Ñamombaʼe memékena Jehová omeʼẽva ñandéve
Ñamombaʼe memékena Jehová omeʼẽva ñandéve
“Ore Jára, hypyʼũetépa umi ne akãme rerekóva! Hetaiterei oñemoĩmbáramo oñondive.” (SALMO 139:17.)
1, 2. Mbaʼérepa ñamombaʼevaʼerã Ñandejára Ñeʼẽ? Mbaʼéichapa David ohechauka omombaʼeha?
OJETOPA sapyʼa peteĩ mbaʼe ijojahaʼỹva. Oñembaʼapo aja Jehová rógare Jerusalénpe, pe saserdóte guasu Hilquías otopa ‘pe kuatia ojehaihápe Ñandejára léi, oñemeʼẽvaʼekue Moisés rupi’. Oiméne raʼe upe Moisés voi ohaíva, ochocientos áño upe mboyve. Mbaʼéichapa nde ere oñeñandunehague rréi Josías ojeguerúvo chupe upe léi? Haʼe oikuaa upéva tuichaiterei mbaʼeha ha upévare ojerure isekretário Safánpe tolee chupe (2 Crónicas 34:14-18).
2 Koʼág̃a rupi hetaiterei tapicha ikatu olee peteĩ párte jepe Ñandejára Ñeʼẽ. Jaʼétapa upe haguére la Biblia ndahaʼeiha peteĩ lívro iñimportánteva? Nahániri. Upépe ningo jatopa Ñandejára heʼíva ñanepytyvõ hag̃ua (2 Timoteo 3:16). David ohaivaʼekue Sálmope mbaʼeichaitépa omombaʼe Ñandejára Ñeʼẽ. Haʼe heʼi: “Ore Jára, hypyʼũetépa umi ne akãme rerekóva! Hetaiterei oñemoĩmbáramo oñondive” (Salmo 139:17).
3. Mbaʼéichapa jaikuaa David ojeroviaitereihague Ñandejárare?
3 David oikove aja pukukue ohechauka ohayhuha Jehovápe, omombaʼetereiha Iñeʼẽ ha opa mbaʼe ojejapóva ojeadora hag̃ua Chupe. Upéva jahecha umi Salmo porãite ohaivaʼekuére. Jahechami ohaíva Salmo 27:4-pe: ‘Peteĩ mbaʼénte Ñandejárape ajerure, peteĩ mbaʼénte aipota. Ñandejára rógape aikose aikove aja pukukue hese ajepyʼamongeta hag̃ua, haʼe chembopyʼa rory hag̃ua, chupe amombaʼeguasu hag̃ua’. David heʼíva ohechauka mbaʼeichaitépa haʼe ohayhu ha omombaʼe Ñandejára róga. Jahechakuaa David ojeroviaitereihague Ñandejárare. Haʼe omombaʼe umi mbaʼe porãita Jehová omeʼẽva ha omboʼéva chupe. Iporãitéta jajapóramo avei upéicha (Salmo 19: 7-11).
Javyʼákena jaikuaágui la Biblia añetehápe omboʼéva
4. Mbaʼérepa Jesús ovyʼaite?
4 Ñantende hag̃ua Ñandejára Ñeʼẽ natekotevẽi ñaneakãporã térã ñanearandueterei. Umi tapicha iñakãporã ha iñaranduetereíva ningo ojejapose jepi. Jehová katu imbaʼeporãgui omyesakã Iñeʼẽ umi ijejapoʼỹva ha ipyʼa potĩvape, umi ohechakuaáva tekotevẽha oikuaa chupe (Mateo 5:3; 1 Juan 5:20). Jesús heʼi rire oñemoĩtaha yvypóra réra yvágape, ‘espíritu sánto rupive ovyʼaiterei, ha heʼi: “Romombaʼeguasu, che Ru Yvy ha yvága Jára, reñomihaguére koʼã mbaʼe umi iñarandúva ha imbaʼekuaávagui, ha reikuaaukahaguére koʼã michĩmívape”’ (Lucas 10:17-21, JMP).
