1. ¿Mbaʼeichagua rregálopa Jesús omeʼẽma ñandéve?

 JESÚS oĩrõ guare ko yvy ape ári imbaʼeporãiterei vaʼekue, ndaipóri ótro yvypóra ikatúva ohupyty chupe. Haʼe pyʼỹinte oipytyvõ vaʼekue umi héntepe ojapóvo umi milágro (Luc. 9:​12-17). Upéi haʼe omano ñanderehehápe ha péicha omeʼẽ ñandéve pe rregálo tuichavéva (Juan 15:13). Oikove jey rire, Jesús osegi vaʼekue imbaʼeporã. Opromete haguéicha, haʼe ojeruréma Itúape omeʼẽ hag̃ua ñandéve pe espíritu sánto ñanemboʼe ha ñanekonsola hag̃ua (Juan 14:​16, 17; 16:13). Umi rreunión rupive Jesús osegi ñanembokatupyry. Péicha rupi ikatu ñamboʼe ha ñaipytyvõ umi hénte oĩvape ko yvy tuichakuére oiko hag̃ua chuguikuéra Jesús disípulo (Mat. 28:​18-20). ¡Ajépa hetaite rregálo omeʼẽma ñandéve Jesús!

2. Ohechaukaháicha Efesios 4:​7, 8, ¿mávapa hína umi kuimbaʼe haʼéva peteĩ rregálo ñandéve g̃uarã?

² Jahechamína mbaʼeichagua rregálopa omeʼẽ avei ñandéve Jesús. Pablo heʼi vaʼekue Jesús ‘ojupírõ guare yvágape ombou hague kuimbaʼépe rregáloramo’ (elee Efesios 4:​7, 8). Pablo ohechauka Jesús omeʼẽ hague koʼã kuimbaʼe oipytyvõ hag̃ua kongregasiónpe heta hendáicha (Efes. 1:​22, 23; 4:​11-13). Ko ñane tiémpope koʼã kuimbaʼe haʼéva rregálo haʼe hína umi siérvo ministeriál, ansiáno ha superintendénte de sirkuíto. a Jaikuaaháicha, koʼã kuimbaʼe ndahaʼéi perfékto, upévare haʼekuéra ikatu hína ojavy (Sant. 3:2). Péro Jesucristo ojevale koʼã kuimbaʼére ñanepytyvõ hag̃ua. Haʼekuéra ningo peteĩ rregálo iporãitereíva kongregasiónpe g̃uarã.

3. ¿Mbaʼéichapa ikatu ñaipytyvõ koʼã ermánope? Emombeʼu peteĩ ehémplo.

³ Jesús omeʼẽ koʼã kuimbaʼépe peteĩ traváho iñimportantetereíva:  Haʼekuéra omopuʼã ha omombarete vaʼerã pe kongregasión (Efes. 4:12). Enterovetéva ikatu ñaipytyvõ koʼã ermánope okumpli hag̃ua ko traváho iñimportantetéva. Ñapensamína ko ehémplore: Oñemopuʼã jave peteĩ Salón del Rréino oĩ umi ombaʼapóva pe konstruksiónpe voi. Péro oĩ avei la oipytyvõva umi ombaʼapóvape oguerahávo tembiʼu térã ojapóvo ótra kósa ifáltava. Péicha avei, umi mbaʼe jaʼéva ha jajapóva rupive ikatu ñaipytyvõ umi siérvo ministeriálpe, ansiánope ha superintendénte de sirkuítope. Jahechamína mbaʼéichapa ideprovécho ñandéve pe traváho ojapóva hikuái ñanderehehápe. Avei ñaanalisáta mbaʼéichapa ikatu jahechauka jaagradeseha chupekuéra ha Jesúspe voi la ojapóvare.

UMI SIÉRVO MINISTERIÁL OPOROPYTYVÕ

4. ¿Mbaʼeichagua traváhopa ojapo raʼe yma umi siérvo ministeriál?

