1, 2. ¿Mbaʼépa oiko vaʼekue mokõi Jesús disípulore oguata aja ohóvo Emaúspe?

 ÑAPENSAMÍNTENA la oiko vaʼekuére. Jesús disipulokuéra oñembyasyeterei ha okyhyje. Pe 16 de Nisán áño 33-pe, mokõi idisípulo oho hína Emaúspe. Upe puévlo opyta 11 kilómetrorupi Jerusaléngui. Haʼekuéra oñedesanimaite kuri pórke ojejuka ramoite Jesúspe. Umi disípulo ohaʼarõ vaʼekue pe Mesías ojapo heta mbaʼe hesehapekuéra, péro upéi opyta hikuái esperansaʼỹre. Upeichaháguinte oiko álgo nohaʼarõietéva hikuái.

² Umi mokõi disípulo oguata aja ohóvo, ohupyty chupekuéra peteĩ kuimbaʼe ha oguata avei ohóvo hendivekuéra. Péro haʼekuéra ndoikuaái chupe. Umi disípulo omombeʼu pe kuimbaʼépe umi mbaʼe vai oiko vaʼekue Jesús rehe. Upéi pe kuimbaʼe oñepyrũ heʼi chupekuéra heta mbaʼe opytátava ikorasõmekuéra pára siémpre. Haʼe oipuru ‘Moisés ha umi Proféta oskrivi vaʼekue’ oexplika hag̃ua umi disípulope mbaʼérepa pe Mesías osufri ha omano vaʼerã. Upéi og̃uahẽma hikuái Emaúspe ha upépe ae umi mokõi disípulo opilla sapyʼa pe kuimbaʼe haʼeha Jesús. ¡Mbaʼeichaitépa oiméne ovyʼa raʼe hikuái ohechávo pe Mesías oikove jeymaha! (Luc. 24:​13-35).

3, 4. a) ¿Mbaʼépa Jesús ojapo idisipulokuéra rehehápe, ha mbaʼéichapa haʼekuéra oñeñandu upéi? (Hechos 1:3). b) ¿Mbaʼépa jahecháta ko artíkulope?

³ Jesús orresusita rire, ohasa vaʼekue 40 día aja ko yvy ape ári oho mboyve yvágape. ¿Mbaʼépa ojapo idisipulokuéra rehehápe? Umi 40 día aja haʼe ojechauka idisipulokuérape heta vése (elee Hechos 1:3). Upe tiémpope Jesús oaprovecha omokyreʼỹ hag̃ua idisipulokuérape pórke haʼekuéra opyta vaʼekue oñembyasy ha okyhyje. Péro upéi ovyʼa ha ipyʼaguasúma hikuái opredika ha  omboʼe hag̃ua umi notísia porã oñeʼẽva Ñandejára Rréinore. a

⁴ Ikatu ñaaprende heta mbaʼe la Jesús ojapo vaʼekuégui umi 40 día aja. Ko artíkulope jahecháta mbaʼéichapa Jesús oaprovecha porã itiémpo 1) omokyreʼỹ hag̃ua idisipulokuérape, 2) oipytyvõ hag̃ua chupekuéra ontende porãve hag̃ua Ñandejára Ñeʼẽ, ha 3) ombokatupyry hag̃ua chupekuéra ikatu hag̃uáicha okumpli hetave rresponsavilida. Káda kásope jahecháta mbaʼéichapa ñande ikatu jasegi Jesús ehémplo porãite.

ÑAMOKYREʼỸ ÓTROPE

5. ¿Mbaʼérepa tekotevẽ kuri oñemokyreʼỹ Jesús disipulokuérape?

⁵ ¿Mbaʼérepa tekotevẽ kuri oñemokyreʼỹ Jesús disipulokuérape? Ijapytepekuéra ningo oĩ vaʼekue ohejáva hóga, ihénte ha inegósio omoirũ meme hag̃ua Jesúspe (Mat. 19:27). Ótrope katu ojeapoʼi ha oñemaltrata oiko haguére chuguikuéra Jesús disípulo (Juan 9:22). Jesús disípulokuéra naiprovlémai vaʼekue ohasa hag̃ua koʼã mbaʼe, pórke oĩ vaʼekue segúro Jesús haʼeha pe Mesías (Mat. 16:16). Péro ojejukárõ guare Jesúspe, haʼekuéra opyta yvýre oimoʼãgui noñekumplimoʼãiha la ohaʼarõva hikuái.

