‘Hiʼag̃uíma Jehová ára guasu’
‘Hiʼag̃uíma Jehová ára guasu’
“Hiʼag̃uíma Ñandejára ára guasu! Hiʼag̃uíma hína ha pyaʼe ou.” (SOFONÍAS 1:14.)
1, 2. a) Mbaʼe ára ijojahaʼỹvapa ohaʼarõhína Jehová siervokuéra? b) Mbaʼépa tekotevẽ jaikuaa ha mbaʼérepa?
PETEĨ kuñataĩ omendapotáva oipotaitereíma og̃uahẽ pe ára omenda hag̃ua. Peteĩ kuñakarai hyeguasúvape hiʼãitéma onase imemby. Ha peteĩ karai ombaʼapoitereíva katu oipotántema og̃uahẽ domingo opytuʼu hag̃ua. Mbaʼépepa ojojogua koʼã tapicha? Haʼekuéra ohaʼarõ peteĩ ára iporãitereítava chupekuéra g̃uarã ha oipotaitereíma og̃uahẽ. Upe ára katuete og̃uahẽta ha upearã ojepreparamahína hikuái.
2 Jehová siervokuéra ohaʼarõ avei peteĩ ára ijojahaʼỹva. Upéva hína “Ñandejára ára” guasu (Isaías 13:9; Joel 2:1; 2 Pedro 3:12). Mbaʼépa hína ‘Jehová ára’ ha mbaʼépa oguerúta yvyporakuérape? Mbaʼépa jajapovaʼerã ñahaʼarõ aja? Tekotevẽ jaikuaa porã koʼã mbaʼe. Jahecháma añeteha la Biblia heʼíva: ‘Hiʼag̃uíma Jehová ára guasu! Hiʼag̃uíma hína ha pyaʼe ou’ (Sofonías 1:14).
‘Jehová ára guasu’
3. Mbaʼépa hína ‘Jehová ára guasu’?
3 Mbaʼépa hína ‘Jehová ára guasu’? La Biblia oñeʼẽ vove ‘Jehová árare’ ohechaukahína umi kastígo ogueruvaʼekue umi oñemoĩvare hese. Umíva rupive Jehová oikuaauka avei Héra. Umi Judá ha Jerusalengua naiñeʼẽrendúiva Ñandejárape, ha umi tetã guasu Babilonia ha Egipto oikuaavaʼekue mbaʼépa heʼise ‘Jehová ára’ ohupytývo chupekuéra Ñandejára kastígo (Isaías 2:1, 10-12; 13:1-6; Jeremías 46:7-10). Péro ‘Jehová ára’ tuichavéva nog̃uahẽi gueteri. Upérõ oñehundíta umi omongyʼáva Ñandejára réra. Jehová ára guasu oñepyrũta oñehundívo umi rrelihión japu oĩva oñehenóiva ‘Babilonia Guasu’, ha opáta oñehundipa vove ko múndo aña Armagedónpe (Apocalipsis [Revelación] 16:14, 16; 17:5, 15-17; 19:11-21).
4. Mbaʼérepa yvyporakuéra okyhyjevaʼerã Jehová ára hiʼag̃uimbaitévagui?
4 Oikuaa térã ndoikuaáiramo jepe ko ára hiʼag̃uimaha, yvyporakuéra okyhyjevaʼerã. Mbaʼérepa jaʼe upéva? Jehová ohechauka Sofonías rupive: “Upe árape hendýta pochy, vyʼaʼỹ ha angata, oikóta ñehundi opytaʼỹre mbaʼeve, opa mbaʼe iñypytũta, arai ha pytũme ojejahoʼíta”. Ajépa ñanemongyhyje ko mbaʼe! Ko proféta heʼi avei: ‘Amondýita maymávape hembiapo vaikuére’ (Sofonías 1:15, 17).
