“Ojapóma kuri mas de 39 áño Sofía a ha che romenda hague, péro upéi peteĩ mbaʼasy vai ha oreko asýva chupe heta áñore, ogueraha anga chupe chehegui. Che amigokuéra heta chepytyvõ ha che añehaʼã avei añemohembiapo heta, péro un áño pukukuére hasyeterei chéve ha ndaikatúi aaguanta. Ni che ndaikuaái la ojehúva chéve, añeñandu porãiteháguinte desastrete jey aime. Koʼag̃aite peve hasy asy jepi chéve pe che korasõme ha ndaikatúi akontrola upéva, hiʼarive ohasáma haimete 3 áño omano hague” (Kostas).

¿Omanómapa ndehegui peteĩ rehayhúva? Oiméramo upéicha, ikatu oime reñeñandu Kostas oñeñandu haguéicha. Jasufrieterei ha hasy de ótro voi ñandéve omanóramo ñandehegui ñane ména, ñane rembireko, ñane hénte térã peteĩ ñane amigoite, ha umi expérto jepe orrekonose upeichaha. Peteĩ artíkulo oñeʼẽva pe ñembyasýre heʼi: “Heta hénte osufrieterei pórke oñandu operdeha pára siémpre voi upe persóna ohayhuetévape” (The American Journal of Psychiatry). Jahasa jave peichagua situasión ijetuʼuetévare ikatu oime ñañeporandu: “¿Arakaʼe peve piko asegíta péicha añeñandu? ¿Algún día piko avyʼa jeýta? ¿Moõ piko ikatu atopami konsuélo?”.

Ko rrevísta ¡Pepáyke! orresponde koʼã porandu. Pe ótro artíkulope jahecháta umi mbaʼe ikatúva rehasa hína oiméramo reperde ramoite raʼe peteĩ rehayhúva. Ha umi ótro artíkulope jahecháta mbaʼe mbaʼépa ikatu nepytyvõ reaguanta hag̃ua.

Hiʼãite ningo ko rrevísta okonsola ha oipytyvõ entéro umi osufri ha oñembyasývape hína omano haguére chugui peteĩ ohayhúva.