1. ¿Mbaʼépa Jehová oñandu isiervokuérare?

 JEHOVÁ ohecha entéro mbaʼe ohasáva isiervokuéra. Haʼe ñanderecha javyʼa ha ñañembyasy jave (Sal. 37:18). Haʼe ningo ovyʼaiterei ñandereheve ñameʼẽ jave chupe la iporãvéva, jepe jahasa hína umi provléma ijetuʼúvare ha ñañeñandu vaieterei. Péro ndahaʼéi upévante, haʼe ñanepytyvõseterei ha ñanekonsolase.

2. ¿Mbaʼépa Jehová ojapo umi oñembyasýva rehehápe, ha mbaʼépa káda uno jajapo vaʼerã?

² Salmo 147:3 heʼi Jehová ‘omongueraha umi erída’ orekóva umi oñembyasýva. Péicha jahecha Jehová oñangarekoha mborayhúpe umi oñekevrantávare ha umi oñeñandúvare yvýre. ¿Péro mbaʼéichapa ñande ikatu ñamoĩ ñande párte? Epensamína ko ehémplore. Peteĩ doktór ivaléva ikatu ojapo heta mbaʼe oipytyvõ hag̃ua peteĩ persónape okuera hag̃ua, péro upéicha avei pe persóna tekotevẽ ojapo entéro mbaʼe pe doktór heʼihaichaite chupe. Upévare ko artíkulope jahecháta mbaʼépa Jehová heʼi Iñeʼẽ rupive umi oñembyasývape, ha avei jahecháta mbaʼéichapa ikatu jasegi ikonsého.

JEHOVÁ OASEGURA NDÉVE NEMOMBAʼETEREIHA

3. ¿Mbaʼéicha rupi oĩ algúno oñandúva ndovaleiha mbaʼeverã?

³ Ñambyasýramo jepe, ko múndope oĩ hetaiterei hénte ndohayhúiva hapichápe. Upéicha rupi haʼekuéra otrata vai ótrope, ha oñanduka chupekuéra ndovaleiha mbaʼeverã. Peteĩ ermána hérava Helen a heʼi: “Che tuakuéra ningo ndohechaukái vaʼekue chéve cherayhuha. Che túa iviolénto vaʼekue, ha káda día heʼi voi chéve ndavaleiha mbaʼeverã”. Oiko haguéicha ko ermánare, ikatu oime oĩ raʼe ndetrata vaíva, pyʼỹinte nemonáva yvýre ha  oñandukáva ndéve nderevaleiha mbaʼeverã. Oimérõ upéva nde káso, oiméne ijetuʼu ndéve reguerovia hag̃ua oĩha álgien añetehápe ojepyʼapýva nderehe ha nderayhúva.

4. Ohechaukaháicha Salmo 34:​18, ¿mbaʼépa Jehová oasegura ndéve?

⁴ Oĩramo jepe umi ndetrata vaietereíva, nde ikatu reĩ segúro Jehová nderayhuetereiha ha nemombaʼeha. ‘Jehová ningo oĩ ag̃ui umi osufrívagui’ (elee Salmo 34:18). Oiméramo nde ‘reñekevranta ha reñeñandu yvýre’, nemanduʼákena Jehová ohecha hague nderehe heta mbaʼe porã ha haʼe voi nemoag̃ui ijehe (Juan 6:44). Haʼe ningo siémpre oĩ nepytyvõ hag̃uáicha nderayhueterei rupi.

5. ¿Mbaʼépa ikatu ñaaprende Jesús otrata lájagui umi héntepe?

⁵ Ikatu ñantende porãve umi mbaʼe Jehová oñandúva ñaanalisáramo Jesús ehémplo. Haʼe oĩrõ guare ko yvy ape ári otrata porãiterei umi persóna ojeapoʼívape, ha umi oñandúvape ndovaleiha mbaʼeverã (Mat. 9:​9-12). Por ehémplo yma oĩ vaʼekue peteĩ kuña orekóva peteĩ mbaʼasy igravetereíva. Haʼe oho vaʼekue opoko Jesús aóre ogueroviágui péicha okuerataha. Upérõ Jesús okonsola ha oguerohory chupe ojerovia haguére (Mar. 5:​25-34). Jesús ojoguaiterei Itúape entéro mbaʼépe (Juan 14:9). Upévare nde ikatu reĩ segúro Jehová nemombaʼetereiha ha ohechaha entéro umi mbaʼe porã reguerekóva. Haʼe ohecha mbaʼeichaitépa rejerovia hese ha rehayhu chupe.