5. Mbaʼérepa Jesús remimboʼekuéra omombaʼevaʼerã umi mbaʼe oikuaáva Ñandejára Goviérnogui?
5 Jesús oñemboʼepa rire heʼi hemimboʼekuérape: “Ovyʼaiténe umi ohecháva pe peẽ pehechavapeína. Añetehápe haʼe peẽme, heta maranduhára [proféta] ha heta mburuvicha guasu ohechasevaʼekue ko peẽ pehecháva, ha ndohechái. Haʼekuéra ohendusevaʼekue ko peẽ pehendúva, ha nohendúi”. Koʼápe Jesús heʼi hemimboʼekuérape omombaʼe hag̃ua umi mbaʼe porã oikuaáva Ñandejára Goviérnogui. Ñandejára siervokuéra ymave guare ha avei ‘umi iñarandúva ha imbaʼekuaáva’ oikóva upérõ ndoikuaaivaʼekue umi mbaʼe (Lucas 10:23, 24).
6, 7. a) Mbaʼérepa ñamombaʼevaʼerã jaikuaáva Ñandejára Ñeʼẽgui? b) Mbaʼéichapa oĩ umi oservíva Jehovápe ha umi oĩva rrelihión japúpe?
6 Ñande katu koʼýte ñamombaʼevevaʼerã pe jaikuaáva Ñandejára Ñeʼẽgui. Jehová oiporu pe ‘tembiguái jeroviaha ha iñarandúvape’ ñanepytyvõ hag̃ua ha upéicha jaikuaa porãve Iñeʼẽ (Mateo 24:45; Daniel 12:10). Oñeʼẽvo ára paháre proféta Daniel heʼi: ‘Heta oĩ oikótava águio pégotyo’ ha hetáta pe arandu (Daniel 12:4). Koʼág̃a rupi ikatu jaikuaa hetaiterei mbaʼe Ñandejáragui ha jaservívo chupe jareko ñaikotevẽva imbarete hag̃ua ñande jerovia.
7 Umi oservíva Jehovápe oikuaa porã chupe ha Haʼe ojapótava, péro umi oĩva Babilonia Guasúpe katu ndoikuaaporãi mbaʼépa oguerovia. Upévare heta tapicha ohechakuaáva koʼã mbaʼe ipochy ha oheja pe rrelihión japu ha oadora Jehovápe. Haʼekuéra ipyʼaporã ha ndoikeséi Babilonia Guasu ‘rembiapo vaípe ha ohupyty isarambi vai guasu’. Jehová ha isiervokuéra heʼi koʼã tapichápe omoirũ hag̃ua chupekuéra (Apocalipsis [Revelación] 18:2-4; 22:17).
Umi omombaʼéva pe añetegua oñemboja Ñandejárare
8, 9. Mbaʼéichapa oñekumpli koʼág̃a Ageo 2:7 heʼíva?
8 Jehová heʼivaʼekue ojeadorataha chupe péicha: ‘Amboryrýita opa tetã ha oguerúta hikuái imbaʼeta ha che róga omimbipáta’ (Ageo 2:7). Koʼápe heʼíva oñekumpli Ageo árape, umi oadoráva Jehovápe ou jeýrõ guare Jerusalénpe omopuʼã hag̃ua Ñandejára róga oñehundivaʼekue. Ha koʼág̃a oñekumpli avei Jehová adorasión rehe.
9 Hetaiterei tapicha oadoramahína Jehovápe. Haʼekuéra omombaʼeguasu Ñandejárape “añetehápe ha haʼe oipotaháicha” ha káda áño hetavéntema ohóvo. Ojeʼe voi ningo ‘opa tetã oguerutaha imbaʼeta’ (Juan 4:23, 24). Pe áño 2006-pe, oñemeʼẽ Jehovápe ha ojevautisa 248.327 tapicha, upéva hína 680 káda día! Haʼekuéra ohayhu pe añetegua ha ojapose Ñandejára heʼíva. Ojehecha hesekuéra Jehová voi ogueruhague chupekuéra (Juan 6:44, 65).
10, 11. Mbaʼéichapa ou omombaʼe la Biblia añetehápe omboʼéva peteĩ karai ha hembireko?
