Jehová Ñeʼẽ ningo oikove

Mbaʼe mbaʼépa ñanemboʼe Isaías (párte 2)

ISAÍAS ningo peteĩ proféta ha oikuaaukahína Jehová ñeʼẽ. Oikopaitéma umi mbaʼe heʼivaʼekue umi diez trívu Israelguáre. Ha koʼág̃a katu heʼi mbaʼépa oikóta Jerusalén rehe.

Pe táva oñehundíta ha umi hénte ojeguerahapáta upégui. Péro Isaías heʼi avei Jerusalén ndopytareimoʼãiha. Upéi ou jeýta hikuái oadora hag̃ua Jehovápe. Koʼã mbaʼe rehe oñeʼẽ Isaías 36:​1–66:24. * Iporã ñahesaʼỹijo koʼã kapítulo, omombeʼúgui heta mbaʼe oikóva koʼág̃a rupi ha tenonderãme oikótava avei. Ko pártepe jahecháta avei heta mbaʼe oñeʼẽva Jesucrístore.

“OUTAHÍNA ÁRA”

(Isaías 36:1–39:8)

Ezequías ogovernáma 14 áñore (732 Jesús ou mboyve). Upérõ umi Asiriaygua ojagarra Judá. Péro Jehová, oprometehaguéicha, oñangareko Jerusalén rehe. Umi Asiriaygua ohopa jey hetãme peteĩ ánhel ojuka rire chuguikuéra 185.000 soldádo.

Upéi katu Ezequías ou hasy. Oñemboʼe Jehovápe ha Jehová omonguera chupe. Upévare oikove 15 áño. Babiloniaygua mburuvicha guasu omondo hembijokuái omomaitei hag̃ua Ezequíaspe okuerahaguére. Haʼe katu ivýrogui ohechaukapa chupekuéra umi mbaʼe porãita orekóva. Upévare Jehová heʼi ko mbaʼe Isaías rupive: “Outahína ára ojereraha hag̃ua Babilóniape opa mbaʼe nde rógape oĩva, opa mbaʼe ombyatyvaʼekue nde rukuéra ypykue koʼag̃aite peve” (Isaías 39:​5, 6). Koʼã mbaʼe oiko 100 áño rupi upe rire.

Porandukuéra:

38:8. Mbaʼe grádaguipa omboguevi Jehová pe kuarahyʼã? Setecientos áño Jesús  ou mboyve, Egipto ha Babilóniape ojeporuvaʼekue umi reloj kuarahy. Upévare umi gráda ikatuhína peteĩ párte oĩva peteĩ reloj kuarahýpe orekovaʼekue Acaz, Ezequías ru. Térã ikatu umi gráda oĩva Rréi róga ryepýpe. Oiméne ijykére oĩraʼe peteĩ kolúmna ha upéva omokuarahyʼã umi gráda ha oiporu hikuái oikuaa hag̃ua óra.

Mbaʼépa ñanemboʼe:

36:​2, 3, 22. Sebnápe oñemosẽ ha ndahaʼevéima rréi róga rerekua. Péro osegi ombaʼapo rréipe g̃uarã oipytyvõvo pe karai opytávape hendaguépe (Isaías 22:​15, 19). Peichahágui ojepeʼáramo ñandehegui peteĩ rresponsavilida Jehová organisasiónpe, jasegivaʼerã jajapo oimeraẽ mbaʼe ikatúva Jehovápe g̃uarã.

37:​1, 14, 15; 38:​1, 2. Jajepyʼapy jave ñañemboʼevaʼerã Jehovápe ha jajerovia hese.

37:​15-​20; 38:​2, 3. Umi Asiriaygua oñemoĩramo guare Jerusalén rehe, Ezequías ojepyʼapy ndoipotáigui oñemongyʼa Jehová réra. Avei oikuaávo omanotaha Ezequías ndojepyʼapýi ijehe. Haʼe ningo ojepyʼapyeterei omanóramo g̃uarã taʼyraʼỹre. Upéicharõ ndaiporimoʼãvéima David familiarégui peteĩ ogovernáva. Ha avei mávapa omoakãta chupekuéra oñorairõvo Asiriaygua ndive. Ezequías ojapohaguéicha, ñande avei jaipotave opa mbaʼégui toñemopotĩ Jehová réra ha toiko haʼe oipotáva. Upéva iñimportanteve ñane salvasióngui.

