Kuimbaʼe ha kuña hembiaporã iporã

JEHOVÁ ojapo Adánpe ha upéi Évape. Oiko aja haʼeño Adán ohecha ha ojapovaʼekue heta mbaʼe. Avei Jehová omboʼe chupe heta mbaʼe (Génesis 2:​15-20). Adán omombeʼuvaʼerã hembirekópe Ñandejára heʼíva. Upéicharõ, haʼe omotenondevaʼerã opa mbaʼe ojejapóva ojeadora hag̃ua Ñandejárape.

Péicha avei ojapo kristianokuéra kongregasiónpe, ha katuete ñanepytyvõta jaikuaa porãvérõ ko mbaʼe. Apóstol Pablo heʼivaʼekue: ‘Aníke kuña oporomboʼe térã ipuʼakase kuimbaʼére. Che aipota opyta kirirĩháme. Ñandejára niko ojapovaʼekue Adánpe raẽ ha upéi Évape’ (1 Timoteo 2:​12, 13). Koʼápe ndeʼíri peteĩ kuña ndaikatuiha oñeʼẽ kristianokuéra atyhápe. Heʼise katu naiporãiha ojediskuti kuimbaʼéndi térã oapoʼi chupe térã oñehaʼã omboʼe kongregasiónpe. Kuimbaʼe omoakã ha omboʼevaʼerã kongregasiónpe. Péro umi kuña heta mbaʼe ikatu ojapo rreunionhápe.

Ñantende porãve mbaʼépa Ñandejára oipota kuimbaʼe ha kuñáme g̃uarã apóstol Pablo heʼivaʼekuére: ‘Kuimbaʼe niko noñerenohẽivaʼekue kuñágui, kuña katu pe oñerenohẽvaʼekue kuimbaʼégui. Upéicharamo jepe, kuimbaʼe ndoikói kuñaʼỹre, ha kuña kuimbaʼeʼỹre [kuimbaʼe ha kuña ndoikói ojueheʼỹ]. Añetéramo jepe kuña oikohague kuimbaʼégui, añete avei kuimbaʼe osẽhague kuñágui, ha opaite mbaʼe katu ou Ñandejáragui’ (1 Corintios 11:​8-12).

Tembiapo kuñáme g̃uarã

Pe léi Ñandejára omeʼẽvaʼekue Israélpe heʼi kuñanguéra ikatuha ojapo heta mbaʼe ijeheguínte. Pór ehémplo Proverbios 31:​10-31 oñeʼẽ pe ‘tembireko haʼevévare’ ojoguáva mbaʼe porã ojapo hag̃ua ijaorã hogayguakuérape. Haʼe ‘ojapo ao ha omeʼẽ oñemúvape’ (versíkulo 13; 21-24). “Y rupigua mbaʼyrúicha” ko kuña guápa oheka hiʼupyrã, oguerútaramo jepe mombyrýgui (versíkulo 14). ‘Yvy oipotáva ojogua ha upépe haʼe oñemitỹ’ (versíkulo 16). ‘Vyʼápe ohecha hembiapo’ ha ojapóva oho porã (versíkulo 18). ‘Hógare oñangareko, koʼẽre toho porã’ ha avei ko kuña okyhyjéva Jehovágui oipytyvõ hapichakuérape (versíkulo 20, 27). Upévare ojeguerohory chupe (versíkulo 31).

Pe léi Jehová omeʼẽvaʼekue Moisés rupi heʼi avei mbaʼéichapa kuñanguéra ikatu omombarete ijerovia. Jahechamíntena Josué 8:35 heʼíva: “Mbaʼevete umi mbaʼe Moisés ohejavaʼekue ojejapo hag̃uágui ndohejái ojejapoʼỹ rehe. Opavavépe ohenduka; umi kuña, mitã ha tetã ambueguáva ijapytepekuéra oikóvape”. Ha Esdras rehe katu la Biblia heʼi: ‘Esdras ogueru pe kuatia léi ryru oñembyatyhápe opa karai, kuñakarai ha mitã guasukuéra, ha pyhareve guive asaje  peve ohenduka chupekuéra umi léi, pe plásape oĩva okẽ hérava Y rovái. Opavave ojapysaka porã umi mbaʼe ohendúvare’ (Nehemías 8:​2, 3). Kuñanguéra oĩvaʼekue avei ojeleévo Ñandejára léi. Ha ofestehavaʼerã avei umi arete ojejapóva Jehovápe g̃uarã (Deuteronomio 12:​12, 18; 16:​11, 14). Ha iñimportantevéva katu, yma umi kuña Israelgua ikatu oĩ porã Jehová renondépe ha oñemboʼe chupe haʼeñoháme (1 Samuel 1:10).

