Umi ermáno oĩ vaʼekue Betélpe ombaʼapóma kuri mas de un áño oñekonstrui hag̃ua pe estasión de rrádio WBBR, peteĩ lugár héravape Staten Island, Nueva Yórkpe. Umi ermáno oñepyrũ omopotĩ pe terréno ha okonstrui peteĩ óga tuicháva umi ombaʼapóvape g̃uarã, ha avei ojapo hikuái peteĩ lugár apartete oñemoĩ hag̃ua umi ekípo de rrádio. Opa rire pe konstruksión umi ermáno oñepyrũ oprepara umi ekípo oñekotevẽva ikatu hag̃uáicha oñetransmiti pe rrádio. Péro upéi haʼekuéra osolusiona vaʼerã kuri heta provléma.

Umi ermánope ijetuʼu vaʼekue oinstala hag̃ua pe anténa prinsipál de rrádio. Upe anténa ipuku vaʼekue 91 métro, ha ojeko vaʼerã mokõi póste de madéra ipukúvare 61 métro káda uno. Pe primera ves haʼekuéra oñehaʼãrõ guare oinstala pe anténa, osẽ vai chupekuéra. Péro ojeroviágui Jehováre, amo ipahápe okonsegi hikuái. Calvin Prosser ombaʼapo vaʼekue upérõ ha heʼi: “Roinstalárire pe anténa de unoite, roʼéta kuri ojupe: ‘¡Ajépa ñandevalete!’”. Upéva rangue umi ermáno ohechakuaa Jehová oipytyvõ hague chupekuéra ha omombaʼeguasu chupe. Péro umi provléma ndopái upépe.

Upe tiémpope pe rrádio ipyahu vaʼekue, upévare umi ermánope ijetuʼu vaʼekue ojogua hag̃ua umi ekípo oñekotevẽva oñetransmiti hag̃ua pe rrádio. Upéicharamo jepe, umi ermáno otopa ag̃ui upe lugárgui peteĩ ekípo de transmisión usádo álgien ojapo vaʼekue ha ojogua chugui. Avei haʼekuéra ojogua rangue peteĩ mikrófono, oipurúnte peteĩ mikrófono orekóva peteĩ teléfono. Upéi febrérope, peteĩ pyharépe umi ermáno otantease oikótapa pe ekípo de transmisión isensilloitéva. Ikatu hag̃uáicha oñetransmiti álgo umi ermáno oñepyrũ opurahéi umi kántiko. Peteĩva umi ermáno hérava Ernest Lowe omombeʼu oiko hague peteĩ mbaʼe igrasiaitereíva. Haʼe heʼi umi ermáno opurahéi aja, ermáno  Rutherford b ohenói hague chupekuéra. Haʼe oĩ vaʼekue Broóklynpe, peteĩ siuda opytáva 25 kilómetrorupi upégui. Ha aviasído ohendu hína rrádiope umi ermáno opurahéivape.

Upérõ ermáno Rutherford heʼi chupekuéra: “Pemboguemína aipóva. Pendepu vaieterei ningo”. Umi ermáno opyta otĩeterei, upévare pyaʼeterei oho ombogue pe transmisór de rrádio. Péro upéicha avei haʼekuéra oikuaáma pe ekípo oikoha ha ikatutamaha ojapo umi transmisión.

Pe 24 de febrero de 1924-pe ojejapo pe primera transmisión. Upérõ ermáno Rutherford heʼi “pe estasión de rrádio ojepurutaha ojejapo hag̃ua pe tembiapo pe Mesías onkarga vaʼekue chupekuéra”. Avei heʼi péicha “oñepytyvõtaha la héntepe ontende hag̃ua la Biblia omboʼéva ha mbaʼe tiémpopepa jaiko”.

Pe primera transmisión ojejapo vaʼekue osẽ porãiterei. Ha 33 áñore ñane organisasión oipuru pe WBBR otransmiti hag̃ua umi prográma de rrádio.

Julio de 1924-pe umi estudiánte de la Biblia oho peteĩ asambléa ojejapo vaʼekuépe Columbus, Ohíope. Upérõ umi ermáno ou vaʼekue heta paísgui ohendu hag̃ua umi diskúrso ojejapo vaʼekue alemán, árabe, francés, griego, húngaro, inglés, italiano, lituano, polaco, ruso, ucraniano ha umi idióma escandinávope. Avei umi ermáno ikatu vaʼekue ohendu rrádio rupive algúno umi diskúrso. Ha ojejapo la oñekotevẽva ikatu hag̃uáicha peteĩ diário upepegua opuvlika káda día umi artíkulo oñeʼẽva pe prográma de asambléare.

Pe jueves 24 de julio mas de 5.000 ermáno ha ermána osẽ opredika pe siuda ojejapo haguépe pe asambléa. Upe díape oñemeʼẽ haimete 30.000 lívro ha umi ermáno omoñepyrũ voi miles de kúrso bíblico. Pe Watch Tower heʼi vaʼekue “upe moméntope la ojevyʼave hague pe asambléape”.

