UMI ÁÑO OHASA VAʼEKUÉPE HETA OÑEINVESTIGA MBAʼEICHAITÉPA ÑANDEAFEKTA OMANÓRAMO PETEĨ JAHAYHÚVA. Péro jahecháma haguéicha, umi mbaʼe oakonseháva umi expérto, ymaitereíma ojeskrivi vaʼekue la Bíbliape. Upéva ohechauka umi konsého oĩva pype koʼag̃aite peve ideprovechoha ñandéve. Péro la Biblia ndahaʼéi omeʼẽnteva konsého iporãva, síno omeʼẽ avei umi informasión ndajatopamoʼãiva ótro lugárpe, ha umíva tuichaiterei ñanekonsola.

• Oasegura ñandéve umi omano vaʼekue ndosufririha.

  Eclesiastés 9:5 heʼi ‘umi omanóva ndoikuaaveimaha mbaʼevete asy’. Ha ótra pártepe heʼi ‘upe díape opamaha umi mbaʼe opensáva’ (Salmo 146:4). Upévare la Biblia heʼi peteĩ persóna omanóramo haʼetenteha okéva hína (Juan 11:11).

• Ñanekonsola jaikuaávo Ñandejára ñanderayhuha ha upévare jajerovia hese.

  La Biblia heʼi: “Jehová a omaña umi hembiapo porãvare, ha ohendu ojerure jave hikuái oipytyvõ hag̃ua chupekuéra” (Salmo 34:15). Ñañemboʼe jave Ñandejárape, ndahaʼéi ojapo porãnteva ñanderehe ñamombeʼu haguére álgienpe mbaʼéichapa ñañeñandu, térã ñanepytyvõvante ñapensa porãve hag̃ua. Añetehápe pe orasión ñanepytyvõ ñañemoag̃uive hag̃ua ñande Kreadór rehe, ha haʼe ikatu oipuru ipodér ñanekonsola hag̃ua.

• Omeʼẽ ñandéve esperánsa jaiko porãvetaha amo gotyove.

  La Biblia heta vése heʼi oikove jeytaha umi omano vaʼekue, ha upéva ndahaʼéi peteĩ suéño reínte. Heʼi avei mbaʼéichapa enterovéva jaikóta oñekumpli vove upéva: “Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva” (Apocalipsis 21:3, 4).

Ajépa iporãite ko promésa: ikatúta jahecha jey umi jahayhúva omano vaʼekuépe. Ko esperánsa rupive heta oĩ ojeroviáva Jehováre ha upéva omombarete ha oipytyvõ chupekuéra oaguanta hag̃ua imbaʼembyasy. Upéva oiko Ann rehe, iména omano chugui 65 áño omenda haguépe hikuái. Haʼe heʼi: “La Biblia oasegura ñandéve umi jahayhúva omano vaʼekue ndosufririha, ha Ñandejára omoingove jeytaha chupekuéra. Upévare káda ke chemanduʼa che ménare, chemanduʼa avei upe promésare. Upéva chepytyvõ aaguanta hag̃ua upe mbaʼe vaiete ahasáva hína”.

Tina, upe ñañeʼẽma hague anteve, heʼi: “Omano guive Timo, ahechakuaa Ñandejára oĩha che ykére. Añandu mbaʼéichapa ipodér rupive Jehová chemopuʼã añembyasyetereírõ guare. Che aguerovia che pyʼaite guive la Biblia heʼívo oñemoingove jeytaha umi omanóvape, ha upéva chemombarete asegi hag̃ua ahecha jey peve Tímope”.

Hetaiterei persóna ojeroviáva la Bíbliare oñeñandu avei Ann ha Tínaicha. Oiméramo nde repensa la Biblia heʼíva haʼeha peteĩ suéño reínte, mbaʼépa ere eanalisáramo ndete voi umi pruéva ohechaukáva ikatuha jajerovia ikonsehokuérare ha umi promésa oĩvare pype.

Ore sítio de Internétpe, jw.org, retopáta unos kuánto vidéo oñeʼẽva ko témare.

 ¿MBAʼÉPA OIKO UMI OMANO VAʼEKUÉGUI?

¿REHENDUSÉPA NOTÍSIA IPORÃVA?