Ñamombaʼeguasu oñondivepa Jehová réra

“Oñondive ñamombaʼeguasu Ñandejárape, héra jaropurahéi oñondivepa.” (SALMO 34:​4, [34:3 NM].)

1. Mbaʼe ehémplo iporãvapa omeʼẽ Jesús oĩ aja ko Yvy ape ári?

 JESÚS ha ijapostolkuéra oñembyaty peteĩ ógape oĩva Jerusalénpe ha opurahéi Jehovápe. Upéva oiko 14 de nisán pyhare, áño 33-pe (Mateo 26:30). Upérõ haʼekuéra ipahaitéma oĩ oñondive ko Yvy ape ári, upéicharõ jepe opurahéi omohuʼã hag̃ua pe rreunión. Oñepyrũ guive opredika Jesús omombaʼeguasu Itúvape ha kyreʼỹme oikuaauka Héra (Mateo 4:10; 6:9; 22:​37, 38; Juan 12:28; 17:6). Jesús heʼi avei pe salmísta heʼihaguéicha: “Oñondive ñamombaʼeguasu Ñandejárape, héra jaropurahéi oñondivepa” (Salmo 34:​4, [34:​3, NM]). Iporãitéta piko jajapóramo upéicha!

2, 3. a) Mbaʼérepa jaʼe Salmo 34-pe oĩha profesía? b) Mbaʼépa jahecháta ko párte ha pe oúvape?

² Opuraheipa rire hikuái, apóstol Juan ohecha oñemosaingóvo yvyráre Jesúspe ha mokõi vandído ijykére. Umi soldádo Romaygua ohetymamopẽ umi vandído omano pyaʼeve  hag̃ua. Péro Jesús omanóma ha upévare nomopẽi chugui hetyma. Juan omombeʼu ko mbaʼe oikoha oñekumpli hag̃ua avei Salmo 34 heʼíva: “Peteĩnte jepe ikangue nomopẽi chugui” (Juan 19:​32-36; Salmo 34:21 [34:​20, NM]).

³ Salmo 34-pe oĩ heta mbaʼe oipytyvõva kristianokuérape. Upévare ñepyrũrã jahecháta mbaʼépa ohasavaʼekue David ohaírõ guare ko salmo. Ha upéi katu mbaʼéichapa ñanepytyvõ.

David okañy Saúlgui

4. a) Mbaʼérepa ojeporavo Davídpe rreirã? b) Mbaʼérepa Saúl “ohayhueterei” Davídpe?

⁴ David imitãrõ guare Saúl ogoverna Israel. Péro upéi Saúl naiñeʼẽrenduvéi ha upévare Ñandejára noipytyvõvéi chupe. Upévare Samuel heʼi Saúlpe: “Péicha Ñandejára omondoróma koʼág̃a ndehegui tetã Israel. Oipeʼáma ndehegui omeʼẽ hag̃ua ambuépe iporãvéva ndehegui” (1 Samuel 15:28). Upéi Jehová omondo Samuélpe oiporavo hag̃ua rreirã Jesé raʼy pahaguépe. Upéva hína David. Upérõ Ñandejára noĩvéima Saúl ndive, ha upévare haʼe ndahetiaʼevéi ha ipire vai. Upémaramo oñehenoiuka Davídpe ombopu hag̃ua chupe árpa. David ombopúva ombyetiaʼe Saúlpe ha haʼe “ohayhueterei chupe” (1 Samuel 16:​11, 13, 21, 23, ÑÑM).

5. Mbaʼérepa Saúl ndaijaʼevéi Davídre, ha mbaʼépa ojapo David upévare?

⁵ Upéi ojehecha porã Jehová oipytyvõha Davídpe. Haʼe ojuka Goliátpe, peteĩ kuimbaʼe tuichapajepéva. Oñorairõkuaaiterei ha upévare oñemombaʼe chupe Israélpe. Ohechávo Jehová oipytyvõha Davídpe, Saúl iselóso ha ndaijaʼevéi hese. Dos vése ojakutusemoʼã chupe ilánsape ombopu aja hiʼárpa, péro David ojehekýi chugui. Ha ojapo jeývo upéva, David ohechakuaa okañyvaʼerãha upégui. Saúl katu ojukasénte voi chupe, upévare David ohómante Israélgui (1 Samuel 18:11; 19:​9, 10).

