1, 2. ¿Mbaʼépa ombovyʼa Ñandejára siervokuérape? (Santiago 1:​22-25).

 JEHOVÁ ha Itaʼýra oipotaiterei ñande javyʼa. Pe oskrivi vaʼekue Salmo 119:2 heʼi vaʼekue: “Ovyʼa umi ojapóva Ñandejára heʼíva, umi oñehaʼãva ipyʼaite guive oservi porã chupe”. Jesús avei heʼi vaʼekue: “Umi ohendúva Ñandejára ñeʼẽ ha ojapóva la ovyʼáva” (Luc. 11:28).

² Ñande jaservíva Jehovápe javyʼa heta mbaʼére. Péro la ñanembovyʼavéva haʼe hína jalee meme Ñandejára Ñeʼẽ ha ñañehaʼã jajapo umi mbaʼe ñaaprendéva (elee Santiago 1:​22-25).

3. ¿Mbaʼéichapa ideprovécho ñandéve jajapo Ñandejára Ñeʼẽ heʼíva?

³ Tuichaiterei ideprovécho ñandéve ‘jajapo Ñandejára ñeʼẽ heʼíva’. Por ehémplo, jasegíramo umi konsého oĩva Ñandejára Ñeʼẽme ñambovyʼa Jehovápe ha upéva ñanembovyʼa ñandéve avei (Ecl. 12:13). Jajapóramo la Biblia heʼíva, jajogueraha porãve ñande rogayguándi ha umi ermanokuérandi. Katuete nde kásope rehecháma upéva siertoha. Avei jajei umi provléma orekóvagui umi hénte naiñeʼẽrendúiva Jehovápe. Siertoite la heʼi vaʼekue rréi David peteĩ purahéipe. Haʼe oñeʼẽ vaʼekue Jehová léi ha mandamientokuérare ha upéi heʼi: “Umi ojapóva nde léi heʼíva ohupytýta hetaiterei mbaʼe porã” (Sal. 19:​7-11).

4. ¿Mbaʼérepa ijetuʼu jepi jalee Ñandejára Ñeʼẽ ha jajapo heʼíva pype?

 ⁴ Ñarrekonose vaʼerã ndahaʼeiha la ifasilpáva jalee Ñandejára Ñeʼẽ ha jajapo umi mbaʼe ñaaprendéva. Jarekóramo jepe heta mbaʼe jajapo vaʼerã, tekotevẽ ñañemotiémpo jalee ha jastudia hag̃ua la Biblia. Péicha jaikuaáta mbaʼépa Jehová oipota jajapo. Upévare jahechamína unos kuánto konsého ikatúva jasegi jalee meme hag̃ua Ñandejára Ñeʼẽ. Avei ñaanalisáta mbaʼépa ñanepytyvõta jajepyʼamongeta hag̃ua la jaleévare, ha mbaʼéichapa ikatu jajapo umi mbaʼe ñaaprendéva.

ÑAÑEMOTIÉMPOKENA JALEE HAG̃UA ÑANDEJÁRA ÑEʼẼ

5. ¿Mbaʼérepa ikatu jaʼe ñanerembiapoitereiha?

⁵ La majoría jaservíva Jehovápe ñanerembiapoiterei, pórke jajapo vaʼerã umi mbaʼe la Biblia voi heʼíva iñimportanteha. Por ehémplo, ñambaʼapo vaʼerã ñañemantene hag̃ua ñandejupe ha ñane famíliape (1 Tim. 5:8). Heta ermáno avei okuida ihénte hasývare térã ijedávare. Avei enterovéva jakuida vaʼerã ñande salúre ha upéva hoʼu ñandehegui ñane tiémpo. Hiʼarive jareko heta mbaʼe jajapo vaʼerã kongregasiónpe, por ehémplo, iñimportanteterei japredika kyreʼỹme. Legálmente, oiméne nde avei hetaiterei mbaʼe ereko rejapo vaʼerã. ¿Mbaʼéicha upéicharõ ikatu eñemotiémpo relee hag̃ua la Biblia káda día, rejepyʼamongeta hag̃ua hese ha ejapo hag̃ua la heʼíva?

