Jehová ojapóta hustísia

“Ha piko [...] Ñandejára ndojapomoʼãi mbaʼe hekoitepegua [hustísia] hembiporavokuérape ojeruréva ichupe ára ha pyharépe?” (LUCAS 18:​7, BNP.)

1. Mbaʼeichagua ermánopa tuicha ñanemokyreʼỹ, ha mbaʼérepa?

 HETA testígo de Jehová oĩva opárupi heta árarema oservi porã Ñandejárape. Reikuaápa peteĩme jepe koʼã kristiáno jahayhuetéva apytégui? Ikatu ñapensañaína pe ermána ijedámavare ojevautisavaʼekue ymaitereíma ha oho meméva rreunionhápe. Térã pe ermáno itujámava heta árarema oñehaʼãva ha opredika meméva kongregasión ndive. Oiméne koʼã ermanokuéra apytépe heta oĩ oimoʼãvaʼekue koʼã árape oumavaʼerãha Armagedón. Ndopáiramo jepe ko múndo aña gueteri, naikangýi ijerovia Jehová ojapótavare, ha oaguanta hag̃ua og̃uahẽ meve huʼãme ko múndo aña (Mateo 24:13). Katuete, ijerovia mbaretégui koʼã Jehová rembiguái omokyreʼỹ umi kongregasiónpe (Salmo 147:11).

2. Mbaʼépa oiko sapyʼánte ñambyasýva?

² Upéicharamo jepe, sapyʼánte jahecha avei Testígo opredika rire heta áñore ikangýva ijerovia ha ohejáva kongregasión. Ñambyasy ohejahaguére Jehovápe, ha upévare ñañehaʼãvaʼerã ñaipytyvõ opaichagua ‘ovecha oho rei vaʼekuépe’ ojevy hag̃ua pe atýpe (Salmo 119:176; Romanos 15:1). Upéicharamo jepe, jahecha rupi oĩha ojepytasóva ijeroviápe ha oĩha avei ohejáva ikatu ñañeporandu: Mbaʼérepa oĩ heta Testígo ojerovia mbaretéva Jehová heʼivaʼekuére ha oĩ avei oheja reíva? Mbaʼéichapa ikatu ñamombarete ñande jerovia ‘hiʼag̃uimaha Jehová ára guasu’? (Sofonías 1:14.) Jahechami peteĩ ehémplo oĩva pe lívro Lucas ohaivaʼekuépe.

Peteĩ ñemomarandu umi oikótavape ‘ou vove yvypóra Raʼy’

3. Mávape g̃uarãpa oñemoĩ pe ehémplo oñeʼẽva peteĩ viúda ha hués rehe, ha mbaʼérepa?

³ Lucas kapítulo 18-pe jatopa peteĩ ehémplo oñeʼẽva peteĩ viúda ha peteĩ hués rehe. Ojogua pe amígo ombaʼejerure jey jey vaʼekuépe, jahechahaguéicha ko artíkulo mboyve (Lucas 11:​5-13). Upéicharamo jepe, ñamaña porãvo jahecha oñeñeʼẽha umi tapicha oikótavape ‘ou vove pe yvypóra Raʼy’, oñepyrũvaʼekue ogoverna Ñandejára Rréino 1914-pe (Lucas 18:​8, JMP). *

4. Mbaʼe rehépa oñeʼẽ Jesús omombeʼu mboyve pe ehémplo jatopáva Lucas kapítulo 18-pe?

⁴ Omeʼẽ mboyve ko ehémplo, Jesús heʼivaʼekue ojekuaavaʼerãha opárupi haʼe oñepyrũ vove ogoverna yvágape, “pe aratirícha overávo ohesapepáva ára tuichakue” (Lucas 17:24; 21:​10, 29-33). Upéicharamo jepe, avave nunga oikóva “upe ára paha” jave nomombaʼemoʼãi umi mbaʼe ohechátava (Daniel 12:4). Mbaʼérepa upéva? Nopenáigui Jehová heʼívare, ojapohaguéicha umi hénte Noé ha Lot oikórõ guare. “Okaru ha omboyʼu, ojogua ha oñemu, oñemitỹ ha ojogapo”, ohundipa peve chupekuéra Jehová (Lucas 17:​26-29). Oikoiterei rupi umi mbaʼe rapykuéri ndojapói Ñandejára oipotáva, ha upévare omanomba hikuái (Mateo 24:39). Koʼág̃a upéicha avei. Umi tapicha ojepyʼapyeterei ijehénte, ha ndohechakuaái ko múndo aña opatamaha (Lucas 17:30).

