1, 2. a) Pablo oskrivírõ guare pe kárta umi kristiáno oĩvape Judéape, ¿mbaʼe situasiónpepa oĩ raʼe hikuái? b) ¿Mbaʼérepa ikatu jaʼe pe kárta oñemondo hague chupekuéra itiempoitépe?

 JESÚS omano rire, umi kristiáno hebreo oikóva Jerusalénpe ha Judéape ohasa kuri heta mbaʼe ijetuʼúvare. Upérõ oñeforma ramoite pe kongregasión kristiána ha ojepersegi mbarete kuri chupekuéra (Hech. 8:1). Amo 20 áñorupi upe rire, Jesús segidorkuérandi hendy ekonómikamente pórke ou vaʼekue peteĩ ñembyahýi guasu oparupiete (Hech. 11:​27-30). Upéi áño 61 rupi, oúma itrankilomie la situasión chupekuéra g̃uarã. Ikatu voi jaʼe umi kristiáno oiko hague pyʼaguapýpe upe tiémpope, ñakomparátarõ la ohaʼarõ vaʼekuére chupekuéra. Ha upépe kavalete Pablo oskrivi chupekuéra peteĩ kárta. Upe kártape oĩ umi konsého opreparátava umi kristiánope la oútavape g̃uarã.

² Pe kárta oñemondo vaʼekue umi hebréope og̃uahẽ hiʼoraitépe, pórke haʼekuéra ndoikomoʼãi kuri pára siémpre pyʼaguapýpe. Pablo omeʼẽ vaʼekue chupekuéra konsého ikatu hag̃uáicha oaguanta pe jehasa asy ou potaitéva upe tiémpope. Jesús heʼíma vaʼekue voi og̃uahẽmbaitemaha pe tiémpo Jerusalén oñehundi hag̃ua (Luc. 21:20). Pablo ha umi kristiáno oĩva Judéape ndoikuaái vaʼekue arakaʼetépa oñehundíta Jerusalén. Upéicharamo jepe umi kristiáno ikatu vaʼekue oipuru pe tiémpo ojeprepara hag̃ua, ikatu hag̃uáicha ojeroviave ha iñaguanteve (Heb. 10:25; 12:​1, 2).

3. ¿Mbaʼérepa iñimportánte ñaanalisa koʼág̃a pe kárta oñemondo vaʼekue umi hebréope?

³ Umi kristiáno upe tiémpope guare heta ohasa asy vaʼekue. Péro upéva ndaikatúi ni ñakompara la jahasátavare ñande koʼẽrõitéma (Mat. 24:21; Apoc. 16:​14, 16). Upévare ko artíkulope  jahecháta unos kuánto konsého Jehová omeʼẽ vaʼekue umi kristiánope, ha ikatúva avei ñanepytyvõ koʼág̃a.

“JASEGÍKENA JAKAKUAAPA PEVE ÑANDEJÁRA SERVÍSIOPE”

4. ¿Mbaʼépa ijetuʼu vaʼekue umi kristiánope? (Ehecha pe taʼanga).

⁴ Umi hebreo oheja vaʼekue pe rrelihión judía ha oiko chuguikuéra kristiáno. Upévare haʼekuéra ojapo vaʼerã kuri heta kámbio ha umíva ndaifasilpái chupekuéra. Heta áñore Jerusalén haʼe vaʼekue peteĩ lugár iñimportantetereíva. Pe rréi ogovernáva upépe orrepresenta vaʼekue Jehovápe voi, ha umi hénte oadoraséva Jehovápe oho vaʼerã pe témplo oĩvape Jerusalénpe. Umi judío ifiélva ojegia vaʼekue Moisés léire ha la omboʼévare umi líder rrelihióso. Umi líder heʼi vaʼekue umi judíope mbaʼépa hoʼu vaʼerã térã nahániri, mbaʼépa opensa vaʼerã pe sirkunsisiónre ha mbaʼéichapa otrata vaʼerã umi ndahaʼéivape judío. Péro Jesús omano rire, Jehová ndoaseptavéima umi sakrifísio ojapóva umi judío pe témplope. Upéva ijetuʼu vaʼekue umi kristiáno judíope pórke haʼekuéra ojepokuaa vaʼekue ojegia Moisés léire (Heb. 10:​1, 4, 10). Umi kristiáno ijerovia mbaretévape jepe ijetuʼu vaʼekue ojapo hag̃ua umi kámbio. Apóstol Pédrore oiko vaʼekue upéva (Hech. 10:​9-14; Gál. 2:​11-14). Umi kristiáno okambia rupi la ogueroviáva, umi líder rrelihióso opersegi mbarete chupekuéra.

