‘Añetehápe peiméta torypápe’

“Pemboarete guasu vaʼerã Ñanderuete, pende Járape [...], ha añetetehápe peiméta torypápe.” (DEUTERONOMIO 16:​15, ÑÑM.)

1.a) Mbaʼépa omoñepyrũ Satanás Edénpe? b) Adán ha Eva opuʼã rire Jehováre, mbaʼépa Haʼe heʼi ojapotaha?

 SATANÁS omokyreʼỹrõ guare Adán ha Évape opuʼã hag̃ua Ñandejárare, omoñepyrũ mokõi mbaʼe iñimportantetereíva. Primero, heʼi Jehová ijapuha ha nogovernaporãiha. Ha segundo katu, heʼi yvyporakuéra oserviha Ñandejárape omeʼẽgui chupekuéra heta mbaʼe. Ko mbaʼe ojehecha porã vaʼekue Job árape (Génesis 3:​1-6; Job 1:​9, 10; 2:​4, 5). Upéicharamo jepe, Jehová pyaʼe porã ohecha mbaʼéichapa omyatyrõta koʼã mbaʼe. Adán ha Eva oĩ aja gueteri Edénpe, Jehová omombeʼúma mbaʼépa ojapóta. Heʼi outaha peteĩ “ñemoñare”, kóvape ojesuʼúta ipytápe, ha haʼe katu ombochipéta Satanás akã (Génesis 3:15).

2. Mbaʼéichapa Jehová omyesakãve ohóvo pe ojapótava?

 ² Upe rire Jehová omyesakãve ohóvo pe ojapótava ha péicha ohechauka katuete oikotaha heʼivaʼekue. Pór ehémplo, Jehová opromete Abrahánpe ifamíliagui outaha pe “ñemoñare” (Génesis 22:​15-18). Umi doce trívu Israelgua ou iniéto Jacóbgui. Áño 1513-pe Jehová omeʼẽ iléi upe tetãme ha heʼi chupekuéra omboaretevaʼerãha heta ára káda áño. Apóstol Pablo heʼi koʼã arete “niko taʼanga umi ouvaʼerã renondépe” (Colosenses 2:​16, 17; Hebreos 10:1). Heta mbaʼe ojejapóva koʼã aretépe ohechauka mbaʼéichapa pe Ñemoñare ojapóta Jehová oipotáva. Umi Israelgua ovyʼajoa koʼã aretépe. Jaikuaa porãvérõ koʼã arete jajeroviavéta Jehová promésare.

Ou pe Ñemoñare

3. Mávapa hína pe Ñemoñare ha mbaʼéichapa ojesuʼu chupe ipytápe?

³ Ohasa rire cuatro mil áño Jehová omombeʼuhague ojapótava ou Jesús. Haʼe hína pe Ñemoñare (Gálatas 3:16). Jesús ndojapói mbaʼevete ivaíva ha iñeʼẽrendu omano meve, upéicha ohechauka Satanás ijapuhague. Ndojavýi rupi mbaʼevetépe ikatu omano yvyporakuéra iñeʼẽrendúva rehehápe ha oipeʼa chupekuéra pekádo ha ñemano poguýgui. Ojejukávo chupe ‘ojesuʼu ipytápe’ pe Ñemoñare (Hebreos 9:​11-14).

4. Mbaʼépa orrepresenta Jesús sakrifísio?

⁴ Jesús omano 14 de nisán áño 33-pe. * Upe árape Israélpe vyʼápe ojesfeteha pe Pascua. Hoʼu hikuái peteĩ ovecha raʼy hesãiva, kóva omomanduʼa chupekuéra oikovaʼekue Egíptope 14 de nisán 1513-pe Jesús ou mboyve. Upérõ pe ovecha raʼy ruguy osalva umi Israelgua raʼy ypykuépe, peteĩ ánhel ojukáramo guare umi Egiptoygua raʼy ypykuépe (Éxodo 12:​1-14). Pe ovecha raʼy orrepresenta Jesúspe. Apóstol Pablo heʼi hese: “Cristo niko pe Ovecha Raʼy ñande Pascuapegua, omanovaʼekue ñanderehápe” (1 Corintios 5:7). Upe ovecha raʼy ruguy osalva hetápe, Jesús ruguy ojapoháicha (Juan 3:​16, 36).

“Pe tenonde oikove jevy vaʼekue”

5, 6. a) Arakaʼépa oñemoingove jey Jesúspe ha mbaʼe aretépa ohechaukavaʼekue ko mbaʼe? b) Mbaʼérepa oñemoingove jey vaʼerã Jesúspe oiko hag̃ua Génesis 3:15 heʼíva?