Pe viernes 25 de julio ermáno Rutherford ojapo aja peteĩva umi idiskúrso, pyʼaguasúpe olee peteĩ dokuménto okondenáva umi líder rrelihiósope. Upe dokuménto heʼi umi líder polítiko, líder rrelihióso ha komersiánte káusare “umi hénte ndaikatuiha oikuaa pe añetegua Ñandejára Rréinogui, ha upe Rréino hína la Ñandejára oipurútava ovendesi hag̃ua yvyporakuérape”. Ermáno Rutherford heʼi avei haʼekuéra tuicha ojavyha “oapojávo pe Sociedad de Naciónespe ha heʼívo Ñandejára ogovernaha upe Sosieda rupive”. Umi estudiánte de la Biblia ipyʼaguasu vaʼerã kuri omombeʼu hag̃ua pe mensáhe.

 Upe riremi, pe Watch Tower onohẽ peteĩ artíkulo heʼíva pe asambléa ojejapo vaʼekue Colúmbuspe, omombarete hague ermáno ha ermanakuéra jerovia. Upéicha rupi haʼekuéra ikatu ipyʼaguasu opredika hag̃ua oĩramo jepe oñemoĩva hesekuéra. Leo Claus oĩ vaʼekue pe asambléape ha heʼi: “Opa rire pe asambléa ropyta orekyreʼỹeterei ropredika hag̃ua pe mensáhe ore territóriope”.

Octúbrepe umi estudiánte de la Biblia oñepyrũ orreparti pe tratádo okondenáva umi líder rrelihiósope. Jahechamína la oiko vaʼekue peteĩ puévlo michĩva oĩva Oklahoma, Estados Unídospe. Peteĩ ermáno hérava Frank Johnson omeʼẽmbáma pe tratádo pe território oñeasignahápe chupe. Upéi haʼe ohaʼarõ vaʼerã 20 minúto umi ermáno ha ermána oúvape hína oheka chupe. Ko ermáno ndaikatúi opyta kállepe ohaʼarõ, pórke umi kuimbaʼe pe puevlopegua ipochyeterei hendive ha oheka chupe. Upévare ermáno Johnson oho okañy peteĩ tupao oĩvape upérupi, ha oikévo ohecha avave ndaiporiha upépe. Upémarõ haʼe oheja peteĩ tratádo pe pastór Bíbliape ha entéro umi lugár oguapyhápe la hénte. Upéi pyaʼe osẽ oho pe tupaógui, ha hembýiti chupe tiémpo, upémarõ odesidi ojapotaha la mísma kósa mokõi tupaópe.

Upéi ermáno Frank odipara jey oho pe lugár ojetopatahápe umi ótro ermanokuérandi. Haʼe oho okañy peteĩ estasión de servísio kupépe, ha upe guive haʼe ohecha umi kuimbaʼe opersegívape chupe. Umi kuimbaʼe ohasa upérupi péro ndohechái ermáno Fránkpe. Ha oho riremi hikuái, umi ermáno opredika vaʼekue ag̃ui upérupi og̃uahẽ oúvo ermáno Frank piári.

Peteĩva umi ermáno imanduʼávo la oiko vaʼekuére heʼi: “Rosẽvo pe siudágui rohasa umi mbohapy tupao renondérupi, ha káda tupaópe rohecha 50 persónarupi oñemboʼyha upépe. Algúno oleéma pe tratádo ha ótro katu orekónte ipópe ohechauka hag̃ua pe pastórpe. Kavalete ningo omeʼẽ oréve tiémpo rosẽ hag̃ua, upéicha rupi naoreprovlémai. Roagradese Jehovápe orepytyvõ haguére roikuaa hag̃ua mbaʼépa rojapo vaʼerã rontrega hag̃ua upe mensáhe avave ojapoʼỹre orerehe mbaʼeve”.

Umi ótro paíspe umi estudiánte de la Biblia opredika avei pyʼaguasúpe. Por ehémplo Fránciape pe nórte gotyo, Józef Krett opredika umi minéro oúvape Polóniagui ombaʼapo hag̃ua. Upérõ haʼe ojapóta kuri pe diskúrso hérava “Koʼẽrõitéma oñemoingove jeýta umi omano vaʼekuépe”. Umi ermáno oñepyrũ ontrega pe invitasión pe siudápe, péro peteĩ saserdóte upe siudapegua heʼi umi héntepe ani hag̃ua oho ohendu pe diskúrso. Péro avavete nopenái hese, pórke mas de 5.000 persóna oho ohendu pe diskúrso ha amo ipahápe pe saserdóte ohónte avei. Upérõ ermáno Krett heʼi pe saserdótepe odefende hag̃ua umi mbaʼe ogueroviáva, péro pe saserdóte ndoaseptái upe invitasión. Opa rire pe diskúrso ermáno Krett ontregapaite umi puvlikasión, pórke umi hénte oikuaaseterei la Bíbliagui (Amós 8:11).

