Umi 70 disípulo ndaipóri vaʼekue Jesús ndive haʼe omoñepyrũrõ guare pe Séna del Señór. Péro upe haguérente ndaikatúi jaʼe Jesús ndoguerohorýi hague chupekuéra, térã oheja rei hague hikuái Jesúspe. Haʼe oĩsénte vaʼekue upe pyharépe umi ijapostolkuérandi.

Jesús oguerohory vaʼekue umi 12 ha umi 70-pe avei. Jesús oiporavo raẽ vaʼekue umi 12 kuimbaʼépe entéro umi disípulo apytégui ha ohenói chupekuéra apóstol (Luc. 6:​12-16). Haʼe oĩ vaʼekue Galiléape ‘ohenóirõ guare umi 12 apóstolpe’ ha “omondo chupekuéra opredika hag̃ua Ñandejára Rréino ha oporomonguera hag̃ua” (Luc. 9:​1-6). Tiémpo rire, oĩrõ guare Judéape, “Jesús oiporavo jey 70 disípulo ha omondo chupekuéra de a 2 oho hag̃ua henonderã” (Luc. 9:51; 10:1). Upéicharõ, Jesús orekónte vaʼekue voi idisípulo diferénte lugárpe opredika hag̃ua upérupi.

Umi judío oikóva chugui kristiáno ofesteha vaʼekue pe Páskua káda áño ha oiméne haʼekuéra ojapo upéva ifamíliandi (Éx. 12:​6-11, 17-20). Jesús omano mboyve oho ijapostolkuérandi Jerusalénpe. Péro upérõ Jesús ndojeruréi entéro umi idisípulo oĩvape Judea, Galilea ha Peréape ofesteha hag̃ua hendive pe Páskua. Provávlemente Jesús oĩse kuri ijapostolkuérandi añónte. Haʼe heʼi chupekuéra: “Hetaitéma ahaʼarõ og̃uahẽ ko Páskua asena hag̃ua penendive ahasa asy mboyve” (Luc. 22:15).

¿Mbaʼérepa oĩse vaʼekue hendivekuérante? Jareko vaʼerã enkuénta Jesús omano mbotaitéma hague. Haʼe ningo “Ñandejára Ovecha Raʼy, oipeʼáva pe pekádo ko múndogui” (Juan 1:29). Jesús omanóta kuri Jerusalénpe, upépe ojejapo vaʼekue heta tiémpore umi sakrifísio Ñandejárape g̃uarã. Pe Páskua omomanduʼa vaʼekue umi israelítape Jehová olivera hague chupekuéra Egíptogui. Péro Jesús sakrifísio rupive ojehupytýta peteĩ mbaʼe tuichaitereivéva: Ojeliveráta yvyporakuérape pekádo ha ñemano poguýgui (1 Cor. 5:​7, 8). Jesús sakrifísio rupive, umi 12 apóstol ikatúta kuri oĩ pe simiénto oñekotevẽvape oñemopuʼã hag̃ua pe kongregasión kristiána (Efes. 2:​20-22). Avei ñanemanduʼakuaa pe siuda sagráda Jerusalén, orekoha “12 ita isimiéntope” ha umi itáre oĩha “umi 12 apóstol réra, koʼãva hína pe Ovecha Raʼy apóstol” (Apoc. 21:​10-14). Upéicharõ umi apóstol tuicha oipytyvõta kuri oñekumpli hag̃ua Ñandejára volunta. Péicha ñantende mbaʼérepa Jesús oĩse vaʼekue hendivekuéra pe última Páskuape ha pe Séna del Señórpe, omoñepyrũ vaʼekue avei upépe.

Umi 70 disípulo ha umi ótro avei ndaipóri vaʼekue Jesús ndive upérõ. Péro entéro osegíva ifiél oñevenefisiáta kuri pe Séna del Señórgui. ¿Mbaʼérepa? Pórke entéro umi kristiáno upéi oñeunhítavape, oikéta kuri avei pe kompromíso Jesús ojapo vaʼekuépe ogoverna hag̃ua. Jesús oñeʼẽ vaʼekue ko kompromísore ijapostolkuérandi pe pyhare omoñepyrũ haguépe pe Séna del Señór (Luc. 22:​29, 30).