6. ¿Mbaʼéichapa ikatu remotenonde nde lektúra de la Biblia? (Ehecha pe taʼanga).

⁶ Jalee la Biblia haʼe hína peteĩva umi mbaʼe “iñimportantevéva” tekotevẽva ojapo entéro kristiáno. Upévare ñamotenonde vaʼerã ñande lektúra (Filip. 1:10). Pe primer lívro de Salmo oñeʼẽ peteĩ persóna ovyʼávare ha heʼi hese: “Haʼe ohayhueterei voi Jehová léi, ára ha pyhare olee ha ojepyʼamongeta hese” (Sal. 1:​1, 2). Upéva heʼise tekotevẽha ñañemotiémpo jalee hag̃ua la Biblia. ¿Mbaʼe órapepa iporãve jalee ñande Biblia? Upéva odependétama káda únore, péro la iñimportantevéva hína jaiporavo peteĩ  moménto ikatutahápe siémpre jalee. Peteĩ ermáno hérava Víctor heʼi: “Che alee che Biblia pyharevekue. Ndahaʼéi ningo la igustopáva chéve apuʼã voi, péro upe órapemante saʼive ajedistrae, ikatu añekonsentra porãve ha antendeve la aleéva”. ¿Ha nde kásopepa péicha avei? Eñeporandumína: “¿Mbaʼe órapepa opyta porãvéta chéve alee la Biblia?”.

JAJEPYʼAMONGETÁKENA LA JALEÉVARE

7, 8. ¿Mbaʼéicha javépa ndaideprovechomoʼãi ñandéve ñande lektúra de la Biblia? Emombeʼu peteĩ ehémplo.

⁷ Ikatu oime jalee meme heta informasión péro amo ipahápe ndopytái ñane akãme. ¿Releémapa algúna ves álgo ha upéi nanemanduʼavéi la relee vaʼekuére? Enterovévare oikóma upéva, ha ñambyasýramo jepe, jalee jave ñande Biblia ikatu avei oiko upéva. Por ehémplo, oiméne jadesidi raʼe jalee unos kuánto kapítulo káda día ha upéva iporãiterei. Ñamoĩ vaʼerã voi méta ha ñañehaʼã vaʼerã ñakumpli umíva (1 Cor. 9:26). Péro iporãramo jepe jalee la Biblia, ndaikatúi japyta upévapente. Oĩ ótra kósa tekotevẽva jajapo ideprovechove hag̃ua ñandéve ñande lektúra de la Biblia.

⁸ Ñapensamína ko ehémplore. Pe ama iñimportánte umi plánta okakuaa hag̃ua, péro oúramo oky tuichaiterei peteĩ sapyʼaitépe, pe yvy ndaikatumoʼãvéima oipytepa pe ama ha amo ipahápe umi plántape nog̃uahẽvéima pe y oikotevẽva. Ikuentavétante oky saʼi saʼíramo ikatu hag̃uáicha pe y oike pe yvýre, og̃uahẽ hag̃ua pe plánta rapo oĩháme. Péicha avei, ñañehaʼã vaʼerã ani hag̃ua jalee la Biblia apúrope, pórke upéicha ndaikatumoʼãi oikepa ñane akãme pe informasión ha ñanderesaráita chugui. Ha upéva oikóramo ndaikatumoʼãi jajapo upe jalee vaʼekue (Sant. 1:24).

9. ¿Mbaʼépa jajapo vaʼerã jahechakuaárõ pyaʼe pyaʼéntema jaleeha la Biblia?

⁹ ¿Rehechakuaápa releeha nde Biblia pyaʼe pyaʼéntema? Eñehaʼãkena ani rejapuraiterei ikatu hag̃uáicha repensáma rehóvo la releévare, térã eñemotiémpo releepa rire ejepyʼamongeta hag̃ua. Ojeʼe haguére ndéve  ejepyʼamongeta vaʼerãha ikatu eñemondýi pórke haʼetévaicha la ijetuʼúva, péro upéva heʼise repensánte vaʼerãha la relee vaʼekuére. Upearã ikatu edesidi estudia arevetaha ikatu hag̃uáicha repensa la releévare. Térã ikatu relee saʼive versíkulo ha eipuru pe tiémpo hembýva rejepyʼamongeta hag̃ua pe relee vaʼekuére. Pe ermáno Víctor, ajeʼi ñañeʼẽma vaʼekuére heʼi: “Ndaikói alee pukueterei la che Biblia, sapyʼánte alee un kapítulonte. Alee rupi pyharevete, upéi ikatu apensa hese tódo el día”. Káda uno odesidíta mboy versíkulo térã kapítulopa oleéta, péro la iñimportánteva hína, ani jajapura ikatu hag̃uáicha ñapensa pe jaleévare (Sal. 119:97; ehecha pe rrekuádro “ Eñeporandumína koʼã mbaʼe”).

