérra ivaietereíva. Pe 2 de julio de 1990-pe umi opuʼãva pe goviérno kóntrape ojagarrapaite umi lugár oĩva Betel jerére. Upévare 3 mése aja ndaikatúi vaʼekue roñeʼẽ avavete oĩvandi ótro paíspe, ni ore hentekuérandi ni pe sentrál mundiál ndive. Pe país kompletoitépe 14 áñore oĩ vaʼekue hetaiterei violénsia, sarambi, saʼi la tembiʼu ha ojeviola hetaiterei kuñáme.

Anne: Oĩ vaʼekue umi trívu oñorairõva ha ojukáva umi hénte ótro trivupeguápe. Kállere umi soldádo oguata árma reheve, iñextráño la oñemonde lája ha oike hikuái umi hentekuéra rógape ogueraha hag̃ua oipotáva guive. Algúno soldádope g̃uarã ndahaʼéi vaʼekue mbaʼevete ojuka umi héntepe, haʼete voi chupekuéra ojukáva ryguasúnte. Umi soldádo omboty umi tape, okontrola umi ohasávape ha pyʼỹinte oporojuka. Upéi haʼekuéra ojagarra umi teʼongue ha omoĩmba ojoʼári. Upéva oiko vaʼekue ag̃ui Betélgui. Rombyasyetereíramo jepe oĩ vaʼekue ermáno omanóva, umíva apytépe mokõi misionéro rohayhuetereíva.

Heta ermáno oĩ vaʼekue umi trívu ojehekávape ojejuka hag̃ua. Upévare umi ótro ermáno omokañy chupekuéra hógape ipeligrósoramo jepe. Avei umi misionéro ha betelita ojapo vaʼekue upéva. Oĩ vaʼekue ermáno okañýva Betélpe, algúno oke vaʼekue pe primer písope ha ótro katu oiko orendive ore kotýpe. Orendive oĩ vaʼekue peteĩ família de 7.

Paul: Káda día umi soldádo oñehaʼã oike Betélpe ohecha hag̃ua noromokañýipa hína álgienpe. Péro ore roñeorganisa porã rokuidapa hag̃ua ojuehe. Por ehémplo mokõi ermáno osẽmi vaʼerã pe portónpe  oñeʼẽ hag̃ua umi soldádondi, ha ótro mokõi ermáno opyta ventána guive okontrola hag̃ua. Umi ermáno oĩva portónpe omoĩramo ipo tenonde gotyo heʼise trankilopanteha, péro umi ermáno omoĩramo ipo hapykue gotyo heʼise umi soldádo iviolentoha. Upéicha jave umi ermáno okontroláva ventána guive ohóma pyaʼe porã omokañy umi ermánope.

Anne: Heta semána upe rire unos kuánto soldádo mbaretépe oikemi. Peteĩ ermána ha che roike roñemboty peteĩ váñope. Upépe oĩ vaʼekue peteĩ muévle oguerekóva peteĩ lugár michiʼĩva reike hag̃ua rekañy. Upe ermána oike upépe ha apenaite ija. Umi soldádo hiʼárma reheve ojupi pe ore roĩháme ha oñepyrũ ombota vaipa pe váño rokẽ. Paul ojokoségui umi soldádope ani hag̃ua oike heʼi chupekuéra che aike hague sapyʼaite váñope. Upéi amboty pe lugár pe ermána oĩháme ha ambotykuévo hatãiterei hyapu, ha umi soldádo ohendu upéva. Hiʼarive atardaiterei amohendapa jey hag̃ua umi kósa oĩva pe muévlepe. Che apilláma umi soldádo osospechaha ajapoha álgo, upévare añepyrũ aryrýi asusũ ha ni ndaikuaái mbaʼéichapa upéi aavríta pe okẽ. Upémarõ añemboʼe Jehovápe ha ajerure asy chupe tachepytyvõmi. Upéi aavri pe okẽ ha ni ndaikuaái mbaʼéichapa, péro asaluda chupekuéra pyʼaguapýpe porãnte. Peteĩva umi soldádo chemyaña oike hag̃ua ha derechoite oho pe muévle oĩháme, oavri ha orrevisapaite la oĩva, péro ni ndoroviaséi ndotopái hague mbaʼeve. Upéi haʼe ha umi ótro soldádo oho oike umi ótro kotýpe, orrevisa técho ári, péro ndotopái jeýnte hikuái mbaʼevete.