6. Mbaʼérepa Saúl ojukaukapaite umi hénte oikóva Nóbpe?

 ⁶ Okañývo ohóvo Israélgui David og̃uahẽ táva Nóbpe. Upépe oĩ Jehová róga. David ojerure pe saserdóte guasúpe tembiʼu, hoʼu hag̃ua haʼe ha umi iñirũnguéra. Saúl ipochyeterei oikuaávo pe saserdóte guasu omeʼẽha Davídpe ijaviorã ha Goliat espadakue. Upévare ojukaukapaite umi hénte oikóva táva Nóbpe ha ijapytepekuéra 85 saserdóte (1 Samuel 21:​1, 2; 22:​12, 13, 18, 19; Mateo 12:​3, 4).

David ojesalva jey

7. Mbaʼérepa Gat naiporãi David okañy hag̃ua?

⁷ Táva Nóbgui David osẽ oho Gátpe, opytáva 40 kilómetro upégui. Upéva oĩ Filistéape. Upépe onasevaʼekue Goliat ha upérõ ogoverna rréi Akís. Oiméne David oimoʼã Saúl ndohekamoʼãiha chupe upépe. Péro pe rréi rembiguaikuéra ohechávo Davídpe imanduʼa hese. David oikuaávo upéva “okyhyje Gat ruvicha guasu Akísgui” (1 Samuel 21:​11-13 [21:​10-12, NM]).

8. a) Mbaʼépa heʼi Salmo 56 David ohasavaʼekuére Gátpe? b) Mbaʼéichapa David ojesalva jey?

⁸ Upéi umi Filisteaygua ojagarra Davídpe. Ko mbaʼe oikórõ guare oiméne David ohai ko salmo porãite Jehovápe: “Emoĩ che resay Ne mbaʼyrúpe” (Salmo 56:​8, S ha iñepyrũme heʼíva). Péicha David ohechauka ogueroviaha Jehová oñangarekotaha hese ojejopy vai jave. Avei David oñembotavyraiguaʼu ombotavy hag̃ua pe rréipe. Ohechávo upéva rréi Akís omongavaju hembiguaikuérape ogueruhaguére hógape peteĩ “kuimbaʼe tarova”. Jehová oipytyvõ Davídpe, upévare omosẽ chupe hikuái upe távagui ha péicha ojesalva jey (1 Samuel 21:​13-15).

9, 10. Mbaʼérepa David ohai Salmo 34, ha mávarepa imanduʼáne avei ohaírõ guare?

⁹ La Biblia ndeʼíri David irũnguéra ohohague hendive Gátpe, térãpa opyta omangea Israel ypýpe. Péro ovyʼáneraʼe hikuái ojotopávo David ndive ha ohendúvo mbaʼéichapa Jehová osalva chupe. David imanduʼa ko mbaʼére ohaívo Salmo 34. Upéva ningo jahecha ko salmo oñepyrũvo. Salmo 34:​2-8-pe [34:​1-7, NM] David omombaʼeguasu Jehovápe osalvahaguére chupe ha omokyreʼỹ iñirũnguérape ojapo hag̃ua avei upéva (Salmo 34:​4, 5, 8 [34:​3, 4, 7, NM]).

¹⁰ David ha iñirũnguéra oho okañy peteĩ itakua opytáva Adulam sérro mbytére. Ko táva opyta 15 kilómetro Gátgui. Upépe oho hendapekuéra heta kuimbaʼe Israelgua ndovyʼavéiva Saúl poguýpe (1 Samuel 22:​1, 2). David imanduʼáne avei iñirũnguérare ohaívo Salmo 34:​9-23 [34:​8-22, NM]. Umi mbaʼe heʼíva ñanepytyvõta heta mbaʼépe ha upévare iporã ñahesaʼỹijo ko salmo porãite.

Ñamotenondépa David omotenondevaʼekue?

11, 12. Mbaʼe mbaʼérepa ñamombaʼeguasuvaʼerã Jehovápe?

¹¹ “Amombaʼeguasúta opa ára Ñandejárape, chupe aropurahéita tapiaite.” (Salmo 34:2 [34:​1, NM].) David katuete oiko asýne raʼe oĩ aja Gátpe, upéicharõ jepe haʼe omombaʼeguasu meme Jehovápe jahechaháicha koʼápe. Iporãitéta jajapóramo avei upéva jajejopy vai jave! Ñamombaʼeguasuse Jehovápe ñaime jave eskuélape, ñande travahohápe, ñane ermanokuérandi, térã japredika jave. Hetaiterei mbaʼe ningo Haʼe omeʼẽ ñandéve. Pór ehémplo, ikatu ñaaprende heta mbaʼe ñamañávo Jehová rembiapokuére. Ñamombaʼeterei avei opa mbaʼe iñorganisasión ojapóva. Jehová ojevale yvyporakuéra imperféktore ojapo hag̃ua heta mbaʼe guasu. Ni mbaʼevéicharõ ndaikatúi ñambojoja Ñandejára ojapóva yvyporakuéra ojapóvare. Katuete ñapensa David opensahaguéicha. Haʼe heʼi: ‘Ore Jára, ndaipóri ndeichagua. Ndaipóri ojapóva umi mbaʼe nde rejapóva’ (Salmo 86:8).