10. ¿Mbaʼépa nepytyvõta rejapo hag̃ua la reaprendéva? Emombeʼu peteĩ ehémplo (1 Tesalonicenses 5:​17, 18).

¹⁰ Releévo umi versíkulo oĩva la Bíbliape iñimportánte avei repensa mbaʼéichapa ikatu rejapo la releéva. Por ehémplo, eñeporandumína: “¿Mbaʼéichapa ko aleéva ideprovéchota chéve koʼág̃a térã amo gotyomie?”. Ñamoĩ chupe nde lektúra bíblicape releeha 1 Tesalonicenses 5:​17, 18 (elee). Upe rire ikatu epytaʼimi ha eñeporandu: “¿Mboy vésepa añemboʼe jepi? ¿Añeʼẽpa Jehovápe che pyʼaite guive? ¿Oĩpa álgo aagradesesévare chupe?”. Upéi ikatu ou ne akãme mbohapy mbaʼe eagradese hag̃ua chupe. Péicha unos kuánto minútopente epensáma la releévare. Ha upéva nepytyvõta rentende porãve hag̃ua Ñandejára Ñeʼẽ ha ejapo hag̃ua pe reaprendéva. Upéi káda día reñehaʼãramo rejapo la releéva la Bíbliape, kon el tiémpo reservi porãvétantema Jehovápe. ¿Péro mbaʼépa oikóta oimérõ rehechakuaa hetaiterei mbaʼépe tekotevẽha emehora?

ÑAMOĨ UMI MÉTA IKATÚTAVA JAHUPYTY

11. ¿Mbaʼérepa sapyʼánte ikatu reñedesanimaʼimi? Emombeʼu peteĩ ehémplo.

¹¹ Relee jave la Biblia, sapyʼánte ikatu reñedesanima pórke rehechakuaa hetaiterei mbaʼépe tekotevẽha emehora. Por ehémplo, ñamoĩ chupe peteĩ día releeha jatrata vaʼerã enterovévape peteĩchante (Sant. 2:​1-8). Ikatu rehechakuaa tekotevẽha etrata porãve ótrope, upévare edesidi ekambiaʼimitaha algúna kósape. ¡Oikoite ningo upéva! Upéi koʼẽrõ g̃uarã elee ótro versíkulo heʼíva tekotevẽha ñañatende la jaʼévare (Sant. 3:​1-12). Upépe nemanduʼa sapyʼánte ereha umi mbaʼe ikatúva omoñeñandu vai nde rapichápe. Upémarõ edesidi eñehaʼãtaha eporomokyreʼỹve eñeʼẽ jave. Upéi al día sigiénte otoka ndéve relee ndovaleiha jajeheʼa ko múndore (Sant. 4:​4-12).  Upépe katu rehechakuaa tekotevẽha eiporavo porãve ne diversionrã. Pe kuárto díape g̃uarã eñandúma ijetuʼuetereitaha ekambiapaite hag̃ua koʼã mbaʼépe, ha upéva nedesanima.

12. ¿Mbaʼérepa ndovaléi reñedesanima? (Ehecha pe nóta).

¹² Oimérõ tekotevẽ rekambia unas kuánta kósape, ani reñedesanima. Rehechakuaa haguére remehora vaʼerãha, ojekuaa neumílde ha ndepyʼaporãha. Peteĩ persóna iñumíldeva olee jave la Biblia oheka mbaʼépepa tekotevẽ ombaʼapove omehora hag̃ua. a Tekotevẽ avei nemanduʼa kontinuadoite ñamonde vaʼerãha peteĩ aóicha pe “kondúkta pyahu” (Col. 3:10). ¿Mbaʼépa nepytyvõta resegi hag̃ua rejapo la heʼíva Ñandejára Ñeʼẽ?