5. a) Mávapepa oñemoñeʼẽ Jesús, ha mbaʼérepa? b) Mbaʼérepa oĩ kristiáno oheja reíva ijerovia?

 ⁵ Katuete avei Jesúspe oipyʼapy Satanás múndo omboykéramo g̃uarã hemimboʼekuérape, ha upévare heʼi chupekuéra ani hag̃ua ojevy umi mbaʼe ohejamavaʼekuépe (Lucas 17:​22, 31). Ha ñambyasy upéva oikomaha avei heta kristiánore. Heta áñore ohaʼarõ hikuái Jehová ohundi ko múndo aña. Péro nog̃uahẽimaramo Armagedón oimoʼãhague árape, omokangy chupekuéra ha ndojeroviaguasuvéi Jehová huísio ára hiʼag̃uimaha. Upéicha rupi opredika saʼive, ha mbeguekatúpe oñemoĩ ombaʼapove ijupe g̃uarãnte, ha ndaijavéima ojapo hag̃ua Ñandejára oipotáva (Lucas 8:​11, 13, 14). Ipahápe, ojevy jey umi mbaʼe ohejamavaʼekuépe. Ñambyasyetépa oikoha hesekuéra upéicha!

Mbaʼérepa ‘ñañemboʼe tapia’ vaʼerã

6-8. a) Emombeʼumi pe ehémplo oñeʼẽva upe viúda ha hués rehe. b) Mbaʼéichapa oiporu Jesús ko ehémplo?

⁶ Mbaʼépa ikatu jajapo ani hag̃ua ikangy ñande jerovia Jehová heʼivaʼekuére ojapotaha? (Hebreos 3:14.) Jesús ombohovái ko porandu oñemoñeʼẽ riremi hemimboʼekuérape ani hag̃ua ojevy Satanás múndo añáme.

⁷ Lucas heʼi Jesús omombeʼuhague “ichupekuéra peteĩ káso omboʼe hag̃ua [...] tekotevẽha oñemboʼe tapia ha ani [oheja]”. Jesús heʼi: “Oĩvaʼekue peteĩ siudápe peteĩ hués okyhyjeʼỹva [...] Ñandejáragui, ha ojapoʼỹva mbaʼevéramo avavépe. Oĩvaʼekue avei upe siudápe peteĩ viúda oumantereíva hendápe ojerure hag̃ua ichupe hustísia peteĩ pléitope hese ijaʼeʼỹva ndive. Pe hués katu heta ára ndojaposéi ichupe pe hembijerure, upéi katu heʼi ipyʼapýpe: ‘Ndakyhyjéiramo jepe [...] Ñandejáragui ha ndajapóiramo jepe mbaʼevéramo avavépe, ko viúda chemyangekoimantereígui, ajapóta ichupe hustísia anive hag̃ua oumanterei chemokaneʼõ peve’”.

⁸ Upéi, Jesús ohechauka mbaʼérepa oiporu ko ehémplo: “Upéicha heʼi ko hués rekojojaʼỹ [inhústo]. Ha piko [...] Ñandejára ndojapomoʼãi mbaʼeve hekoitepegua hembiporavokuérape ojeruréva ichupe ára ha pyharépe? Omohaʼarõ arénepa ichupekuéra? Haʼe peẽme pyaʼete oipytyvõne hag̃ua ichupekuéra. Opáichavo, ko [yvypóra Raʼy] [...] ou jevyhaʼára, ojuhúnepa gueteri jerovia yvy ári?” (Lucas 18:​1-8, BNP).