6. ¿Mbaʼépa ikatu rejapo reñandúramo nderevaleiha mbaʼeverã?

⁶ Oimérõ reñandu nderevaleiha mbaʼeverã, ¿mbaʼépa ikatu rejapo? Elee la Bíbliape umi téxto oaseguráva ndéve Jehová nemombaʼetereiha ha ejepyʼamongeta umívare (Sal. 94:19). b Ikatu oime ereko raʼe peteĩ méta nderehupytýiva, térã ndaikatúi ejapo la umi ótro  ojapóva. Oimérõ upéicha aníkena eñepyrũ eñekompara ótrore ha ani epensaiterei la ndaikatúivare rejapo. Jehová ningo nohaʼarõi nde rejapo umi mbaʼe ndaikatumoʼãiva (Sal. 103:​13, 14). Oimérõ oĩ rakaʼe nemaltratáva, nemoñeñandu vaíva térã ndevioláva, aníkena eñeñandu kulpávle. Nde ningo neremereséi péicha rejetrata ha la oikóva ndahaʼéi nde kúlpa. Nemanduʼákena Jehová koʼẽrõitéma ohusgataha umi iñañávape, ha siémpre oipytyvõtaha umi oñemaltratávape (1 Ped. 3:12). Peteĩ ermána hérava Sandra, heta oñemaltrata vaʼekue imitãkuñaʼírõ guare. Haʼe heʼi: “Pyʼỹinte ajerure Jehovápe tachepytyvõmi ahecha hag̃ua avei umi mbaʼe porã haʼe ohecháva cherehe”.

7. ¿Mbaʼéichapa umi mbaʼe ijetuʼúva jahasa vaʼekue ikatu ñanepytyvõ Jehová servísiope?

⁷ Ani reduda Jehová ikatuha ojevale nderehe reipytyvõ hag̃ua ótrope. Haʼe omeʼẽ ndéve peteĩ priviléhio ijojahaʼỹva rembaʼapo hag̃ua hendive predikasiónpe (1 Cor. 3:9). Rehasa rupi yma umi mbaʼe ijetuʼúva, koʼág̃a ikatu rentende porãve umi osufrívape ha ikatu rejapo heta mbaʼe reipytyvõ hag̃ua chupekuéra. Helen, pe ermána ñamensionáma vaʼekue, oñeñandu porãvéma oĩ rupi la oapojáva chupe ha koʼág̃a haʼe avei oipytyvõ ótrope. Haʼe heʼi: “Che ningo añandúmi vaʼekue ndavaleiha mbaʼeverã. Péro Jehová chepytyvõ rupi, añandúma oĩha cherayhúva ha haʼe ojevale cherehe aipytyvõ hag̃ua umi ótrope”. Koʼág̃a Helen ovyʼaiterei ikatu haguére oservi de prekursóra rregulár.

JEHOVÁ OIPOTA REASEPTA HAʼE NEPERDONAMAHA

8. ¿Mbaʼépa Jehová heʼi ñandéve Isaías 1:​18-pe?

⁸ Oĩ ermáno ojepyʼapyetereíva umi mbaʼe vai ojapo vaʼekuére ymave, tahaʼe ojevautisa mboyve térã upe rire. Péro ñanemanduʼa vaʼerã Jehová ñanderayhuetereígui omeʼẽ hague pe rreskáte operdona hag̃ua ñande pekadokuéra. Jehová oipota jaasepta upe rregálo, upévare haʼe oasegura ‘jaiko porã jey rire hendive’ ñaneperdonambaitemaha (elee Isaías 1:18). c Javyʼaite Jehová siémpre imanduʼa haguére umi mbaʼe porã jajapóvare, ha hesaráima haguére ñande pekadokuéragui (Sal. 103:​9, 12; Heb. 6:10).

9. ¿Mbaʼérepa ndovaléi jasegi ñapensa umi mbaʼe vai jajapo vaʼekuére ymave?

