Jaikuaaukavaʼerã mbaʼépa añetehápe omboʼe la Biblia

“Tapeho aipóramo opa tetã rupi ha pejapo chupekuéra che remimboʼéramo [...] ha pemboʼe chupekuéra.” (MATEO 28:​19, 20.)

1. Mbaʼépa ikatu jaʼe la Bíbliare?

 ÑANDEJÁRA Ñeʼẽ la Biblia oĩ umi lívro ymave guare ha oñemosarambivéva apytépe. Ojetradusipaite térã michĩmínte jepe haimete dos mil trescientos idiómape. Upéva heʼisehína noventa por ciento rupi yvyporakuéra orekoha iñeʼẽme la Biblia.

2, 3. a) Mbaʼérepa oĩ tuicha joavy la Biblia omboʼévare? b) Mbaʼe mbaʼépa ñahesaʼỹijóta?

² Hetaiterei oĩ oleéva la Biblia ára ha ára, ha oĩ umi olee jey jeýva iñepyrũ guive opa peve. Heta rrelihión heʼi omboʼeha Ñandejára Ñeʼẽme heʼiháicha. Upéicharõ jepe, nog̃uahẽi hikuái peteĩ ñeʼẽme ohechávo mbaʼépa añetehápe omboʼe upe lívro. Ivaive hag̃ua, umi oĩva peteĩ rrelihiónpe jepe pyʼỹi tuichaiterei ojoavy. Oĩ umi ndoikuaaporãiva moõguipa ou la Biblia ha ikatúnepa ñanepytyvõ. Oĩ katu heʼíva iporãha jaiporu hag̃ua trivunálpe, ñamoĩnte hag̃ua ñande po hiʼári jahechauka hag̃ua nañandejapumoʼãiha.

³ Añetehápe, la Bíbliape oĩ Ñandejára ñeʼẽ yvyporakuérape g̃uarã (Hebreos 4:12). Upévare, ñande testigos de Jehová jaipota ñande rapichakuéra oikuaa mbaʼépa omboʼe ko lívro ijojahaʼỹva. Torýpe jajapo Jesucristo heʼivaʼekue hemimboʼekuérape ojapo hag̃ua: “Tapeho [...] opa tetã rupi ha pejapo chupekuéra che remimboʼéramo [...] ha pemboʼe chupekuéra” (Mateo 28:​19, 20). Japredika jave jatopa heta ñande rapicha ipyʼaporãva ha ojepyʼapýva ohechávo mbaʼéichapa umi rrelihión oĩva ko múndope ojoavypa. Oikuaa porãse hikuái ñande Apoharépe ha mbaʼépa heʼi Ñandejára Ñeʼẽ ñande rekovére. Upévare, ñahesaʼỹijomi mbohapy porandu hetápe oipyʼapýva. Jahechamíta mbaʼépa omboʼe hendapeʼỹ umi rrelihión omoakãva, ha upe rire mbaʼépa añetehápe omboʼe la Biblia. Ñahesaʼỹijóta koʼã mbaʼe: 1) Ojepyʼapýpa Ñandejára ñanderehe? 2) Maʼerãpa ñaime ko Yvy ape ári? 3) Mbaʼépa oiko ñandehegui ñamano rire?

Ojepyʼapýpa Ñandejára ñanderehe?

4, 5. Mbaʼérepa hetaiterei oĩ heʼíva Ñandejára ndojepyʼapyiha ñanderehe?

⁴ Jahechami raẽta ojepyʼapýpa Ñandejára ñanderehe. Ñambyasýramo jepe, heta oĩ heʼíva ndaupeichaiha. Mbaʼérepa heʼi hikuái upéicha? Ohechágui ijerére hetaitereiha umi ndaijaʼéiva avavére, oñorairõva ha ohasa asýva. Upévare heʼi hikuái: “Ojepyʼapýrire Ñandejára ñanderehe, ndohejaivaʼerãmoʼã oiko umi mbaʼe vaieta”.