Ojejapovaʼerã hustísia

9. Mbaʼe rehépa oñeñeʼẽ pe viúda ha hués ehémplope?

⁹ Ko ehémplope ojehecha porã mbaʼe rehépa oñeñeʼẽ, imanduʼágui upévare umi mokõi tapicha ha Jesús avei. Pe viúda oumante hués rendápe “ojerure hag̃ua ichupe hustísia”. Pe hués heʼi: “Ajapóta ichupe hustísia”. Ha Jesús oporandu: “Ha piko [...] Ñandejára ndojapomoʼãi [hustísia]?”. Avei,  Jesús heʼi Jehová rehe: ‘pyaʼete ojapóta hustísia chupekuéra’ (Lucas 18:​3, 5, 7, 8). Péro arakaʼépa ojapóta hustísia Ñandejára?

10. a) Mbaʼe áñopepa ojejapo hustísia síglo primérope? b) Arakaʼépa ha mbaʼéichapa ojejapóta hustísia Ñandejára siervokuérape?

¹⁰ Pe síglo primérope, pe ‘ára ojejapo hag̃ua hustísia’ (heʼiséva, ‘ára oñevenga hag̃ua’) og̃uahẽ áño 70-pe, oñehundírõ guare Jerusalén itémplo reheve (Lucas 21:​22, NM; nóta). Ñandejára siervokuéra koʼag̃aguápe ojejapóta hustísia ‘Jehová ára guasúpe’ (Sofonías 1:14; Mateo 24:21). Upe árape, Jehová ‘omyengoviáta jehasa asýpe umi chupekuéra ombohasa asývape’, Jesucristo okastigátagui “umi oikuaaseʼỹva [...] Ñandejárape ha iñeʼẽrenduʼỹva [...] Jesucristo” rehegua notísia porãme (2 Tesalonicenses 1:​6-8, BNP; Romanos 12:19).

11. Mbaʼéichapa ojejapóta hustísia “pyaʼete”?

¹¹ Mbaʼépa heʼise Jehová ojapotaha hustísia “pyaʼete” heʼihaguéicha Jesús? Ñandejára Ñeʼẽ ohechauka Jehová ipasiénsiaramo jepe, og̃uahẽ vove hiʼára pyaʼeterei ojapotaha heʼivaʼekue (Lucas 18:​7, 8; 2 Pedro 3:9, 10). Og̃uahẽrõ guare pe Dilúvio Noé árape, umi iñañáva pyaʼe oñehundi. Upéicha avei ojehu Lot oikórõ guare, hoʼárõ guare tata yvágagui ha ohundipa umi iñañávape. “Upeichaitéta avei ouhaʼára ko Yvypóra raʼy”, heʼi Jesús (Lucas 17:​27-30, JMP). Upeichaite, umi iñañáva ‘ohaʼarõʼỹve jave oñehundi’ jeýta (1 Tesalonicenses 5:​2, 3). Upévare, jajeroviakuaa Jehová ndohejamoʼãiha ko múndo aña oho pukuve pe hustísia ojerurévagui.

‘Ojapóta hustísia chupekuéra’

12, 13. a) Mbaʼépa ñanemboʼe Ñandejáragui pe ehémplo oñeʼẽva pe viúda ha hués rehe? b) Mbaʼérepa jaikuaa Jehová ñanerendutaha ha ojapotaha hustísia?

¹² Pe ehémplo oñeʼẽva viúda ha hués rehe ohechauka avei ambue mbaʼe iñimportánteva. Oñeʼẽvo upévare, Jesús heʼi: “Péicha heʼi pe hués rekojojaʼỹ. Ha piko [...] Ñandejára ndojapomoʼãi [...] [hustísia] hembiporavokuérape[?]”. Jesús ndeʼiséi Jehová ojapotaha isiervokuérare pe hués ojapohaguéicha upe viúda rehe. Upéva rangue, omboʼe hemimboʼekuérape mbaʼeichaguápa Ñandejára, ohechaukávo mbaʼéichapa ojoavy Jehová ha pe hués. Mbaʼépepa ojoavy hikuái?

¹³ Pe hués iñinhustovaʼekue, Jehová katu peteĩ hués ihústova (Salmo 7:11; 33:5). Pe hués imanduʼahague Jesús ndojepyʼapyiete pe viúdare, Jehová katu ojepyʼapy opavavére (2 Crónicas 6:​29, 30). Pe hués noipytyvõséi avei pe viúdape, Jehovápe katu hiʼãiterei ñanepytyvõ (Isaías 30:​18, 19). Upéicharamo, ko mbaʼe hesakã porã: pe hués iñinhústova jepe ohendu ha ojapóramo pe viúda ojeruréva, koʼýte Jehová ohendúta hembiguaikuéra ojeruréva ha ojapóta hustísia chupekuéra! (Proverbios 15:29.)

