Jehová oguerohory ñane rembiapo

‘Ñandejára niko hekojojahína ha ndahesaraimoʼãi umi pejapovaʼekuégui ha mborayhu pehechaukavaʼekue chupe.’ (HEBREOS 6:10.)

1. Mbaʼéichapa Jehová ohechauka omombaʼeha Rútpe?

 JEHOVÁ omombaʼeterei umi oñehaʼãvape ojapo Haʼe oipotáva ha omeʼẽ chupekuéra heta mbaʼe porã (Hebreos 11:6). Boaz peteĩ kuimbaʼe ojeroviáva Jehováre oikuaavaʼekue ko mbaʼe. Upévare heʼi Rútpe: ‘Ñandejára tohechakuaa ndéve umi mbaʼe rejapovaʼekue ha tomyengovia rasaite ndéve opa mbaʼe’. Rut ningo peteĩ kuñakarai Moabgua oñangarekóva isuégra g̃uaig̃uimíre (Rut 2:12). Ovendesípa Ñandejára Rútpe? Katuetei. Upévare la Bíbliape oñemombeʼu hekovekue, omenda Boaz rehe ha rréi David ha Jesucristo ou ifamíliagui (Rut 4:​13, 17; Mateo 1:​5, 6, 16). Heta hendápe la Biblia omombeʼu mbaʼeichaitépa Jehová oguerohory isiervokuéra ojapóva.

2, 3. a) Mbaʼérepa ñamombaʼeterei Jehová oguerohoryhaguére isiervokuérape? b) Mbaʼérepa Jehová omombaʼeterei isiervokuéra ojapóva? Mbaʼérepa ikatu ñambojoja.

² Jehová omombaʼeterei isiervokuéra ojapóva. Hebreos 6:10 heʼi: ‘Ñandejára niko  hekojojahína ha ndahesaraimoʼãi umi pejapovaʼekuégui ha mborayhu pehechaukavaʼekue chupe peipytyvõvo umi heseguávape, pejapoháicha gueteri peikóvo’. Péicha jahecha Ñandejára oguerohoryha isiervokuérape iñimperféktoramo jepe hikuái ha ñamombaʼeterei upéva (Romanos 3:23).

³ Jajavy memégui Ñandejára renondépe ikatu ñaimoʼã ndovaleiha mbaʼeverã jajapóva chupe g̃uarã. Péro Jehová ñandekuaa porã ha ohechapaite jahasáva, upévare omombaʼeterei umi mbaʼe jajapóva chupe g̃uarã ñande pyʼaite guive (Mateo 22:37). Ikatu ñambojoja ko mbaʼére. Peteĩ kuñakarai otopa mesa ári peteĩ rregálo ha oavrívo ohecha peteĩ kollarʼi. Nomombaʼéi oikuaágui ndahepyiha. Upeichahágui ohecha sapyʼa peteĩ kuatiaʼi ha hese oĩ imemby kuñaʼi réra. Ko mitãkuñaʼi ogastapaite ipláta ombyatymivaʼekue ojogua hag̃ua upe rregálo. Koʼág̃a katu ko kuñakarai omombaʼeterei pe kollár. Hesay pororopa, oñañuã imembyʼípe ha heʼi chupe ovyʼaitereiha.

4, 5. Mbaʼépepa Jesús ojogua Jehovápe?

⁴ Jehová oikuaa porãiterei ñañandúva ha jahasáva, upévare omombaʼe ñameʼẽva chupe michĩramo jepe. Ko mbaʼépe Jesús ojoguaiterei avei Itúvape. Jahechami mbaʼépa heʼivaʼekue peteĩ viúdare. La Biblia heʼi: ‘Jesús ohecha umi mbaʼeta rerekoha omoĩramo iñofrénda pe ofrénda ryrúpe. Ohecha avei peteĩ viúda imboriahuetereíva omoĩramo mokõi pláta saʼimi, ha heʼi: “Añetéko haʼe peẽme, ko viúda, imboriahúramo jepe, omoĩ hetave opavavégui, umíva omoĩ pe hembývagui ichupekuéra, kóva katu pe mbovymi oguerekóvagui, omoĩ pe hembiʼu repy rangue”’ (Lucas 21:​1-4, BNP).