Paul: Heta mésere saʼieterei vaʼekue la tembiʼu ha pyʼỹinte ndoroguerekói vaʼekue mbaʼeve rorambosa hag̃ua. Péro pe adorasión matutína rorekóva Betélpe haʼete vaʼekue oréve g̃uarã ore desajúno. Enterovetéva roikuaa upéva orepytyvõtaha roaguanta hag̃ua káda día.

Tekotevẽrire rosẽ roheka y ha tembiʼu, avave ndopytamoʼãi kuri oñangareko hag̃ua umi ermáno okañývare ha ojejukáta chupekuéra. Pyʼỹinte Jehová omeʼẽ vaʼekue oréve umi mbaʼe roikotevẽva itiempoitépe ha roimoʼãʼỹháicha. Jehová oñangareko porã orerehe ha orepytyvõ roĩ hag̃ua trankílo.

La situasión amás día pe paíspe ivaive, péro pe añetegua omeʼẽ oréve tuicha esperánsa. Umi ermáno hetaiterei vése osẽ okañy ojesalva hag̃ua. Péro haʼekuéra siémpre ojerovia mbarete ha oĩ trankílo ijetuʼúramo jepe. Oĩ vaʼekue ermáno heʼíva pe situasión opreparamaha chupekuéra pe jehasa asy guasúpe g̃uarã. Umi ansiáno ha ermáno imitãva pyʼaguasúpe ojapo la ikatumíva oipytyvõ hag̃ua umi ermanokuérape. Umi ermáno oho jave okañy ótro lugárpe oñopytyvõmba ha oñepyrũ opredika pe oĩhárupi. Avei oipuru hikuái otopáva guive kaʼaguýrupi ojapo hag̃ua peteĩ Salón del Rréino oreko hag̃ua irreunionkuéra. Upe situasión ningo ijetuʼueterei vaʼekue, péro umi rreunión ha pe predikasión oipytyvõ vaʼekue umi ermánope ikyreʼỹ ha osegi hag̃ua oaguanta. Ore romondómi chupekuéra tembiʼu, ao ha hetave mbaʼe. Péro umi ermáno ojerure oréve romondo  hag̃ua chupekuéra vólso opredika hag̃ua, romondo rangue chupekuéra ao. Upéva ningo opokoiterei vaʼekue orerehe. Umi hénte ohecha ha ohasa vaʼekue hetaiterei mbaʼe ivaíva pe gerrahápe, upévare ohenduse hikuái umi notísia porã. Haʼekuéra oñesorprende ohechávo umi Testígo ovyʼa ha oporohayhuha ijetuʼúramo jepe. Umi ermáno haʼe vaʼekue peteĩ lus ohesapéva pytũmbýpe (Mat. 5:​14-16). Umi ermáno ikyreʼỹeterei rupi, oĩ soldádo ivioléntova upéi oikóva chugui Testígo.

Paul: Sapyʼánte tekotevẽ vaʼekue rosẽ Libériagui, 3 vése sapyʼaiténte ha 2 vése un áñore. Peteĩ misionéra oexplika porãiterei mbaʼéichapa roñeñandu vaʼekue péicha jave ha heʼi: “Galaádpe roaprende vaʼekue rohayhu vaʼerãha umi ermáno oĩvape ore asignasiónpe, ha upéva la rojapóva. Upévare ropyta yvýre tekotevẽrõ guare roheja umi ermánope upe situasión ijetuʼuetévape”. Péro rovyʼaiterei avei ikatu haguére roipytyvõ upe tembiapo ojejapóvape Libériape roĩ aja umi ótro paíspe.