14. Mbaʼérepa nañamboykeivaʼerã ñande jerovia hiʼag̃uimaha Ñandejára huísio?

¹⁴ Upévare, umi ndojeroviavéimava hiʼag̃uimaha pe huísio ára tuichaiterei ojavy. Mbaʼérepa? Ndojeroviavéivo ‘Jehová ára guasu’ hiʼag̃uimaha, añetehápe heʼihína Jehová ndojapomoʼãiha pe heʼivaʼekue. Péro avave ndaikatúi heʼi Jehová opyrũtaha iñeʼẽre (Job 9:12). Upévare, tekotevẽ ñañeporandu: “Jajepytasótapa ñande Jehová ykére?”. Ko mbaʼére imanduʼa Jesús omombeʼupávo pe ehémplo oñeʼẽva pe viúda ha hués rehe.

‘Ojuhúnepa ko jerovia yvy ape ári?’

15. a) Mbaʼépa oporandu Jesús, ha mbaʼérepa? b) Mbaʼépa ñañeporanduvaʼerã?

¹⁵ Jesús oporandu: “Ha ou vove ko Yvypóra raʼy, ojuhúne jepépa [ko] jerovia ko yvy ape ári?” (Lucas 18:​8, JMP [NM, nóta]). Heʼívo Jesús “ko jerovia” ohechauka noñeʼẽiha oimehaichagua jeroviáre. Oñeʼẽhína pe viúda jeroviáre. Jesús nombohováiri  upe porandu, oipotágui hemimboʼekuéra ojepyʼamongeta mbaʼéichapa oĩ ijerovia. Ikangýpa chuguikuéra? Ikatúpa ojevy hikuái umi mbaʼe ohejamavaʼekuépe? Térãpa ijerovia mbarete hikuái pe viúdaicha? Koʼág̃a rupi, ñande avei ñañeporanduvaʼerã: “Mbaʼeichagua jeroviápa ohecha pe ‘yvypóra Raʼy’ oĩha che pyʼapýpe?”.

16. Mbaʼeichaguápa rakaʼe pe viúda jerovia?

¹⁶ Jaipotáramo avei Jehová ojapo ñandéve hustísia, jajapovaʼerã pe viúda ojapohaguéicha. Mbaʼeichaguápa rakaʼe ijerovia? Peteĩ jerovia omomýiva chupe ojerure jey jey hag̃ua pe huéspe ojapo hag̃ua hustísia. Pe viúda ojeroviavaʼekue, ojerure jey jeýramo, ikatutaha peteĩ kuimbaʼe iñinhústova ojapo chupe hustísia. Koʼýte upéicharamo, ñande jaservíva Ñandejárape jajeroviakuaa Jehová ojapotaha hustísia, oiméramo jepe hetáma ñahaʼarõ. Ha mbaʼéichapa jahechauka jajeroviaha Ñandejára heʼivaʼekuére? Ñañemboʼe memévo, jajerure jey jeývo chupe ‘ára ha pyhare’ (Lucas 18:7). Añetehápe, peteĩ kristiáno ndojerurevéiramo Ñandejárape ojapo hag̃ua hustísia, ohechaukáta ndojeroviaveimaha Jehová ojapotaha upéva isiervokuéra rehehápe.