⁵ Avei umi rrelihión omoakãva ogueroviauka umi tapichápe Ñandejára ipyʼahatãha ha mombyry oĩha ñandehegui. Mbaʼépa heʼi jepi hikuái oiko jave peteĩ mbaʼe ivaietereíva? Omanórõ guare mokõi mitã peteĩ aksidéntepe, pe omoakãva irrelihión heʼi umi mitã sýpe: “Péva Ñandejára  rembipota. Haʼe oipotave mokõi anhelíto”. Heʼívo upéicha hikuái, omboja Ñandejárare umi mbaʼe vai oikóva. Pe disípulo Santiago katu ohaivaʼekue: “Oĩramo ohasa asýva, térã ojepyʼaraʼãva ojapo hag̃ua ivaíva, ani oimoʼã koʼã mbaʼe ouha [Ñandejáragui]. [Ñandejára] niko ndojepyʼaraʼãi ojapo hag̃ua ivaíva, ha ndoipyʼaraʼãi avavépe upéva ojapo hag̃ua” (Santiago 1:13). Upéicharõ, Ñandejára Jehová arakaʼeve nomboúi ñandéve umi mbaʼe ñanembohasa asýva. Ñandejára Ñeʼẽ heʼi: “Ani peimoʼã, [Ñandejára] pe ipuʼakapáva, ojapoha ivaíva térã hekopeguaʼỹ” (Job 34:10).

6. Mávapa pe ojapoukáva hetaite mbaʼe vai ha oporombohasa asyetéva ko múndope?

⁶ Upéicharõ, mbaʼére piko oiko hetaite mbaʼe vai ha ojehasa asyete? Yvyporakuéra ndoipotáigui Ñandejára ogoverna chupekuéra ha ndojaposéi Haʼe heʼíva ha ojeruréva. Upéicha yvyporakuéra oimoʼãʼỹre oñemoĩ Satanás poguýpe, pe ndaijaʼeivéva Ñandejárare. Ha la Biblia heʼi voi “ko múndo oĩmbaha aña poguýpe” (1 Juan 5:​19, BNP). Upévare, jahechakuaa mbaʼérepa oiko jepi hetaite mbaʼe vai. Satanás iñañaiterei, ijapu ha ipyʼahatã. Upéicha, ojehecha porã mávapa oisãmbyhy ko múndo. Upévare, ndajahecharamói oikohaguére hetaite mbaʼe vai ko múndope!

7. Mbaʼérepa jahasa asy jepi?

⁷ Jahasa asy avei ñaneimperfékto rupi. Yvyporakuéra oporogovernase ha oñehaʼãmbaite upearã. Upévare oñorairõ, ojopy vai ha ombohasa asy hapichápe. Eclesiastés 8:9 heʼi porã: ‘Yvypóra oisãmbyhy yvypórape vairã’. Ha ipahápe, ñanembohasa asy avei pe ‘tiémpo ha umi mbaʼe ñahaʼarõʼỹva’ (Eclesiastés 9:​11, NM). Pyʼỹinte ojehasa asy oñeĩ rupi oikohápe mbaʼe vai.

8, 9. Mbaʼérepa ikatu jaʼe Jehová ojepyʼapyha ñanderehe?

⁸ Ñanembopyʼaguapy jaikuaávo ndahaʼeiha Jehová ñanembohasa asýva. Upéicharõ jepe, oipyʼapýpa chupe umi mbaʼe oikóva ñanderehe? Añetehápe oipyʼapy. Upéva jahechakuaa omombeʼuhaguére ñandéve Iñeʼẽme mbaʼérepa ohejarakaʼe yvyporakuérape oho tape vaíre. Upéva oheja oiko mokõi mbaʼe iñimportántevare: ohechauka hag̃ua mávapa iderécho ogovernávo ha ohechaukátapa yvyporakuéra ojeroviaha hese ha ohayhu añeteha chupe. Haʼe ningo ñande Apohare ipuʼakapáva, ha natekotevẽi heʼi ñandéve mbaʼérepa oheja jahasa asy. Upéicharõ jepe, ñanderayhu rupi omombeʼu ñandéve.

