Mbaʼépa nepytyvõta revyʼave hag̃ua
Mbaʼépa nepytyvõta revyʼave hag̃ua
TÚVA ha sy ojepyʼapy ifamíliare ha oipota oho porã chupekuéra. Upéicha avei ñande Ru yvagapegua ojepyʼapy ñanderehe ha oipota jaiko porã. Upévare heta oñemoñeʼẽ ñandéve jaikuaa hag̃ua mbaʼéichapa ikatu javyʼave. La Biblia heʼi porã jajapóramo Ñandejára heʼíva ‘opa mbaʼe jajapóva osẽ porãtaha’ (Salmo 1:3).
Upéicharõ, mbaʼérepa ndahetái umi oiko porã ha ovyʼáva? Jahechami mbaʼépa heʼi la Biblia ko mbaʼére ha mbaʼéichapa ñanepytyvõ ñasẽ porã hag̃ua jajapóvape.
“Iñañáva ñeʼẽ”
La Biblia heʼi naiporãiha jajapo “iñañáva ñeʼẽ” (Salmo 1:1). Satanás hína umi iñañáva ruvicha (Mateo 6:13). La Biblia ohenói chupe “ko múndo ruvicha” ha heʼi “ko múndo oĩmbaha aña poguýpe” (Juan 16:11; 1 Juan 5:19, BNP). Upévare ndajahecharamói mbaʼérepa ko múndope oĩ heta opensáva Satanás opensaháicha.
Mbaʼépa heʼi umi iñañáva? Haʼekuéra ‘oñembohory’ jepi Ñandejárare (Salmo 10:13). Opárupi ojehecha ko mbaʼe. Koʼág̃a rupi oñemokyreʼỹ umi héntepe ojapo hag̃ua ‘umi mbaʼe vai ohayhúva, hesa ohayhu ha ohechaséva ha ijejapo hag̃ua’ (1 Juan 2:16, BNP). Téle ha rrádio rupi ñahendu ojeʼérõ ‘eñehaʼãmbaitékena nde pláta hag̃ua’. Káda áño umi emprésa ko múndo jerére ogasta 500 mil millones de dólares rupi ojapo hag̃ua propagánda. Oporomokyreʼỹ hikuái ojejogua hag̃ua heta mbaʼe noñekotevẽiva jepe. Ha ndahaʼéi upéva añónte. Ogueroviauka hikuái ndaikatuiha javyʼa ndajarekóiramo koʼã mbaʼe.
Upévare, umi orekóva heta mbaʼe oipotapotavénte oikóvo. Oimoʼã ndorekóiramo umi mbaʼe ndaikatumoʼãiha ovyʼa. Upéva ningo japu rei ha ‘ndoúi ñande Rúgui, ko múndo mbaʼénte hína’ (1 Juan 2:16, BNP).
Ñande Apohare oikuaa porã mbaʼépa ñanembovyʼavéta. Haʼe heʼíva ojoavy umi “iñañáva ñeʼẽ” ndive. Upéicharõ, ndaikatúi ñaime porã Ñandejárandi ha jaiko avei ko múndope ojeikoháicha. Haʼete ku jahaséva mokõi tape rupi. Peteĩrente ikatu jaha. Upévare la Biblia heʼi: “Anivéma peiko ojeʼeháicha koʼág̃a ojeikovaʼerãha” (Romanos 12:2).
Ani ñapensa ko múndo opensaháicha
Ko múndo aña oĩva Satanás poguýpe ojepyʼapyguaʼu ñanderehe. Upévare, tekotevẽ ñañeñangareko. Iporã ñanemanduʼa Satanás ombotavyhague Évape ohupyty hag̃ua oipotáva. Upéi oiporu chupe omokyreʼỹ hag̃ua Adánpe ojapo hag̃ua ivaíva. Koʼág̃a peve Satanás oiporu yvyporakuérape oporomokyreʼỹ hag̃ua mbaʼe vairã.