38:​9-​20. Ko purahéi rupive Ezequías ohechauka iñimportanteveha ñamombaʼeguasu Jehovápe oimeraẽ mbaʼégui.

‘OÑEMOPUʼÃ JEVÝTA’

(Isaías 40:1–59:21)

Heʼipa rire Jerusalén oñehunditaha ha umi hénte ojeguerahataha upégui, Isaías heʼi oñemopuʼã jevytaha (Isaías 40:​1, 2). Isaías 44:28 heʼi ‘Jerusalén oñemopuʼã jevýta’. Umi Babiloniaygua omombaʼeguasu taʼangakuéra. Koʼãvagui ‘oikóta mbaʼe pohýi’ mymba apére ojehupi hag̃ua (Isaías 46:1). Babilonia oñehundíta avei. Koʼã mbaʼe oiko 200 áño upe rire.

Jehová omeʼẽta hembiguái “tetãnguéra resapehárõ” (Isaías 49:6). Umi “yvagakuéra” térã Babiloniaygua mburuvichakuéra “tatatĩcha opa reíta”, ha yvypóra upepegua “ñatiʼũicha omanombáta”. Jerusalénpe katu ojeʼe: “Sión, kuñataĩ reñemyakãsãvaʼekue, eipeʼa mbaʼe pohýi nde atiʼýgui” (Isaías 51:6; 52:2). Jehová heʼi umi hese oñemoag̃uívape: ‘Ajapóta penendive ñeʼẽ ñomeʼẽ (kompromíso) opa árape g̃uarãva, umi mborayhu ñeʼẽ ameʼẽvaʼekue Davídpe’ (Isaías 55:3). Iñeʼẽrendúramo hikuái Jehovápe, haʼe ‘ombovyʼáta’ chupekuéra (Isaías 58:14). Ojapóramo hikuái ivaíva katu ‘oñemomombyrýta Ñandejáragui’ (Isaías 59:2).

Porandukuéra:

40:​27, 28. Mbaʼérepa umi Israelgua heʼi: ‘Ñandejára nañanderechakuaái, mbaʼeve  ndoikuaaséi ñandehegui’? Oiméne umi Israelgua oikóva Babilóniape oimoʼã Jehová ndohechaiha umi mbaʼe vai oikóva hesekuéra. Upévare Jehová omomanduʼa chupekuéra haʼe ohechapaiteha oikóva Babilóniape. Jehová ningo Yvy apohare arakaʼeve ndaijukuʼái ha naikaneʼõiva.

43:​18-​21. Mbaʼérepa ojeʼe umi hudío ou jeývape Babilóniagui ‘ani hag̃ua imanduʼa ymaguarére? Upéva ndeʼiséi ndovaleiha imanduʼa hikuái mbaʼéichapa yma Jehová osalva chupekuéra. Péro Jehová oipota omombaʼeguasu chupe hikuái peteĩ mbaʼe “ipyahúva” ojapótava rehe. Pór ehémplo, ohokuévo Jerusalénpe oñangareko hesekuéra ohasávo desiértore. Upéicha avei pe “aty guasu” osẽva “jehasa asy guasúgui” omombaʼeguasúta Jehovápe hetaiterei mbaʼére (Apocalipsis [Revelación] 7:​9, 14, BNP).

49:6. Jesucristo, pe Mesías, opredikavaʼekue Israelguápente, mbaʼérepa upéicharõ ojeʼe ‘ohesapeha tetãnguéra’? Umi mbaʼe oikóva Jesús omano rire ohechauka mbaʼérepa. La Biblia heʼi Isaías 49:6 oñekumpliha Jesús remimboʼekuérare (Hechos 13:​46, 47). Koʼág̃a rupi, umi ohótava yvágape ha pe aty guasu ‘ohesape tetãnguérape’, opredikávo “Yvy pahaite peve” (Mateo 24:14; 28:​19, 20).

53:10. Mbaʼérepa Jehová ojopysevaʼekue itaʼýrape jeiko asýpe? Jehová ningo oporoporiahuvereko ha imbaʼeporã, upévare katuete hasýneraʼe chupe ohechávo itaʼýra ohayhuetéva ohasa asy. Upéicharamo jepe ovyʼa ohechávo Jesús iñeʼẽrenduha, ha avei oikuaágui umi mbaʼe porã ojehupytýtava omanohaguére (Proverbios 27:11; Isaías 63:9).

