Ñaipytyvõ ñande rapichápe ojapo hag̃ua la Biblia omboʼéva

“Pe hoʼavaʼekue yvy porãháme katu umi ohendúva pe ñeʼẽ ha pyʼaporã ha pyʼapeteĩ reheve oñongatu pe ohenduvaʼekue ha hiʼa porã ohasa asýramo jepe.” (LUCAS 8:​15, BNP.)

1, 2. a) Emombeʼumi maʼerãpa ojejapovaʼekue pe lívro Mbaʼépa añetehápe omboʼe la Biblia? b) Mbaʼéichapa Jehová ovendesi oikóvo isiervokuéra rembiapo?

 “PE LÍVRO ndaijojahái. Umi ostudiáva chendive oguerohoryeterei ha che avei aguerohory. Ñañepyrũkuaa jastudia ñande rapicha ndive ñañemongeta ypy guive hendive, hóga okaraitépe voi.” Péicha heʼi peteĩ prekursóra pe lívro Mbaʼépa añetehápe omboʼe la Biblia? * rehe. Peteĩ ermáno itujámava katu heʼi: “Ojapóma cincuenta áño apredikahague, ha hetaitereípema aipytyvõ oikuaa hag̃ua Jehovápe. Ha ndaijojahái ko lívro. Umi ehémplo ha taʼangakuéra iporãiterei”. Ñandépa jaguerohory avei péicha pe lívro Mbaʼépa omboʼe la Biblia? Ko lívro ñanepytyvõta jajapo hag̃ua Jesús heʼivaʼekue: “Tapeho aipóramo opa tetã rupi ha pejapo chupekuéra che remimboʼéramo. [...] Ha pemboʼe chupekuéra ojapopa hag̃ua opa umi mbaʼe ahejavaʼekue peẽme” (Mateo 28: 19, 20).

² Katuete Jehová ovyʼa ohechávo 6.600.000 Testigos ojapoha kyreʼỹme Jesús heʼivaʼekue hemimboʼekuérape ojapo hag̃ua (Proverbios 27:11). Ha jahechakuaa Jehová ovendesiha upe tembiapo. Ikatu jahecha pe áño 2005-pe ojeguerahahague 235 tetãme pe notísia porã ha ojejapohague 6.061.500 estúdio rupi. Upévare, hetaiterei oĩ ‘ohenduvaʼekue Ñandejára ñeʼẽ ha oroviáva, ndahaʼéi kuimbaʼe ñeʼẽnguéicha, Ñandejára ñeʼẽramo voi katu’ (1​Tesalonicenses 2:​13, BNP). Umi dos áño ohasavaʼekuépe, quinientos mil ári oĩ umi temimboʼe pyahu oikómava Ñandejára oipotaháicha ha oñemeʼẽmavaʼekue Jehovápe.

3. Mbaʼépa ñahesaʼỹijóta koʼág̃a?

³ Ñandépa jastudiañaína la Biblia peteĩ ñande rapicha ndive? Opárupi oĩ gueteri umi ‘ipyʼaporã ha ipyʼapeteĩva’. Umíva ohendúvo Ñandejára ñeʼẽ “oñongatu pe ohenduvaʼekue ha hiʼa porã” (Lucas 8:​11-15, BNP). Upévare, jahechami mbaʼéichapa ikatu jaiporu pe lívro Mbaʼépa omboʼe la Biblia? ñaporomboʼe hag̃ua. Ñahesaʼỹijóta mbohapy porandu: 1) Mbaʼéichapa ikatu jastudia ñepyrũ la  Biblia ñande rapicha ndive? 2) Mbaʼéichapa ikatu ñaporomboʼe porãve? 3) Mbaʼéichapa ikatu ñaipytyvõ umi ostudiávape oporomboʼe hag̃ua avei Ñandejára Ñeʼẽ?