Áfricape, ermáno Claude Brown oho omombeʼu hag̃ua umi notísia porã Costa de Órope, koʼág̃a hérava Ghana. Upépe hetaiterei persóna oikuaa vaʼekue pe añetegua, pórke ermáno Brown ojapo heta diskúrso ha ontrega heta puvlikasión upe lugárpe. Upe tiémpope John Blankson ostudia vaʼekue oiko hag̃ua chugui farmaséutiko. Haʼe oho vaʼekue ohendu hag̃ua peteĩva umi diskúrso ojapo vaʼekue ermáno Brown. Upérõ guare haʼe pyaʼeterei voi opilla otopa hague la verda. Haʼe heʼi vaʼekue: “Aikuaárõ guare pe añetegua avyʼaiterei, ha ahárõ guare pe astudiahápe añeʼẽ heta héntendi la aaprendévare”.

John oaprende vaʼekue la Biblia omboʼéva ha upévare oikuaa pe trinida haʼeha peteĩ enseñánsa japu. Upévare peteĩ díape John oho peteĩ tupaópe oporandu hag̃ua peteĩ saserdótepe pe trinidáre.  Péro pe saserdóte ipochyeterei ha osapukái chupe: “¡Nde ndahaʼéi kristiáno, nde haʼe pe aña rembiguái, esẽ chéve koʼágui!”.

John oho jey hógape ha oskrivi peteĩ kárta pe saserdótepe ojotopa hag̃ua hendive oñeʼẽ hag̃ua pe trinidáre. Pe saserdóte heʼi chupe oho hag̃ua pe profesór prinsipál rendápe. Pe profesór oporandu Jóhnpe: “¿Siérto piko la nde reskrivi pe kárta pe saserdótepe?”.

John okontesta: “Si, che askrivi chupe”.

Upémarõ pe profesór heʼi chupe oskrivi hag̃ua peteĩ kárta pe saserdótepe ojediskulpa hag̃ua hendive. Upévare John oskrivi pe saserdótepe ha heʼi chupe:

“Karai, che profesór ojerure chéve ajediskulpa hag̃ua nendive, ha che aime ajerure hag̃uáicha ndéve cheperdonami hag̃ua. Péro upearã nde reasepta vaʼerã avei umi mbaʼe remboʼéva japuha”.

Pe profesór oleévo la John oskrivíva oñemondýi ha heʼi chupe: “¿Ko reskrivíva piko remondose pe saserdótepe?”.

Ha John heʼi chupe: “Si, upevaiténte la askriviséva chupe”.

Pe profesór heʼi jey Jóhnpe: “Upéicharõ nde reñemosẽta koʼágui. ¿Mbaʼéicha piko reñeʼẽta péicha pe saserdótepe? Nde reikuaa porã pe goviérno oapojaha chupe”.

John heʼi jey: “Profesór, nde oremboʼe jave álgo ha norontendéiramo, ¿ajépa ikatu roporandu jey ndéve?”.

Pe profesór heʼi chupe: “Kláro ke si”.

Upémarõ John heʼi chupe: “Upéva ningo la oikóva koʼág̃a profesór. Pe saserdóte oremboʼe hína kuri la Biblia heʼíva ha che aporandu chupe peteĩ mbaʼe, péro pe saserdóte ndaikatúi ombohovái chéve. Upéicharõ piko, ¿mbaʼére che ajediskulpa vaʼerã hendive?”.

Amo ipahápe John noñemosẽi pe ostudiahágui, ha avei noñemondói la haʼe oskrivi vaʼekue pe saserdótepe.

Pe Watch Tower oñeʼẽ pe tembiapo ojejapo vaʼekuére upe áñope ha heʼi: ‘Ñande ikatu avei jaʼe la David heʼi vaʼekue: “Nde chemombaretéta añorairõ hag̃ua” (Salmo 18:39). La oikóva ko áñope ñanemokyreʼỹeterei pórke jahecha mbaʼeichaitépa Jehová ñanepytyvõ jajapo hag̃ua ko tembiapo. Umi isiérvo ifiélva opredika vyʼápe umi notísia porã’.

Opakuévo pe áño umi ermáno ohecha oñekonstrui hag̃ua peteĩ estasión de rrádio pyahu Chicágope. Upe estasión de rrádio pyahúpe haʼekuéra ombohéra PE ÑEʼẼ, pórke upe rrádio rupive ojepredikáta Ñandejára Ñeʼẽ. Upe tiémpope g̃uarã oipurúma hikuái umi ekípo iporãvéva, upéicha rupi umi hénte oikóva mombyry jepe ikatu ohendu pe mensáhe oñeʼẽva Ñandejára Rréinore. Por ehémplo umi oikóva nórte gotyo Canadápe ikatúma avei ohendu.

Áño 1925-pe Jehová oipytyvõta kuri umi estudiánte de la Bíbliape ontende hag̃ua la heʼíva Apocalipsis kapítulo 12. Osẽ rire pe entendimiénto pyahu, oĩ vaʼekue odesidíva ndoservimoʼãveimaha Jehovápe. Péro hetave vaʼekue la ovyʼáva ontende porãve rupi umi mbaʼe oiko vaʼekue yvágape, ha avei oikuaa haguére mbaʼéichapa upéva ohupyty Ñandejára puévlope ko yvy ape ári.