⁴ Síglo primérope, unos kuánto ermánope oñenombra vaʼekue siérvo ministeriál (1 Tim. 3:8). Ikatu oime Pablo oñeʼẽ raʼe hesekuéra heʼívo oĩha “umi oipytyvõva ótrope” (1 Cor. 12:28). Péicha jahecha umi siérvo ministeriál oñenkarga hague unos kuánto traváhore, ikatu hag̃uáicha umi ansiáno oporomboʼe ha oñangareko porã umi ovecha mimíre. Por ehémplo, yma umi siérvo ministeriál oipytyvõne raʼe ojekopia hag̃ua umi eskritúra, térã ikatu oime ojogua hikuái umi materiál oñekotevẽva upearã.

5. ¿Mbaʼeichagua traváhopa ojapo koʼág̃a umi siérvo ministeriál?

⁵ Ñapensamína umi traváho iñimportántevare orekóva ikárgope umi siérvo ministeriál (1 Ped. 4:10). Ikatu oime oñeasigna chupekuéra ojapo hag̃ua pe kontavilida kongregasionpegua, oñatende hag̃ua umi territóriore, ojerure hag̃ua umi puvlikasión ermanokuérape g̃uarã, oñatende áudio ha vidéore, oservi de akomodadór ha oipytyvõ ojejapo hag̃ua mantenimiénto Salón del Rréinope. Entéro koʼã traváho iñimportánte pe kongregasión oho porã hag̃ua hese (1 Cor. 14:40). Algúno siérvo ministeriál ojapo diskúrso pe rreunión éntre semanaguápe, ha avei ojapo umi diskúrso púvliko. Peteĩ siérvo ministeriálpe ikatu avei oñeasigna oipytyvõ hag̃ua peteĩ superintendénte de grúpope. Avei sapyʼánte algúno siérvo ministeriál omoirũ umi ansiánope ojapo hag̃ua umi visíta de pastoréo.

6. ¿Mbaʼe mbaʼérepa ñamombaʼeterei umi siérvo ministeriálpe?

⁶ ¿Mbaʼéichapa koʼág̃a umi siérvo ministeriál ñanepytyvõ kongregasiónpe? Peteĩ ermána oikóva Bolíviape hérava Berta b heʼi: “Umi siérvo ministeriál ojapo porãiterei rupi hembiapo kongregasiónpe, ore rodisfruta umi rreuniónpe. Upéicha rupi che ikatu apurahéi, akomenta, ahendu porã umi diskúrso, ha aaprende umi vidéo ha taʼangágui. Umi siérvo ministeriál oñangareko entéro umi ohóvare rreunionhápe oĩ hag̃ua segúro, ha umi ndohóivape oipytyvõ ikatu hag̃uáicha oñekonekta ha ohecha pe rreunión hóga guive. Opa rire pe rreunión katu haʼekuéra púntape omopotĩ pe Salón, oipytyvõ ojapo hag̃ua pe kontavilida kongregasionpegua ha oñenkarga oĩ hag̃ua umi puvlikasión oñekotevẽva. ¡Aagradeseterei ningo chupekuéra la ojapóvare!”. Peteĩ ermána oikóva Colómbiape hérava Lesly oreko iména haʼéva ansiáno. Haʼe heʼi: “Ahechakuaa umi siérvo ministeriál tuichaiterei oipytyvõha che ménape. Hesekueraʼỹ haʼe hetaitereive hembiapo vaʼerãmoʼã. Upévare aagradeseterei chupekuéra ikyreʼỹ ha iguápo haguére”. Katuete ningo enterovéva ñamombaʼeterei avei umi siérvo ministeriálpe (1 Tim. 3:13).

7. ¿Mbaʼéichapa ikatu jahechauka umi siérvo ministeriálpe ñandeagradesidoha? (Ehecha pe taʼanga).