5. ¿Mbaʼépa ombohovái vaʼekue umi kristiáno?

⁵ ¿Mbaʼérepa ikatu kuri ijetuʼu umi kristiáno hebréope ifiél hag̃ua? Oĩ vaʼekue mokõi grúpo oñemoĩ mbaretéva hesekuéra. Peteĩva haʼe vaʼekue umi líder rrelihióso judío. Chupekuéra g̃uarã umi kristiáno hebreo haʼe vaʼekue voi apóstata. Pe ótro grúpo oñemoĩva hesekuéra oĩ vaʼekue kongregasiónpe voi. Haʼekuéra heʼi umi kristiáno osegi vaʼerãha ojegia Moisés léire. Ikatu oime heʼi raʼe hikuái upéva ndoipotáigui ojepersegi chupekuéra (Gál. 6:12). ¿Mbaʼépa ikatu vaʼekue oipytyvõ umi kristiánope osegi hag̃ua ifiél?

6. ¿Mbaʼépa omokyreʼỹ vaʼekue Pablo umi ermánope ojapo hag̃ua? (Hebreos 5:14–6:1).

⁶ Pe kárta omondo vaʼekuépe umi hebréope, Pablo heʼi umi ermánope ostudia hag̃ua Ñandejára Ñeʼẽ ha ojepyʼamongeta hag̃ua hese  (elee Hebreos 5:14–6:1). Ikártape Pablo ohechauka vaʼekue umi kristiáno oadora lája Jehovápe iporãiteveha umi judío oadora lájagui chupe. Heʼi hag̃ua upéva haʼe omensiona voi unas kuánta kósa heʼíva umi Escrituras Hebréaspe. a Pablo ningo oikuaa porã vaʼekue umi kristiáno tekotevẽha ontende porã pe añetegua oĩva Ñandejára Ñeʼẽme. ¿Mbaʼérepa? Péicha umi kristiáno ikatúta orrekonose umi enseñánsa verdadéra ha orrechasáta umi enseñánsa japu ikatúva omomombyry chupekuéra Ñandejáragui.

7. ¿Mbaʼeichagua situasión ijetuʼúvapa ñambohovái koʼág̃a?

⁷ Ñande avei koʼág̃arupi jahasa umi situasión ohasa vaʼekue umi hebreo. Por ehémplo, opárupi oĩ hénte heʼíva oĩ porãha umi mbaʼe ndogustaietéva Jehovápe. Oĩ umi hénte heʼíva testígo de Jehová tuichaiterei ojavyha ojegiávo la Biblia heʼívare pe séxore. Ha he’i voi ñanefanátiko ha ñaneñañaha. Ko múndope la hénte opensa lája káda día idiferenteve la Jehová opensa lájagui (Prov. 17:15). Upévare iñimportanteterei amás día ñandeletradove jahechakuaa hag̃ua ojeʼe jave peteĩ mbaʼe naiporãiva, pórke péicha ikatúta ñamboykete umíva. Aníkena jaheja umi oñemoĩva ñanderehe ñanedesanima térã ñanemomombyry Jehovágui anivéma hag̃ua jaservi chupe (Heb. 13:9).

8. ¿Mbaʼépa jajapo vaʼerã jakakuaapa hag̃ua Jehová servísiope?

⁸ Pablo heʼi vaʼekue umi hebréope osegi hag̃ua omehora ‘okakuaapa peve Ñandejára servísiope’. Ñande jasegi vaʼerã avei upe konsého. Upéva heʼise tekotevẽha jastudia porã la Biblia ikatu hag̃uáicha jaikuaa porã Jehovápe ha ñapensa haʼe opensaháicha. Jasegi vaʼerã jajapo upéva jajevautisa rire jepe. Oiméramo jepe aréma jaservi hague Jehovápe, enterovéva tekotevẽ jalee ha jastudia meme Ñandejára Ñeʼẽ (Sal. 1:2). Jajepokuaáramo jastudia meme la Biblia, ñamombaretéta ñande jerovia. Pablo heʼi vaʼekue voi umi kristiáno hebréope tekotevẽha oguereko pe kualida (Heb. 11:​1, 6).

“ÑAIME UMI OJEROVIÁVA APYTÉPE HA UPÉVARE JAJESALVÁTA”

9. ¿Mbaʼérepa umi kristiáno tekotevẽ kuri ijerovia mbarete?