5. Mbaʼérepa hetaiterei tapicha oipota og̃uahẽ Jehová ára?
5 Péro, hetaiterei tapicha oipota og̃uahẽ Jehová ára. Mbaʼérepa? Oikuaágui upe árape ojesalvataha umi heko potĩvape. Upérõ avei Jehová oñembotuicháta ha omopotĩta héra (Joel 3:16, 17; Sofonías 3:12-17). Peteĩ tapicha ohechauka umi mbaʼe ojapóvare okyhyjépa térã oipotápa og̃uahẽ ko ára. Ha ñande? Jajepreparapañaína ko árape g̃uarã? Mbaʼéichapa jaikoñaína jahechávo og̃uahẽmbaitemaha?
“Oñembohorýta penderehe”
6. Mbaʼépa ojapo hetaiterei yvypóra oñeñeʼẽvo chupekuéra Jehová árare ha mbaʼérepa ndajahecharamói upéva?
6 Ko múndo ningo ndohopukumoʼãvéima, upéicharõ jepe hetaiterei yvypóra nopenái ‘Jehová ára’ hiʼag̃uimbaitévare. Oñembohory katu hikuái umi oñeʼẽvare chupekuéra upe árare. Péro umi kristiáno tee ndohecharamói ko mbaʼe. Haʼekuéra imanduʼa apóstol Pedro heʼihague: “Peikuaa porãke kóva: Ára pahápe ouvaʼerã umi iñakã rehénte oikoséva, ha ojaposévante ojapóva. Umíva oñembohorýta penderehe, ha heʼíta peẽme: ‘Cristo niko heʼivaʼekue ou jevytaha. Moõ piko oime? Ore rukuéra niko omanombáma, ha ko yvy katu oĩ iñepyrũmby guive guaréicha’” (2 Pedro 3:3, 4).
7. Mbaʼépa ñanepytyvõta ñañatende meme hag̃ua?
7 Mbaʼépa ñanepytyvõta ani hag̃ua ñapensa avei upéicha ha ñañatende meme hag̃ua? Pedro heʼi: ‘Añehaʼã pereko hag̃ua pene akãme mbaʼe hekopeguáva. Penemanduʼáke umi mbaʼe profetakuéra marangatu heʼivaʼekue ymave, ha Jesucristo ñeʼẽngue apostolkuéra ohendukavaʼekue peẽme’ (2 Pedro 3:1, 2). Ñañatende meme hag̃ua jajesarekovaʼerã umi proféta heʼivaʼekuére, upéicha ‘jarekóta ñane akãme umi mbaʼe hekopeguáva’. Jepe ñahendúma heta vése koʼã mbaʼe, koʼág̃a tekotevẽtereive jajesareko umívare (Isaías 34:1-4; Lucas 21:34-36).
8. Mbaʼérepa oĩ heta ndoipotáiva og̃uahẽ Jehová ára?
8 Mbaʼérepa heta nohenduséi koʼã mbaʼe ojeʼéva chupekuéra? Pedro heʼi: ‘Umíva niko ndohechakuaaséi yvága oĩha ymaite guive voínte, ha iñeʼẽ rupi Ñandejára onohẽhague ko yvy umi y apytégui. Y rupínte avei oñehundivaʼekue opa mbaʼe, ku ama guasu oúramo guare yma’ (2 Pedro 3:5, 6). Upéicha jahecha oĩha heta ndoipotáiva og̃uahẽ Jehová ára. Haʼekuéra niko ojaposévante ojapo ha ndoikuaaséi mbaʼeve Ñandejáragui. Heʼiháicha Pedro ‘ndohechakuaaséi’ mbaʼeve hikuái.
9. Mbaʼépa ojapo umi tapicha Noé árape ha Lot jernokuéra?
9 Umi oñembohorýva “ndohechakuaaséi” Jehová ohundimahague yma umi iñañávape. Jesucristo ha apóstol Pedro omombeʼu mbaʼépa oiko ‘Noé árape’ ha ‘Lot árape’ (Lucas 17:26-30; 2 Pedro 2:5-9). Umi oikóva pe dilúvio mboyve nopenái ojeʼévare chupekuéra. Ha Lot heʼíramo guare ijernokuérape Sodoma ha Gomorra oñehunditaha, haʼekuéra ‘oimoʼã Lot heʼiguaʼunteha’ (Génesis 19:14).