Mbaʼéichapa ikatu jastudia ñepyrũ ñande rapicha ndive

4. Mbaʼérepa peteĩ tapicha ikatu ndostudiaséi la Biblia, ha mbaʼéichapa ikatu ñaipytyvõ chupe?

⁴ Ojeʼéramo ñandéve japónte hag̃ua ha jahasáma peteĩ ysyry ipetereíva, ajépa ndajaposemoʼãi? Ha oñemoĩramo heta ita pe ysyrýpe ikatu hag̃uáicha jahasa umíva ári, upéicharõ jahasáta. Upéicha avei, peteĩ tapicha hembiapo hetáva ikatu ndostudiaséi la Biblia. Oimoʼã ipuku ha ijetuʼutaha upéva. Mbaʼéichapa ikatu ñaipytyvõ chupekuéra anive hag̃ua ipyʼamokõi ha ostudia meme hag̃ua la Biblia? Ikatu ñañemongeta mbykymínte jepi hendive, ha upearã jaiporukuaa pe lívro Mbaʼépa omboʼe la Biblia? Ñañembosakoʼi porãramo jaha jey hag̃ua hendápe, haʼetéta ñamoĩvañaína umi ita ohasa hag̃ua pe ysyry. Upéva oipytyvõta ñande rapichápe oñemoag̃uive hag̃ua Jehováre.

5. Mbaʼérepa jaleevaʼerã pe lívro Mbaʼépa omboʼe la Biblia?

⁵ Upéicharõ jepe, jaiporu mboyve pe lívro Mbaʼépa omboʼe la Biblia? ñaipytyvõ hag̃ua ñande rapichápe, jaikuaa raẽ vaʼerã mbaʼépa heʼi pype. Jaleepámapa? Jahechami mbaʼépa oiko peteĩ ermáno ha hembireko rehe. Haʼekuéra oñepyrũ olee ko lívro ivakasión aja. Opytuʼu aja y rembeʼýpe, peteĩ kuñakarai ombaʼevendéva oñemboja hendapekuéra. Upe kuñakarai ohechávo pe lívro Mbaʼépa añetehápe omboʼe la Biblia? heʼi ojerureramoite hague Ñandejárape ombohovaimi hag̃ua chupe upe porandu. Upémarõ, haʼekuéra torýpe omeʼẽ chupe peteĩ lívro. Ha ñande? ‘Jaiporukuaavaʼerã ñane tiémpo’ jalee hag̃ua ko lívro, ha oiméramo jaleepáma ikatu ñañepyrũ jey jalee. Ikatu jajapo upéva ñaporohaʼarõ jave ỹrõ japytuʼu aja ñanembaʼapohápe térã eskuélape (Efesios 5:​15, 16). Jaiporukuaáramo ñane tiémpo, jaikuaa porãvéta mbaʼérepa oñeʼẽ ko lívro, ha ikatúta avei ñañemongeta ñande rapicha ndive heta mbaʼe heʼívare.

6, 7. Mbaʼéichapa ikatu ñamoñepyrũ peteĩ estúdio jaiporúvo pe lívro Mbaʼépa omboʼe la Biblia?

⁶ Ñaikuaveʼẽvo pe lívro japredika jave, jaiporu porãkena umi taʼanga, umi téysto oĩva la Bíbliape ha porandukuéra oĩva páhina 4, 5 ha 6-pe. Ñañepyrũ hag̃ua ñañemongeta ikatu ñaporandu: “Ndépa ere oĩha peteĩ mbaʼe ikatúva ñanepytyvõ ñambohovái hag̃ua hetaite provléma?”. Ñahendu rire heʼíva, jalee 2 Timoteo 3:​16, 17, ha ñamombeʼu chupe Ñandejára Ñeʼẽme heʼiha mbaʼéichapa oñemyatyrõta ñane provlemakuéra. Upe rire, jahechauka chupe páhina 4 ha 5, ha ñaporandu: “Koʼápe jahecha heta provléma, mbaʼépa ndepyʼapyve koʼãva apytégui?”. Heʼi rire mbaʼépa, jajerure chupe ojokomi hag̃ua pe lívro jalee aja la Biblia heʼíva upe provlémare. Upe rire jalee pe páhina 6 ha ñaporandu: “Koʼã seis porandu apytépe, mbaʼépa reikuaaseve?”. Heʼi rire mbaʼépa, jahechauka chupe mbaʼe kapítulopa oñeʼẽ upévare. Jaheja chupe ilivrorã ha ñaporandu arakaʼépa ikatu jaha jey ñañeʼẽve hag̃ua hendive.