⁹ Oimérõ reñeñandu vai gueteri umi mbaʼe vai rejapo vaʼekuére yma, eñehaʼãmbaitékena epensa umi mbaʼe porã ikatúvare rejapo koʼág̃a ha amo gotyove. Epensamína Pablo ehémplore. Haʼe opersegi mbarete vaʼekue umi kristiánope ha upéi ombyasyeterei vaʼekue ojapo haguére upéva. Péro haʼe oikuaa Jehová operdonáma hague chupe (1 Tim. 1:​12-15). ¿Osegípa raʼe Pablo opensa umi mbaʼe vai ojapo vaʼekuére ymave? Nahániri, ha ndoikói vaʼekue avei opensa umi mbaʼe ohupyty vaʼekuére umi judío rrelihiónpe (Filip. 3:​4-8, 13-15). Upéva rangue Pablo osegi kyreʼỹme omeʼẽ la iporãvéva Jehová servísiope, ha ojesareko la ikatúvare ojapo amo gotyove. Pábloicha avei, nde ndaikatuvéima rekambia umi mbaʼe vai rejapo vaʼekue yma, péro si ikatu rembovyʼa ha remombaʼeguasu Jehovápe koʼág̃a. Avei ikatu rejesareko meme umi promésa porãite oñekumplítavare amo gotyove.

10. Oimérõ yma rejapo raʼe álgo hasy asýva ótrope, ¿mbaʼépa ikatu rejapo?

¹⁰ Ikatu oime reñeñandu vai rejapo haguére yma peteĩ mbaʼe hasy asýva ótrope. Oimérõ upéicha, eñehaʼã ejapo ikatumíva guive reĩ porã jey hag̃ua pe persónandi ha resolusiona hag̃ua pe provléma. Ikatu ere ha ehechauka chupe rembyasyetereiha la rejapo vaʼekue  (2 Cor. 7:11). Ejerurékena avei Jehovápe tanepytyvõ ndéve ha pe persónape pesegi hag̃ua peservi chupe ha pendepyʼaguapy jey hag̃ua.

11. ¿Mbaʼépa ikatu ñaaprende proféta Jonás ehémplogui? (Ehecha pe taʼanga).

¹¹ Eñehaʼãkena eaprende umi mbaʼe vai rejapo vaʼekuégui yma, ha eheja Jehová tandepuru haʼe oipotaháicha. Jahechamína proféta Jonás ehémplo. Ñandejára omanda vaʼekue chupe oho hag̃ua Nínivepe, péro oho rangue upépe haʼe ojapi oho ótro ladoite. Upévare Jehová okorrehi Jonáspe ha haʼe oaprende upe mbaʼe vai ojapo vaʼekuégui (Jon. 1:​1-4, 15-17; 2:​7-10). Jehová nopensái vaʼekue Jonás naipohãveimaha. Upéva rangue haʼe omeʼẽ jey Jonáspe ótra oportunida oho hag̃ua Nínivepe, ha ko vuéltape Jonás pyaʼeterei ohechauka iñeʼẽrenduha ha oho. Haʼe ombyasyeterei vaʼekue la ojapóva, péro ndohejái upéva ojoko chupe oasepta hag̃ua peteĩ asignasión oúva Jehovágui (Jon. 3:​1-3).

JEHOVÁ NEKONSOLÁTA IJESPÍRITU SÁNTO RUPIVE

12. ¿Mbaʼéichapa Jehová ikatu omeʼẽ ñandéve pyʼaguapy jahasa jave umi mbaʼe ijetuʼuetereíva? (Filipenses 4:​6, 7).

