Mávapa vaicha ndéve umi ovyʼavéva?

HETÁPE g̃uarã Dón Jesse Livermore haʼevaʼekue empresário ikatupyryvéva negósiope. Upévare, ou iplataiterei. Oiporu umi tráhe iporãmba jepéva ha hepyetereíva, ha hóga katu tuichaiterei, 29 voi ikoty. Oreko peteĩ kóche ndaijojaháiva, hepy ha iporãitereíva ha ichoferpa voi.

David * ombaʼapo porã vaʼekue avei. Haʼe ningo visepresidénte peteĩ emprésa guasúpe. Ha péichante ohórire oikovaʼerãmoʼã chugui presidénte upe emprésape. Haʼe ningo iplatase ha oipota oñemombaʼe chupe. Upéicharõ jepe, David orrenunsia itraváhope. Haʼe heʼi: “Aikuaa porã ningo ndarekomoʼãveimaha peichagua oportunida”. Ndépa ere David ivyrohague?

Heta tapicha heʼi javyʼa hag̃ua ñande pláta heta vaʼerã ha ñande rapichakuéra ñandeguerohoryvaʼerã. Upéicharõ jepe umi iplátava ndovyʼáinte avei ha ndoikuaái mbaʼépa ojapóta. Dón Livermore rehe oikovaʼekue ohechauka porã ko mbaʼe. Ipláta hetáramo jepe, ojahoʼi chupe provléma ha ñembyasy. Haʼe oñedeprimi, opoi hembirekógui ha ndojeguerahaporãi ifamiliakuérandi. Upéi operde heta mbaʼe. Ipahápe, oĩ aja peteĩ hotélpe oguapy hoʼu vevída ha oñembyasy ojehúvare chupe. Upéi ohai hembirekópe peteĩ kárta ojedespedi hag̃ua. Hoʼupa rire oho peteĩ koty iñypytũvape ha ojesuisida.

 Oiméramo jepe ojesuisida ojopýgui chupe heta provléma, jahecha añeteha la Biblia heʼíva: ‘Umi imbaʼeretaséva katu ogueru ijupe hetaiterei jeiko asy’ (1 Timoteo 6:​9, 10).

Ikatúpa jaʼe ojavyha umi heʼíva javyʼa hag̃ua ñande pláta heta vaʼerãha ha enterove ñandeguerohoryvaʼerã? Ndépa ere reiko porãha? Mbaʼérepa ere upéva? Mávapa ndéve g̃uarã umi ovyʼavéva? Mbaʼérepa repensa upéicha? Ko párte oúvape jahecháta mbaʼépa oipytyvõ heta tapichápe ovyʼave hag̃ua. Jahechami mbaʼéichapa nde avei ikatu revyʼave.

[Nóta]