⁷ Ikatu oime ñañandu javaloraha umi siérvo ministeriálpe, péro jahechauka vaʼerã avei chupekuéra upéva. La Biblia heʼi voi: “Pehechauka pendeagradesidoha” (Col. 3:15). Peteĩ ansiáno  oikóva Finlándiape hérava Cristobal omombeʼu la ojapóva jepi: “Aagradese hag̃ua peteĩ siérvo ministeriálpe, amondo jepi chupe peteĩ tarhetaʼi térã peteĩ mensáhe. Upépe amoĩ chupe peteĩ téxto bíblico ha haʼe chupe mbaʼéichapa haʼe chemokyreʼỹ, ha mbaʼérepa amombaʼete la itraváho”. Peteĩ matrimónio oikóva Nueva Caledóniape, hérava Pascual ha Jael omombeʼu pyʼỹinte oñemboʼeha umi siérvore. Pascual heʼi: “Ojapóma un tiémpo roiko hague roñemboʼe meme umi siérvo ministeriál rehe. Roagradese Jehovápe roguereko haguére koʼã ermánope kongregasiónpe, ha rojerure chupe oipytyvõmi hag̃ua chupekuéra”. Katuete Jehová ohendu ñañemboʼe jave péicha, ha pe kongregasión kompletoite oñevenefisia (2 Cor. 1:11).

UMI ANSIÁNO OMBAʼAPO JEJOPY KONGREGASIÓNPE

8. ¿Mbaʼérepa Pablo heʼi vaʼekue umi ansiáno itiémpope guare ‘ombaʼapo jejopy’ hague? (1 Tesalonicenses 5:​12, 13).

⁸ Umi ansiáno síglo primeropegua ‘ombaʼapo jejopy’ vaʼekue kongregasiónpe (elee 1 Tesalonicenses 5:​12, 13; 1 Tim. 5:17). ¿Mbaʼéichapa haʼekuéra ‘ogia vaʼekue’ pe kongregasión? Haʼekuéra odirihi umi rreunión ha odesidi oñondive heta mbaʼe pe kongregasión rehehápe. Avei haʼekuéra omeʼẽ vaʼekue konsého umi ermáno ha ermánape oikotevẽ jave, ikatu hag̃uáicha osegi ojerovia mbarete. Péro siémpre ojapo upéva mborayhúpe (1 Tes. 2:​11, 12; 2 Tim. 4:2). Avei umi ansiáno ombaʼapo jejopy vaʼekue omantene hag̃ua ifamíliape, ha avei haʼekuéra voi oñehaʼã osegi hag̃ua oñemoag̃ui Jehováre ha ojerovia mbarete (1 Tim. 3:​2, 4; Tito 1:​6-9).

9. ¿Mbaʼeichagua rresponsavilidápa oreko umi ansiáno koʼág̃arupi?

⁹ Umi ansiáno koʼag̃agua hembiapoiterei avei. Haʼekuéra opredika umi notísia porã (2 Tim. 4:5). Umi ansiáno omoĩ ehémplo porã opredikávo kyreʼỹme, oorganisávo pe predikasión ikongregasión territóriope, ha avei ñanembokatupyrývo japredika ha ñamboʼe porã hag̃ua. Sapyʼánte umi ansiáno tekotevẽ avei oporohusga, péro haʼekuéra siémpre ojapo upéva mborayhúpe. Por ehémplo peteĩ ermáno opeka vai jave, pe ansiáno oñehaʼãmbaite oipytyvõ chupe oĩ porã jey hag̃ua Jehovándi. Péro avei okuidaiterei pe kongregasiónre osegi hag̃ua ipotĩ (1 Cor. 5:​12, 13; Gál. 6:1). Péro la iñimportanteveha, umi ansiáno okuida pe kongregasiónre ojapoháicha peteĩ pastór (1 Ped. 5:​1-3). Haʼekuéra ojeprepara porã ojapóta jave idiskúrso, oñehaʼãmbaite oikuaa káda únope kongregasiónpe ha ojapo umi visíta de pastoréo. Oĩ avei umi ansiáno oipytyvõva oñemopuʼã hag̃ua umi Salón del Rréino ha ojejapo hag̃ua mantenimiénto. Oĩ oorganisáva umi aty guasu, ombaʼapóva Komite de Enláse con los Hospitálespe, ha avei pe Grúpo de visíta al pasiéntepe. Hiʼarive haʼekuéra okumpli vaʼerã hetave asignasión. Legálmente umi ansiáno ombaʼapo jejopy ñanderehehápe.