10. Mbaʼépa Jehová ojapóta umi nohenduséivare iñeʼẽ?
10 Upeichaite ningo avei koʼág̃a. Péro jahechamína mbaʼépa ojapóta Jehová umi nohenduséivare iñeʼẽ: ‘Upérõ che ainupãta umi pyʼaguapýpe oikóvape ha heʼíva ijupekuéra: “Ñandejára ko ndojapomoʼãi mbaʼevete asy”. Pévare oñemondapáta, ha hogakuéra oñehundíta. Hogarã omopuʼãta ha ndoikomoʼãi upépe, oñotỹta parralty ha víno chugui ndoʼumoʼãi’ (Sofonías 1:12, 13). Ikatúningo umi tapicha ombaʼapo meme, péro ombaʼapovéramo jepe umi mbaʼe porã ohupytýva opa reíta. Mbaʼérepa upéva? Jehová ára niko og̃uahẽta oñehaʼarõʼỹve jave, ha umi mbaʼerepy ha pláta ndosalvamoʼãi avavépe (Sofonías 1:18).
“Ehaʼarõnte”
11. Mbaʼépa jajapovaʼerã?
11 Ñande ndajaikói ko múndope ojeikoháicha, ñañehaʼã guei jajapo proféta Habacuc heʼivaʼekue: “Nog̃uahẽi gueteri ára oiko hag̃ua ko rehecháva, katuete oikótaramo jepe. Hiʼaréramo ehaʼarõnte, ág̃a hiʼárape og̃uahẽta” (Habacuc 2:3). Ikatu vaicha ñandéve aretereíma ñahaʼarõ ko ára, péro ani ñaimoʼã Jehová imbegueha. Upe ára og̃uahẽta hiʼaraitépe, yvyporakuéra oimoʼãʼỹve jave (Marcos 13:33; 2 Pedro 3:9, 10).
12. Mbaʼépa heʼi Jesús oikotaha hemimboʼekuéra apytépe ha mbaʼépa ojapo hemimboʼekuéra iñeʼẽrendúva?
12 Jesús heʼivaʼekue iñimportanteha ñahaʼarõ meme Jehová ára. Heʼi avei hemimboʼekuéra apytépe jepe oĩtaha nohaʼarõmoʼãvéiva upe ára. Jahechami mbaʼépa heʼi hesekuéra: “Pe tembiguái imbaʼevaíramo katu ha oimoʼãramo pe óga jára hiʼaretaha, ha oñepyrũramo oguereko asy umi hapicha tembiguáipe, ha okaru ha hoʼu umi tekove kaʼukuéra ndive, pe óga jára ou jevy vaʼerã pe tembiguái ohaʼarõʼỹve jave ha oikuaaʼỹha órape, ha okastiga pohýi vaʼerã” (Mateo 24:48-51, BNP). Péro pe tembiguái jeroviaha ha iñarandúva katu ndaupeichaiete, haʼekuéra ohaʼarõ meme Jehová ára. Ojesareko ha ojapo meme rupi Jesús heʼíva, haʼe ‘omoĩ ipoguýpe opa oguerekóva’ ko Yvy ape ári (Mateo 24:42-47).
