Peteĩ paséo oorganisa vaʼekuépe peteĩ koléhio, ojeakusa unos kuánto mitãrusúpe oviola hague ótro mitãrusúpe. Hiʼarive koʼã mitãrusu ostudia hína peteĩ koléhio iñimportántevape oĩvape Canadápe. Oiko rire ko mbaʼe vaiete, peteĩ periodísta hérava Leonard Stern oskrivi pe diário héravape Ottawa Citizen: “Umi mitãrusu iñintelihénte, ijestúdio porã ha iplátaramo jepe, ndeʼiséi ikondúkta porãtamaha”.

Upéi Leonard Stern heʼive: “Koʼág̃arupi ningo umi tuakuéra ojepyʼapyve ifamiliakuéra nótare, ikatu hag̃uáicha upéi okonsegi peteĩ traváho ojepaga porãtahápe chupekuéra. Péro legálmente la iñimportantevéva hína ifamiliakuéra oaprende mbaʼépa iporã ha mbaʼépa ivai”.

Iñimportanteterei ningo añete jastudia, péro peteĩ persóna ijestúdio porãramo jepe, upéva noipytyvõmoʼãi chupe ipuʼaka hag̃ua umi deséo vai orekóvare ha umi mbaʼe vai ojaposévare. ¿Mbaʼeichagua edukasiónpa upéicharõ ikatu ñanepytyvõ jaikuaa hag̃ua mbaʼépa iporã ha mbaʼépa ivai?

La Biblia ningo ojogua peteĩ espéhope. Pórke jalee jave ikatu japilla mbaʼépepa ñanekangy ha mbaʼépa umi mbaʼe ndaikatumoʼãiva jajapo (Santiago 1:23-25). La Biblia ñanepytyvõkuaa avei ñakambia hag̃ua, ikatu hag̃uáicha jaiko vyʼápe ha pyʼaguapýpe ñande rapichakuérandi. La Biblia rupive ñande ikatu ñanembaʼeporã, ñandepyʼaporã, ñanepasiénsia, jajejokokuaa ha japorohayhu. La Biblia heʼi voi ‘pe mborayhu oipytyvõha enterovépe oĩ hag̃ua unído oñondivepa’ (Colosenses 3:14). ¿Péro mbaʼérepa iñimportantete japorohayhu? Jahechamína mbaʼépa heʼi la Biblia upévare.

• “Pe oporohayhúva ipasiénsia ha imbaʼeporã, naiñenvidiósoi, ndaijejapói ha noñembotuichái. Pe oporohayhúva ningo oñekomporta porã, nopensái ijehénte, ndaipochyreíri ha ndaipyʼarói. Ndovyʼái umi mbaʼe vai ojejapóvare, síno ovyʼa ojekuaaukávo la verda. Pe oporohayhúva oaguanta entéro mbaʼe, [...] ha ni mbaʼevéicharõ noñentregái. Pe mborayhu núnka ndofallái” (1 Corintios 13:4-8).

• “Pe persóna oporohayhúva ndojapói mbaʼeve ivaíva hapicháre” (Romanos 13:10).

• “Ha koʼýte pejoayhu vaʼerã pende pyʼaite guive, pórke pe oporohayhúva siémpre oĩ operdona hag̃uáicha hapichápe” (1 Pedro 4:8).

Ñaime jave ñane hénte ha ñane amigokuérandi ñande ñaĩ trankílo ha ndajakyhyjéi mbaʼevégui. ¿Mbaʼérepa? Pórke jaikuaa porã haʼekuéra oipotaha iporãvante ñandéve g̃uarã ha núnka ndojapomoʼãiha ñanderehe mbaʼeve ivaíva.

Jahayhúramo ñande rapichápe, ñaiméta dispuésto jajapóvo sakrifísio hesehápe ha tekotevẽramo ikatu voi ñakambia peteĩ mbaʼe jajepokuaáva jajapo. Por ehémplo, peteĩ karai oĩseterei kuri inietoʼi onase ramóvandi, péro la ijérno ndoipotái haʼe opita oĩ jave pe mitã ypýpe. ¿Mbaʼépa ojapo upémarõ? Haʼe ningo opitáma kuri 50 áñore, upéicharõ jepe haʼe oheja pe sigarríllo pórke oĩseterei la inietoʼíndi. Péicha jahecha ke jahayhúramo umi ótrope tuichaiterei ikatuha ñanepytyvõ.

 Enterovéva ningo ikatu ñaaprende jahayhu hag̃ua ñande rapichápe, ha koʼýte tuakuéra ikatu omboʼe ifamíliape oporohayhu hag̃ua. ¿Mbaʼérepa jaʼe upéva? Pórke tuakuéra okuida porãiterei ifamíliare. Por ehémplo omeʼẽ ifamíliape hoʼu vaʼerã, okuida hesekuéra ha hasykatu térã oñelastimáramo oĩ ijykére oipytyvõ hag̃ua chupe. Umi sy ha túa ikalidáva oñemongeta meme ifamíliandi ohekomboʼe hag̃ua chupe ha tekotevẽ jave, okorrehi avei chupekuéra ikatu hag̃uáicha oikuaa mbaʼépa iporã ha mbaʼépa ivai. Péro iñimportánte haʼekuéra voi omoĩ ehémplo porã.

Ñambyasýramo jepe, heta sy ha túa nokumplíri pe rresponsavilida orekóva. ¿Heʼisépa upéva ifamília si o si osẽ vaitaha ha ndorekoveimaha esperánsa? Nahániri. Heta mitã okakuaa vaʼekue heta provléma apytépe, tuicha rire okambia ha oñepyrũma avei oporohayhu ha irresponsávle. Oĩ voi heta persóna ojeʼéma vaʼekue hese naipohãveimaha péro upéi okambia. Umi artíkulo oúvape ñañeʼẽta umichagua persónare.