Pór ehémplo, David pe karai ñanemanduʼahague heta ombaʼapo ha oviaha pyʼỹi vaʼerã. Haʼe heʼi: “Asẽvaʼerã lunes pyharevete ha aju jueves pyhare”. Ojapovaʼerã upéva ohupytyséramo ko múndo oikuaveʼẽva. Iñamigokuéra, ihénte ha umi ombaʼapóva hendive heʼi chupe “ejapo katu upéva ne família rehehápe”. Heʼi hikuái ojapovaʼerãha upéva oĩ porã pevénte. David heʼi: “Haʼekuéra oimoʼã upéva iporãvetaha che famíliape g̃uarã. Aganavéta ha ahupytýta heta mbaʼe. Naimemoʼãiramo jepe che famíliandi, che amigokuéra heʼi chéve péicha ameʼẽtaha chupekuéra iporãvéva”. Upévare avei heta tapicha ombaʼapoiterei omeʼẽ hag̃ua ifamíliape haʼekuéra oimoʼãva oikotevẽha. Péro, oikóvo upéicha ovyʼavépa hikuái? Mbaʼépa oikotevẽ ñane família?
David ohechakuaa mbaʼépa oikotevẽ ifamília oviahárõ guare ombaʼapo hag̃ua. Haʼe omombeʼu: “Añeʼẽʼaína Angélica che rajyʼíndi teléfonope, ha osẽ heʼi chéve: ‘Mbaʼére piko papa nereimeséi orendive ógape?’ Añeñandu vaietereíko ahendúvo upéva”. Itajýra heʼíva omokyreʼỹ chupe oheja hag̃ua itraváho. David ohechakuaa ifamília oikotevẽha hese.
Jajapóramo Ñandejára heʼíva javyʼavéta
Mbaʼépa ikatu jajapo ani hag̃ua ko múndo aña ipuʼaka ñanderehe? Sálmope oñemombeʼu mávapa umi ovyʼavéva: ‘Ñandejára léi ipyʼa ombohory, ha hese ojepyʼamongeta ára ha pyhare’ (Salmo 1:2).
Ñandejára oiporavórõ guare Josuépe omoakã hag̃ua Israel, heʼi chupe: ‘Ára ha pyhare ejepyʼamongeta Ñandejára Ñeʼẽre’. Iporã Josué olee ha ojepyʼamongeta Ñandejára Ñeʼẽre, péro tekotevẽ avei ‘ojapo heʼihaichaite’. Upéicharõ, ñasẽ porã hag̃ua jalee ha jajapovaʼerã la Biblia heʼíva. Josuépe ojeʼevaʼekue: “Upéicharamo osẽ porãta ndéve opa mbaʼe rejapóva” (Josué 1:8).
Epensamína peteĩ mitã oguapývare itúva rapypaʼũme olee aja chupe peteĩ lívro ogustaitereíva chupe. Oleémaramo jepe heta vése ovyʼa hikuái. Upéicha avei, jahayhúramo Ñandejárape javyʼáta jaleévo la Biblia káda día jaikuaágui péicha ñañemoag̃uiha ñande Ru yvagapeguáre. Jajapóramo Jehová heʼíva jajoguáta ‘yvyra mátape oñeñotỹva y rembeʼýpe, hiʼáva hiʼárape ha ndahoguekúiriva. Opa mbaʼe jajapóva osẽ porãta’ (Salmo 1:3).
Ko yvyra máta oñemombeʼúva koʼápe nosẽreíri. Oñeñotỹ y rembeʼýpe ha oñeñangareko hese. Upéicha avei, ñande Ru yvagapegua oñemoñeʼẽ ñandéve la Biblia rupive jajapo hag̃ua iporãva. Ko yvyra máta katuete ipoty ha hiʼa porãta, upéicha avei ñande jajapóta iporãva ha Ñandejára ñandeguerohorýta.
Péro “ndaupéichai umi hembiapo vaíva”. Haʼetéramo jepe oho porãha chupekuéra koʼág̃a rupi, upéi opa vaíta katuete. Haʼekuéra noĩporãmoʼãi Ñandejára renondépe. La Biblia heʼiháicha “hembiapo vaíva rape katu opa vai” (Salmo 1:4-6).
Upévare aníke jaheja ko múndo aña heʼi ñandéve mbaʼépa ñamombaʼe ha jahupytyvaʼerã. Ndevaléramo jepe rehupyty hag̃ua heta mbaʼe ko múndope, reñatende porã vaʼerã rejapóvare. Jaikóramo pláta rapykuérinte nañasẽporãmoʼãi. Péro ñaime porãramo Ñandejára ndive ñasẽ porãta ha javyʼavéta.
Mbaʼépa rejapovaʼerã revyʼave hag̃ua
Mbaʼérepa osẽ porãta umi ojapóva Ñandejára heʼíva? Sálmope noñeñeʼẽihína ojehupytývare ko múndope. Peteĩ tapicha oservíva Ñandejárape osẽ porã ojapo rupi Haʼe oipotáva ha upéva iporã katuete. Jahechami mbaʼéichapa jajapóramo la Biblia heʼíva ñanepytyvõ ñasẽ porã hag̃ua.