Síglo primérope umi kuña okyhyjéva Ñandejáragui oipytyvõ Jesúspe (Lucas 8:​1-3). Peteĩ kuña oñohẽ aséite hyakuã asýva iñakã ha ipýre peteĩ senahápe Betániape (Mateo 26:​6-13; Juan 12:​1-7). Avei oĩ kuña ohechavaʼekue Jesúspe oikove jey rire (Mateo 28:​1-10; Juan 20:​1-18). Jesús oho rire yvágape, 120 hemimboʼe oñembyaty ha ijapytepekuéra ‘mbovymi kuña, María, Jesús sy ndive’ (Hechos 1:​3-15). Koʼãva katuete oĩnerakaʼe Jerusalénpe Pentecostés 33-pe, oñemeʼẽrõ guare espíritu sánto Jesús remimboʼekuérape. Ha upérõ oñepyrũ oñeʼẽ hikuái heta idiómape (Hechos 2:​1-12).

Kuimbaʼe ha kuñáre oñekumpli Joel 2:​28, 29 heʼíva. Oñeʼẽvo ko mbaʼére apóstol Pedro omombeʼu Ñandejára heʼiha: “Añohẽvaʼerã che espíritu opavave yvyporakuéra ári ha oñemoñeʼẽvaʼerã espíritu sánto rupi pende raʼy ha pende rajykuéra [...]. Ha che rembiguaikuéra kuimbaʼe ha kuñáva ári añohẽvaʼerã che espíritu umiha árape” (Hechos 2:​13-18, BNP). Pentecostés rire umi kristiána ikatu ojapo heta mbaʼe espíritu sánto rupi. Oprofetisa térã oñeʼẽ la  Biblia heʼívare ha oñeʼẽ hikuái heta idiómape.

Apóstol Pablo ohaírõ guare umi kristiáno Romayguápe heʼi chupekuéra: ‘Pejerovia ñane reindy Febe rehe’. Upéi imanduʼa Trifena ha Trifósare ha heʼi haʼekuéra ‘ombaʼapoha Ñandejárape g̃uarã’ (Romanos 16:​1, 2, 12). Ndaikatúiramo jepe omoakã kongregasión, Ñandejára oiporavo koʼã kuñáme oho hag̃ua yvágape ogoverna Itaʼýra Jesús ndive (Romanos 8:​16, 17; Gálatas 3:​28, 29).

Mbaʼeichaitépa ovyʼa umi kuña oservíva Jehovápe koʼág̃a rupi! “Ñandejára oñeʼẽ ha heta vaʼekue umi [kuña] osẽva iñeʼẽ omosarambi” heʼi Salmo 68:12 [68:​11, NM]. Ojeguerohoryvaʼerã koʼã kuñáme. Pór ehémplo haʼekuéra omboʼe hetápe la Biblia heʼíva ha oipytyvõ chupekuéra ojapo hag̃ua Ñandejára oipotáva. Umi kristiána oipytyvõ imembykuérape ojerovia hag̃ua Jehováre ha avei oipytyvõ iménape oñatende hag̃ua kongregasiónre (Proverbios 31:​10-12, 28). Ñandejára oguerohory avei umi kuña nomendáivape. Upévare kuimbaʼekuérape ojeʼe ‘ig̃uaig̃uívape oreko hag̃ua isyramoguáicha, ha umi kuñataĩme iñermanarõguáicha’ (1​Timoteo 5: 1, 2).

Kuimbaʼe rembiapo

Ñandejára omeʼẽ kuimbaʼekuérape hembiaporã. Pablo heʼi: ‘Aipota peikuaa Cristoha pe kuimbaʼe akã, ha pe kuimbaʼe pe kuña akã, Ñandejaraháicha Cristo akã’ (1 Corintios 11:​3, BNP). Kuimbaʼépe omoakã Cristo. Upéicharõ haʼe oñemoĩvaʼerã Cristo ha Ñandejára poguýpe. Ñandejára oipota kuimbaʼe omoakã kuñáme mborayhúpe (Efesios 5:25). Upéva upéicha ojejapo ypy guive yvyporakuérape.

La Biblia heʼi Ñandejára omoĩhague kuimbaʼépe omoakã hag̃ua heta mbaʼe. Pór ehémplo Jehová heʼi Noépe ojapo hag̃ua pe árka ojesalva hag̃ua hikuái dilúvio aja (Génesis 6:​9–7:24). Abrahánpe katu opromete opa tetã ko Yvy arigua oñevendesitaha iñemoñare rupi. Ko ñemoñare ningo Jesucristo (Génesis 12:3; 22:18; Gálatas 3:​8-16). Ñandejára oiporavo Moiséspe oguenohẽ hag̃ua umi Israelguápe Egíptogui (Éxodo 3:​9, 10, 12, 18). Avei Moisés rupive omeʼẽ chupekuéra iléi (Éxodo 24:​1-18). Ha umi ohaivaʼekue la Biblia kuimbaʼe meme avei.