Anne: Mayo de 1996-pe, éntre 4 roviaha peteĩ veíkulo haʼévape Betel mbaʼe, ha rogueraha unos kuánto dokuménto iñimportánteva sukursalgua. Rohose vaʼekue peteĩ lugár isegurovévape oĩva pe ótra púntape ore roĩhágui, ha upearã roho vaʼerã 16 kilómetro. Péro upe javete pe lugár ore roĩháme ojeataka. Umi soldádo pochy reheve ombokapu yvate gotyo ha orejoko. Mbohapýpe oremboguejy ha ogueraha hikuái la veíkulo, péro Paul opyta pe veíkulo ryepýpe. Tuichaiterei ningo roñemondýi. Peichaháguinte umi hénte apytépe rohecha Paul iñakã ruguyha oúvo. Ore roimoʼãite voi ojejapi hague chupe iñakãme, péro upéinte ropensa porã la upéicharire haʼe ndaikatúi vaʼerãmoʼã oguata. Aviasído peteĩ soldádo omyañahápe chupe osẽ hag̃ua pe veíkulogui ogolpea raʼe chupe. Upémarõ tuicha roñetrankilisa pórke ndojehúi chupe mbaʼeve guasu.

Ore ypýpe oĩ vaʼekue peteĩ kamión militár ogueraháva umi héntepe osẽ hag̃ua upe lugárgui. Enterovéva oĩ vaʼekue kyhyjepópe. Upe kamión henyhẽtéma kuri, upévare roñakarama ore fuérsa omeʼẽmiháicha ha roñasaingo lénto rohóvo. Upéi pe chofér oñepyrũ oho hatãiterei ha haimete roʼa. Rojerure asy chupe topytami péro okyhyjetereígui ni nohendúi la roʼéva chupe. Rog̃uahẽ rire ropyta rososopaite ha roryrýi roñemondýigui.

Paul: Rog̃uahẽvo orekyʼa, la ore ao osoropa ore lómope. Romaña ojuehe ha ni ndorogueroviái la noromanói hague. Upe pyharépe roke kaʼaguýpe, ore ypýpe oĩ peteĩ elikóptero ojejapi vaipáva, haʼete voi la hoʼapátamava ha upéva la orerahátava al día sigiénte Siérra Leónape. Rog̃uahẽ rire upépe rovyʼaiterei noromanói haguére. Péro avei rojepyʼapy umi ermáno opytávare Libériape.

Anne: Upéi rog̃uahẽ Betélpe oĩva peteĩ siuda héravape Freetown, Siérra Leónape. Upépe umi ermáno oñangareko porãiterei orerehe. Péro upéi oñepyrũ oupaite jey chéve che akãme umi mbaʼe vai oiko vaʼekue Libériape. De diakue aĩ vaʼekue kyhyjepópe, ndaikatúi apensa porã ha nantendepái la oikóva che jerére. Pyharekue katu apáy che ryʼái roʼysãmba, aryrýi asusũ ha haʼete chepytupátava. Péicha jave Paul cheañuã mbarete, oñemboʼe chendive ha ropurahéi umi kántiko añetrankilisa peve. Che apensáma voi chetavyraitamaha ha ndaikatumoʼãveimaha aservi de misionéra.

Núnka ndacheresaraimoʼãi la oiko vaʼekuégui upéi. Upe semánape rorresivi vaʼekue mokõi rrevísta. Peteĩva haʼe vaʼekue pe ¡Despertad! 8 de junio de 1996 orekóva peteĩ artíkulo hérava “Qué hacer ante los ataques de pánico”. Upépe antende sapyʼa mbaʼépa la ojehúva chéve. Upe ótra rrevísta katu haʼe La Atalaya 15 de mayo de 1996 orekóva peteĩ artíkulo hérava “¿De dónde proviene su fuerza?”. Upe rrevístape ojekuaa vaʼekue peteĩ panambi opẽ vaʼekue chugui ipepo, ha pe artíkulo oexplika lomímonte pe panambi ikatuha osegi okaru ha oveve opẽramo jepe chugui la ipepo. Péicha avei ñande jahasáramo jepe heta mbaʼe ijetuʼuetereíva, Jehová espíritu rupive ikatu jasegi ñaipytyvõ umi ótrope. Jehová omeʼẽ chéve umi artíkulo hiʼoraitépe (Mat. 24:45). Upéi ainvestiga umi artíkulo oñeʼẽva umi témare ha añongatu umíva. Ohasávo pe tiémpo, añeñandu porãitevéma.

