¿Mbaʼérepa oĩ hetaite ndorrespetáiva hapichápe?
MBAʼÉREPA IÑIMPORTÁNTE JARRESPETA ÑANDE RAPICHÁPE
Oĩ jave peteĩ situasión ijetuʼúva iñimportánte japororrespeta, upéicharõmante noñembyaivemoʼãi la situasión ha ñaipytyvõta oñetrankilisa hag̃ua ñande rapicha.
-
Peteĩ proverbio bíblico heʼi: “Pe persóna orrespondéva pyʼaguapýpe ombohasaite pe pochy, péro pe orresponde vaíva ombopochyve rei hapichápe” (Proverbios 15:1). Jaʼéramo térã jajapóramo peteĩ mbaʼe ohechaukáva ndajapororrespetaiha haʼete ku ñahatapyñáva la tata, ha upéicha jave opa vai katuete.
-
Jesús heʼi vaʼekue: “Umi mbaʼe omyenyhẽva ñane korasõ osẽ ñande jurúrupi” (Mateo 12:34). Ñañeʼẽ jave ndajarrespetáiramo ñande rapichápe, ikatu ohechauka jarekoha peteĩ provléma tuichavéva ha tekotevẽva ñakambia. Por ehémplo, ikatu jahechauka mbaʼépa legálmente ñapensa umi persóna oúvare ótro país térã trívugui, ipire kolór diferénteva ñandehegui térã umi orekóvare diferénte nivél ekonómiko.
Ramoite ojejapo peteĩ enkuésta mas de 32.000 persónape oikóva 28 paíspe, ha el 65 por ciento heʼi primera ves ohechaha peichaite peve ndojorrespetaiha la hénte.
MBAʼÉPA NDE IKATU REJAPO
Reime jave nde travahohápe, koléhio térã eskuélape, errespetákena enterovévape, inklúso umi opensa diferéntevape ndehegui. Ehekánte umi mbaʼe peimehápe de akuérdo. Upéva nepytyvõta pono ehusga chupekuéra ni eñeʼẽ vai hesekuéra.
Etrata umi ótrope nde reipotaháicha ndetrata avei hikuái. Nembaʼeporã ha ndekalidáramo umi ótrondi, haʼekuéra posívlemente péicha avei ndetratáta.
Eporoperdonákena. Oiméramo álgien heʼi térã ojapo peteĩ mbaʼe ndahaʼéiva la iporãmbáva eñehaʼã embohasa reínte, ha ekonfia pe persóna ndojapói hague upéva nemoñeñandu vai hag̃uáicha.
MBAʼÉPA ROJAPO ORE
Tahaʼe haʼéva la ore traváho térã pe lugár roikoha, ore testígo de Jehová rorrespeta enterovévape, ha romokyreʼỹ ore rapichápe ojapo hag̃ua avei upéicha.
Romboʼe la Biblia gratiete opaichagua persónape. Péro ndoroovligái avavépe oguerovia hag̃ua umi mbaʼe ore rogueroviáva ni opensa hag̃ua oréicha. Upéva rangue, rosegi ko konsého omeʼẽva la Biblia: “Pejapo vaʼerã upéva pyʼaguapýpe porãnte ha perrespeta pende rapichakuérape pende pyʼaite guive” (1 Pedro 3:15; 2 Timoteo 2:24).
Noromboykéi avavépe. Ore rreuniónpe vyʼápe rorresivi opaichagua persóna oaprendesévape la Bíbliagui, tahaʼe haʼéva ipire kolór, ikultúra térã ipaís. Avei ore rorrespeta entéro persónape, noroiméiramo jepe de akuérdo umi mbaʼe odesidívandi (1 Pedro 2:17).
Rorrespeta umi autoridápe (Romanos 13:1). Ore rokumpli umi léi ha ropaga umi impuésto. Ha noroñentremetéiramo jepe polítikare, rorrespeta pe derécho la hénte orekóva upe témape.