⁵ Tres ára omanohaguépe Jesúspe oñemoingove jey. Upéicha ikatúma omeʼẽ Itúvape hekove repykue (Hebreos 9:24). Oĩ ambue arete ohechaukáva Jesús oñemoingove jeytaha. Upéva hína Pán Oñembovuʼỹva Ára (fiesta de las Tortas no Fermentadas), oñepyrũva 15 de nisán. Upéi, 16 de nisánpe umi Israelgua oraha saserdótepe cebada apesã tenondere. Ko cebada raẽte oñemonoʼõ umi ótro kógagui. Pe saserdóte omyatymoivaʼerã upéva Jehová renondépe (Levítico 23:​6-14). Ha avei 16 de nisán áño 33-pe Jehová ndohejái oiko Satanás oipotáva. Satanás omokirĩrisemoʼã ‘pe testígo fiél iñeʼẽ añetéva’. Jehová omoingove jey Jesúspe 16 de nisán 33-pe oiko hag̃ua yvágape omanoʼỹ hag̃uáicha (Apocalipsis [Revelación] 3:​14, BNP; 1 Pedro 3:18).

⁶ Upéicharõ, Jesús hína “pe tenonde oikove jevy vaʼekue” (1 Corintios 15:20). Haʼe ndahaʼéi umi yma oñemoingove jey vaʼekuéicha, umíva ningo omano jey. Jesús katu oho yvágape ha oguapy Jehová deréchape, upépe ohaʼarõ omoĩ meve chupe Rreirã (Salmo 110:1; Hechos 2:​32, 33; Hebreos 10:​12, 13). Jesús ningo ogovernáma yvágape ha ikatúma opyrũ Satanás akãre ha ohundi iñemoñare (Apocalipsis [Revelación] 11:​15, 18; 20:​1-3, 10).

Oñembohetave Abrahán ñemoñare

7. Mbaʼépa ojejapo Semanakuéra aretépe?

⁷ Jesús ningo pe Ñemoñare oñeprome tevaʼekue Edénpe, ha Jehová omoĩ chupe “ombyai hag̃ua upe ojapovaʼekue aña” (1 Juan 3:8). Péro Jehová heʼi Abrahánpe iñemoñare hetataha “mbyjakuéra yvagapegua ha yvykuʼi raʼỹi y guasu rembeʼypeguáicha” (Génesis 22:17). Ambue arete ohechauka pe ‘ñemoñare’ hetavetaha. Dieciséis de nisán rire 50 ára haguépe, Israelgua ofesteha Semanakuéra rehegua arete (fiesta de las Semanas). Haʼekuéra ojapo Léi heʼiháicha: ‘Pe sábado oúva peve, ojepapáta 50 ára. Upéramo peraha Ñandejárape mbaʼe kuaveʼẽramo pende trígo pyahu, ha heseve peraha mokõi pán pejapóva trígo kuʼi iporãvévagui ha oñembovuvaʼekue, peteĩteĩ oguerekóva 4 kílo, peikuaveʼẽva Ñandejárape pende kogaʼa tenonderégui’ (Levítico 23:​16, 17, 20). *

8. Mbaʼépa oiko Pentecostés 33-pe?

⁸ Jesús oikórõ guare ko Yvy ape ári, ko Semanakuéra aretépe oñehenói Pentecostés (oúva griégo ñeʼẽgui heʼiséva cincuentaha). Pentecostés 33-pe, Saserdóte Guasu Jesucristo omeʼẽ espíritu sánto 120 hemimboʼekuéra ijatýva Jerusalénpe. Upévare haʼekuéra Ñandejára raʼýma ha Jesucristo ermanokuéra (Romanos 8:​15-17). Oiko chuguikuéra peteĩ tetã pyahu ‘Israel Ñandejára mbaʼe’ (Gálatas 6:​16, JMP). Ñepyrurã mbovy vaʼekue hikuái, upéi katu ohupyty 144.000 (Apocalipsis [Revelación] 7:​1-4).

9, 10. Mbaʼéichapa Pentecostés arete orrepresenta umi kristiáno ohótava yvágape?