⁹ Umi kristiáno hebreo tekotevẽ kuri ojerovia mbarete ani hag̃ua omano pe jehasa asy oútavape Judéape (Heb. 10:​37-39). Jesús heʼi vaʼekue isegidorkuérape pyaʼe osẽ vaʼerãha upe siudágui ohechávo umi ehérsito omongoraha Jerusalén, ha oho vaʼerã hikuái umi montáñare. Upéva ojapo vaʼerã entéro umi oikóva pe siudápe ha avei umi oĩva pe siuda jerére (Luc. 21:​20-24). Yma umi hénte oikuaárõ guare peteĩ ehérsito outaha oataka chupekuéra, haʼekuéra ohómi vaʼerã ojeprotehe peteĩ siuda imurallapávape. Upévare oiméne naisentidoiete chupekuéra ojeʼérõ guare tekotevẽha osẽ oho umi montañaháre, opyta rangue Jerusalénpe. Legálmente ijerovia mbarete vaʼerã hikuái iñeʼẽrendu hag̃ua Jesúspe.

10. ¿Mbaʼépa ikatúta kuri ojapo umi kristiáno ojerovia mbarete rupi? (Hebreos 13:17).

¹⁰ Umi kristiáno tekotevẽ vaʼekue ojerovia umi kuimbaʼe Jesús ojevale vaʼekuére ogia hag̃ua pe kongregasiónpe. Upérõ umi ogiáva pe kongregasión omeʼẽne raʼe instruksión umi ermánope, péicha haʼekuéra oikuaáta arakaʼépa ha mbaʼéichapa osẽta Jerusaléngui (elee Hebreos 13:17). Pe palávra griega ojepurúva Hebreos 13:​17-pe ojeʼe hag̃ua “peneñeʼẽrendúkena”, heʼise peteĩ persóna iñeʼẽrenduha pe  ogiávape chupe pórke okonfia hese, ha ndahaʼéi pórke ojapómante vaʼerã la haʼe heʼíva. Upévare umi kristiáno hebreo tekotevẽ vaʼekue oñehaʼã okonfia umi kuimbaʼe ogiávare pe kongregasión og̃uahẽ mboyve pe jehasa asy. Umi kristiáno iñeʼẽrendúramo umi ogiávape chupekuéra iporã aja pe situasión, upéi ifasilvéta chupekuéra iñeʼẽrendu hag̃ua og̃uahẽ vove umi tiémpo ijetuʼúva.

11. ¿Mbaʼérepa tekotevẽterei koʼág̃arupi jajerovia mbarete?

¹¹ Umi kristiáno hebréoicha, ñande avei tekotevẽ jajerovia mbarete. La majoría umi hénte ndogueroviái ko múndo aña oñehundi potaitemaha, haʼekuéra oñembohory voi ñanderehe jaguerovia haguére upéva (2 Ped. 3:​3, 4). Jaguereko vaʼerã avei enkuénta peteĩ mbaʼe. La Biblia omombeʼúramo jepe ñandéve heta mbaʼe oikótava pe jehasa asy guasúpe, ñarrekonose vaʼerã avei oĩha heta mbaʼe ndajaikuaáiva. Upévare tekotevẽ jajerovia ko múndo aña oñehunditaha itiempoitépe, ha ndajadudái vaʼerã Jehová oñangarekotaha ñanderehe upe aja (Hab. 2:3).

12. ¿Mbaʼépa ñanepytyvõta jajesalva hag̃ua pe jehasa asy guasúpe?

¹² Tekotevẽ avei ñañehaʼã jajeroviave hag̃ua pe ‘esklávo de konfiánsa ha iñarandúvare’, pórke Jehová ojevale hína pe esklávore ñandegia hag̃ua koʼág̃a (Mat. 24:45). Umi rrománo oatakátarõ guare Jerusalén, oñemeʼẽ kuri umi kristiánope instruksión ojesalva hag̃ua. Upéicha avei, ág̃a oñepyrũ vove pe jehasa asy guasu, oiméne oñemeʼẽta avei ñandéve instruksión jajesalva hag̃ua. Upévare iñimportánte koʼág̃ama voi jajerovia umi ermáno ñandegiávare Jehová organisasiónpe. Oimérõ koʼág̃a nañakonfiapái umi ñandegiávare ha nañaneñeʼẽrendúi chupekuéra, ijetuʼuvétantema ñandéve jajapo hag̃ua upéva pe jehasa asy guasu aja.

13. ¿Mbaʼérepa ideprovechoiterei vaʼekue umi kristiánope pe konsého oĩva Hebreos 13:​5-pe?