6. ¿Mbaʼépa Jesús ojapo oikove jey riremi?

⁶ Jesús nopensái vaʼekue idisipulokuéra ijerovia kangyha ohechárõ guare mbaʼeichaitépa oñembyasy hikuái haʼe omano rire. Upéva rangue haʼe ontende umi idisípulo oñeñandutanteha voi upéicha. Upévare pe día orresusita haguépema voi oñepyrũ omokyreʼỹ iñamigokuérape. Por ehémplo, ojechauka María Magdalénape haʼe hasẽ aja pe sepultúra ypýpe (Juan 20:​11, 16). Avei ojechauka vaʼekue umi mokõi disípulo oviahávape Emaúspe ha Pédrope (Luc. 24:34). ¿Mbaʼépa ikatu ñaaprende Jesús ehémplogui? Jahechamína la oiko vaʼekue ojechaukárõ guare María Magdalénape.

7. ¿Mbaʼépa Jesús ohecha María ojapoha, ha mbaʼépa ojapo hesehápe? (Juan 20:​11-16). (Ehecha pe taʼanga).

⁷ (Elee Juan 20:​11-16). Pe 16 de Nisán, unos kuánto kuña oho pyharevete Jesús sepultúrape (Luc. 24:​1, 10). Umi kuña apytépe oĩ vaʼekue María Magdalena. Haʼe og̃uahẽrõ  guare pe sepultúrape ohecha nandimaha, upémarõ odipara oho omombeʼu upéva Pedro ha Juánpe. Haʼekuéra osẽ oho avei pe sepultúrape ha María hapykuerikuéra. Pedro ha Juan ohecha rire Jesús retekue ndaiporiveimaha pe sepultúrape, oho jeýnte hikuái hogapekuéra, péro María opyta upépe oñemboʼy ha hasẽ hína kuri. Haʼe ndoikuaáiramo jepe, Jesús omaña hese ha okonsolase chupe. Upémarõ ojechauka Maríape ha ojapo álgo omokyreʼỹ hag̃ua chupe. Jesús oñeʼẽ hendive ha omeʼẽ chupe peteĩ asignasión iñimportánteva. Heʼi chupe: “Tereho che ermanokuéra oĩháme”. ¿Maʼerãpa? Omombeʼu hag̃ua Jesús oikove jeýma hague (Juan 20:​17, 18).

8. ¿Mbaʼéichapa ikatu jasegi Jesús ehémplo?

⁸ ¿Mbaʼéichapa ikatu jasegi Jesús ehémplo? Ikatu jajapo upéva ñamokyreʼỹvo ñane ermáno ha ermanakuérape osegi hag̃ua oservi Jehovápe. Jesús ojapo haguéicha, ñañehaʼã jaikuaa umi mbaʼe ohasáva ñane ermanokuéra, ñantende la oñandúva hikuái ha ñakonsola chupekuéra. Jahechamína la ohasa vaʼekue peteĩ ermána hérava Jocelyn. Iñermána ningo omano vaʼekue peteĩ aksidénte ivaietereívape. Haʼe heʼi: “Heta mésere añembyasyháre aiko vaʼekue”. Péro peteĩ ermáno ha hembireko oinvita Jocelýnpe hógape, ha ohendu chupe haʼe omombeʼu aja la oñandúva. Ko matrimónio oasegura ko ermánape Jehová ohayhuetereiha chupe. Jocelyn heʼi: “Añeñandu vaieterei vaʼekue, ku aimerõguáicha cheaño peteĩ pe mar mbytépe peteĩ torménta ivaietereívape. Péro ajahoga potaitépe, Jehová ojevale koʼã ermánore chepytyvõ hag̃ua ikatu hag̃uáicha asegi aservi chupe”. Ñande avei ikatu ñaporomokyreʼỹ jahejávo umi ermáno omombeʼu ñandéve la oñandúva ha jajapysaka porãrõ hesekuéra. Péicha ikatúta ñakonsola ha ñaipytyvõ chupekuéra osegi hag̃ua oservi Jehovápe (Rom. 12:15).

ÑAIPYTYVÕ ÓTROPE ONTENDE PORÃ HAG̃UA ÑANDEJÁRA ÑEʼẼ

9. ¿Mbaʼe situasiónpepa oĩ vaʼekue Jesús disipulokuéra, ha mbaʼéichapa haʼe oipytyvõ chupekuéra?

