ARTÍKULO OJESTUDIÁVA 43
PURAHÉI 90 ¡Ñañehaʼãkena ñañomokyreʼỹ!
Ñanedesanimárõ umi mbaʼe ñanembodudáva
“Pehechákena siértopa hína entéro mbaʼe” (1 TES. 5:21).
¿MBAʼÉPA ÑAAPRENDÉTA?
Ko artíkulope jahecháta sapyʼánte ikatuha oĩ umi mbaʼe ñanembodudáva, ha upévare ikatu ñanekangy ha ndajaservivéi Jehovápe.
1, 2. a) ¿Mbaʼe mbaʼépa ikatu sapyʼánte ñañeporandu? b) ¿Mbaʼépa jahecháta ko artíkulope?
ENTEROVÉVA, tahaʼe ñanemitã térã ñandeeda, jaduda mimi jepi sapyʼánte ha ñañedesanima. a Por ehémplo peteĩ mitãrusu ikatu oñeporandu: “¿Jehová piko oñeinteresa legálmente cherehe?”. Ha opensa rupi upéicha, ikatu oduda ojevautisa hag̃ua. Térã ñapensamína peteĩ ermáno omotenonde vaʼekuére Jehová servísio imitãvépe oiko rangue pláta rapykuéri. Koʼág̃a ohasáma heta áño, haʼe orekóma ifamília omantene vaʼerã péro apéna ohupyty chupe la ipláta. Upéicha rupi oñepyrũ opensa odesidi porãpa rakaʼe yma. Térã ñapensami peteĩ ermána ijedávare. Haʼe naimbaretevéima yma guaréicha, upéicha rupi ndaikatuvéi ojapo umi mbaʼe yma ojapo vaʼekue ha upéva odesanima chupe. Ñande avei ikatu sapyʼánte ñañeporandu: “¿Oñeinteresápa Jehová cherehe? ¿Ovalépa la péna umi sakrifísio ajapo vaʼekue hesehápe yma? ¿Chedeprovéchopa gueteri Jehovápe?”.
2 Nañañehaʼãiramo ñakontesta koʼã mbaʼe ikatu hína jaju ñanekangy ha ndajaservivéi Jehovápe. Ko artíkulope jahecháta mbaʼéichapa la Biblia ikatu ñanepytyvõ oimérõ: 1) Jaduda Jehová oñeinteresaha ñanderehe, 2) ñapensa jadesidi vai hague yma, térã 3) ñañeporandu ñandedeprovéchopa gueteri Jehovápe.
¿MBAʼÉPA JAJAPO VAʼERÃ JADUDA JAVE?
3. ¿Mbaʼépa jajapo vaʼerã ñañepyrũ jave jaduda?
3 Sapyʼánte ikatu jaduda ha ñañeporandu heta mbaʼe. Péicha jave tekotevẽterei jaheka la rrespuésta la Bíbliape. Jajapóramo upéva ñakonfiavéta Jehováre, ñane amista hendive imbaretevéta ha ‘jasegíta jajerovia mbarete’ (1 Cor. 16:13).
4. ¿Mbaʼéichapa ikatu jahecha “siértopa hína entéro mbaʼe”? (1 Tesalonicenses 5:21).
4 (Elee 1 Tesalonicenses 5:21). La Biblia ñanemokyreʼỹ jahecha hag̃ua “siértopa hína entéro mbaʼe”. ¿Mbaʼéichapa ikatu jajapo upéva? Oimérõ ñañepyrũ jaduda algúna kósagui, tekotevẽterei jahecha mbaʼépa la Biblia heʼi upe témare. Por ehémplo peteĩ mitãrusu odudáramo Jehová oñeinteresaha hese, ¿mbaʼépa ojapo vaʼerã umi mbaʼe opensávare? ¿Iporãpa osegínte oduda? Nahániri. Haʼe ohecha vaʼerã “siértopa hína entéro mbaʼe”. Upearã ostudia vaʼerã la Biblia ha oikuaa vaʼerã mbaʼépa Jehová legálmente opensa.
5. ¿Mbaʼéichapa ikatu jaikuaa la Jehová opensáva peteĩ témare?
5 Jalee jave la Biblia haʼete Jehová oñeʼẽva ñandéve. Péro ndahaʼéi ku jalee haguérentema jatopátava pe rrespuésta jahekáva hína. Upearã ñamoĩ vaʼerã ñande párte. Upévare tekotevẽ jaheka ha jastudia umi téxto bíblico ñanepytyvõtava ñande kásope, ha jaipuru umi puvlikasión omeʼẽva ñandéve Jehová organisasión (Prov. 2:3-6). Avei jajerure vaʼerã Jehovápe tañandegia jaikuaa hag̃ua mbaʼépa haʼe opensa. Upéi ikatu jaheka umi téxto ha informasión ñanepytyvõtava ñane situasiónpe. Tuicha avei ideprovéchota ñandéve jahechárõ la Bíbliape umi ehémplo oheja vaʼekue Jehová siervokuéra yma guare oñeñandu vaʼekue ñandéicha.