17. Mbaʼérepa nañanekaneʼõivaʼerã ñañemboʼe hag̃ua ha jajerovia meme Jehová huísio ára katuete og̃uahẽtaha?

¹⁷ Jahechávo mbaʼéichapa oĩvaʼekue pe viúda, koʼýte ñande nañanekaneʼõivaʼerã ñañemboʼe jey jey hag̃ua. Jahechami mbaʼérepa jaʼe upéva. Pe viúda naikaneʼõi ojerure hag̃ua, ndaipóriramo jepe omokyreʼỹva chupe. Ñandéve katu Ñandejára Ñeʼẽ ñanemokyreʼỹ jey jey ñañemboʼe meme hag̃ua  (Romanos 12:12). Avei, pe viúda ndoikuaái oñemeʼẽtapa chupe hembijerure, ñandéve katu Jehová heʼi ojapotaha hustísia. Upévare, heʼivaʼekue iproféta rupive: “Hiʼaréramo [jepe] ehaʼarõnte, ág̃a hiʼárape og̃uahẽta” (Habacuc 2:3; Salmo 97:10). Avei, pe viúda ndorekói mávapa oñeʼẽmíta hese, ñandéve katu ñanepytyvõ mbarete Jesús, oĩva “Ñandejára [deréchape] ha ojeruréva ñanderehe” (Romanos 8:​34, BNP; Hebreos 7:25). Upévare, ijetuʼúramo jepe pe viúda ndive, naikaneʼõi ha ojerovia pe hués ojapotaha chupe hustísia. Koʼýte ñande jajerovia meme vaʼerã Jehová huísio ára katuete og̃uahẽtaha.

18. Mbaʼéichapa omombaretéta ñande jerovia ñane ñemboʼe, ha mbaʼéichapa upéva rupi ojejapóta ñandéve hustísia?

¹⁸ Pe viúda ehémplo ohechauka ñandéve ñañemboʼévo jajeroviavaʼerãha avei. Ohechauka avei ñañemboʼe jey jeývo ndajahejaiha ñande jerovia ikangy. Upéva ndeʼiseihína ñañemboʼe jey jeýpente ñande jerovia naikangymoʼãiha, ñañemboʼevaʼerã ñande pyʼaite guive (Mateo 6:​7, 8). Ñane ñemboʼére ojehechavaʼerã ñaikotevẽha Ñandejárare opa mbaʼerã, ha upéicha ñañemoag̃uíta hese ha imbaretevéta ñande jerovia. Ha ñaikotevẽgui jajerovia jajesalva hag̃ua, jahechakuaa mbaʼérepa Jesús omokyreʼỹ hemimboʼekuérape oñemboʼe jey jey hag̃ua ha ani ikaneʼõ (Lucas 18:1; 2 Tesalonicenses 3:13). Añete, ‘Jehová ára guasu’ og̃uahẽta voínte, ndahaʼéi ñande jajerurehaguérente. Péro ojejapo hag̃ua ñandéve hustísia ha jahasa Ñandejára ñorairõ guasu, jajerovia ha ñañemboʼe meme vaʼerã.

19. Mbaʼéichapa ikatu jahechauka jajeroviaitereiha Ñandejárare ojapotaha hustísia?

¹⁹ Ñanemanduʼavaʼerã Jesús oporanduhague: “Ha ou vove ko Yvypóra raʼy, ojuhúne jepépa [ko] jerovia ko yvy ape ári[?]”. Mbaʼéichapa oñembohovái ko porandu? Javyʼa jahechávo oĩha ko Yvy tuichakuére hetaiterei oservíva Ñandejárape, ha oñemboʼe, ipasiénsia ha oñehaʼã rupive ohechauka hikuái ojeroviaha Jesús heʼihaguéicha. Añetehápe, ñanembohasa asýramo jepe ko múndo oĩva Satanás poguýpe, jajeroviaiterei Ñandejára ojapotaha hustísia umi haʼe oiporavovaʼekuépe.

[Nóta]

Ñanemanduʼápa?

• Mbaʼérepa oĩ kristiáno oheja reíva ijerovia?

• Mbaʼérepa jajeroviaitereivaʼerã Jehová huísio ára og̃uahẽtaha?

• Mbaʼérepa ñañemboʼe jey jey vaʼerã?

• Mbaʼéichapa ñañemboʼe jey jeýramo ñanepytyvõta ani hag̃ua jaheja ñande jerovia?

[Porandu ñahesaʼỹijóta]

[Nóta oĩva táʼanga ndive páhina 18]

Mbaʼépa ñanemboʼe pe ehémplo oñeʼẽva pe viúda ha hués rehe?

[Nóta oĩva táʼanga ndive páhina 20]

Hetaiterei tapicha ojeroviaiterei Ñandejárare ojapotaha hustísia