⁹ Jesús disipulokuéra ojerovia vaʼekue Ñandejára Ñeʼẽre ha oñehaʼã ojapo Jehová heʼíva (Juan 17:6). Upéicharõ jepe haʼekuéra nontendéi vaʼekue mbaʼérepa ojejuka Jesúspe haʼerõguáicha peteĩ kriminál. Jesús oikuaa vaʼekue idisipulokuéra ojeroviaha Jehováre ha ohayhuha chupe. Péro ohechakuaa avei ofaltaha gueteri chupekuéra ontende porãve Ñandejára Ñeʼẽ (Luc. 9:​44, 45; Juan 20:9). Upévare Jesús oipytyvõ idisipulokuérape ontende hag̃ua la oleéva Ñandejára Ñeʼẽme. Jahechamína la oiko vaʼekue haʼe ojechaukárõ guare umi mokõi disípulo ohóvape Emaúspe.

10. ¿Mbaʼéichapa Jesús oipytyvõ idisipulokuérape ohechakuaa hag̃ua haʼe haʼeha pe Mesías? (Lucas 24:​18-27).

¹⁰ (Elee Lucas 24:​18-27). Jesús ningo ndeʼíri ensegída voi umi mokõi idisípulope mávapa haʼe. Upéva rangue, ombaʼeporandu chupekuéra. ¿Mbaʼérepa oiméne ojapo upéicha? Ikatu oime Jesús oikuaase raʼe la oñandúva ha opensáva hikuái, ha upeichaite oiko. Umi mokõi disípulo heʼi chupe haʼekuéra oimoʼã hague Jesús osalvataha Israélpe Roma poguýgui. Jesús oheja chupekuéra heʼipa raẽ la opensáva hikuái. Upe rire oipuru Ñandejára Ñeʼẽ ha oipytyvõ chupekuéra ontende hag̃ua oñekumpliha heta profesía. b Upe pyharépe Jesús ojotopa hetave idisipulokuérandi ha oexplika chupekuéra mbaʼépa heʼise umi profesía (Luc. 24:​33-48). ¿Mbaʼépa ikatu ñaaprende la oiko vaʼekuégui?

11, 12. a) ¿Mbaʼépa ñaaprende Jesús omboʼe lájagui? (Ehecha pe taʼanga). b) ¿Mbaʼéichapa pe ermáno ombostudiáva Nórteype oipytyvõ chupe?

¹¹ ¿Mbaʼéichapa ikatu jasegi Jesús ehémplo?  Ñamboʼe jave la Biblia, jajapokuaa vaʼerã umi porandu ñanepytyvõtava jaikuaa hag̃ua mbaʼépa opensa ha oñandu ñane estudiánte (Prov. 20:5). Ñantende rire la opensáva ikatu jahechauka chupe mbaʼéichapa otopakuaa umi téxto bíblico oipytyvõtava chupe isituasiónpe. Jajejokopaitékena ani hag̃ua jaʼe ñane estudiántepe mbaʼépa odesidi vaʼerã ojapo. Jalee rire umi téxto bíblico, ikatu jajapo ñane estudiántepe umi pregúnta omopensátava chupe la oleévare, ikatu hag̃uáicha ohechakuaa mbaʼéichapa umi téxto ideprovécho chupe. Jahechamína la ohasa vaʼekue peteĩ ermáno hérava Nortey oikóva Ghánape.