6. ¿Mbaʼéichapa umi rreunión ikatu ñanepytyvõ?
6 Avei ñaĩ jave umi rreunionhápe haʼete ku Jehová oñeʼẽva ñandéve. Jaha memérõ rreunionhápe ikatu hína ñahendu peteĩ komentário térã peteĩ diskúrso ojeʼehápe la ñaikotevẽva hesakã porã hag̃ua ñandéve upe ñanembodudáva (Prov. 27:17). Jahechamína koʼág̃a unas kuánta kósa ñañeporandúva jepi ha mbaʼépa ikatu jajapo péicha jave.
¿EDUDÁPA JEHOVÁ OÑEINTERESAHA NDEREHE?
7. ¿Mbaʼépa sapyʼánte ikatu ñañeporandu?
7 Ndépa reñeporandúmava: “¿Chereko piko legálmente Jehová enkuénta?”. Reñandúramo nde ndahaʼeiha voi mbaʼeve, ndahasyiete repensa hag̃ua ndaikatumoʼãiha voínte reñemoag̃ui ko univérso Apoharére ha oiko ndehegui iñamígo. Rréi David provávlemente opensa vaʼekue avei péicha yma. Haʼe ohecharamoiterei vaʼekue mbaʼéichapa Jehová ojepyʼapy yvyporakuérare. Upévare heʼi vaʼekue: “Jehová, peteĩ yvypóra ningo ndahaʼéi mbaʼevete ereko hag̃ua chupe enkuénta. Umi hénte ndahaʼéi mbaʼeve nde reiko hag̃ua repena hesekuéra” (Sal. 144:3). ¿Ha ndépa mbaʼe repensa? ¿Ojepyʼapýpa Jehová káda únore?
8. Ohechaukaháicha 1 Samuel 16:6, 7, 10-12, ¿mbaʼépa Jehová oreko enkuénta umi héntere?
8 Ikatu oĩ umi persóna naiñimportánteiva ótrope g̃uarã, péro Jehovápe g̃uarã haʼekuéra iñimportánte. La Biblia voi heʼi ñandéve upéva. Por ehémplo ñanemanduʼamína la oiko vaʼekuére Jehová omondórõ guare Samuélpe Jesé rógape. Samuel oho vaʼekue upépe onombra hag̃ua Jesé raʼykuéra apytégui peteĩ rréi Israélpe g̃uarã. Haʼe ohenói vaʼekue umi 8 itaʼýrape péro omboyke pe imitãvéva Davídpe. b Péro Jehová Davídpe oiporavo (elee 1 Samuel 16:6, 7, 10-12). Jehová ohecha vaʼekue umi mbaʼe David orekóva ikorasõme ha oikuaa haʼe ohayhuetereiha chupe.
9. ¿Mbaʼérepa ikatu reĩ segúro Jehová oñeinteresaha nderehe? (Ehecha pe taʼanga).
9 Epensamína mbaʼéichapa Jehová ohechaukáma ndéve oñeinteresaha nderehe. Haʼe omeʼẽ ndéve umi konsého iporãvéva reikotevẽhaichaite (Sal. 32:8). Upéva ohechauka ‘ndekuaa porãitereiha’, ¿ajépa? (Sal. 139:1). Resegi jave Jehová konsého ha rehechávo mbaʼeichaitépa umíva ideprovécho ndéve, reñekonvenséta Jehová nderayhuetereiha (1 Crón. 28:9; Hech. 17:26, 27). Jehová ohecha mbaʼeichaitépa reñehaʼã reservi ha neñeʼẽrendu hag̃ua chupe. Haʼe oikuaa umi mbaʼe porã erekóva ne korasõme ha oikose ne amígoramo (Jer. 17:10). Upévare Jehová ovyʼaitereíta nde avei reipotáramo chupe ne amigorã (1 Juan 4:19).
‘Nde rehekáramo Jehovápe, haʼe ojejuhukáta ndéve’ (1 Crón. 28:9) (Ehecha párrafo 9) c
¿EPENSÁPA YMA REDESIDI VAI HAGUE?
10. Ñapensávo la jadesidi vaʼekuére yma, ¿mbaʼépa ikatu hína ñañeporandu?