⁵ Jesús oikuaa porã mbaʼépa ohasa ko kuñakarai, opytamaha haʼeñomi ha imboriahuha. Upévare omombaʼeterei upe ojapóva. Upéicha avei Jehová (Juan 14:9). Haʼekuéra omombaʼe ñane rembiapo, ndaikatúiramo jepe jajapo heta mbaʼe. Ajépa javyʼa jaikuaágui Ñandejára ha Itaʼýra oguerohoryha jajapóva.

Jehová oguerohory peteĩ kuimbaʼe Etiopiayguápe

6, 7. Mbaʼéichapa Jehová ohechauka oguerohoryha Ébed-mélecpe ha mbaʼérepa?

⁶ La Biblia heʼi jey jey Jehová oguerohoryha umi ojapóvape Haʼe oipotáva. Ébed-mélec rehe oikovaʼekue ohechauka porã upéva. Ko kuimbaʼe Etiopiaygua ningo rréi Sedequías rembijokuái. Ko rréi ñaña ogoverna Judápe. Ébed-mélecpe oñemombeʼu Judá mburuvichakuéra opoihague Jeremíaspe peteĩ pósope omano hag̃ua ñembyahýigui. Haʼekuéra heʼi Jeremías oñemoĩha mburuvichakuérare (Jeremías 38:​1-7). Ndaijaʼevéi hikuái Jeremías rehe pe heʼíva ombopochýgui chupekuéra ha Ébed-mélec oikuaa upéva. Upéicharõ jepe haʼe oho oñeʼẽ pe rréi ndive ha heʼi: “Che ruvicha guasu, pe ojejapovaʼekue Jeremías rehe hína peteĩ mbaʼe nde  vaipa jepéva. Oity hikuái chupe ykuápe ha upépe omanóta ñembyahýigui, ndaiporivéigui távape hiʼupyrã”. Upéramo pe rréi heʼi Ébed-mélecpe ogueraha hag̃ua treinta kuimbaʼe onohẽ hag̃ua pósogui Jeremíaspe (Jeremías 38:​8-13).

⁷ Jehová oguerohory Ébed-mélecpe ojeroviahaguére hese. Upévare haʼe ndokyhyjéi oñeʼẽ hag̃ua pe rréipe. Omombaʼégui upéva Jehová heʼiuka chupe Jeremías rupive: ‘Ajapóta pe haʼevaʼekue ko táva rehe, vairã ndahaʼéi iporã hag̃ua chupe. Che katu romoʼãta ani hag̃ua reʼa umi rekyhyjeha pópe. Che roipeʼáta jejukágui. Ikatúta rekañy rejeroviahaguére cherehe’ (Jeremías 39:​16-18). Jehová oñangareko Ébed-mélec ha Jeremías rehe. Umi Judá mburuvichakuéra ndojapói mbaʼeve hesekuéra ha upéi umi Babiloniaygua ohundírõ guare Jerusalén ndoikói avei mbaʼeve hesekuéra. Jehová ‘oñangareko umi ojeroviávare hese, ha onohẽ chupekuéra umi iñañáva poguýgui’ heʼi Salmo 97:10.

‘Pende Ru ohecháva mbaʼépa pejapo peneañoháme omyengoviáta peẽme’

8, 9. Jesús ojapohaguéicha, mbaʼeichagua ñemboʼépa Jehová oguerohory?

⁸ Jahecha avei Jehová omombaʼeha jajapóva chupe g̃uarã jaleévo la Biblia heʼíva ñemboʼe rehe. Rréi Salomón heʼivaʼekue ‘Ñandejára ohenduha hekojojáva ñemboʼe’ (Proverbios 15:8). Jesús oĩrõ guare ko Yvy ape ári, umi rrelihión omoakãva oñemboʼe hapichakuéra rovake. Péro noñemboʼéi ohayhúgui Jehovápe síno ojehechauka hag̃uánte. “Chupekuéra niko oñemyengoviapáma oñemyengoviavaʼerã” heʼi Jesús hesekuéra. Upéi heʼi hemimboʼekuérape: “Peẽ peñemboʼéta vove katu, peike pende kotýpe, pemboty pene rokẽ, ha peñemboʼe pende Rúpe peneañoháme. Ha pende Ru ohecháva mbaʼépa pejapo peneañoháme, omyengoviáta peẽme pene rembiapokue” (Mateo 6:​5, 6).