10 Heta tapicha ipyʼaporãva oñemoag̃ui Jehováre ohechávo mbaʼéichapa ojoavy ojuehegui “imarangatúva ha iñañáva, pe Ñandejárape omombaʼéva ha pe nomombaʼéiva” (Malaquías 3:18). Upéva oiko Dón Wayne ha Ña Virgíniare. Haʼekuéra ningo protestánte vaʼekue ha oikuaase heta mbaʼe. Ndaijaʼéi hikuái ñorairõre ha nontendéi mbaʼérepa paʼikuéra ohovasa umi soldádope. Itujavévo ohecha mbaʼéichapa omboyke chupekuéra umi irrelihiongua, jepe Ña Virginia are omboʼevaʼekue mitãnguérape tupaópe. Haʼekuéra heʼi: “Avave ndojepyʼapýi orerehe, hesarái hikuái orehegui. Ore plátante oipota. Ndoroikuaái ningo mbaʼépa rojapóta”. Koʼýte oñeñandu vai hikuái ohechávo irrelihión omoneĩ umi kuimbaʼe oikóva kuimbaʼéndi ha kuña kuñándi.
11 Upe aja iniéta ha upéi Dón Wayne ha Ña Virginia membykuña, oikuaa Jehovápe. Ñepyrũrã ipochy hikuái péro upéi ostudia avei la Biblia. “Tres mésepe hetaiterei mbaʼe roaprende la Bíbliagui ndoroikuaáiva setenta áñope. Avave naoremboʼéi Ñandejára heraha Jehová, ndoroikuaái mbaʼeve igoviérnogui ha ko Yvy iporã jeytaha” heʼi Dón Wayne. Upe riremínte haʼekuéra oho meméma rreunionhápe ha osẽ opredika. “Romombeʼuse enterovépe la Biblia omboʼéva” heʼi Ña Virginia. Ha 2005-pe ojevautisa hikuái oreko riréma 80 áño ári. “Rotopáma ore familiarã kristianoitéva!” heʼi hikuái.
Javyʼákena jarekógui ñaikotevẽva ‘jajapo hag̃ua opa mbaʼe iporãva’
12. Mbaʼépa Jehová omeʼẽ isiervokuérape ha mbaʼépa jajapovaʼerã ñanepytyvõ hag̃ua?
12 Jehová oipytyvõ isiervokuérape ojapo hag̃ua hembipota. Pór ehémplo Noépe ohechauka porã vaʼekue mbaʼeichaitépa ojapovaʼerã pe árka. Kóva ojejapo porã vaʼerã. Ha Noé ojapo porã. Mbaʼérepa? ‘Noé ojapo opa mbaʼe Ñandejára heʼihaguéicha chupe’ (Génesis 6:14-22). Koʼág̃a rupi Jehová omeʼẽ isiervokuérape oikotevẽva ojapo hag̃ua hembipota. Ñane rembiapo iñimportantevéva ningo japredika Ñandejára rréino ogovernamaha ha ñaipytyvõ umi oikuaasevévape oiko hag̃ua chuguikuéra Jesús remimboʼe. Ha oikohaguéicha Noé rehe ñande ñasẽ porãta avei ñaneñeʼẽrendúramo. Jajapovaʼerã Jehová heʼíva ñandéve Iñeʼẽ ha iñorganisasión rupive (Mateo 24:14; 28: 19, 20).
13. Mbaʼépa Jehová oiporu ñanemboʼe hag̃ua?
13 Jajapo hag̃ua ñane rembiapo ñañehaʼãvaʼerã ‘ñamboʼe hekópe’ Ñandejára Ñeʼẽ. La Biblia ningo ‘iporã ñamboʼe ha ñañemoñeʼẽ hag̃ua ñande rapichápe, ñaporohekomboʼe ha ñaporomoarandu hag̃ua hekopete. Upéicharõ, pe Ñandejárape omombaʼeguasúva noikotevẽmoʼãi mbaʼeve ojapo hag̃ua opa mbaʼe iporãva’ (2 Timoteo 2:15; 3:16, 17). Síglo primérope ojapohaguéicha Jehová avei ñanemboʼe pe kongregasión rupive. Umi 99.770 kongregasiónpe ko múndo jerére káda semána ojejapo Eskuéla dél Ministério Teokrátiko ha Rreunión de Servísio ñanepytyvõva japredika hag̃ua. Ñamombaʼépa koʼã rreunión jaha memévo ha jajapóvo oñemboʼéva upépe? (Hebreos 10:24, 25.)