10. ¿Mbaʼe mbaʼérepa ñamombaʼete umi ansianokuérape?

¹⁰ Jehová heʼi vaʼekue umi pastór oñangareko porãtaha ñanderehe, upévare ‘ndajakyhyjemoʼãi ni nañañemondyimoʼãi’ (Jer. 23:4). Peteĩ ermána oikóva Finlándiape hérava Johana ohechakuaa siertoiteha pe téxto heʼíva isy oúrõ guare hasyete. Haʼe heʼi: “Chéveko ijetuʼu vaʼekue amombeʼu hag̃ua ótrope la añandúva. Péro upérõ peteĩ ansiáno ni ndaikuaaporãiva ipasiénsia vaʼekue cherehe, oñemboʼe chendive ha oasegura chéve Jehová cherayhuetereiha. Ni nachemanduʼaporãi ningo mbaʼépa la heʼipa vaʼekue chéve pe ermáno, péro si chemanduʼa upe rire ndakyhyjevéi hague. Aikuaa porã Jehová omondo hague pe ansiánope che rendápe aikotevẽve jave”. ¿Mbaʼéichapa umi ansiáno ne kongregasionpegua nepytyvõma?

11. ¿Mbaʼéichapa ikatu jahechauka jaagradeseha umi ansiánope la ojapóvare? (Ehecha pe taʼanga).

¹¹ Jehová oipota jahechauka umi ansiánope ñande pyʼaite guive ñamombaʼeha chupekuéra  “pe itraváhore” (1 Tes. 5:​12, 13). Peteĩ ermána oikóva Finlándiape hérava Henrieta heʼi: “Umi ansiáno ningo vyʼápe ñanepytyvõ. Péro upéva ndeʼiséi haʼekuéra itiempoitereiha, naikaneʼõiha térã naiprovlemaiha. Upévare sapyʼánte añemboja peteĩvare ha haʼe chupe: ‘Nde ningo che ermáno ndeguápo ha ndekalidaiterei, ha upévante aipota reikuaa’”. Peteĩ ermána hérava Sara oikóva Turquíape heʼi: “Umi ansiáno oikotevẽ ñamokyreʼỹ chupekuéra osegi hag̃ua ojapo hembiapo, upévare ikatu jaskrivi chupekuéra peteĩ tarhetaʼi, ñainvita chupekuéra okaru hag̃ua ñanendive térã ñamoirũ chupekuéra predikasiónpe”. Epensamína, ¿oĩpa peteĩ ansiáno nde remombaʼetereíva pe traváho ojapóvare kongregasiónpe? Upéicharõ, ehechaukákena chupe reagradeseha la ojapóvare (1 Cor. 16:18).

UMI SUPERINTENDÉNTE DE SIRKUÍTO ÑANEMOMBARETE

12. ¿Mávapepa onombra vaʼekue avei Jesús omombarete hag̃ua umi kongregasiónpe? (1 Tesalonicenses 2:​7, 8).