⁹ Jesús ndeʼíri ivaiha ñañemboʼe ñande rapichakuéra rovake. Haʼe voi péicha oñemboʼevaʼekue (Lucas 9:16). Jehová ovyʼa ñañemboʼéramo chupe ñande pyʼaite guive ha ndahaʼéi jajehechauka hag̃ua. Ñañemboʼévo ñaneañoháme jahechauka mbaʼeichaitépa jahayhu Ñandejárape ha jajerovia hese. Upévare Jesús pyʼỹi oñemohaʼeñóva oñemboʼe hag̃ua. Haʼe oñemboʼe ‘koʼẽ mboyvemi, pytũ aja gueteri hína’, avei ‘ojupi peteĩ sérrope oñemboʼe hag̃ua haʼeñoháme’ ha oiporavo mboyve umi doce apóstol oñemboʼe pe pyhare pukukue (Marcos 1:​35, JMP; Mateo 14:23; Lucas 6:​12, 13).

10. Mbaʼépa oikóta katuete ñañemboʼéramo ñande pyʼaite guive?

¹⁰ Katuete Jehová ojapysaka porã vaʼekue Itaʼýrare oñemboʼévo chupe. Sapyʼánte Jesús ‘tesaýreve hatã oñemboʼevaʼekue. Ha iñeʼẽrendúgui Ñandejára ohendu chupe’ (Hebreos 5:7; Lucas 22:​41-44). Upéicha avei ñañemboʼéramo ñande Ru yvagapeguápe ñande pyʼaite guive haʼe katuete ojapysaka porãta ñanderehe. Jehová ‘oñemoag̃ui umi oñemboʼéva rehe, umi ipyʼaite guive chupe oñemboʼévare’ (Salmo 145:18).

11. Omombaʼépa Jehová jajapóva ñaneañoháme?

¹¹ Jehová oguerohorýramo ñañemboʼévo chupe ñaneañoháme, koʼýte oguerohoryvéta ñaneñeʼẽrendúramo chupe ñaime jave ñaneaño. Haʼe oikuaa jajapóva ñaneañoháme (1 Pedro 3:12). Upéicharõ jajerovia ha ñaneñeʼẽrendúramo Jehovápe avave nañanderechái jave jahechauka jahayhuha chupe ñande “pyʼaite guive”. Avei jahechauka jajaposeha ha ñamombaʼeha iporãva (1 Crónicas 28:9). Katuete Jehová ovyʼaiterei ñanderechávo jajapo koʼã mbaʼe! (Proverbios 27:11; 1 Juan 3:22.)

12, 13. Mbaʼépa jajapovaʼerã ani hag̃ua ko múndo ñanembyai? Mbaʼéichapa ikatu jajogua Natanaélpe?

 ¹² Upévare ndajajapomoʼãi ñaneañoháme mbaʼeve ikatúva ñanembyai. Nañamañamoʼãi mbaʼe tieʼỹ térã ohechaukáva oñorairõ ha ojojukáva. Oĩramo jepe umi pekádo ikatúva ñamokañy ñande rapichakuéragui, ñanemanduʼavaʼerã ko mbaʼére: ‘Ndaipóri mbaʼeve Ñandejára ojapovaʼekue ikatuvaʼerã okañy chugui, opa mbaʼe haʼe ohecha ha oikuaa ha ichupe ñamombeʼuvaʼerã ñane rembiapokue’ (Hebreos 4:​13, BNP; Lucas 8:17). Ñañehaʼãmbaitéramo jajapo Jehová oguerohorýva, ñaime porãta henondépe ha javyʼáta. Jehová katuete oguerohory ‘upe hembiapo porã ha hekojojávape, upe añeteguánte heʼívape ipyʼaite guive’ (Salmo 15: 1, 2).

¹³ Mbaʼépa jajapovaʼerã ani hag̃ua ko múndo iñañaitereíva ñanembyai? (Proverbios 4:23; Efesios 2:2.) Jaiporupaitevaʼerã Jehová omeʼẽva ñandéve ñamombarete hag̃ua ñande jerovia. Avei ñañehaʼãvaʼerã ñamboyke ivaíva ha jajapo iporãva. Ha oiméramo ñañandu jajaposeha ivaíva pyaʼe porã ñakambiavaʼerã jajapo mboyve (Santiago 1:​14, 15). Ajépa javyʼaitéta Jesús heʼíramo ñanderehe upe heʼivaʼekue Natanael rehe: ‘Kóina ko oúva, avavépe ombotavyʼỹva’ (Juan 1:47). Natanael oñehenóiva avei Bartolomé ningo upéi oĩ umi doce apóstol apytépe (Marcos 3:​16-19).