¹² Nortey orekórõ guare 16 áño oñepyrũ vaʼekue ostudia la Biblia. Ensegída voi ihentekuéra oñemoĩ hese. ¿Mbaʼépa oipytyvõ chupe osegi hag̃ua ostudia la Biblia? Pe ermáno ombostudiáva Nórteype ohechaukáma kuri chupe Mateo kapítulo 10, ha oexplika chupe umi kristiáno verdadérope ojepersegitaha. Nortey heʼi: “Oñepyrũrõ guare oĩ la oñemoĩ mbaretéva cherehe, aĩma segúro atopa hague la rrelihión verdadéra”. Pe ermáno ohechauka avei Nórteype la heʼíva Mateo 10:16. Péicha Nortey ohechakuaa oñatende porã vaʼerãha ani hag̃ua oiko vai ifamíliandi, ha oñeʼẽ vaʼerãha pyʼaguapýpe ihentekuérandi la oaprendévare. Nortey ojevautisa rire, oñepyrũse kuri iprekursorádo rregulár, péro itúa oipota oho universidápe. Pe ermáno ombostudiáva Nórteype ndeʼíri chupe mbaʼépa ojapo vaʼerã. Upéva rangue ojapo Nórteype unas kuánta pregúnta haʼe voi imanduʼa hag̃ua umi téxto bíblico oipytyvõtavare chupe. ¿Mbaʼépa oiko upéi? Nortey odesidi oñepyrũ iprekursorádo rregulár, upémarõ itúa omosẽ chupe hógagui. ¿Mbaʼéichapa haʼe oñeñandu la oiko vaʼekuére hese? Nortey heʼi: “Ni michĩmi ndadudái adesidi porã hague”. Ñande avei ñamokyreʼỹ jave ótrope ojepyʼamongeta hag̃ua Ñandejára Ñeʼẽre, ñaipytyvõta hína chupe ojeroviave hag̃ua Jehováre ha osegi hag̃ua oservi chupe (Efes. 3:​16-19).

ERMANOKUÉRA, PEMBOKATUPYRÝKENA ÓTROPE

13. ¿Mbaʼépa Jesús ojapo ojesegi hag̃ua oñekumpli pe tembiapo Itúa omeʼẽ vaʼekue? (Efesios 4:8).

¹³ Jesús oĩrõ guare ko yvy ape ári, okumpli porã vaʼekue pe tembiapo omeʼẽ vaʼekue chupe itúa (Juan 17:4). Péro Jesús núnka nopensái vaʼekue: “Chémante ajapo vaʼerã ko traváho ojejapo porã hag̃ua”. Upéva rangue, umi tres áño imédio opredika aja ko yvy ape ári,  haʼe oaprovecha ombokatupyry hag̃ua ótrope. Jesús ojerovia vaʼekue idisipulokuérare, upévare omeʼẽ chupekuéra peteĩ rresponsavilida. Haʼekuéra oñenkargáta kuri opredika ha omboʼe hag̃ua umi notísia porã, ha oñangareko vaʼerã avei Jehová ovecha mimíre. Hiʼarive umi disipulokuéra apytépe provávlemente oĩ vaʼekue umi ni ndohupytýiva gueteri 30 áño (elee Efesios 4:8). Jesús disipulokuéra ifiél ha ombaʼapo jejopy vaʼekue hendive. Péro oho mboyve yvágape Jesús ombokatupyryve chupekuéra oiko hag̃ua koʼã kuimbaʼégui ‘rregálo’ enterovépe g̃uarã. ¿Mbaʼéichapa ombokatupyry chupekuéra?

14. ¿Mbaʼépa Jesús omboʼe vaʼekue idisipulokuérape umi último 40 día oĩrõ guare ko yvy ape ári? (Ehecha pe taʼanga).

¹⁴ Tekotevẽrõ guare, Jesús oñemoñeʼẽ vaʼekue idisipulokuérape, péro siémpre ojapo vaʼekue upéva mborayhúpe. Por ehémplo Jesús oikuaa vaʼekue algúno idisipulokuéra ndahaʼéi la ogueroviapáva haʼe oikove jey hague, upévare haʼe oñeʼẽ porã hendivekuéra oikuaa hag̃ua hikuái la verda (Luc. 24:​25-27; Juan 20:27). Heʼi avei chupekuéra oñehaʼãmbaite vaʼerãha okuida porã Jehová ovecha mimíre ha ani hag̃ua omotenonde inegosiokuéra (Juan 21:15). Avei omomanduʼa chupekuéra ani hag̃ua ojesarekoiterei umi priviléhio oñemeʼẽvare umi ótrope ha pono oñekompara hesekuéra (Juan 21:​20-22). Oexplika porã avei idisipulokuérape umi mbaʼe nontendeporãiva hikuái Ñandejára Rréinore, ha oipytyvõ chupekuéra omotenonde meme hag̃ua pe predikasión (Hech. 1:​6-8). ¿Mbaʼe mbaʼépa umi ansiáno ikatu oaprende Jesúsgui?

15, 16. a) ¿Mbaʼéichapa umi ansiáno ikatu osegi Jesús ehémplo? Emyesakã. b) ¿Mbaʼéichapa oipytyvõ peteĩ ermánope pe konsého orresivi vaʼekue?