¹³ Umi kristiáno hebreo ohaʼarõ aja pe tiémpo osẽ hag̃ua pe siudágui, tekotevẽ kuri oiko sensillomi ha ndoikói vaʼerã ‘iplatarayhu’ (elee Hebreos 13:5). Algúno ijapytepekuéra ohasa vaʼekue heta mbaʼe ijetuʼúva, por ehémplo oĩ imboriahúva ha ndorekói vaʼekue mbaʼépa hoʼu vaʼerã peteĩ tiémpore (Heb. 10:​32-34). Haʼekuéra oaguantáma vaʼekue heta mbaʼe umi notísia porã rehehápe. Upéicharõ jepe, ikatu vaʼekue oĩ algúno ijapytepekuéra oñehaʼãva iplatave openságui upéva oprotehetaha chupekuéra. Péro ndaipóri pláta ikatu vaʼerã kuri osalva chupekuéra Jerusalén oñehundítarõ guare (Sant. 5:3). Ñapensa porãramo, umi iplatarayhúvape ijetuʼuvéta kuri osẽ hag̃ua Jerusaléngui, pórke ndohejasemoʼãi hogakuéra ni umi mbaʼerepy orekóva.

14. ¿Mbaʼéichapa jahecháta umi mbaʼerepy ñandejerovia mbaretérõ?

¹⁴ Ndajadudáiramo Jehová koʼẽrõitéma ohunditaha ko múndo aña, nañapensamoʼãi pe pláta ha umi mbaʼerepy haʼeha la iñimportantevéva. Pe jehasa asy guasu aja pe pláta ndovalemoʼãi mbaʼeverã. La Biblia heʼi umi hénte ‘omombotaha ipláta kállepe’, pórke ohechakuaáta ‘ni pe pláta ni pe óro ndosalvamoʼãiha chupekuéra Jehová ipochyha díape’ (Ezeq. 7:19). Upévare ñañehaʼã vaʼerã jaiko sensillomínte. Iporã ñambaʼapo ñamantene hag̃ua ñane famíliape, péro ndovaléi jaiko tarovaite pláta rapykuéri ha upéva káusare ñamboykéma Jehovápe. Upearã ndajaikói vaʼerã jadeveparei térã jaipurupa ñane tiémpo jakuidaiterei rupi ñane mbaʼerepýre. Avei ñañatendéta ani hag̃ua ñamombaʼeterei umi mbaʼe jaguerekóva, pono umívantema la iñimportánteva ñandéve g̃uarã (Mat. 6:​19, 24). Ko múndo aña oñehundi potaitéma, ha amáske hiʼag̃ui upe  día, tekotevẽta jadesidi jajeroviátapa Jehováre térã umi mbaʼerepýre.

“TEKOTEVẼ NINGO PEAGUANTA”

15. ¿Mbaʼérepa umi kristiáno tekotevẽterei vaʼekue iñaguánte?

¹⁵ Umi kristiáno hebreo tekotevẽta kuri osegi oaguanta hetave mbaʼe ijetuʼúva amedída ivaive la situasión Judéape (Heb. 10:36). Umi kristiáno apytépe oĩ vaʼekue unos kuánto ohasa asyetereíva ojepersegi mbarete rupi chupekuéra. Péro heta oĩ vaʼekue ijapytepekuéra ndohasaʼasýiva gueteri la peichaite, pórke itrankilomiéma vaʼekue la situasión oikórõ guare chuguikuéra kristiáno. Upévare Pablo oavisa chupekuéra ojeprepara vaʼerãha pórke amo gotyove ojepersegi mbaretevéta chupekuéra. Haʼe heʼi chupekuéra oĩ vaʼerãha omano hag̃uáicha Jesús ojapo haguéicha (Heb. 12:4). Ohasávo el tiémpo, heta hetave persónagui oiko kristiáno ha upéva ombopochyvéntema umi judíope. Epensamíntena la oiko vaʼekuére Páblore. Ojapo unos kuánto áño haʼe oho hague Jerusalénpe opredika hag̃ua. Upérõ mas de 40 kuimbaʼe oataka vaipaite chupe ha heʼi voi hikuái: “Ore rohura ni mbaʼevéicharõ ndoroʼumoʼãiha mbaʼevete rojuka peve Páblope” (Hech. 22:22; 23:​12-14). Peichaite peve ijetuʼu vaʼekue la situasión upe tiémpope. Upéicharamo jepe, umi kristiáno tekotevẽ vaʼekue osegi oñerreuni, opredika ha ijerovia mbarete.

16. ¿Mbaʼéichapa pe kárta oñemondo vaʼekue umi hebréope ikatu ñanepytyvõ oĩ jave ñandepersegi mbaretéva? (Hebreos 12:7).