‘Peteĩ Saserdóte Guasu heko jeroviáva ha oporoporiahuverekokuaáva’

14. Mbaʼépa heʼi Jesús María ojapóvare?

¹⁴ Jesús ‘niko pe Ñandejára jahechaʼỹva joguahaite’ ha upévare ojapo opa mbaʼe Itúva ojapoháicha. Haʼe avei omombaʼe umi oservívape Itúvape ipyʼaite guive (Colosenses 1:​15, JMP). Pór ehémplo cinco día omano mboyve Jesús oho hemimboʼekuérandi Simón rógape Betániape. Kaʼaruete upe árape ou María, haʼe ningo Lázaro ha Marta ermána. Haʼe “ogueru peteĩ hyru mbaʼe ryakuã porã nardoetégui ojejapóva” hepýva (ovale un áñope oñeganáva) ha oñohẽ Jesús py ha iñakãre avei (Juan 12:3). Ohechávo ko mbaʼe oĩ heʼíva: “Maʼerã piko ohundi rei pe mbaʼe repyete?”. Péro Jesús nopensái upéicha. Haʼe omombaʼeterei María ojapóva hiʼag̃uímagui upe ára omano ha oñeñotỹ hag̃ua. Haʼe ndojaʼói Maríape, oñeʼẽ porã katu hese ha heʼi: “Mamo oñemyerakuãha rupi marandu porã, ko yvy jerekuévo, oñemombeʼúta avei ko kuña ojapovaʼekue, ha oikóta hese manduʼa” (Mateo 26:​6-13).

15, 16. Mbaʼépepa ñanepytyvõ Jesús oikohaguére yvypóraicha?

¹⁵ Ajépa javyʼaite Jesús ñanemoakãhaguére! Haʼe ningo omombaʼe hemimboʼekuéra ojapóva. Oikohaguére yvypóraicha ikatupyry ojapo hag̃ua Jehová oipotáva. Jehová omoĩ chupe Saserdóte Guasu ha Rreirã. Péicha Jesús omoakã umi yvágape ohótavape ha upéi opa yvyporakuérape (Colosenses 1:13; Hebreos 7:26; Apocalipsis [Revelación] 11:15).

¹⁶ Jesús ojepyʼapy ha ohayhumavaʼekue yvyporakuérape ou mboyve ko Yvy ape ári (Proverbios 8:31). Péro oiko rire yvypóraicha oikuaa porãve mbaʼépa jahasa jaservívo Ñandejárape. Apóstol Pablo heʼi hese: ‘Oikovaʼerã ipehẽnguekuéraicha opa mbaʼépe, oiko hag̃ua chugui peteĩ Saserdóte Guasu heko jeroviaháva ha oporoporiahuverekokuaáva. Ha haʼe voi ohasa asy ha ojepyʼaraʼã rupi, koʼág̃a ikatu oipytyvõ umi ojepyʼaraʼãvape avei’. Jesús ‘ikatu ñandeporiahuvereko ñanekangyhápe, haʼe voi niko ojepyʼaraʼã vaʼekue ñandéicha. Haʼe niko nahembiapovaírinte arakaʼeve, ndahaʼéi ñandéicha’ (Hebreos 2:​17, 18; 4:​15, 16).

17, 18. a) Mbaʼépa ñanemboʼe Jesús rehe umi kárta omondovaʼekue umi siete kongregasiónpe? b) Maʼerãpa ojeprepara umi kristiáno yvágape ohótavape?

¹⁷ Oñemoingove jey rire Jesúspe ojekuaa  porã hese ontendeveha hemimboʼekuéra rembiasy. Epensamíntena umi kárta omondovaʼekuére apóstol Juan rupive umi siete kongregasión oĩvape Asia Menórpe. Kongregasión Esmírnape heʼi: “Che aikuaa rehasa asyha ha ne mboriahuha”. Péicha haʼete ku heʼíva: “Aikuaa porã rehasáva”. Jesús ohasa asy omano meve, upévare oiporiahuvereko chupekuéra ha heʼi: ‘Ejepytasóke nde jeroviáre remanoite meve, ha che ameʼẽta ndéve jopóiramo jeikove’ (Apocalipsis [Revelación] 2:​8-10).