Jesús omoakãvo kongregasión ‘omeʼẽ’ kuimbaʼe oñangareko hag̃ua kongregasión rehe (Efesios 1:22; 4:​7-13). Ha Pablo heʼi kuimbaʼekuérape mbaʼépa ojejerure chuguikuéra omoakã hag̃ua (1 Timoteo 3:​1-7; Tito 1:​5-9). Upévare testigos de Jehová kongregasiónpe kuimbaʼe hína umi superintendénte térã ansiáno ha umi siérvo ministeriál (Filipenses 1:​1, 2; 1 Timoteo 3:​8-10, 12). Kuimbaʼe añónte ikatu oñangareko kongregasiónre (1 Pedro 5:​1-4). Upéicharõ jepe, Ñandejára omeʼẽ kuñanguérape hembiaporã iporãva.

Kuimbaʼe ha kuña ovyʼa hembiapóre

Kuimbaʼe ha kuña ovyʼa ojapóvo Ñandejára heʼíva chupekuéra. Umi omendáva ovyʼave ojapóramo Jesús ha hemimboʼekuéra ojapohaguéicha. Apóstol Pablo heʼi: ‘Peẽ menakuéra, pehayhúke pene rembirekópe Cristo ohayhuhaguéicha ikongregasión, ha omeʼẽ hese hekove. Menakuéra ohayhuvaʼerã hembirekópe, haʼekuéra ojehayhuháicha ijupe voi’ (Efesios 5:​25-33). Upéicharõ, menakuéra nopensaivaʼerã ijehénte, mborayhúpe omoakãvaʼerã hembirekópe. Jepe Jesús remimboʼekuéra iñimperfékto, haʼe ohayhu ha oñangareko hesekuéra. Upéicha avei peteĩ kuimbaʼe oservíva Jehovápe ohayhu ha oñangarekovaʼerã hembirekóre.

Peteĩ kuña oservíva Jehovápe ‘omombaʼevaʼerã iménape’ (Efesios 5:33). Ha pe kongregasión ojapóva peteĩ ehémplo chupe g̃uarã. Efesios 5:​21-24 heʼi: ‘Opavavéke pejapo ojeʼeháicha peẽme, pehechauka hag̃ua pemombaʼeha Jesúspe. Peẽ kuña pemendáva, peja póke pene ména heʼíva peẽme, pejapoháicha Jesús heʼíva peẽme. Menakuéra niko tembireko akã hína, Cristo haʼeháicha pe kongregasión akã. Pe Cristo kongregasión niko Cristo rete ha opa ipypeguápe haʼe onohẽvaʼekue jejopy vaígui. Ha pe Cristo kongregasión ojapoháicha Cristo heʼíva, tembirekokuéra avei ojapovaʼerã imenakuéra heʼíva chupekuéra’. Ikatu hasy jepi pe tembirekópe oñemoĩ hag̃ua iména poguýpe péro ‘upéicha vaʼerã umi Jesús rehe ojeroviáva’ (Colosenses 3:18). Pe tembireko oñemoĩséta iména poguýpe imanduʼáramo Jesús oipotaha upéva.

Jepe iména ndoservíri Jehovápe hembireko oñemoĩvaʼerã ipoguýpe. Apóstol Pedro heʼi: “Peẽ tembireko peñemoĩvaʼerã pene ména poguýpe oimérõ ndogueroviái pe marandu pyahu, ikatu hag̃ua ohechakuaa añeteha. Upéicharõ natekotevẽmoʼãi peñeʼẽ chupekuéra, ohechágui haʼekuéra pende reko marãʼỹ” (1 Pedro 3:​1, 2). Sara omombaʼevaʼekue iména Abrahánpe, upévare Jehová tuichaiterei ovendesi chupe, imemby Isaac familiarégui ou Jesús (Hebreos 11:​11, 12; 1 Pedro 3:​5, 6). Upéicharõ Ñandejára oguerohory umi kuña ojapóvape Sara ojapohaguéicha.

Umi kuimbaʼe ha kuña ojapóva Ñandejára heʼíva oikóta oñondive pyʼaguapy ha vyʼápe. Ha iporãvéva katu, jajapóramo la Biblia heʼíva tuicha ñanepytyvõta jajapo hag̃ua pe tembiapo porãite Jehová omeʼẽva kuimbaʼe ha kuñáme.

[Rrekuádro oĩva páhina 5-pe]

Mbaʼépa heʼi kuñanguéra hembiapóre

Peteĩ kuñakarai hérava Susan heʼi: “Che ména ningo omoakã mborayhúpe ore rogapy. Pyʼỹi roguapy roñemongeta ha haʼe odesidi vove peteĩ mbaʼe aikuaa osẽ porãtaha. Avyʼa ajapóvo Ñandejára ojeruréva tembirekokuérape ha upéva orepytyvõ roiko porã hag̃ua che ménandi. Roñehaʼã oñondive roservi porãve Jehovápe”.

Ña Mindy katu heʼi: “Jehová ojeruréva kuñanguérape ohechauka ñanderayhuha. Amombaʼévo che ménape ha aipytyvõvo chupe oñangareko hag̃ua kongregasiónre ahechauka aagradeseha Jehovápe imbaʼerechakuaahaguére kuñanguérandi”.

[Nóta oĩva taʼanga ndive páhina 5]

“Ñandejára oñeʼẽ ha heta vaʼekue umi [kuña] osẽva iñeʼẽ omosarambi”