Paul: Káda ke roho jey Libériape rovyʼaiterei. Opakuévo áño 2004 ojapóma haimete 20 áño roĩ hague  ore asignasiónpe. Pe gérra opáma kuri Libériape ha oĩ projékto de konstruksión Betélpe. Péro upe javete oñemeʼẽ oréve peteĩ asignasión ipyahúva.

Upéva ningo peteĩ pruéva tuichaitereíva, pórke umi ermáno oĩva Libériape haʼe vaʼekue ore familiaite ha ndorohejaséi chupekuéra. Péro ore rohecháma kuri mbaʼéichapa Jehová orevendesi rohejárõ guare ore hentekuérape roho hag̃ua Galaádpe. Upévare roaseptántema upe asignasión ha roho Ghánape.

Anne: Hetaiterei orerasẽ vaʼekue rohórõ guare Libériagui. Peteĩ ermáno ijedáva ha iñarandúva hérava Frank heʼi vaʼekue oréve peteĩ mbaʼe oresorprendéva. Haʼe heʼi: “Aníkena ni penemanduʼa orerehe”. Péro upéi heʼive: “Oréngo roikuaa napenderesaraimoʼãiha orehegui, péro koʼág̃a pehayhu vaʼerã pende pyʼaite guive umi ermáno oĩvape Ghánape. Ko asignasión ou Jehovágui, asíke pekuida porãkena umi ermáno ha ermána oĩvare upépe”. Upéva tuicha oremokyreʼỹ vaʼekue pórke rohóta kuri peteĩ país saʼihápe la orekuaáva ha entéro mbaʼénte ipyahúta oréve.

Paul: Ensegídama voi rohayhu umi ermáno oĩvape Ghánape. Upépe oĩ vaʼekue hetaiterei testígo de Jehová. Umi ermáno ifiél ha ojerovia mbarete ha heta mbaʼe roaprende chuguikuéra. Roservi rire 13 áño Ghánape, rorresivi peteĩ notísia oresorprendetereíva. Ojejerure vaʼekue oréve roservi hag̃ua sukursál de Kéniape oĩva África Orientálpe. Sinséramente heta rohechagaʼu vaʼekue umi ermáno oĩvape Ghana ha Libériape. Péro ensegída avei rojepokuaa umi ermáno oĩvare Kéniape ha rosegi roservi peteĩ território oĩháme tuicha nesesida.

Anne: Koʼã áño ohasa vaʼekuépe ahasa heta mbaʼe ijetuʼuetereíva ha heta vése akyhyje. Jahasa jave umi mbaʼe ipeligrósova, ikatu oafekta ñande salu ha ikatu ñañandu nañaaguantamoʼãiha. Jaikuaa ndaikatuiha ñahaʼarõ Jehová ojapo peteĩ milágro ñandeprotehe hag̃ua koʼã mbaʼégui. Koʼag̃aite peve ahendu jave oñembokapuha, chepyʼajerepa ha chepojehýipa. Péro aaprendéma aaprovechapaite vaʼerãha pe ajúda Jehová omeʼẽva chéve chembarete hag̃ua, umíva apytépe umi ermáno ha ermána. Avei ahechakuaa Jehová ikatuha ñanepytyvõ jasegi hag̃ua ñane asignasiónpe jastudiáramo, ñañemboʼéramo, jaháramo rreunionhápe ha japredikáramo.

Paul: Ikatu oĩ oporandúva oréve: “¿Pendegusta piko la pene asignasión?”. Legálmente ikatu hína pe país reñeasignahápe iporã, péro peichaháguinte avei ikatu ou ipeligróso. Upévare, ¿mbaʼe la iñimportantevéva péicha jave? Jahayhu vaʼerã ermáno ha ermanakuérape, pórke haʼekuéra ñane família. Jajúramo jepe diferénte lugárgui, jahayhueterei Jehovápe. Ore ropensa vaʼekue roñemondoha romokyreʼỹ hag̃ua umi ermánope, péro amo ipahápe haʼekuéra la oremokyreʼỹva.

Pe unida oĩva ermanokuéra apytépe ko yvy tuichakuére haʼe peteĩ milágro oúva Jehovágui. Ñaĩ aja Jehová puévlo apytépe, jareko família jaha jahahápe. Ore roime segúro rosegíramo rojerovia Jehováre, haʼe oremombaretetaha toiko la oikóva (Filip. 4:13).