⁹ Jahechavemi mbaʼérepa jaʼe Ñandejárape oipyʼapyha oikóva ñanderehe. Noé oi kórõ guare, ko Yvy henyhẽvaʼekue mbaʼe vai apógui, ha upéva Ñandejára “ombyasy ipyʼaite guive” (Génesis 6:​5, 6). Upévare, oñeñandúnepa avei koʼág̃a upéicha? Katuete, haʼe niko nokambiái (Malaquías 3:6). Jehová koʼág̃a peve ndaijaʼéi opaichagua inhustísiare ha oiporiahuvereko umi ohasa asývape. La Biblia omboʼe koʼẽrõitéma omyatyrõtaha opa mbaʼe vai ojapovaʼekue yvypóra goviérno ha avei Satanás rembiapokue. Ajépa ohechauka porã ñandéve upéva Ñandejára ojepyʼapyha ñanderehe?

10. Mbaʼépa oñandu Ñandejára ohechávo yvyporakuéra ohasa asy?

¹⁰ Jahechamahaguéicha, umi omoakãva rrelihión ijapu heʼi jave jahasa asyha Ñandejára oipotágui. Péro ndahaʼeiete upéicha: Jehovápe hiʼãiterei oipeʼapa umi mbaʼe oporombohasa asýva. ‘Haʼe ojepyʼapy penderehe’, heʼi 1 Pedro 5:7 (NM). Upéva hína añetehápe la Biblia omboʼéva.

Maʼerãpa ñaime ko Yvy ape ári?

11. Mbaʼépa omboʼe heta rrelihión heʼívo maʼerãpa ñaime ko Yvy ape ári?

¹¹ Jahechami koʼág̃a peteĩ mbaʼe heta ñande rapicha oñeporandúva jepi: maʼerãpa ñaime ko Yvy ape ári? Heta rrelihión heʼi jepi yvypóra ohasakuévonte oĩha ko Yvy ape ári. Oimoʼã hikuái ko Yvy ape ári ñaimeha sapyʼamínte ha upéi jahataha jaiko ambue hendápe. Oĩ voi katu omboʼéva peteĩ árape Ñandejára ohunditaha ko Yvy. Upévare, heta ñande rapicha heʼi iporãveha ojapo opa ikatúva ovyʼa hag̃ua koʼág̃a, oimoʼãgui omanotanteha voi. Upéicharõ, mbaʼépa añetehápe omboʼe la Biblia heʼívo maʼerãpa ñaime ko Yvy ape ári?

12-14. Mbaʼépa heʼi la Biblia Ñandejára oipotaha ko Yvy ha yvyporakuérape g̃uarã?

¹² Ñandejára ojapóta peteĩ mbaʼe ijojahaʼỹva ko Yvy ha yvyporakuérape g̃uarã. Haʼe “ndojapói yvy perõ, ojapo uvei, pype ojeiko hag̃uáicha” (Isaías 45:18). Avei, Jehová ‘omopyendavaʼekue ko yvy ani hag̃ua okuʼe arakaʼeve’ (Salmo 104:5). Jaikuaa rupi koʼã mbaʼe Ñandejára ojapotáva ko Yvy ha yvyporakuérape g̃uarã, ñanepytyvõ jahechakuaa hag̃ua maʼerãpa ñaime ko Yvy ape ári.

¹³ Génesis kapítulo 1 ha 2-pe oñemombeʼu Jehová ojapo porã hague ko Yvy oiko hag̃ua ipype yvyporakuéra. Ñandejára Ñeʼẽ omombeʼu avei ojapopávo Ñandejára ko Yvy, ohechahague iporãitereiha (Génesis 1:31). Ñandejára omoĩ pe kuimbaʼe ha kuña ypykuépe peteĩ hardín neporãvape hérava Edén. Upépe okakuaa heta hiʼupyrã. Heʼi avei chupekuéra: “Pende raʼýkena, taheta, taisarambi yvy tuichakue ha toguereko ipoguýpe”. Upéicharõ, Adán ha Eva familiakuéra iperfektovaʼerã, ombotuicha pe hardín oikoha ko Yvy tuichakuére ha oisãmbyhy umi mymbakuéra mborayhúpe (Génesis 1: 26-28).