¹⁶ ¿Mbaʼépa ikatu vaʼekue oipytyvõ umi kristiánope oĩrõ guare opersegi mbaretéva chupekuéra? Pablo oipota vaʼekue umi ermáno ontende koʼã pruéva ijetuʼúva ikatuha ideprovécho chupekuéra. Upévare haʼe oexplika Ñandejára ikatuha oipuru umi situasión ñaneentrena hag̃ua (elee Hebreos 12:7). Peichagua entrenamiénto ikatu ñanepytyvõ jaguereko hag̃ua hetave kualida Jehovápe ogustáva. Umi kristiáno hebreo ohecha vaʼerã kuri mbaʼéichapa ideprovécho oaguanta umi pruéva, péicha  ifasilvéta chupekuéra ogueropuʼaka umi mbaʼe ijetuʼúva (Heb. 12:11).

17. ¿Mbaʼépa Pablo oaprende vaʼekue ojepersegi mbarete rupi chupe?

¹⁷ Pablo omokyreʼỹ vaʼekue umi kristiáno hebréope taipyʼaguasu ha ani hag̃ua oñentrega ohasa jave umi pruéva ijetuʼúvare. Haʼe ikatu vaʼekue omeʼẽ peichagua konsého pórke ymave haʼe voi opersegi vaʼekue umi kristiánope, ha ohecha mbaʼeichaitépa ojetrata vai chupekuéra. Pablo oikuaa vaʼekue avei mbaʼéichapa ikatu ñaaguanta pe persekusión, pórke oiko rire chugui kristiáno ojepersegi mbarete vaʼekue chupe heta hendáicha (2 Cor. 11:​23-25). Entéro koʼã mbaʼére Pablo oikuaa porã vaʼekue mbaʼépa peteĩ persóna oikotevẽ oaguanta hag̃ua. Upévare Pablo heʼi vaʼekue umi kristiánope ojerovia vaʼerãha Jehováre ha ndahaʼéi ijehénte ohasa jave umi pruévare. Péicha umi kristiáno hebreo pyʼaguasúpe ikatúta heʼi: “Jehová chepytyvõ hína, ndakyhyjemoʼãi asy” (Heb. 13:6).

18. ¿Mbaʼépa ñanepytyvõta amo gotyove ñaaguanta hag̃ua oĩ jave ñandepersegíva?

¹⁸ Koʼág̃a avei algúno ñane ermánope ojepersegi mbarete hína. Upévare ikatu ñañemboʼe hesekuéra ha sapyʼánte ikatu voi ñameʼẽ chupekuéra álgo oikotevẽva (Heb. 10:33). La Biblia ningo heʼi porã: “Enterove oadoraséva Ñandejárape ipyʼaite guive Cristo Jesús disípuloramo, ojepersegíta avei” (2 Tim. 3:12). Upévare, enterovéva tekotevẽ jajeprepara pórke amo gotyove oúta hína umi tiémpo ijetuʼúva. Jasegíkena jajerovia ñande pyʼaite guive Jehováre, ha ani jaduda haʼe ñanepytyvõtaha ñaaguanta hag̃ua oimehaichagua pruéva ikatúva oñepresenta. Jehová itiempoitépe omeʼẽta pyʼaguapy entéro oadorávape chupe (2 Tes. 1:​7, 8).

19. ¿Mbaʼe mbaʼépa ikatu ñanepytyvõ jajeprepara hag̃ua pe jehasa asy guasúpe g̃uarã? (Ehecha pe taʼanga).

¹⁹ Ndajadudái pe kárta Pablo oskrivi vaʼekue umi hebréope oipytyvõ hague chupekuéra ojeprepara hag̃ua pe jehasa asýpe g̃uarã. Haʼe omokyreʼỹ vaʼekue umi kristiánope ostudia ha ontende porãve hag̃ua Ñandejára Ñeʼẽ, ikatu hag̃uáicha orrechasaite umi enseñánsa ikatúva omokangy chuguikuéra ijerovia. Pablo omokyreʼỹ avei chupekuéra ojerovia mbarete hag̃ua. Péicha haʼekuéra pyaʼe ikatúta osegi umi instruksión Jesús omeʼẽ vaʼekue, ha avei umi instruksión omeʼẽva umi ogiáva pe kongregasión. Haʼe oipytyvõ avei umi kristiánope oaguantakuaa hag̃ua umi pruéva, oexplikávo Jehová ikatuha oipuru koʼã mbaʼe oentrena hag̃ua chupekuéra. Ñande avei jasegíramo koʼã konsého oĩva la Bíbliape ikatúta ñaaguanta ha ñandefiél ipahaite peve (Heb. 3:14).