14. Mbaʼéichapa umi oservíva Jehovápe ohechauka omombaʼeha predikasión? (Emombeʼumi oĩva páhina 25-28-pe.)
14 Hetaiterei tapicha oservíva Ñandejárape opárupi ohechauka omombaʼeha Ñandejára omboʼéva oñehaʼãmbaitévo opredika. Upéva jahecha pe infórme 2006-pe, 6.741.444 puvlikadór opredika ha oporomboʼe 1.333.966.199 óra. Ojejapo avei 6.286.618 estúdio vívliko. Koʼãva ningo ohechauka mbaʼeichaitépa oñembaʼapo porã hína. Mbaʼérepa neremañamiéi hese? Katuete ningo nemokyreʼỹta, omokyreʼỹhaguéicha umi kristiáno ymaguarépe ohendúvo mbaʼéichapa oñemosarambi pe marandu porã (Hechos 1:15; 2:5-11, 41, 47; 4:4; 6:7).
15. Mbaʼérepa naiporãi ñañeñandu vai ndaikatúiramo jajapove Jehovápe g̃uarã?
15 Hatãiterei ningo ojepuraheihína ára ha ára Jehovápe. Upéva ohechauka mbaʼeichaitépa omombaʼe Chupe isiervokuéra ha ovyʼaha ikatuhaguére oñeʼẽ Hérape (Isaías 43:10). Jaikuaa avei ñane ermanokuéra hasýva térã itujámava ndaikatuiha ojapo hetave Ñandejárape g̃uarã. Ojapóva hikuái ojogua pe viúda omeʼẽvaʼekuépe. Péro ñanemanduʼavaʼerã Jehová ha Jesús omombaʼetereiha umi ojapóvape ipyʼaite guive opa ikatumíva (Lucas 21:1-4; Gálatas 6:4).
16. Mbaʼe mbaʼépa Jehová omeʼẽ ñandéve ñamboʼe hag̃ua ñande rapichápe?
16 Jehová ñanembokatupyry japredika hag̃ua ha avei omeʼẽ ñandéve iñorganisasión rupive heta mbaʼe ñanepytyvõ hag̃ua. Umíva apytépe umi lívro La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ha pe ipyahuvéva Mbaʼépa añetehápe omboʼe la Biblia? Umi omombaʼéva koʼã lívro oiporu meme oporomboʼe hag̃ua.
Jaiporu porãkena pe lívro Mbaʼépa añetehápe omboʼe la Biblia?
17, 18. a) Mbaʼe pártepa reiporuve jepi pe lívro Mbaʼépa omboʼe la Bíbliagui repredika jave? b) Mbaʼépa heʼi peteĩ superintendénte ko lívrore?
17 Pe lívro Mbaʼépa añetehápe omboʼe la Biblia? oreko diecinueve kapítulo ha pe párte informasión oĩvévape ohechauka heta mbaʼe. Ko lívro ndahasýi ñantende hag̃ua, upévare tuichaiterei ñanepytyvõ predikasiónpe. Pór ehémplo kapítulo 12 heʼihína “Jaiko Ñandejára oipotaháicha”. Upépe ojehechauka pe ostudiávape mbaʼépa ojapovaʼerã oipotáramo Ñandejárape iñamigorã. Heta oĩ ohecharamóva ko mbaʼe oimoʼãgui yvypóra ndaikatuiha ojapo upéva (Santiago 2:23). Mbaʼéichapa ojeporuhína ko lívro?
18 Peteĩ superintendénte sirkuitoygua oikóva Austráliape heʼi: “Pe óga jára ohechávonte ko lívro oñepyrũma oñeʼẽ ñanendive”. Heʼi avei ndahasyiha jaiporu, upévare “heta puvlikadór ikyreʼỹ ha ovyʼa jey oporomboʼévo. Oñehenóima voi ko lívrope Óro Kuʼi”.
19-21. Emombeʼumi mbaʼéichapa ojeporuhína pe lívro Mbaʼépa omboʼe la Biblia?