¹⁴ Ñandejára oipota yvyporakuéra oiko porã ko Yvy ape ári opa ára g̃uarã. Jehová heʼi voi: “Heko potĩvape, opytapáne ko yvy, ha upépe haʼekuéra oikóne opa árape” (Salmo 37:29). Upeichaite: yvyporakuérape ojejapovaʼekue oiko hag̃ua opa árare peteĩ hardínpe ko Yvy ape ári. Kóicha Ñandejára oipota jaiko, ha upéva añetehápe omboʼe la Biblia.

Mbaʼépa oiko ñandehegui ñamano rire?

15. Mbaʼépa omboʼe heta rrelihión oikoha ñandehegui ñamano rire?

¹⁵ Jahechami koʼág̃a peteĩ mbaʼe heta ñande rapicha oñeporandúva: mbaʼépa oiko ñandehegui ñamano rire? Opavavenunga rrelihión omboʼe ñamanóvo oĩha peteĩ mbaʼe osegíva oikove. Oĩ katu omboʼéva Ñandejára okastigaha umi iñañávape, ombohasa asývo chupekuéra opa árare pe tata rendýpe térã infiérnope. Péro añetépa hína koʼã mbaʼe? Mbaʼépa añetehápe omboʼe la Biblia oikoha ñandehegui ñamano rire?

16, 17. Heʼiháicha Ñandejára Ñeʼẽ, mbaʼéichapa oĩ umi omanovaʼekue?

 ¹⁶ Ñandejára Ñeʼẽ heʼi: “Oikovéva oikuaa omanovaʼerãha, omanóva katu ndoikuaái mbaʼeve ha ndaipóri mbaʼeve iporã vaʼerã chupekuéra”. ‘Ndoikuaái rupi mbaʼeve’ umi omanovaʼekue, nohendúi, ndohechái, noñeʼẽi, noñandúi ha nopensái. Ndaikatuvéima oñemeʼẽ chupekuéra mbaʼeve hembiapokuére. Mbaʼéicha voi piko oñemeʼẽta chupekuéra ndaikatuvéimava ombaʼapo hikuái? Avei, “opáma ohayhúva, ijaʼeʼỹha ha opa mbaʼe oñandúva”, ndaikatuvéima rupi ohechauka umi mbaʼe (Eclesiastés 9:​5, 6, 10).

¹⁷ La Biblia omboʼéva ko mbaʼére hesakã porã: umi omanovaʼekue ndosegíri oikove mamove hendápe. Ndaipóri mbaʼeve ohejáva ñande rete ñamano vove ha osegíva oikove oñembohete pyahu jey hag̃ua, heʼiháicha umi ogueroviáva pe reencarnación. Ñande rekove ikatu ñambojoja peteĩ tataindy rendýre. Oguévo, ndohói mamove. Opa reínte.

18. Peteĩ ostudiáva la Biblia oikuaávo umi omanovaʼekue noñanduiha mbaʼeve, mbaʼépa ikatu ohechakuaa?

¹⁸ Tuichaite mbaʼe ningo jaikuaa ha hesakã ñandéve ko mbaʼe. Peteĩ ostudiáva la Biblia oikuaávo umi omanovaʼekue noñanduiha mbaʼeve, pyaʼe ohechakuaa omano rire umi ihentekuéra ipyʼahatãvéva jepe ndaikatuveimaha ojapo hese mbaʼeve. Avei ohechakuaáta umi hogaygua omanovaʼekue ndaikatuveimaha ohendu, ohecha, oñeʼẽ, oñandu térã opensa. Upévare, ndaikatúi avei oĩ haʼeño rei purgatóriope omopotĩ hag̃ua hekove térã ohasa asy tatarendýpe. Upéicharõ jepe, la Biblia omboʼe umi omanovaʼekue ha Ñandejára imanduʼávare, oñemoingove jeytaha. Aje piko iporãite upéva! (Juan 5:​28, 29.)