⁷ Péicha ikatu jajapo cinco minútopente. Avei jaikuaátama mbaʼépa oipyʼapy ñande rapichápe, jalee ha ñamyesakãtama chupe mokõi téysto ha jaikuaátama arakaʼépa ikatu jaha jey hendápe. Ikatu voi aréma nohenduvéi peteĩ mbaʼe peichaite iporãva. Upévare, umi hembiapoitereíva jepe, oipotáne jaha jey ñañemongetave hag̃ua hendive. Ha jaha jeýramo katu ñande rapicha oñepyrũtama oguata ‘upe tape ohóvare tekovépe’ (Mateo 7:14). Upe rire, oikuaasevévo mbaʼépa Ñandejára rembipota, jastudia pukuvéma vaʼerã hendive. Upearã, ikatu jaʼe chupe jaguapy ha jastudia areve hag̃ua.

 Mbaʼéichapa ikatu ñaporomboʼe porãve

8, 9. a) Mbaʼéichapa ikatu ñaipytyvõ peteĩ estudiántepe ombohovái hag̃ua umi jejopy vai? b) Moõpa jatopa umi mbaʼe porã ñanepytyvõtava ñamombarete hag̃ua ñande jerovia?

⁸ Oñepyrũvo ñande rapicha ojapo la Biblia heʼíva, ikatu heta mbaʼe ojoko chupe ani hag̃ua oikuaave Ñandejárape. Pe apóstol Pablo heʼivaʼekue: “Opa umi ojeroviáva [Ñandejárare] Cristo Jesús rupi, heta ojerereko asýta” (2 Timoteo 3:12). Pablo ombojojavaʼekue tata rehe umi jejopy vai, ohundíva umi mbaʼe okai reíva péro ndojapóiva mbaʼeve umi mbaʼe ndokaireírivare, umíva apytépe oĩ óro, pláta ha umi ita hepýva (1 Corintios 3:​10-13; 1 Pedro 1:​6, 7). Upéicharõ, peteĩ estudiánte omoheñoivaʼerã hekovépe umi mbaʼe porã oipytyvõtava chupe ojejopy vai jave. Upearã, ñaipytyvõvaʼerã chupe omombarete hag̃ua ijerovia umi mbaʼe okaiʼỹva reheve.

⁹ Pe salmísta heʼi: “Ñandejára heʼívaniko [...] ojogua plátape oñemboyku jey jeýva [siete vése] ipotĩ hag̃ua” (Salmo 12:7 [12:​6, NM]). Upéicharõ, umi mbaʼe porã ñaikotevẽva ñamombarete hag̃ua ñande jerovia jatopa Ñandejára Ñeʼẽme (Salmo 19:​7-11; Proverbios 2:​1-6). Ha pe lívro Mbaʼépa omboʼe la Biblia? ñanembokatupyrýta jaiporukuaa hag̃ua Ñandejára Ñeʼẽ.