¹² Jesús onombra vaʼekue algúno kuimbaʼépe oipytyvõ hag̃ua pe kongregasiónpe ótro hendáicha. Haʼe ojevale vaʼekue umi ansiáno oĩ vaʼekuére Jerusalénpe omondo hag̃ua Pablo, Bernabé ha hetavépe kómo superintendénte ovisita hag̃ua umi kongregasión (Hech. 11:22). ¿Maʼerãpa ojejapo upéva? Umi siérvo ministeriál ha ansiánope oñenombra omombarete hag̃ua pe kongregasión, ha umi superintendéntepe oñenombra avei upearã (Hech. 15:​40, 41). Koʼã superintendénte heta ojesakrifika vaʼekue okumpli porã hag̃ua hembiapo, sapyʼánte haʼekuéra ojapeligra vaʼekue voi omboʼe ha omokyreʼỹ hag̃ua umi ótrope (elee 1 Tesalonicenses 2:​7, 8).

13. ¿Mbaʼeichagua rresponsavilidápa oguereko umi superintendénte de sirkuíto?

¹³ Umi superintendénte de sirkuíto tódo el tiémpo oviaha, algúno oviaha voi hetaiterei kilómetro ovisita hag̃ua umi kongregasión. Káda semána pe superintendénte de sirkuíto ojapo diskúrso, visíta de pastoréo, rreunión prekursorkuérandi, rreunión ansianokuérandi ha pe aty predikasionrã. Haʼekuéra oorganisa umi aty guasu, oprepara idiskúrso asamblearã, omboʼe pe Eskuéla de Prekursórpe ha oorganisa pe  rreunión ojejapóva umi prekursorkuérandi oĩva pe sirkuítope. Hiʼarive pe sukursál omeʼẽ avei chupekuéra umi traváho iñimportánteva ha sapyʼánte umíva iñurhénte voi.

14. ¿Mbaʼe mbaʼérepa ñamombaʼete la ojapóva umi superintendénte de sirkuíto?

¹⁴ ¿Mbaʼéichapa umi superintendénte de sirkuíto oipytyvõ umi kongregasiónpe? Peteĩ ermáno oikóva Turquíape heʼi: “Pe superintendénte de sirkuíto orevisita rire apyta jepi chekyreʼỹ aipytyvõve hag̃ua umi ermáno ha ermánape. Heta superintendénte de sirkuítopema aikuaa ha haʼekuéra hembiapoitereíramo jepe, siémpre oñemotiémpo oñeʼẽ hag̃ua chendive. Upévare ifásil añemoag̃ui hag̃ua hesekuéra”. Johana, pe ermána ajeʼi ñamensionáma vaʼekue, peteĩ vuéltape opredika peteĩ superintendénte de sirkuítondi, péro ndotopái hikuái avavépe hógape. Upéi Johana heʼi: “Núnka ndacheresaraimoʼãi upe díagui. Upérõ mokõi che ermána ova ramoite ha ahechagaʼueterei chupekuéra. Péro pe superintendénte de sirkuíto chemokyreʼỹ ha heʼi chéve: ‘Jaservívo Jehovápe ikatu hína ñaĩ mombyry ñane hénte ha amigokuéragui, péro upéva ningo sapyʼaiterãnte, pórke múndo pyahúpe jarekóta hetaiterei oportunida ñakomparti hag̃ua hendivekuéra’”. Katuete ningo nde avei nemanduʼa porãiterei la ojapo vaʼekuére nderehehápe peteĩ superintendénte de sirkuíto (Hech. 20:37–21:1).

15. a) Ohechaukaháicha 3 Juan 5-8, ¿mbaʼéichapa ikatu jahechauka ñamombaʼeha umi superintendéntepe? (Ehecha pe taʼanga). b) ¿Mbaʼérepa ñamombaʼe vaʼerã umi siérvo, ansiáno, ha superintendénte rembirekópe, ha mbaʼéichapa ikatu jajapo upéva? (Ehecha pe rrekuádro “ Jarekókena enkuénta koʼã ermáno rembirekópe”).