Peteĩ lívro pyahu jaiporu hag̃ua

19, 20. Mbaʼépa jajapovaʼerã ñande, ha mbaʼe lívropa oñeguenohẽ jastudia hag̃ua la Biblia ñande rapichakuéra ndive?

¹⁹ Ñahesaʼỹijóma mbohapy mbaʼe heta ñande rapicha oñeporandúva jepi. Jahecháma la Biblia omyesakã ha ombohovái porãha umi porandu. Javyʼaiténiko ñamombeʼúvo koʼã mbaʼe porã umi oikuaasévape mbaʼépa omboʼe la Biblia! Upéicharõ jepe, heta ñande rapicha ipyʼaporãva oñeporandu hetave mbaʼe ha oikuaa porãse umi mbaʼe. Ha ñande jaservíva Ñandejárape, ñaipytyvõvaʼerã chupekuéra ombohovái hag̃ua umi porandu.

²⁰ Ijetuʼu jepi ñamboʼe Ñandejára Ñeʼẽ hesakã ha oporomokyreʼỹ hag̃uáicha. Upévare, ñanepytyvõ hag̃ua pe “tembiguái jeroviaha ha iñarandúva” oguenohẽ peteĩ lívro jaiporu hag̃ua japredika jave (Mateo 24:​45-47). Ko lívrope oĩ 224 páhina ha héra Mbaʼépa añetehápe omboʼe la Biblia?

21, 22. Emombeʼumi mbaʼe mbaʼépa jahechakuaa pe lívrore Mbaʼépa omboʼe la Biblia?

²¹ Ko lívro osẽ ypy vaʼekue pe asambléa de distrítope, “Ñaneñeʼẽrendu Ñandejárape”, ojapovaʼekue testigos de Jehová 2005 ha 2006-pe. Jahechakuaa, oñepyrũvo pe lívro oĩha cinco páhina iporãitereíva jastudia ñepyrũ hag̃ua ñande rapicha ndive. Ndahasyivéta ñañemongeta hag̃ua jaiporúramo umi taʼanga ha umi téysto oñeguenohẽvaʼekue la Bíbliagui. Koʼã mbaʼe oĩva oñepyrũvo ko lívro jaiporukuaa avei jahechauka hag̃ua  umi estudiántepe mbaʼéichapa otopáta umi kapítulo ha versíkulo Bibliapegua.

²² Ko lívro ndahasyieterei ñantende hag̃ua. Ojejapo ikatu hag̃uáicha omomýi umi estudiántepe ohechaukávo mbaʼéichapa pe informasión ojapo porãta hesekuéra. Oñepyrũvo umi kapítulo jatopa heta porandu, ha opávo oĩ avei peteĩ rrekuádro heʼíva “Mbaʼépa omboʼe la Biblia”. Upépe Ñandejára Ñeʼẽ ombohovái umi porandu oĩva iñepyrũme. Umi taʼanga porãite ha umi heʼíva hese, ha avei umi ehémplo oñemoĩva ko lívrope, oipytyvõta umi estudiántepe ontende hag̃ua umi mbaʼe ipyahúva chupekuéra. Ndahasýiramo jepe ko lívro, oĩve informasión ñahesaʼỹijo porãve hag̃ua catorce téma iporãva umi estudiánte oikuaasevéva ndive.