10. Mbaʼépa ikatu jajapo umi estudiánte ohesaʼỹijo hag̃ua la Biblia?

¹⁰ Jastudia aja, ñahesaʼỹijovaʼerã umi téysto oñemoĩva umi kapítulope. Ñaporandúkena pe ostudiávape jahecha hag̃ua hesakãpa chupe umi téysto iñimportantevéva ha ohechakuaa hag̃ua mbaʼéichapa ojapóta. Ha natekotevẽi jaʼe chupe mbaʼépa ojapovaʼerã. Upéva rangue, jajapovaʼerã Jesús ojapohaguéicha. Peteĩ kuimbaʼe oikuaa porãva umi léi Moisés ohaivaʼekue ombaʼeporandúrõ guare chupe, Jesús heʼi: “Mbaʼépa heʼi [...] Ñandejára [léi]? Mbaʼe vaichápa ndéve heʼi?”. Pe kuimbaʼe ombohovái hag̃ua oiporu Ñandejára Ñeʼẽ, ha Jesús oipytyvõ chupe ohechakuaa hag̃ua mbaʼéichapa ojapóta upépe heʼíva. Peteĩ ehémplo rupive, ohechauka avei chupe mbaʼéichapa oikovaʼerã ontende rire oñemboʼéva upépe (Lucas 10:​25-37, BNP). Upéicha avei, pe lívro Mbaʼépa omboʼe la Biblia? henyhẽ umi ehémplo ndahasýivagui ha ikatúva jaiporu ñamyesakã hag̃ua umi ostudiávape mbaʼéichapa ojapóta Ñandejára heʼíva.

11. Mboy párrafopa ñahesaʼỹijovaʼerã jastudia jave?

¹¹ Jesús oiporuhaguéicha umi ñeʼẽ ndahasýiva omyesakã hag̃ua umi mbaʼe hasyvéva, ko lívro Mbaʼépa omboʼe la Biblia? omyesakã Ñandejára Ñeʼẽ oñentende porã hag̃uáicha (Mateo 7:​28, 29). Upéicha avei ñande jajapovaʼerã. Ñaporomboʼe oĩhaichaite, ndahasýi ha hesakã porã hag̃uáicha. Jastudia pyaʼe pyaʼe rangue, jahechakuaavaʼerã mbaʼéichapa oĩ ñande rapicha ha moõ pevépa ikatu ñahesaʼỹijo hendive. Upéicha jajapóramo jaikuaáta mboy párrafopa jastudiáta jepi hendive. Jesús oikuaavaʼekue ikatúva ojapo hemimboʼekuéra. Upévare upe jave oikotevẽvante heʼi chupekuéra (Juan 16:12).

12. Mbaʼéichapa jaiporuvaʼerã pe informasión oĩvéva?

¹² Pe lívro Mbaʼépa omboʼe la Biblia? orekove informasión oñeʼẽva catorce téma rehe. Jaikuaávo mbaʼépa oikotevẽ pe ostudiáva ñanendive, jahechakuaátama mbaʼéichapa jaiporuvaʼerã upe informasión. Ñamoĩ chupe peteĩ estudiánte yma ogueroviahague peteĩ mbaʼe. Upévare nahesakãporãi chupe ñahesaʼỹijovañaína térã ikatu oikuaaseve peteĩ mbaʼégui. Upéicharõ, ikatu jahechaukánte chupe pe informasión oĩvéva ha haʼéntema ohesaʼỹijo upe rire. Ikatu avei oĩ umi mbaʼe tekotevẽtava ñahesaʼỹijo hendive. Pe informasión oĩvéva oñeʼẽ heta mbaʼe iñimportántevare, umíva apytépe “‘Álma’ ha ‘espíritu’: mbaʼépa heʼise koʼã ñeʼẽ?” ha “Mbaʼépa pe “Babilonia Guasu’?”. Ikatu jahechakuaa iporãtaha ñahesaʼỹijo koʼã mbaʼe ñande rapicha ndive. Pe informasión oĩvévape ndaipóri po randu umi párrafope g̃uarã. Upévare jaikuaa porã vaʼerã mbaʼépa heʼi, ikatu hag̃uáicha ñaporandu hendaitépe.