⁹ Umi mokõi pán oñemyatymóiva Jehová renondépe Pentecostés aretépe orrepresenta umi kristiáno ohótava yvágape. Umi pán ojejapo levadúra rehe ohechauka hag̃ua koʼã kristiáno ipekadoha gueteri. Upéicharamo jepe, ikatu oñemoag̃ui Jehováre Jesús sakrifísio rupive (Romanos 5:​1, 2). Ha mbaʼérepa mokõi pán? Oiméne ojehechauka hag̃ua umi 144.000 ouha mokõi atýgui: ñepyrũrã umi hudío apytégui ha upe rire umi tetã ambuegua (Gálatas 3:​26-29; Efesios 2:​13-18).

¹⁰ Umi pán ojejapo trígo kuʼi oñemonoʼõ tenondévagui. Upéicha avei, ojeʼe umi kristiáno yvágape ohóvare ‘tenonderãite umi Ñandejára rembiapokue apytépe’ (Santiago 1:​18, JMP). Chupekuéra raẽ oñeperdona hembiapo vaikue Jesús ruguy rupive. Upévare ikatu oiko yvágape ha nomanomoʼãvéima arakaʼeve, upe guive ogovernáta Jesús ndive (1 Corintios 15:53; Filipenses 3:​20, 21; Apocalipsis [Revelación] 20:6). Upéicha, haʼekuéra koʼẽrõite ‘omanda pohýita tetãnguéra rehe fiérro orekoramoguáicha ipópe’ ha ‘oñemoĩta Satanáspe ipyguypekuéra’ (Apocalipsis [Revelación] 2:​26, 27, BNP; Romanos 16:20). Apóstol Juan heʼi: ‘Koʼãva omoirũ pe Ovecha Raʼýpe mamo ohohápe. Koʼãva ojesalvavaʼekue yvyporakuéra apytégui ofrénda tenondeguáramo Ñandejárape g̃uarã ha pe Ovecha Raʼýpe g̃uarã’ (Apocalipsis [Revelación] 14:​4, BNP).

 Peteĩ ára ohechaukáva mbaʼéichapa ñanesãsóta

11, 12. a) Mbaʼépa ojejapo Ñemoĩ Porã Jevy Árape? b) Mbaʼéichapa ojeporu umi Israelgua rehehápe umi sakrifísio ojejapóva Ñemoĩ Porã Jevy Árape?

¹¹ Oĩ avei peteĩ arete ohechaukáva mbaʼépa ojehupyty Jesús omanohaguére ñanderehehápe. Kóva ojejapo 10 de etanim (upe rire oñehenóiva tisri). * Umi Israelgua ijatypa ofesteha hag̃ua pe Ñemoĩ Porã Jevy Ára (Día de Expiación), omymbajuka hikuái Jehovápe operdona hag̃ua chupekuéra hembiapo vaikuére (Levítico 16:​29, 30).

¹² Ñemoĩ Porã Jevy Árape pe saserdóte guasu ojuka peteĩ tóro raʼy ha ogueraha huguy Tenda Marangatuetépe (Santísimo) ohypýi hag̃ua pe Karameg̃ua Marangatu (Arca del Pacto) renondépe siete vése. Péicha oikuaveʼẽ Jehovápe. Saserdóte Guasu omeʼẽ ko ofrénda hembiapo vaikuére ha umi ótro saserdóte ha Leví trivuygua rehehápe. Upe rire katu ojagarra mokõi kavara mácho. Ojuka peteĩ kavara umi Israelgua rembiapo vaikuére ha ohypýi huguy Karameg̃ua renondépe. Ipahápe, omoĩ ipo ótro kavara akã ári ha omombeʼu Israelgua rembiapo vaikue. Upéi opoi desiértore ogueraha hag̃ua Israelgua pekádo (Levítico 16:​3-16, 21, 22).

13. Mbaʼéichapa umi mbaʼe ojejapóva Ñemoĩ Porã Jevy Árape ohechauka Jesús ojapóva yvypóra rehehápe?

¹³ Koʼã mbaʼe ojejapóva ohechauka mbaʼéichapa Jesús pe Saserdóte Guasu oiporúta huguy oñeperdona hag̃ua yvyporakuéra rembiapo vaikue. Primero, oiporu huguy umi 144.000 ohótava yvágape rehehápe. Upéicha oñemopotĩ chupekuéra ha ikatu oĩ porã Jehová renondépe (1 Pedro 2:5; 1 Corintios 6:11). Upévare ikatu oho hikuái yvágape. Kóva ojehechauka pe tóro raʼy ojejukavaʼekuére. Segundo katu, Jesús ruguy ojeporu hetaiterei tapicha ojeroviáva hese rehehápe. Kóva ojehechauka pe kavara ojejukavaʼekuére. Haʼekuéra oikóta opa ára g̃uarã ko Yvy ape ári. Adán ha Eva oikovaʼerãmoʼã péicha iñeʼẽrendúrire Jehovápe  (Salmo 37:​10, 11). Jesús ruguy rupive ojepeʼa yvyporakuéra pekádo, pe kavara oguerahahaguéicha Israelgua pekádo desiértore (Isaías 53:​4, 5).