23. Mbaʼéichapa ikatu jaiporu pe lívro Mbaʼépa omboʼe la Biblia jastudia jave ñande rapicha ndive?

²³ Pe lívro Mbaʼépa omboʼe la Biblia? ojejapo ojestudia hag̃uáicha umi tapicha iñarandu ha iñaranduʼỹva ndive ha oimehaichagua rreilionpegua ndive. Pe ostudiáva ndoikuaaietéramo la Biblia omboʼéva, ikatu jastudia mbegueve peteĩ kapítulo hendive. Jastudia pyaʼe pyaʼe rangue, ñañehaʼãvaʼerã umi mbaʼe jastudiáva topoko ikorasõre. Ha nontendéiramo umi ehémplo oñemoĩva ko lívrope, ikatu ñamyesakã chupe térã ñakambia upe ehémplo. Ñañehaʼãmbaitékena jaiporu porã ko lívro ha ñañembosakoʼi porãkena upearã. Jajerurevaʼerã avei Ñandejárape tañanepytyvõ ‘ñamboʼe hag̃ua hekópe porã pe añetegua’ (2 Timoteo 2:15).

Ñamombaʼékena umi mbaʼe ijojahaʼỹva oñemeʼẽva ñandéve

24, 25. Mbaʼe mbaʼe ijojahaʼỹvapa omeʼẽ ñandéve Jehová?

²⁴ Jehová omeʼẽ heta mbaʼe ijojahaʼỹva umi oservívape chupe. Haʼe ojekuaauka ñandéve, ha katuete ñamombaʼevaʼerã upéva. Ñandejára oñomi umi mbaʼe ojapótava umi oñemombaʼeguasúvagui ha umi oñemomirĩvape katu omombeʼu. Upévare Jesús heʼivaʼekue: “Romombaʼeguasu che Ru, yvága ha yvy Jára, reñomihaguére koʼã mbaʼe umi iñarandu ha imbaʼekuaávagui, ha reikuaauka umi iñaranduʼỹvape” (Mateo 11:25). Tuichaiterei mbaʼe ningo ñaime umi iñumíldeva apytépe, umi oservíva Jehovápe, pe Mburuvicha Guasu.

²⁵ Avei, Ñandejára omeʼẽ ñandéve jaikuaauka hag̃ua mávapa añetehápe haʼe. Ñanemanduʼavaʼerã oñemongyʼahague Ñandejára réra oñeñeʼẽ vai rupi hese. Upévare heta ñande rapicha oimoʼã Jehová ndojepyʼapyiha ñanderehe ha ipyʼahatãha. Upévare, hiʼãpa ñandéve ñaipytyvõ ojehecha hag̃ua ndahaʼeiha upéicha? Jaipotápa umi ñande rapicha ipyʼaporãva oĩva opárupi oikuaa porã mávapa Ñandejára? Upéicharõ, jajapovaʼerã opa ikatúva ñaneñeʼẽrendu hag̃ua Ñandejárape. Upearã japredikavaʼerã kyreʼỹme ha jaikuaauka umi mbaʼe iñimportantevéva oĩva Ñandejára Ñeʼẽme. Umi oikuaase añetéva Ñandejárape tekotevẽ oikuaa mbaʼépa añetehápe omboʼe la Biblia.

Mbaʼépa ñambohováita?

• Mbaʼérepa ikatu jaʼe Ñandejára ojepyʼapyha ñanderehe?

• Maʼerãpa ñaime ko Yvy ape ári?

• Mbaʼépa oiko ñandehegui ñamano rire?

• Mbaʼépa reguerohoryve pe lívro Mbaʼépa omboʼe la Biblia rehe?

[Porandu ñahesaʼỹijóva]

[Nóta oĩva taʼanga ndive páhina 12]

La Biblia omboʼe Ñandejára oipeʼaitetaha opa mbaʼe ñanembohasa asýva

[Roagradese]

Yvate derécha gotyo, mitãkuñaʼi: © Bruno Morandi/age fotostock; asu gotyo, kuñakarai: AP Photo/Gemunu Amarasinghe; iguýpe derécha gotyo, umi ohejavaʼekue hetã: © Sven Torfinn/Panos Pictures