¹⁵ ¿Mbaʼéichapa umi ansiáno ikatu osegi Jesús ehémplo? Haʼekuéra ombokatupyry vaʼerã umi ermánope, umi imitãvape jepe. Péicha haʼekuéra ikatúta orekove rresponsavilida kongregasiónpe. c Umi ansiáno nohaʼarõi vaʼerã umi ermáno iperfékto ombokatupyry hag̃ua chupekuéra. Haʼekuéra orekótante voi heta mbaʼe oaprende vaʼerã gueteri. Upévare umi ansiáno omboʼe vaʼerã umi imitãvape mborayhúpe, ikatu hag̃uáicha haʼekuéra iñumílde, oporopytyvõkuaa, ha oiko hag̃ua chuguikuéra ermáno de konfiánsa (1 Tim. 3:1; 2 Tim. 2:2; 1 Ped. 5:5).

¹⁶ Jahechamína mbaʼéichapa peteĩ konsého oipytyvõ vaʼekue peteĩ ermánope. Patrick, imitãvépe ijarhél ha ndotrataporãi vaʼekue umi ótrope, umi ermánape jepe. Peteĩ ansiáno  ohechakuaa Patrick okambia vaʼerãha. Upévare oñemoñeʼẽmante chupe péro ojapo upéva mborayhúpe. Patrick heʼi: “Avyʼa pe ansiáno heʼi haguére chéve mbaʼépepa akambia vaʼerã. Ymave che añedesanima vaʼerã oñemeʼẽrõ ótro ermánope peteĩ priviléhio che aipotáva. Péro pe konsého rupive ahechakuaa tekotevẽha cheumílde ha añehaʼã vaʼerãha aservi mborayhúpe ermanokuérape, aiko rangue apensaiterei peteĩ priviléhiore”. Tiémpo rire, ko ermánope oñenombra ansiáno orekórõ guare 23 áño (Prov. 27:9).

17. ¿Mbaʼéichapa Jesús ohechauka vaʼekue ojeroviaha idisipulokuérare?

¹⁷ Jesús ndeʼíri idisipulokuérape opredikánte vaʼerãha, síno avei omanda chupekuéra omboʼe hag̃ua umi héntepe (Mat. 28:20). Ikatu oime umi disípulo opensa haʼekuéra ndaikatumoʼãiha okumpli porã pe asignasión. Péro Jesús ojerovia vaʼekue haʼekuéra ikatutaha ojapo porã upe traváho. Haʼe ni michĩmi ndodudái vaʼekue chuguikuéra. Upévare heʼi idisipulokuérape: “Pe Túa chembou haguéicha, che avei pomondo” (Juan 20:21).

18. ¿Mbaʼéichapa umi ansiáno ikatu osegi Jesús ehémplo?

¹⁸ ¿Mbaʼéichapa umi ansiáno ikatu osegi Jesús ehémplo? Umi ansiáno iñarandúva omeʼẽ rresponsavilida umi ótro ermánope (Filip. 2:​19-22). Por ehémplo umi ansiáno ikatu ojerure umi imitãvape oipytyvõ hag̃ua oñemopotĩ hag̃ua pe Salón del Rréino ha ojejapo hag̃ua mantenimiénto. Umi ansiáno omeʼẽvo rresponsavilida umi ermánope ombokatupyry avei chupekuéra ha upéi ojerovia ojapo porãtaha hikuái pe traváho. Peteĩ ansiáno pyahu hérava Matthew oagradese umi ansiáno iñexperiensiavéva ombokatupyry haguére chupe ojapo hag̃ua umi tembiapo ha okonfia haguére hese hikuái. Haʼe heʼi: “Ndajapoporãirõ peteĩ traváho, umi ansiáno heʼi chéve oikonteha voi upéva, ha chepytyvõ amehora hag̃ua”. d

19. ¿Mbaʼépa jajedesidi vaʼerã jajapotaha?

¹⁹ Umi último 40 día Jesús oĩrõ guare ko yvy ape ári, oaprovecha vaʼekue omokyreʼỹ, omboʼe ha ombokatupyry hag̃ua ótrope. Ñañehaʼãkena ñande avei jasegi iñehémplo porãite (1 Ped. 2:21). Jaikuaa Jesús ñanepytyvõtaha pórke opromete voi ñandéve ‘oĩtaha ñanendive káda día og̃uahẽ meve pe fin’ (Mat. 28:20).