19 “Katuete ningo Ñandejára nembou” heʼi peteĩ kuñakarai Guyanaygua peteĩ prekursór og̃uahẽvape hógape. Ko kuñakarai mokõi imemby ha ikonkuvíno ohejaramoite chupekuéra. Upe prekursór ohechauka chupe pe lívro Mbaʼépa omboʼe la Biblia?, kapítulo 1 ha olee chupe párrafo 11 heʼihápe: “Mbaʼéichapa oñeñandu Ñandejára umi inhustísia jahasávare?”. “Upe aleéva chupe opoko hese. Opuʼã ha oho inegósio kupépe hetaiterei hasẽ” heʼi pe prekursór. Koʼág̃a ko kuñakarai ostudiáma la Biblia peteĩ ermánandi ha oho porã hese.
20 José oikóva Espáñape opyta vaieterei hembireko omano rire peteĩ aksidéntepe. Haʼe oñepyrũ ojedroga ha oho avei doktórpe jahechápa noipytyvõi chupe. Oporandu chupekuéra: “Mbaʼére piko Ñandejára oheja omano che rembireko?”. Haʼekuéra nombohovaikuaái chupe upéva. Upéi José oñemongeta peteĩ hapichándi hérava Francesc ombaʼapóva hendive. Francesc heʼi chupe oleemi hag̃ua pe lívro Mbaʼépa omboʼe la Biblia? kapítulo 11, heʼihápe “Mbaʼérepa oheja Ñandejára oĩ pe jehasa asy?”. Omopirĩ chupe ohechávo mbaʼépa heʼi la Biblia jehasa asýre, ha ontende porãve ohechávo pe ilustrasión oñeʼẽva peteĩ profesór ha iñalúmnore. Oñepyrũ ostudia, oho peteĩ asambléape ha koʼág̃a oho meméma Salónpe avei.
21 Roman katu peteĩ karai orekóva 40 áño, oiko Polóniape ha oreko peteĩ emprésa. Haʼe omombaʼe Ñandejára Ñeʼẽ, péro ombaʼapoitereígui ndohoporãvéi ijestúdiope. Upéicharõ jepe oho peteĩ asambléa tres diaguápe ha oñemeʼẽ chupe pe lívro Mbaʼépa omboʼe la Biblia? Upe guive tuichaiterei okambia. “Ko lívro haʼete voi ku onohẽva ha omoĩmba ojoykére la Biblia omboʼéva ha péicha ohechaukapaite ñandéve Ñandejára ojeruréva ha oprometéva” heʼi Roman. Koʼág̃a haʼe ostudia meme la Biblia ha oho porã hína.
Akóintekena ñamombaʼe Ñandejára ojapóva ñanderehe
22, 23. Mbaʼéichapa jahechauka ñamombaʼeha Ñandejára omeʼẽtava ñandéve?
22 Ñande aty guasu “Koʼẽrõitéma ñanesãsóta!” ohechaukákuri ‘ñasẽtaha jejopy vaígui opa ára g̃uarãma’. Upéva Ñandejára opromete ha ikatu jahupyty Jesucristo ruguy rupive. Ñamombaʼégui ko mbaʼe porãite ñañemopotĩvaʼerã ‘umi mbaʼe ñandererahávagui manóme, ikatu hag̃ua ñambaʼapo Ñandejára oikovévape g̃uarã’ (Hebreos 9:12, 14).
23 Ohasáma seis millones umi tapicha oservi meméva Ñandejárape ojejopýramo jepe chupekuéra opensa hag̃ua ijehénte. Ko mbaʼe ningo peteĩ milágro. Ohechauka avei Ñandejára siervokuéra omombaʼeha ojapóva chupe g̃uarã. Jaikuaa ‘ndareiriha opa jajapóva Ñandejárape g̃uarã’. Upévare ñamombaʼékena opa ára Ñandejára ojapóva ñanderehe (1 Corintios 15:58; Salmo 110:3).
Reikuaápa?
• Mbaʼéichapa David heʼivaʼekue ñanepytyvõ ñamombaʼe hag̃ua Jehovápe ha umi mbaʼe porã omeʼẽva ñandéve?
• Mbaʼéichapa oñekumplihína koʼág̃a Ageo 2:7 heʼíva?
• Mbaʼépa omeʼẽ Jehová isiervokuérape oservi porã hag̃ua chupe?
• Mbaʼéichapa ikatu jahechauka ñamombaʼeha umi mbaʼe porã Jehová omeʼẽva ñandéve?
[Porandu ñahesaʼỹijóva]