Tekotevẽ jajesareko meme
13. Mbaʼéichapa Jesús ohechauka hemimboʼekuérape pyaʼe osẽvaʼerãha Jerusaléngui?
13 Umi kristiáno ymaguare tekotevẽvaʼekue ojesareko meme. Mbaʼérepa? Haʼekuéra pyaʼe osẽvaʼerã Jerusaléngui ohechávo “oñemongora ehérsitope” (Lucas 21:20, 21, BNP). Upéva oiko áño 66-pe. Jahechamína mbaʼéichapa Jesús ohechauka chupekuéra tekotevẽha ojesareko meme ha pyaʼe osẽ upégui. Heʼi: “Pe hóga ári oĩva, aníke oguejy oguenohẽ hag̃ua mbaʼeve hógagui. Pe ñúme oĩva, anítei ojevy ijao piári” (Mateo 24:17, 18). Pe istória ohechauka Jerusalén noñehundirihague áño 66-pe, oñehundi cuatro áño haguépe ae. Mbaʼérepa upéicharõ umi kristiáno pyaʼe ojapovaʼerã Jesús heʼíva?
14, 15. Mbaʼérepa umi kristiáno pyaʼe osẽvaʼerã ohechávo Jerusalén oñemongora?
14 Jepe upe ehérsito Romaygua nohundíri Jerusalén 66-pe síno 70-pe ae, umi upépe opytáva ndoikói pyʼaguapýpe. Oñorairõ ha ojojuka katu hikuái. Peteĩ istoriadór heʼi upérõ Jerusalénpe ‘oñorairõ ha ojojukapamoʼã hikuái’ ha ‘ojeiko kyhyje pópe’. Umi mitãrusúpe ojegueraha soldadorã, ha koʼẽ koʼẽre oñembokatupyry chupekuéra oñorairõ hag̃ua. Ha umi ndojapóivare opa mbaʼe ojeʼéva chupekuéra ojeʼe ndohayhuiha hetãme. Upéicharõ, opytárire umi kristiáno upépe ohasa asy vaʼerãmoʼã hikuái (Mateo 26:52; Marcos 12:17).
15 Jahechakuaavaʼerã Jesús ndeʼirihague umi Jerusalénpe oikóvante oho hag̃ua, ohovaʼerã avei “umi Judéape oikóva”. Ha ndeʼireíri upéva, oho riremi Jerusaléngui umi soldádo Romaygua ou jey oñorairõ hag̃ua. Ojagarra raẽ hikuái Galilea áño 67-pe, ha upéi 68-pe katu saʼi saʼípe ojagarrapaite Judea. Upévare misériamante ojehecha umírupi. Avei hasyvéma oñesẽ hag̃ua Jerusaléngui. Oñeñangareko pe táva rokẽnguérare, ha oimeraẽ osẽsévare ojeʼe oñemoĩha Roma ykére.
16. Mbaʼépa ojapovaʼerã umi kristiáno ojesalva hag̃ua?
16 Jaikuaávo koʼã mbaʼe hesakã ñandéve mbaʼérepa Jesús heʼi chupekuéra ojapuravaʼerãha oho hag̃ua upégui. Umi kristiáno ohejavaʼerã heta mbaʼe, umíva apytépe hóga ha imbaʼerepy. Haʼekuéra ‘ohejapavaʼerã opa oguerekóva’ iñeʼẽrendu hag̃ua Jesúspe (Lucas 14:33). Umi iñeʼẽrendúva ha pyaʼe ohóva rrío Jordán mboypýri noñehundíri.
Jajesareko memékena
17. Mbaʼérepa koʼág̃a tekotevẽterei jajesareko meme?
17 La Biblia ohechauka porã ko ára paha opapotaitemaha ha upévare koʼág̃a tekotevẽterei jajesareko meme. Peteĩ soldádo ndojepyʼapýi ha ndokyhyjéi noñeñorairõi jave. Péro upeichahágui oñehenóiramo sapyʼa oñorairõ hag̃ua oñembosakoʼiʼỹre ikatu oho omano. Upéva avei ikatu oiko Jehová siervokuérare. Ikatu mbeguekatúpe ñanderesarái tekotevẽha jajesareko meme. Upéicharõ, jajejopy vai jave hasýta ñandéve ñaaguanta hag̃ua ha Jehová ára og̃uahẽta ñahaʼarõʼỹve jave (Lucas 21:36; 1 Tesalonicenses 5:4). Oiméramo jaheja mbeguekatu ñaína Jehovápe, koʼag̃aite jaheka jey vaʼerã chupe (Sofonías 1:3-6; 2 Tesalonicenses 1:8, 9).