10 Sapyʼánte oĩ ermáno imanduʼáva la odesidi vaʼekuére yma, ha oñepyrũ oduda ha okalkula odesidi porãpa raʼe. Ojapove hag̃ua Jehová servísiope, ikatu oime oheja raʼe umi estúdio yvate térã peteĩ traváho ojepaga porãháme chupe. Péro koʼág̃a ohasáma heta tiémpo upévagui, ha ohecha la ikonosidokuéra odesidi vaʼekue ótra kósa, haʼetévaicha la oiko porãva ha iplátava. Upéicha rupi umi ermáno ikatu oñeporandu: “¿Ovale piko raʼe la péna umi sakrifísio ajapo vaʼekue Jehovápe rehehápe? ¿Aperde rei piko raʼe umi oportunida porã oñepresenta vaʼekue chéve itiémpope?”.
11. ¿Mbaʼérepa oñedesanima kuri pe salmísta oskrivi vaʼekue pe Salmo 73?
11 Oimérõ nde reñeporandu avei koʼãicha mbaʼe, ehechamína mbaʼéichapa oñeñandu pe salmísta oskrivíva vaʼekue Salmo 73. Haʼe ningo ohecha vaʼekue umi hénte ndoservíriva Jehovápe hesãiha, iplataha ha ndojepyʼapyiha voi mbaʼevére (Sal. 73:3-5, 12). Haʼe ohechávo mbaʼéichapa oho porã umi ótrope, opensa reiete oñehaʼãha oservi Jehovápe. Upéicha rupi ou oñedesanima ha ‘tódo el día oñekevranta’ (Sal. 73:13, 14). ¿Mbaʼépa ojapo upéi ko salmísta anivéma hag̃ua opensa upéicha?
12. Ohechaukaháicha Salmo 73:16-18, ¿mbaʼépa oipytyvõ vaʼekue pe salmístape?
12 (Elee Salmo 73:16-18). Pe salmísta oho vaʼekue Ñandejára rógape, pe lugár sagrádope, ha oñepyrũ opensa puku. Upépe ohechakuaa umi hénte koʼág̃a oiko porãvape, nohaʼarõiha mbaʼeve iporãva amo gotyove. Upéicha pe salmísta ohechakuaa odesidi porãitereiha omotenondévo Jehovápe, ha upéva ombopyʼaguapy chupe. Upéi haʼe ojedesidiete osegitaha oservi Jehovápe (Sal. 73:23-28).
13. ¿Mbaʼépa ikatu nepytyvõ oimérõ reduda la redesidi vaʼekuégui yma? (Ehecha pe taʼanga).
13 Ñandejára Ñeʼẽ ikatu avei tuicha nembopyʼaguapy. ¿Mbaʼéichapa? Epensamíntena umi mbaʼe porã rehupytývare, umíva apytépe umi tesóro rembyatýmava yvágape, ha epensa la ohaʼarõvare umi hénte ko mundopeguápe. Haʼekuéra ningo oreko umi mbaʼe ko múndopente ikatúva jahupyty. Upévare oñehaʼã hikuái oiko porã koʼág̃a pórke ndorekói voi esperánsa amo gotyove g̃uarã. Péro ndéve g̃uarã Jehová orekóma heta mbaʼe, umi mbaʼe ndaikatúiva ni eñeimahina jepe (Sal. 145:16). Ha ekalkulamíntena avei: ¿Ikatu piko legálmente reikuaa mbaʼéicha vaʼerãmoʼã nde rekove redesidírire ótra kósa? Péro oĩ peteĩ mbaʼe si ikatúva reaseguraite: Umi odesidíva entéro mbaʼe ohayhu rupi Ñandejárape ha hapichápe, ndojavymoʼãi mbaʼeve iporãva.
Ejepyʼamongetákena umi mbaʼe porã Jehová oprometévare omeʼẽtaha ndéve (Ehecha párrafo 13) d
¿EPENSÁPA NANDEDEPROVECHOVEIMAHA JEHOVÁPE G̃UARÃ?
14. ¿Mbaʼe situasiónpepa oĩ algúno ermáno, ha mbaʼépa oñeporandu jepi hikuái?
14 Oĩ ningo heta ermáno ijedáva, hasykatúva térã orekóva algúna diskapasida. Upévare ndaikatúi ojapo hetave mbaʼe Jehová servísiope. Upéicha rupi oĩ jepi opensáva naiñimportanteiha Ñandejára renondépe ha oñeporandu: “¿Chedeprovéchopa gueteri Jehovápe g̃uarã?”.
15. ¿Mbaʼépa oikuaa porã vaʼekue pe salmísta oskrivi vaʼekue Salmo 71?