Javyʼákena Jehová renondépe

14, 15. Mbaʼépa umi Israelgua ojapo Enrramáda Guýpe Jeiko arete aja, ha mbaʼépa omomanduʼa chupekuéra?

¹⁴ Ñemoĩ Porã Jevy Ára rire, umi Israelgua ofesteha Enrramáda Guýpe Jeiko arete (fiesta de las Cabañas). Kóva hína pe arete ojevyʼaveha (Levítico 23:​34-43). Oñepyrũ 15 de etanim ha oho 21 peve, opa hag̃ua ojejapo peteĩ aty guasu 22 de etanim. Ko arete reheve oñemohuʼã kogaʼa ñemonoʼõ ha ojeagradese Ñandejárape imbaʼeporãitereihaguére. Upévare Jehová heʼi chupekuéra: Avendesíta pene rembiapo ha pende kogaty ha ‘añetehápe peiméta torypápe’ (Deuteronomio 16:​15, ÑÑM). Mbaʼeichaitépa ovyʼáneraʼe hikuái upérõ!

¹⁵ Umi Israelgua oiko enrramáda guýpe siete día pukukue. Upéva omomanduʼa chupekuéra péicha oikohague desiértore. Ko arete aja ikatu ojepyʼamongeta hikuái mbaʼeichaitépa Jehová oñangareko porã hesekuéra (Deuteronomio 8:​15, 16). Avei imboriahúva ha iplátava oiko rupi enrramáda guýpe ohechakuaa ko arete aja enterove peteĩchaha (Nehemías 8:​14-16).

16. Mbaʼépa ohechauka pe Enrramáda Guýpe Jeiko arete?

¹⁶ Enrramáda Guýpe Jeiko aretépe ojefesteha kogaʼa ñemonoʼõ. Kóva ohechauka vyʼápe oñembyatytaha avei umi Jesucrístore ojeroviávape. Upéva oñepyrũ Pentecostés 33-pe, ojeporavórõ guare 120-pe oiko hag̃ua chuguikuéra ‘saserdóte imarangatúva’. Umi Israelgua ndoikoʼaréi enrramáda guýpe, upéicha avei umi ohótava yvágape oikuaa ‘ohasanteha ohóvo’ ko múndo aña rupi (1 Pedro 2:​5, 11). Umi ohótava yvágape oñembyatypáta ko ‘ára pahápe’ (2 Timoteo 3:1).

17, 18. a) Mbaʼéichapa jaikuaa Jesús sakrifísio ojeporutaha entéro yvypóra iñeʼẽrendúva rehehápe? b) Mávapepa ovenefisia Enrramáda Guýpe Jeiko arete koʼag̃agua, ha arakaʼépa opáta?

¹⁷ Yma ojefestehárõ guare ko arete oñekuaveʼẽ 70 tóro (Números 29:​12-34). Setenta ningo osẽ ñamultiplikávo 7 pór 10.  La Bíbliape koʼã número orrepresenta iporãvéva yvágape ha yvýpe. Ko mbaʼe ohechauka Jesús sakrifísio ojeporutaha entéro yvypóra iñeʼẽrendúva rehehápe. Noé ñemoñarégui ningo osẽvaʼekue 70 família ha koʼãvagui oupaite yvyporakuéra (Génesis 10:​1-29). Upévare koʼág̃a oñembyaty opaichagua tapicha ojeroviáva Jesúsre ha oikoséva ko Yvy ape ári peteĩ paraísope.