13. ¿Mbaʼéichapa ikatu rejapo rehóvo umi mbaʼe reaprendéva? (Ehecha pe taʼanga).

¹³ Rejapose rangue entéro mbaʼe reaprendéva una vetépe voi, emoĩ umi méta ikatúva rehupyty (Prov. 11:2). Etanteamína kóva: Ejapo peteĩ lísta emoĩháme umi mbaʼe emehoraséva. Upéi eiporavo peteĩva térã mokõi mbaʼe embaʼapo hag̃ua umívare, ha umi ótro katu eheja emehora hag̃ua amo gotyomie. ¿Mbaʼéichapa ikatu eñepyrũ ejapo ko mbaʼe?

14. ¿Mbaʼeichagua métapa ikatu emoĩ primerorã?

¹⁴ Primerorã ikatu emoĩ peteĩ méta ifasilvétava ndéve rehupyty hag̃ua, térã eñepyrũ embaʼapo peteĩ mbaʼe tekotevẽtereihápe emehora. Emoĩ rire peteĩ méta, eñehaʼã einvestiga upe téma ñane puvlikasionkuérape. Upearã ikatu eipuru pe Índice de las publicaciones Watch Tower térã pe Gía oipurúva testígo de Jehová otopa hag̃ua informasión.  Avei eñemboʼékena Jehovápe ha ejerure chupe tomeʼẽ ndéve ‘pe deséo ha pe podér ejapo hag̃ua entéro mbaʼe chupe ogustáva’ (Filip. 2:13). Upéi eñepyrũntema ejapo la reaprendéva. Rehupytývo pe primera méta remoĩ vaʼekue, nekyreʼỹvéta ehupyty hag̃ua umi ótro. Rehechávo rekambia hague térã remehora hague peteĩ mbaʼépe, rejaposevéta hetave kámbio ha provávlemente ifasilvétama ndéve ejapo hag̃ua umíva.

JAHEJÁKENA ÑANDEJÁRA ÑEʼẼ TAÑANEPYTYVÕ

15. ¿Mbaʼépepa idiferénte Jehová siervokuéra? (1 Tesalonicenses 2:13).

¹⁵ Oĩ umi hénte heʼíva oleéma hague la Biblia hetaiterei vése, ¿péro oguerovia añetépa hikuái la Biblia heʼíva? ¿Okambiápa hikuái oiko hag̃ua la Biblia heʼiháicha? Nahániri, la majoría umi hénte ndojapói upéva. ¡Ajépa idiferentete Jehová siervokuéra! Umi kristiáno síglo primérope guaréicha, ñandéve g̃uarã la Biblia ‘añetehápe haʼe Ñandejára ñeʼẽ’. Ha ndahaʼéi voi upévante, síno jaheja ñanepytyvõ ha jasegi umi konsého oĩva pype (elee 1 Tesalonicenses 2:13).

16. ¿Mbaʼépa ñanepytyvõta jajapo hag̃ua Ñandejára Ñeʼẽ heʼíva?

¹⁶ Ndahaʼéi ningo la ifasilpáva jalee ha jajapo Ñandejára Ñeʼẽ heʼíva. Sapyʼánte ijetuʼu ñañemotiémpo upearã térã jalee pyaʼe pyaʼéntema ha ndajajepyʼamongetái hese. Avése katu ñañedesanima pórke hetaiterei mbaʼépe tekotevẽ ñamehora. Tahaʼe haʼeháicha, aníkena ñañentrega. Jehová ñanepytyvõ rupi ikatúta jasupera oimeraẽ mbaʼe ijetuʼúva ñandéve. Upévare, jahejákena haʼe tañanepytyvõ ikatu hag̃uáicha jajapo Iñeʼẽ heʼíva, ha ani ñahendúnte ha upéi ñanderesaráima. Amáske jalee Ñandejára Ñeʼẽ ha jajapo heʼíva pype javyʼavétantema (Sant. 1:25).