¹² Jahasa jave umi mbaʼe ijetuʼúva ha ñanemarkaitéva voi, Jehová ikatu ñanekonsola ijespíritu sánto rupive. Jahechamína la ohasa vaʼekue Ron ha Carol. Haʼekuéra opyta vaieterei peteĩva ifamília ojesuisidárõ guare, ha heʼi: “Anteve rohasáma vaʼekue heta mbaʼe ijetuʼúva, péro núnka ndorosufríriva la peichaite peve. Heta vése pyharekue ni ndorokéi. Péicha jave roñemboʼe Jehovápe ha roñandu pe pyʼaguapy oñeñeʼẽvare Filipenses 4:​6, 7-pe” (elee). Oimérõ nde rehasa hína peteĩ situasión ijetuʼuetereívare, eñemboʼékena Jehovápe ha emombeʼupaite chupe la reñandúva. Ikatu reñeʼẽ hendive heta vése, ha nderehéma avei odepende ipukútapa térã mbykýtapa ne ñemboʼe (Sal. 86:3; 88:1). Ejerure jey jeýkena Jehovápe ijespíritu sánto ha haʼe siémpre nepytyvõta (Luc. 11:​9-13).

13. ¿Mbaʼéichapa Jehová espíritu sánto ikatu ñanepytyvõ jasegi hag̃ua jaadora chupe? (Efesios 3:16).

¹³ ¿Rehasápa raʼe álgo ijetuʼúva ha koʼág̃a reñandu nekangy ha neremeʼẽveimaha? Jehová espíritu sánto ikatu nemombarete resegi hag̃ua reservi chupe (elee Efesios 3:16). Jahechamína mbaʼépa ohasa vaʼekue peteĩ ermána hérava Flora. Haʼe ha iména oservi vaʼekue oñondive kómo misionéro, péro upéi iména omoakãratĩ chupe ha ojedivorsia hikuái. Ermána Flora heʼi: “Apyta yvýre che ména chetraisiona haguére, ha péantema la arekóva che akãme. Upévare añemboʼe Jehovápe omeʼẽ hag̃ua chéve ijespíritu sánto asegi hag̃ua aaguanta. Ñepyrũrã apensa vaʼekue ndaikatumoʼãiha agueropuʼaka la oikóva, péro Jehová chekonsola ha chemombarete rupi asegi aaguanta”. Jehová oipytyvõ vaʼekue Flórape ojeroviave hag̃ua hese, ha oĩ hag̃ua segúra haʼe oipytyvõtaha chupe toiko la oikóva. Upéi ermána Flora heʼive: “Oñekumpli cherehe la heʼíva Salmo 119:32. Upépe heʼi: ‘Kyreʼỹme akumplíta ne mandamiénto, pórke nde chepytyvõ antende porãve hag̃ua umíva’”.

14. ¿Mbaʼépa jajapo vaʼerã Jehová espíritu ñanepytyvõ hag̃ua?

¹⁴ Ejerure rire Jehovápe ijespíritu sánto, ¿mbaʼépa ikatu rejapove? Ejapo umi mbaʼe nepytyvõtava erresivi hag̃ua upe espíritu. Por ehémplo eho rreunionhápe ha esẽ epredika. Avei relee vaʼerã la Biblia káda día, péicha ikatúta rejepyʼamongeta Jehová opensa lájare (Filip. 4:​8, 9). Releévo la Biblia ikatu reanalisa pe ehémplo ohejáva umi Ñandejára siervokuéra yma guare. Haʼekuéra ombohovái vaʼekue heta mbaʼe ijetuʼúva, péro Jehová oipytyvõ vaʼekue chupekuéra oaguanta hag̃ua umi pruéva. Sandra, pe ermána ajeʼi ñamensionáma vaʼekue, ohasa hetaiterei provlémare. Haʼe  heʼi: “José ehémplo chemokyreʼỹeterei. Haʼe oaguanta vaʼekue heta pruéva ha inhustísia, péro núnka noñemomombyrýi vaʼekue Jehovágui” (Gén. 39:​21-23).

JEHOVÁ OJEVALEKUAA UMI ERMÁNORE NEKONSOLA HAG̃UA

15. ¿Mávapa ikatu ñanekonsola ha mbaʼéichapa ikatu ñanepytyvõ hikuái? (Ehecha pe taʼanga).