¹⁵ Apóstol Juan omokyreʼỹ vaʼekue Gáyope orresivi porã hag̃ua umi ermáno ohóvape omokyreʼỹ hag̃ua pe kongregasiónpe. Haʼe heʼi chupe: “Ág̃a oho vove hikuái, ejapókena ikatumíva guive eipytyvõ hag̃ua chupekuéra Ñandejára oguerohoryháicha” (elee 3 Juan 5-8). Ñande  avei koʼág̃a ikatu jasegi pe konsého ñainvitávo pe superintendénte de sirkuítope okaru hag̃ua ñanendive. Ikatu avei ñasẽve japredika pe semána haʼe ovisitahápe ñane kongregasión. Lesly, pe ermána ñañeʼẽ hague, omombeʼu mbaʼéichapa oagradese umi superintendénte de sirkuítope. Haʼe heʼi: “Añemboʼe Jehovápe omeʼẽ hag̃ua chupekuéra umi mbaʼe oikotevẽva. Avei che ménandi roskrivi jepi chupekuéra peteĩ kárta roʼe hag̃ua chupekuéra mbaʼeichaitépa orepytyvõ la ivisíta”. Aníkena ñanderesarái ñandéichante avei umi superintendénte de sirkuíto ikatuha ikaneʼõ ha ohasaha umi mbaʼe ijetuʼúvare. Ikatu sapyʼánte haʼekuéra hasy, ojepyʼapy ha oñedesanima jepe. Upévare Jehová ikatu ombohovái peteĩ superintendéntepe iñemboʼe ojevalévo ñanderehe ñañeʼẽ hag̃ua chupe mborayhúpe térã ñameʼẽ hag̃ua chupe peteĩ rregaloʼi (Prov. 12:25).

ÑAIKOTEVẼ HETAVE ERMÁNO OMBAʼAPO JEJOPÝVA

16. Ohechaukaháicha Proverbios 3:​27, ¿mbaʼépa ikatu oñeporandu umi ermáno?

¹⁶ Ko múndo tuichakuére ñaikotevẽterei umi ermáno ikatúvare oservi de siérvo ministeriál, ansiáno ha superintendénte de sirkuíto. Upévare oimérõ nde haʼe peteĩ ermáno ojevautisámava, ¿ikatúpa hína “rejapo álgo” reipytyvõve hag̃ua? (elee Proverbios 3:27). ¿Ikatúpa remoĩ pe méta reservi hag̃ua de siérvo ministeriál? Térã oimérõ nde haʼéma siérvo, ¿ikatúpa remoĩ pe méta reservi hag̃ua de ansiáno? c ¿Ikatúpa rejapo umi kámbio tekotevẽva reho hag̃ua pe Eskuéla de Evanhelisadórpe? Ko eskuéla tuichaiterei nepytyvõta Jesús ojevale porãve hag̃ua nderehe. Péro ikatu oime reñandu nereimeiha preparádo rejapo hag̃ua koʼã mbaʼe. Oimérõ upéicha, eñemboʼékena Jehovápe ha ejerure chupe ijespíritu sánto tanepytyvõ rekumpli porã hag̃ua oimeraẽ asignasión oñemeʼẽva ndéve (Luc. 11:13; Hech. 20:28).

17. ¿Mbaʼépa Jesucristo ohechauka onombrávo umi ermáno ombaʼapo jejopývape?

¹⁷ Jesucristo onombrávo umi ermánope ohechauka ñandegia porãitereiha koʼã ára pahápe (Mat. 28:20). Javyʼaiterei ningo jaguereko haguére peteĩ Rréi ñanderayhúva ha imbaʼeporãva. Haʼe oikuaa porãiterei umi mbaʼe ñaikotevẽva ha omeʼẽ ñandéve umi ermáno ñanepytyvõ hag̃ua. Upévare jahechaukákena koʼã ermáno ombaʼapo jejopývape ñamombaʼetereiha chupekuéra ha siémpre jaagradese Jehovápe, pórke chugui ou “entéro mbaʼe porã ha rregálo iporãva” (Sant. 1:17).