¹⁸ Umi kártape heta vése Jesús heʼi oikuaa porãha hemimboʼekuéra jehasa asy ha omombaʼeha ojapóva hikuái oservi hag̃ua Ñandejárape (Apocalipsis [Revelación] 2:1–3:22). Iporã ñanemanduʼa koʼã kárta oñemondohague umi kristiáno yvágape ohótavape ogoverna Jesús ndive. Chupekuéra avei ojeprepara ojapo hag̃ua peteĩ tembiapo iporãva: oipytyvõ mborayhúpe ojeporu hag̃ua yvyporakuéra rehehápe Cristo sakrífisio (Apocalipsis [Revelación] 5:​9, 10; 22:​1-5).

19, 20. Mbaʼéichapa umi oĩva pe aty guasúpe ohechauka ohayhuha Jehová ha Itaʼýrape?

¹⁹ Ohayhuháicha umi yvágape ohótavape Jesús ohayhu avei umi ‘ambue ovechakuéra’ ojeroviávape. Koʼãva apytégui hetaiterei oĩta ‘peteĩ aty guasúpe opa tetãygua’ osẽtava pe ‘jehasa asy guasúgui’ (Juan 10:16; Apocalipsis [Revelación] 7:​9, 14, BNP). Haʼekuéra oñemoĩ Jesús poguýpe omombaʼégui haʼe ojapovaʼekue yvyporakuéra rehehápe ha oikóta opa ára g̃uarã. Upévare mbaʼépa ojapo hikuái? ‘Ára ha pyhare ombaʼapo Ñandejárape g̃uarã’ (Apocalipsis [Revelación] 7:15-17).

²⁰ Pe infórme 2006-pe guare (oĩva páhina 25-28) ohechauka porã Ñandejára siervokuéra ombaʼapoha ‘ára ha pyhare’. Haʼekuéra ha umi yvágape ohótava opredika 1.333.966.199 óra. Ñamoĩramo áñope upéva hetavéta 150.000 áñogui!

Ñamombaʼe memékena Ñandejára ojapóva ñanderehe

21, 22. a) Mbaʼérepa ñañehaʼãmbaitevaʼerã jahechauka ñamombaʼeha Ñandejára ojapóva ñanderehe? b) Mbaʼépa jahecháta pe párte oúvape?

²¹ Jehová ha Itaʼýra ojapóvare ñanderehehápe jahechakuaa mbaʼeichaitépa ñanderayhu hikuái. Péro oĩ heta naimanduʼáiva Ñandejárare ha ndojepyʼapýiva hapicháre. Umi tapicha oikóvare ‘ko ára pahápe’ Pablo heʼivaʼekue: ‘Opavave imbaʼerãnte oipotáta opa mbaʼe, pira pirénte ohayhúta, ndohechakuaamoʼãi avavépe’ (2 Timoteo 3: 1-5). Umi kristiáno tee katu ndaupeichaiete. Haʼekuéra oñemboʼe meme, iñeʼẽrendu ha opredika kyreʼỹme. Upéicha ohechauka omombaʼeha opa mbaʼe Ñandejára ojapóva hesekuéra (Salmo 62:8; Marcos 12:30; 1 Juan 5:3).

²² Pe párte oúvape jahecháta mbaʼe mbaʼépa Jehová omeʼẽ ñandéve ñanderayhúgui. Jajepyʼamongetavaʼerã koʼã mbaʼére ñamombaʼeve hag̃ua umi “mbaʼe porã” Ñandejára ojapóva ñanderehehápe (Santiago 1:17).

Reikuaápa?

• Mbaʼéichapa Jehová ohechauka omombaʼeha isiervokuéra ojapóva?

• Mbaʼéichapa umi mbaʼe jajapóva ñaneañoháme ikatu ombovyʼa Jehovápe?

• Mbaʼéichapa Jesús ohechauka omombaʼeha hentekuéra ojapóva?

• Jesús oikovaʼekue yvypóraicha, mbaʼéichapa upéva oipytyvõ chupe ogoverna hag̃ua mborayhúpe?

[Porandu ñahesaʼỹijóva]

[Nóta oĩva taʼanga ndive páhina 21]

Peteĩ sy omombaʼeterei imemby omeʼẽva chupe. Upéicha avei Jehová omombaʼe ñameʼẽva chupe