¹⁵ Jahasa asy jave, umi ñane ermáno ikatu ‘tuichaiterei ñanekonsola’ (Col. 4:11). Umi ermanokuéra ningo peteĩ rregálo oúva Jehovágui ohechaukáva mbaʼeichaitépa haʼe ñanderayhu. Haʼekuéra ñanerendu ñamombeʼu jave chupekuéra la ñañandúva, ha sapyʼánte oĩ haguére ñanendive tuicha ñanekonsola. Avei ñanemokyreʼỹ hag̃ua, haʼekuéra olee jepi ñandéve peteĩ téxto térã oñemboʼe ñanendive (Rom. 15:4). d Ikatu avei peteĩ ermáno térã peteĩ ermána ñanemomanduʼa la Jehová opensávare peteĩ mbaʼére, ha upéva ñanepytyvõ ñaĩ hag̃ua trankílo. Umi ermáno oñehaʼã avei ñanepytyvõ heta hendáicha, por ehémplo okomparti ñanendive hembiʼu.

16. ¿Mbaʼépa tekotevẽ jajapo umi ermáno ñanepytyvõ hag̃ua?

¹⁶ Sapyʼánte tekotevẽtamante jajerure umi ermánope ñanepytyvõmi hag̃ua. Haʼekuéra ñanderayhu ha ojapose álgo ñanderehehápe (Prov. 17:17). Péro ikatu hína ndoikuaái hikuái mbaʼéichapa ñañeñandu térã mbaʼépa ñaikotevẽ  (Prov. 14:10). Oimérõ nde reñeñandu vai hína, eñeʼẽkena peteĩ ne amígo ikalida ha iñakãguapývandi. Emombeʼu vaʼerã chupe mbaʼéichapa reñeñandu, ha mbaʼépa haʼe ikatu ojapo nepytyvõ hag̃ua. Ikatu avei reñeʼẽ peteĩ térã mokõi ansiáno reñeñandu porãvandi. Ha oĩ ermána odesidíva oñeʼẽ peteĩ ermána iñakãguapývandi ha upéva omokyreʼỹeterei chupekuéra.

17. ¿Mbaʼérepa sapyʼánte ikatu eñemohaʼeño, péro mbaʼérepa reñehaʼã vaʼerã reĩ ermanokuérandi?

¹⁷ Aníkena eñemohaʼeño. Ñañembyasy térã ñañeñandu vaieterei jave, ikatu ndahaʼéi la ñandegustapáva jahasa tiémpo ermanokuérandi. Sapyʼánte ikatu umi ermáno nontendeporãi la rehasáva térã heʼi ndéve álgo nemoñeñandu vaivéntemava (Sant. 3:2). Péro ani reheja umíva ndejoko reĩ hag̃ua umi ermáno ha ermanakuérandi, pórke Jehová ikatu hína ojevale hesekuéra nemokyreʼỹ hag̃ua. Peteĩ ansiáno hérava Gabriel oreko depresión ha haʼe heʼi: “Heta vése che nañeʼẽséi ha naĩséi che amigokuérandi”. Upéicharamo jepe, Gabriel siémpre oñehaʼãmbaite oĩ hag̃ua umi ermanokuérandi ha pyʼỹinte oñeñandu porãve upe rire. Peteĩ ermána hérava Amy heʼi: “Che ningo ahasáma heta mbaʼe ijetuʼúva, upévare sapyʼánte hasy chéve akonfia hag̃ua ótrore. Péro koʼág̃a ahayhúma ermanokuérape ha aaprendéma ikatuha akonfia hesekuéra, pórke Jehová voi ojapo upéva. Upéva chembovyʼa chéve ha Jehovápe avei”.

JEHOVÁ PROMÉSA IKATU NEKONSOLA

18. ¿Mbaʼéguipa ñaĩ vaʼerã segúro, ha mbaʼépa ikatu jajapo koʼág̃ama voi?

¹⁸ Ikatu ñaĩ segúro Jehová koʼẽrõitéma ohunditaha entéro umi provléma ñandereko asýva (Apoc. 21:​3, 4). Upe tiémpo og̃uahẽ vove, entéro umi mbaʼe ñanembosufríva ‘ojeietétama ñane korasõgui’ (Is. 65:17). Jahecháma haguéicha, Jehová koʼág̃ama voi ‘omonguera umi erída’ orekóva umi oñembyasýva ha osufríva. Upévare, eaprovechapaitékena entéro umi mbaʼe Jehová omeʼẽva ndéve nekonsola ha nepytyvõ hag̃ua. Ha aníkena ni michĩmi eduda haʼe ‘ojepyʼapyha nderehe’ (1 Ped. 5:7).