¹⁸ Apóstol Juan ohecha mbaʼéichapa oñembyatýta koʼã tapichápe. Ñepyrũrã ohendu ojesellapaha umi 144.000. Upéi katu ohecha “peteĩ aty guasu avave ikatuʼỹvaʼerã oipapa” oñemboʼýva Jehová ha Jesús renondépe ha “oguerekóva pindo rogue ipopekuéra”. Koʼãva niko “umi ouvaʼekue pe jehasa asy guasúgui” ha oikéva múndo pyahúpe. Haʼekuéra ohasánte avei ohóvo ko múndo aña rupi ha ojerovia ko ñeʼẽre: ‘Pe Ovecha Raʼy oñangarekovaʼerã hesekuéra ha omboyʼu yvu oporomoingovévagui’. Upérõ ‘Ñandejára omokãmbavaʼerã hesaykuéra’ (Apocalipsis [Revelación] 7:​1-10, 14-17). Pe Enrramáda Guýpe Jeiko Arete koʼag̃agua oñemohuʼãta pe aty guasu ha umi oñemoingove jeýva ohupyty vove perfeksión. Ko mbaʼe oikóta opávo Jesús goviérno mil áñope (Apocalipsis [Revelación] 20:5).

19. Mbaʼérepa iporã jajepyʼamongeta umi aretére?

¹⁹ Ñande avei ikatu ‘ñaime torypápe’ jajepyʼamongetávo koʼã aretére. Péicha jaikuaa Jehová ohechaukahague koʼã aretére mbaʼéichapa ojapóta heʼivaʼekue Edénpe. Ajépa javyʼaite jahechávo oikoha koʼã mbaʼe. Jaikuaa pe Ñemoñare ouhague ha ojesuʼu chupe ipytápe, ha koʼág̃a ogovernáma yvágape. Avei umi 144.000 apytégui hetáma ohechauka ijerovia omano meve. Mbaʼépa oikovaʼerã gueteri? Arakaʼépa oñekumplipáta Génesis 3:15 heʼíva? Koʼã mbaʼe jahecháta pe párte oúvape.

[Nóta]

Reikuaápa?

• Mávapepa orrepresenta pe ovecha raʼy ojejukáva Páscuape?

• Mbaʼépa ohechaukavaʼekue Pentecostés arete?

• Mbaʼe ojejapóva Ñemoĩ Porã Jevy Árapepa ohechauka mbaʼéichapa ojeporúta Jesús sakrifísio?

• Mbaʼéichapa pe Enrramáda Guýpe Jeiko arete ohechauka oñembyatytaha kristianokuérape?

[Porandu ñahesaʼỹijóva]

[Rrekuádro oĩva páhina  24 ha 25-pe]

(Emaña pe kuatiañeʼẽre rehecha hag̃ua osẽ hagueichaite ko párte)

Pascua

14 de nisán

Mbaʼépa oiko:

Ojejuka ovecha raʼy Pascuapegua

Mbaʼépa ohechauka:

Ojejuka Jesúspe

Pán Oñembovuʼỹva Ára (15-21 nisán)

15 de nisán

Mbaʼépa oiko:

Sábado

16 de nisán

Mbaʼépa oiko:

Cebada oñekuaveʼẽ

Mbaʼépa ohechauka:

Oñemoingove jey Jesúspe

50 día

Semanakuéra rehegua arete (“Pentecostés”)

6 de siván

Mbaʼépa oiko:

Oñekuaveʼẽ umi mokõi pán

Mbaʼépa ohechauka:

Jesús opresenta Jehovápe iñermanokuéra ohótava yvágape

Ñemoĩ Porã Jevy Ára

10 de tisri

Mbaʼépa oiko:

Oñekuaveʼẽ peteĩ tóro ha mokõi kavara

Mbaʼépa ohechauka:

Jesús omeʼẽ huguy yvyporakuéra rehehápe

Enrramáda Guýpe Jeiko (Ñemonoʼõ arete)

15-​21 de tisri

Mbaʼépa oiko:

Umi Israelgua oiko vyʼápe enrramáda guýpe, ovyʼa ikoséchare, oñekuaveʼẽ 70 tóro

Mbaʼépa ohechauka:

Oñembyaty umi ohótava yvágape ha peteĩ “aty guasu”

[Nóta oĩva taʼanga ndive páhina 23]

Pe ovecha raʼy ruguy osalvahaguéicha hetápe, Jesús ruguy osalva avei hetápe

[Nóta oĩva taʼanga ndive páhina 24]

Cebada oñemonoʼõ raẽva oñekuaveʼẽva 16 de nisán ohechauka Jesús oñemoingove jeytaha

[Nóta oĩva taʼanga ndive páhina 25]

Umi mokõi pán oñekuaveʼẽva Pentecostéspe orrepresenta umi ohótava yvágape

[Nóta oĩva taʼanga ndive páhina 26]

Enrramáda Guýpe Jeiko arete ohechauka oñembyatytaha umi ohótava yvágape ha peteĩ “aty guasu” opa tetãmegua