53:11. Mbaʼe oikuaa rupípa Jesús “oipeʼáta ivaívagui hetápe”? Jesús ningo heta mbaʼe oikuaavaʼekue ou rupi Yvy ape ári oiko yvypóraicha. Haʼe heta ohasa asy ha omano (Hebreos 4:15). Upéicha omeʼẽ peteĩ sakrifísio ñandepeʼa hag̃ua pekádogui. Péva rupi umi ohótava yvágape ha pe aty guasu ikatu oĩ porã Ñandejára renondépe (Romanos 5:19; Santiago 2:​23, 25).

56:6. Mávapa “umi mombyrygua”, ha mbaʼéichapa ovenefisia chupekuéra Jehová pákto? “Umi mombyrygua” niko hína umi “ambue ovecha” (Juan 10:16). Haʼekuéra oñevenefisia Jehová pákto pyahúgui iñeʼẽrendúvo chupe ha ojapóvo opa mbaʼe ojeruréva. Avei Jehová omboʼe chupekuéra ha umi ohótava yvágape, ha oipytyvõ hikuái ojepredika hag̃ua.

Mbaʼépa ñanemboʼe:

40:​10-​14, 26, 28. Jehová imbarete, ñanderayhu, ipuʼakapa ha iñarandu katu ndaijapýrai. Yvypóra oikuaáva ndahaʼéi mbaʼeve Jehová oikuaáva rovake.

40:​17, 23; 41:29; 44:9; 59:4. Umi polítiko ha taʼangakuéra “ndahaʼéi mbaʼeve”. Jajerovia rei hesekuéra.

42:​18, 19; 43:8. Tapichakuéra omboykévo Ñandejára Ñeʼẽ ha nohenduséivo “tembiguái jeroviaha ha iñarandúvape”, haʼete ku ndohechái ha nohendúiva Jehová heʼíva (Mateo 24:45).

43:25. Jehová oheja rei yvypóra rembiapo vaikue Héra rehehápe. Jajeise pekádo ha ñemano poguýgui ha jaikose opaite árare, péro iñimportantevéva hína Jehová réra toñemopotĩ.

44:8. Jehová ñanepytyvõ, haʼe katuete ñanemoʼãta opa mbaʼe vaígui. Aníkena jakyhyje ñamombeʼu hag̃ua Jehovaha Ñandejára tee (2 Samuel 22:​31, 32.)

44:​18-​20. Ñamombaʼeguasúramo taʼangakuéra ohechauka oikeha ñande pyʼapýpe mbaʼe vai. Jehovápe añoite ñamombaʼeguasuvaʼerã ñande pyʼaite guive.

46:​10, 11. Jehová añoite ikatu ‘ojapo opa mbaʼe oipotáva’, upéva ohechauka haʼe Ñandejára teeteha.

48:​17, 18; 57:​19-21. Iporã jajerovia Jehová ñandesalvataha, ñañemoag̃ui hese ha jajapo  haʼe heʼíva. Upéicharõ ñande pyʼaguapy tuicháta ysyry guasúicha, ha umi mbaʼe porã jajapóva hetáta marpegua oládaicha. Ndojapóiva Ñandejára Ñeʼẽ heʼíva katu ojogua “yguasu pochýpe”, arakaʼeve ndaipyʼaguapýi.

52:​5, 6. Umi Babiloniaygua ojavy oimoʼãvo Jehová ikangyha. Haʼekuéra ndohechakuaái umi Israelgua hoʼahague ipoguypekuéra ndojapóigui Jehová heʼívante. Ñande rapichápe hoʼa vai jave naiporãi ñapensa vai upévare.

52:​7-9; 55:​12, 13. Oĩ mbohapy mbaʼe ñanembovyʼáva japredika jave. Umi tapicha ipyʼaporãva ha oikuaaséva Jehovápe ovyʼa ñanderechávo. Jahecha Jehovápe ‘ñande resa tee rupi’, upéva heʼise ñaime porãha hendive. Ha avei jarekógui hetaiterei mbaʼe omombaretéva ñande jerovia.