Ogapýpe: La Biblia heʼi menakuéra ‘ohayhuvaʼerãha hembirekópe haʼekuéra ojehayhuháicha’ ha tembirekokuéra katu ‘omombaʼevaʼerã iménape’ (Efesios 5:28, 33). Omokyreʼỹ túva ha sýpe oĩ hag̃ua ifamíliandi, opukami hag̃ua hendivekuéra ha ohekomboʼe chupekuéra (Deuteronomio 6:6, 7; Eclesiastés 3:4). Ñandejára Ñeʼẽ heʼi avei túva ha sýpe ‘ani pejahéi vai pende raʼykuéra rehe pembopochy hag̃uáicha’. Ojapóramo ko mbaʼe, mitãnguéra kyreʼỹme ‘iñeʼẽrendúta’ ha ‘omombaʼéta itúva ha isýpe’ (Efesios 6:1-4, BNP). Jajapóramo Ñandejára heʼíva javyʼavéta ñande rogapýpe.
Ñane amigokuérandi: Enterove ningo jaipota ñane amigorã. Ikatu japorohayhu ha jaipota ñande rapicha ñanderayhu avei. Jesús heʼi hemimboʼekuérape ‘ojoayhu’ hag̃ua (Juan 13:34, 35). Ijapytepekuéra ikatu jatopa ñane amigorã jahayhu ha jajerovia añetéva (Proverbios 18:24). Ha iporãveha katu, jajapóramo la Biblia heʼíva ikatúta ‘ñañemboja Ñandejárare’ ha ojeʼehaguéicha Abrahán rehe ñandehegui oikóta avei ‘Ñandejára irũ tee’ (Santiago 2:23, 4:8).
Ñande rekovépe: Jaikorangue jaikuaaʼỹre mbaʼépa jajapóta, javyʼa hag̃ua jaikuaavaʼerã mbaʼépa jahupytyse. Ndajajeroviái ko múndope ojehupytývare jaikuaágui umíva opa reiha. Jahupytyse umi mbaʼe añetehápe ñanembovyʼátava. Ha mbaʼépa umíva? Jakyhyje Ñandejáragui ha jajapo hembipota. “Upéva niko tembiaporã tuichave oguerekóva yvypóra.” (Eclesiastés 12:13.)
Ñane renonderã iporã: Ñaime porãramo Ñandejára ndive ikatu ñahaʼarõ iporãva ñane renonderãme g̃uarã. Apóstol Pablo heʼivaʼekue kristianokuérape ‘ani hag̃ua ojerovia imbaʼeta rehe, ndahaʼéi rehe jeroviaha umíva. Tojerovia uvei Ñandejára oikovéva rehe’. Upéicharamo ombyatýta heta mbaʼe tenondeve g̃uarã ‘ikatu hag̃ua ohupyty pe tekovete’ (1 Timoteo 6:17-19, BNP). Ko tekovete ojehupytýta Ñandejára ogoverna vove ko Yvy ha ojapo chugui peteĩ Paraíso (Lucas 23:43).
Jajapóramo jepe la Biblia heʼíva ikatu ñane provléma, péro jajehekýita heta mbaʼe vaígui ohupytýva umi iñañávape. David ha hetaiterei tapicha ohechakuaa iporãveha jajapo la Biblia heʼíva. Otopa rire itravahorã omeʼẽvéva chupe tiémpo, haʼe heʼi: “Avyʼaiterei ajegueraha porã haguére che rembireko ha che famíliandi. Ha avei ikatuhaguére aservi Jehovápe ha aipytyvõ ermanokuérape”. Ndareíri Sálmope heʼi jajapóramo Ñandejára heʼíva ‘opa mbaʼe osẽ porãtaha ñandéve’.
[Informasión oĩva páhina 6-pe]
CINCO MBAʼE ÑANEPYTYVÕVA JAVYʼAVE HAG̃UA
1 Ani ñamombaʼe ko múndope oñemombaʼéva.
2 Káda día jalee ha jajepyʼamongetavaʼerã Ñandejára Ñeʼẽre.
3 Jajapo la Biblia heʼíva.
4 Ñandejára ñane irũ teete vaʼerã.
5 Jakyhyje Ñandejáragui ha jajapo hembipota.
[Nóta oĩva taʼanga ndive páhina 6]
Jajapopañaína koʼã mbaʼe ñasẽ porã hag̃ua?