15 Pe salmísta oskrivi vaʼekue Salmo 71 oñeñandu vaʼekue avei upéicha. Haʼe heʼi vaʼekue Ñandejárape: “Anína chereja cheaño koʼág̃a nachembaretevéimarõ” (Sal. 71:9, 18). Pe salmísta oúramo jepe naimbaretevéi, oĩ vaʼekue segúro Jehová oipytyvõ ha ogiataha chupe oservíramo fiélmente chupe. Haʼe oaprende vaʼekue Jehová oguerohoryetereiha umi omeʼẽvape chupe iporãnguete iposivilida omeʼẽháicha chupe (Sal. 37:23-25).
16. ¿Mbaʼe mbaʼépa ikatu ojapo umi ijedáva? (Salmo 92:12-15).
16 Oimérõ nde ndeeda, eñehaʼãna epensa mbaʼéichapa Jehová nderecha. Haʼe nepytyvõkuaa ejepytaso mbarete hag̃ua ijykére, oiméramo jepe nekangýma ejapo hag̃ua heta mbaʼe iservísiope (elee Salmo 92:12-15). Upévare, ejesarekóna umi mbaʼe ikatúvare rejapo. Epensamíntena: Nde ikatu remombarete ótrope ne ehémplo porãite rupive, ha ehechaukávo reñeinteresaha hesekuéra. Avei ikatu remombeʼu mbaʼéichapa Jehová heta áñorema nepytyvõ ha ekomparti ótrondi pe esperánsa porãite erekóva. Avei ani nderesarái umi ne ñemboʼe tuicha ikatuha oporopytyvõ (1 Ped. 3:12). Tahaʼe haʼéva la ñane situasión, enterovéva jareko álgo ikatúva ñameʼẽ Jehovápe ha ñande rapichápe.
17. ¿Mbaʼérepa ndovaléi ñañekompara ótrore?
17 Oimérõ reñeñandu vai ndaikatúi haguére rejapo hetave mbaʼe Jehovápe g̃uarã, iñimportánte reikuaa haʼe omombaʼetereiha la rejapomíva guive. Sapyʼánte ningo ñakomparaseterei la jajapóva umi mbaʼe ojapóvare umi ótro. Péro aníkena ejapo upéva. ¿Mbaʼérepa? Pórke ni Jehová ndojapói upéicha (Gál. 6:4). Por ehémplo, ñanemanduʼa María omoĩ hague Jesús rehe peteĩ aséite perfumádo hepyetereíva (Juan 12:3-5). Pe viúda mboriahumi katu omeʼẽ mokõi monedaʼi saʼieterei ovaléva (Luc. 21:1-4). Péro Jesúspe g̃uarã mokõivévante ohechauka vaʼekue ojerovia mbareteha, ha omombaʼeterei chupekuéra. Jaikuaaháicha Jesús ojoguaiterei Itúape, upévare ñaĩ segúro Jehová avei omombaʼeha entéro mbaʼe jajapóva jahayhúgui chupe ha jajeroviágui hese, haʼetérõ jepe ñandéve saʼietereiha la jajapóva.
18. ¿Mbaʼépa ikatu ñanepytyvõ ñañeporandu jave heta mbaʼe? (Ehecha pe rrekuádro “ La Biblia oasegura ndéve koʼã mbaʼe”).
18 Enterovévante sapyʼánte ikatu jaduda ha ñañeporandu heta mbaʼe, péro jahecháma haguéicha la Biblia ikatu ñanepytyvõ péicha jave. Upévare eñehaʼãmbaitékena hesakã hag̃ua ndéve umi mbaʼe reikuaaséva, péicha ndereikomoʼãi reduda. Ha reĩta segúro koʼã mbaʼégui: Jehová oñeinteresaha nderehe, oguerohoryha umi sakrifísio rejapóva hesehápe ha nevendesitaha. Aníkena reduda Jehová ohayhuetereiha entéro isiérvope ha orekoha chupekuéra enkuénta.
PURAHÉI 111 Umi mbaʼe ñanembovyʼáva
a MBAʼÉPA HEʼISE: Ko artíkulope jahecháta sapyʼánte ikatuha ñapensa Jehová noñeinteresaiha ñanderehe, térã jaduda umi mbaʼe jadesidi vaʼekuégui yma. Koʼápe noñeñeʼẽmoʼãi hína umi oúvare oduda ndojeroviavéigui Jehováre ha ipromesakuérare.
b La Biblia ndeʼíri mboy áñopa David oreko vaʼekue Jehová oiporavórõ guare chupe, péro provávlemente imitãiti upérõ guare. Ehecha Ñemañaha 1 de septiembre de 2011, páhina 29, párrafo 2.