52:​11, 12. Ikatu hag̃uáicha jagueraha “Ñandejára rembiporu”, térã umi mbaʼe omeʼẽva ñandéve jaservi hag̃ua chupe, ñande reko potĩ vaʼerã ha jaadora Jehovápe añoite.

58:​1-​14. Ndovaléi mbaʼeverã jaadora Jehovápe jajehechauka hag̃uánte ha ñande reko porã guaʼúnte. Umi Jehovápe oservíva ojapovaʼerã upéva ipyʼaite guive ha ojoayhu añete vaʼerã (Juan 13:35; 2 Pedro 3:11).

59:15b-19. Jehová ohecha yvyporakuéra ojapóva, ha omyatyrõ umi mbaʼe haʼe ohecháva tekotevẽha.

‘NDÉTA JEHOVÁ PÓPE, MBURUVICHA GUASU AKÃ REHEGUA JEGUAKA PORÃICHA’

(Isaías 60:1–​66:24)

Isaías omombeʼu mbaʼéichapa Jehová adorasión imbarete jeýta. Upéva oñekumpli yma ha avei koʼág̃a. Isaías 60:1 heʼi: “Epuʼã Jerusalén, mimbipápe ejahoʼi, péina og̃uahẽma nde resapeha ha Ñandejára reko mimbipa hendy nde ári!”. Upéi heʼi koʼã mbaʼe Siónpe: ‘Ndéta Jehová pópe, mburuvicha guasu akã rehegua jeguaka porãicha’ (Isaías 62:3).

Isaías oñemboʼe umi Israelguáre. Haʼekuéra ojegueraháta Babilóniape péro upéi oñembyasýta hembiapo vaíre ha ojevýta Jehovápe (Isaías 63:15–64:12). Isaías omombeʼu mbaʼéichapa ojoavy umi oservi añetéva Ñandejárape ha umi oserviguaʼúnteva. Upéi omombeʼu umi mbaʼe porãita Jehová omeʼẽtava isiervokuérape (Isaías 65:1–66:24).

Porandukuéra:

61:​8, 9. Mbaʼépa hína pe kompromíso ‘opa ára g̃uarã’ Jehová ojapóva ha mávapa “iñemoñarekuéra”? Upéva hína pe pákto pyahu Jehová ojapóva umi yvágape ohótava ndive. “Iñemoñarekuéra” katu ‘ambue ovechakuéra’; umi tapicha ojapóva umi ohótava yvágape heʼíva (Juan 10:16).

63:5. Mbaʼéichapa omombarete Ñandejárape ipochy rendy? Ndahaʼéi Ñandejára ipochýva ha ndojejokokuáaiva. Haʼe ndaipochyreíri ha upéva omomýi chupe okastiga hag̃ua iñañávape.

Mbaʼépa ñanemboʼe:

64:6. Yvyporakuéra imperfékto ndaikatúi ojesalva ijupe. Haʼekuéra ndaikatúi omopotĩ hembiapo vai, ha umi mbaʼe porã ojapóva katu ojogua trápo kyʼápe (Romanos 3: 23, 24).

65:​13, 14. Jehová omeʼẽmbaite isiervokuéra oikotevẽva omombarete hag̃ua ijerovia.

66:​3-5. Jehová ndaijaʼéi umi hovamokõivare.

‘Tapenerenyhẽ vyʼágui’

Mbaʼeichaitépa ovyʼáneraʼe umi Israelgua oikuaávo oho jeytaha Jerusalénpe. Jehová heʼi chupekuéra: “Tahenyhẽ tory ha vyʼágui opa árape g̃uarã upe ajapótava rehe: ajapóta Jerusalén horýva ha tetãygua ipype ovyʼáva” (Isaías 65:18).

Koʼág̃a avei pytũ ojahoʼi ko Yvy ha tetãnguéra pytũnguýpe oiko (Isaías 60:2). ‘Heta ojehasa asy hína’ (2 Timoteo 3:1). Upévare ñanekyreʼỹ jaleévo Isaíaspe mbaʼéichapa Jehová ñandesalváta (Hebreos 4:12).

[Nóta]

[Nóta oĩva taʼanga ndive páhina 8]

Mbaʼérepa Ezequías ojerure Jehovápe osalva hag̃ua chupe umi Asiriaygua oñemoĩvo hese?