18, 19. Mbaʼépa ñanepytyvõta ñahaʼarõ meme hag̃ua Jehová ára?
18 Koʼág̃a hesakã porã ñandéve mbaʼérepa Pedro oipota ñahaʼarõ meme Jehová ára. Mbaʼépa ñanepytyvõta ñahaʼarõ meme hag̃ua? ‘Marangatuetépe ha kyhyje pópe jaikovaʼerã’ (2 Pedro 3:11, 12, BNP). Upéicha jaikóramo jaipotaitereíta og̃uahẽ ‘Jehová ára’. Ñahaʼarõ meme heʼisehína griégo ñeʼẽme ‘ñañehaʼã tog̃uahẽ pyaʼe’. Ndaikatúiramo jepe ñamog̃uahẽ pyaʼeve Jehová ára, ñambaʼapo meméramo chupe g̃uarã upe ára og̃uahẽta ñañanduʼỹre (1 Corintios 15:58).
19 Jajepyʼamongetáramo Ñandejára Ñeʼẽ heʼívare ñanepytyvõta avei jajapo hag̃ua ko mbaʼe: ‘Pehaʼarõ ha peipotákena pende pyʼaite guive tog̃uahẽ Ñandejára ára’ (2 Pedro 3:12, BNP). La Biblia heʼi og̃uahẽtaha Jehová ára ha omombeʼu avei umi ohaʼarõva upe ára ohupytytaha hetaiterei mbaʼe porã (Sofonías 3:8).
20. Mbaʼépa jajapovaʼerã koʼág̃a?
20 Upéicharõ, koʼág̃a jajapovaʼerã Sofonías heʼivaʼekue: “Hoʼa mboyve pende ári Ñandejára pochy rendy, hoʼa mboyve pende ári Ñandejára ipochyha ára. Pehekáke Ñandejárape peẽ ko yvy ári pejejapoʼỹva, ha pejapo opa mbaʼe haʼe oipotáva. Peikóke hekópe pejejapoʼỹre, ha upéicharõ ikatúne pejuhu ñemoʼã Ñandejára ipochytaha árape” (Sofonías 2:2, 3).
21. Mbaʼérepa ñanemanduʼa meme vaʼerã 2007 aja?
21 Iporãitépa upéicharõ ko téysto ojeporavóva 2007-pe g̃uarã: “Hiʼag̃uíma Jehová ára guasu”. Jahecha porã ko ára ‘hiʼag̃uimaha ha pyaʼe ou’ (Sofonías 1:14). “Hiʼárape og̃uahẽta” (Habacuc 2:3). Ñahaʼarõ aja ko ára, ñanemanduʼa memékena jaikoha ára pahápe, ha hiʼag̃uimbaitemaha Jehová ára guasu.
Nemanduʼápa?
• Mbaʼépa hína ‘Jehová ára guasu’?
• Mbaʼérepa oĩ heta ndoipotáiva og̃uahẽ Jehová ára?
• Mbaʼérepa umi kristiáno ojapuravaʼerã ojapo hag̃ua Jesús heʼíva chupekuéra?
• Mbaʼépa ñanepytyvõta jajesareko meme hag̃ua Jehová árare?
[Porandu ñahesaʼỹijóva]
[Ojekuaaukaséva oĩva páhina 10]
Téysto 2007-pe g̃uarã: “Hiʼag̃uíma Jehová ára guasu” (Sofonías 1:14).
[Nóta oĩva taʼanga ndive páhina 10]
Oikohaguéicha Noé árape, Jehová ojapótava omondýita umi oñembohorývape
[Nóta oĩva taʼanga ndive páhina 11]
Umi kristiáno pyaʼe osẽvaʼerã ohechávo Jerusalén “oñemongora ehérsitope”