Kuimbaʼe ha kuña ojupe g̃uarã

KUIMBAʼE ha kuña katuete oĩse oñondive. Ñandejára voi ojapo chupekuéra péicha. Jehová ohecha naiporãiha Adán pe kuimbaʼe ypykue oiko haʼeño. Upévare ojapo “chupe iñirũrã, peteĩ oipytyvõvaʼerã chupe”.

Jehová omongete Adánpe, ha oke aja oipeʼa chugui peteĩ ikostílla ha “upe kãnguégui ojapo peteĩ kuña, ha ogueraha kuimbaʼépe”. Adán ningo ovyʼaiterei ohechávo ko kuña porãite Jehová ojapovaʼekue ha heʼi: “Kóva katu che kãngue ha che roʼógui osẽva”. Eva pe kuña ypykue ijukyetereivaʼekue. Ha Adán katu heko kariaʼyete oñemombaʼe hag̃uáicha chupe. Hoʼaiterei ningo ojuehe hikuái. La Biblia heʼi: “Upévare kuimbaʼe oheja itúva ha isýpe, ojoaju hembireko ndive, ha oiko mokõivégui peteĩ tekovénte” (Génesis 2:​18-24).

Péro koʼág̃a rupi familiakuéra ndoikoporãvéi oñondive ha umi kuimbaʼe ha kuña katu ojogueraha vai. Ivaive hag̃ua katu haʼekuéra opuʼã voi oñoakãre. Ñandejára ndoipotaivaʼekue péicha oiko hikuái. Haʼe omeʼẽ kuimbaʼépe tembiapo neporãva ko Yvy ape ári. Kuñáme katu omeʼẽ avei hendag̃ua ijojahaʼỹva kuimbaʼe ykére. Haʼekuéra ombaʼapo porã vaʼerã oñondive. Ojejapo ypy guive yvyporakuérape, umi kuimbaʼe ha kuña omombaʼeguasúva Ñandejárape oñehaʼã ojapo Haʼe oipotáva. Upévare ovyʼa ha oiko porã hikuái. Maʼerãpa ojapo Ñandejára kuimbaʼe ha kuñáme ha mbaʼéichapa ikatu jajapo haʼe oipotáva?

[Nóta oĩva taʼanga ndive páhina 3]

Ñandejára omeʼẽ hembiaporã iporãva kuimbaʼe ha kuñáme