13. Mbaʼéichapa pe ostudiáva oñemboʼéramo imbaretevéta ijerovia?

¹³ Ñandejára nomopuʼãiramo pe óga, “reiete imopuʼãha oñemoĩta ombaʼapo hese”, heʼi Salmo 127:1. Upéicharõ, jajerurevaʼerã Jehovápe tañanepytyvõ ñañembosakoʼi jave ñaporomboʼe hag̃ua. Ñaipytyvõvaʼerã pe ostudiávape ohechakuaa hag̃ua mbaʼeichaitépa jahayhu Jehovápe ñañemboʼe jave jastudia mboyve ha upe rire avei. Ñamokyreʼỹvaʼerã pe ostudiávape oñemboʼe hag̃ua Ñandejárape tomyesakã chupe Iñeʼẽ ha tomombarete chupe ojapo hag̃ua Haʼe oipotáva (Santiago 1:5). Ojapóramo koʼã mbaʼe, ohupytýta oikotevẽva ogueropuʼaka hag̃ua heta jejopy vai ha imbaretevéta ijerovia.

Mbaʼéichapa ikatu ñaipytyvõ umi ostudiávape oporomboʼekuaa hag̃ua la Biblia

14. Mbaʼépa ojapovaʼerã avei umi ostudiáva la Biblia?

¹⁴ Ñande rapichakuéra “ojapopa hag̃ua opa umi mbaʼe” Jesús heʼivaʼekue, omboʼekuaavaʼerã avei Ñandejára Ñeʼẽ (Mateo 28:​19, 20; Hechos 1:​6-8). Mbaʼéichapa ikatu ñaipytyvõ chupekuéra ojapo hag̃ua upéva?

15. Mbaʼérepa ñamokyreʼỹvaʼerã umi ostudiávape oho hag̃ua rreunionhápe?

¹⁵ Jastudia ñepyrũ guive ñande rapicha ndive ñamokyreʼỹvaʼerã chupe oho hag̃ua ñanendive rreunionhápe. Ñamombeʼuvaʼerã chupe upépe jaikuaahague mbaʼéichapa ñaporomboʼevaʼerã Ñandejára Ñeʼẽ. Heta vése jastudiapa rire japytamievaʼerã ñamombeʼu hag̃ua chupe mbaʼéichapa umi rreunión ha asambléa ñanemboʼe jaguata hag̃ua Ñandejára rapére. Kyreʼỹme ñamombeʼuvaʼerã chupe mbaʼeichaitépa ñanepytyvõ jaha umi atyhápe (Hebreos 10:​24, 25). Ha oñepyrũ vove oho rreunionhápe, ikatútama avei oporomboʼe Ñandejára Ñeʼẽ.

16, 17. Mbaʼépa ikatu oñehaʼã ohupyty umi ostudiáva la Biblia ha mbaʼépa ojapokuaa upearã?

¹⁶ Ñaipytyvõkena ñande rapichápe ohupyty hag̃ua umi mbaʼe iporãva. Ikatu ñamokyreʼỹ chupe oñeʼẽ hag̃ua iñamígo térã ihentekuéra ndive oikuaaramóvare. Jaʼekuaa avei chupe oleepaite hag̃ua Ñandejára Ñeʼẽ. Iporãta jahecháramo hendive mbaʼéichapa oleéta Ñandejára Ñeʼẽ koʼẽ koʼẽre. Ha ojepokuaáramo upéicha ohupytýta heta mbaʼe porã heta tiémpo ojevautisa rire jepe. Ha pe lívro Mbaʼépa omboʼe la Biblia? oreko umi porandu iñimportánteva oñepyrũvo umi kapítulo. Iporãta jaʼéramo chupe imanduʼa hag̃ua peteĩ téystore jepe ombohovái hag̃ua umi porandu. Upéicha pe ostudiávagui oikóta peteĩ “mbaʼapohára hembiapo porãva[...] oguerekoʼỹva mbaʼe rehépa otĩ hag̃ua” (2 Timoteo 2:​15, BNP).

¹⁷ Ñamokyreʼỹrangue chupe imanduʼánte hag̃ua umi téysto heʼívare, ñamboʼevaʼerã chupe omyesakã hag̃ua. Upéicha ikatúta ombohovái oñeporandu jave chupe mbaʼépa haʼe oguerovia. Iporãta ñañensajáramo hendive ojapo hag̃ua upéicha. Ñande ikatu jaiko ihénteramo térã peteĩ ombaʼapóva hendive ha jaipota omombeʼu ñandéve mbaʼépa haʼe oguerovia. Upéicha jave, jahechaukavaʼerã ñande rapichápe mbaʼéichapa ombohováita ‘ojejapoʼỹre ha oporomombaʼévo’ (1 Pedro 3:​16, [3:​15, NM]).

18. Peteĩ ostudiáva oĩma vove osẽ hag̃uáicha opredika, mbaʼéichapa ikatu ñaipytyvõve chupe?

 ¹⁸ Upe rire, pe ostudiáva ikatúma oĩ osẽ hag̃uáicha opredika. Jahechauka porã vaʼerã chupe tuichaiterei mbaʼeha ñasẽ japredika (2 Corintios 4:​1, 7). Umi ansiáno ohecha rire ikatumaha osẽ opredika ojevautisa mboyve, ñaipytyvõvaʼerã chupe oikuaa hag̃ua mbaʼépa heʼíta pe óga járape ha jaha avei japredika hendive. Ñasẽ meme vaʼerã japredika hendive ha ñaporomboʼe, avei ñaipytyvõ chupe ojeprepara hag̃ua oporovisita jeýta jave. Katuete omokyreʼỹta chupe ñanderechávo jajapoha upéicha (Lucas 6:40).

‘Jajesalvavaʼerã ñandejupe voi ha umi ñanerendúvape’

19, 20. Mbaʼépa ñañehaʼãvaʼerã jajapo, ha mbaʼérepa?

¹⁹ Ajépa ñambaʼapo mbarete vaʼerã ‘ñamboʼe hag̃ua pe añetegua’ ñande rapichápe (1 Timoteo 2:4). Upéicharõ jepe, javyʼaiterei ñaipytyvõramo ñande rapichápe ojapo hag̃ua la Biblia heʼíva (1 Tesalonicenses 2:​19, 20). Javyʼaiténiko ñamoirũhaguére Ñandejárape ñamboʼévo ñande rapichakuérape! (1 Corintios 3:9.)

²⁰ Jesucristo ha umi ánhel imbaretetéva rupive, Jehová koʼẽrõite ohundíta ‘umi oikuaaʼỹvape Ñandejárape ha iñeʼẽrenduseʼỹvape Jesús marandu porãme’ (2 Tesalonicenses 1:​6-8, BNP). Upéva heʼise oĩtaha omanóva. Ñañehaʼãvaʼerã ñamboʼe peteĩme jepe Ñandejára Ñeʼẽ jaiporúvo pe lívro Mbaʼépa añetehápe omboʼe la Biblia? Aníkena ñanderesarái ñaporomboʼévo ikatuha ‘ñandejupe voi jajesalva ha umi ñanerendúvape avei’ (1 Timoteo 4:16). Koʼág̃a tekotevẽtereive ñaipytyvõ ñande rapichápe ojapo hag̃ua la Biblia heʼíva.

[Nóta]

Mbaʼépa jaikuaa porãve koʼág̃a?

• Maʼerãpa ojejapovaʼekue pe lívro Mbaʼépa omboʼe la Biblia?

• Mbaʼéichapa ikatu jastudia ñepyrũ ñande rapicha ndive jaiporúvo pe lívro Mbaʼépa omboʼe la Biblia?

• Mbaʼéichapa ikatu ñaporomboʼe porãve?

• Mbaʼéichapa ikatu ñaipytyvõ umi ostudiávape oporomboʼekuaa hag̃ua Ñandejára Ñeʼẽ?

[Porandu ñahesaʼỹijóva]

[Nóta oĩva taʼanga ndive páhina 16]

Jaiporu porãpa ñaína ko lívro?