¹² David ojapohaguéicha ñande avei ñamombaʼeguasuse Jehovápe umi mbaʼe porãita ojapóvare. Avei javyʼa jaikuaágui Jesús ogovernamaha Ñandejára Rréinope. Haʼe ningo ou David  familiarégui (Apocalipsis [Revelación] 11:15). Ko múndo aña oñehundipotaitéma, ha hetaiterei tapicha ikatu omano ndojepredikáirõ chupekuéra. Tekotevẽterei ningo ñamboʼe chupekuéra Ñandejára Goviérno ojapótava yvyporakuérare ha ñaipytyvõ omombaʼeguasu hag̃ua Jehovápe ñanendive. Upévare koʼág̃a ñañehaʼãmbaitevaʼerã ñamboʼe ñande rapichakuérape pe “marandu porã” (Mateo 24:14).

13. a) Mávapepa omombaʼeguasu David ha mávapepa oipytyvõ upéva? b) Mbaʼérepa umi tapicha ipyʼaporãva oike ohóvo kongregasiónpe?

¹³ ‘Ñandejára ombovyʼa che rekove. Heko potĩva tohendu ha tovyʼa.’ (Salmo 34:3 [34:​2, NM].) David ndojejapói ivalehaguére, pór ehémplo ombotavyhaguére rréi Akíspe. Haʼe ohechakuaa Jehová oñangarekohague hese ha osalva chupe (Proverbios 21:1). David omombaʼe Jehová ojapóva, ndojeroviái ijehe ha umi heko potĩva ohechávo upéva oñemoag̃ui avei Jehováre. Jesús avei omombaʼe Jehová réra ha péicha oipytyvõ umi ipyʼaporãvape oñemboja hag̃ua Ñandejárare. Koʼág̃a rupi umi tapicha ipyʼaporãva opa tetãygua oike ohóvo kongregasiónpe ohechávo mbaʼéichapa ombaʼapo umi kristiáno ohótava yvágape. Jesús omoakã koʼã kristiánope (Colosenses 1:18). Umi tapicha ipyʼaporãva ovyʼa ohendúvo mbaʼeichaitépa Ñandejára siervokuéra omombaʼeguasu Jehová réra. Ha ovyʼa avei Ñandejára espíritu oipytyvõhaguére chupekuéra ontende hag̃ua la Biblia (Juan 6:44; Hechos 16:14).

Ñane rreunionkuéra omombarete ñande jerovia

14. a) Omombaʼeguasúpa David Jehovápe haʼeñohámente? b) Mbaʼéichapa Jesús omombaʼeguasu Ñandejárape opavave rovake?

¹⁴ “Oñondive ñamombaʼeguasu Ñandejárape, héra jaropurahéi oñondivepa.” (Salmo 34:4 [34:​3, NM].) David nomombaʼeguasuséi Jehovápe haʼeñohámente. Upévare omokyreʼỹ iñirũnguérape oñondivepa omombaʼeguasu hag̃ua Ñandejára réra. David ojapohaguéicha, Jesucristo ovyʼa avei omombaʼeguasúvo Jehovápe opavave rovake. Upéva ojapo umi hudío oñembyatyhápe, umi arete ojejapóva Jerusalénpe ha hemimboʼekuéra apytépe (Lucas 2:49; 4:​16-19; 10:21; Juan 18:20). Ñande avei vyʼápe ñamombaʼeguasu tapiaite Jehovápe ñane ermanokuérandi, koʼýte jahechávo ‘koʼág̃a hiʼag̃uimaha Ñandejára ára’ (Hebreos 10:​24, 25).

15. a) Mbaʼéichapa oipytyvõ iñirũnguérape umi mbaʼe David ohasavaʼekue? b) Mbaʼéichapa ñanepytyvõ ñane rreunionkuéra?

 ¹⁵ “Ñandejárape añemboʼe, haʼe cherendu, ha oipeʼapa chehegui umi mbaʼe chemongyhyjéva.” (Salmo 34:5 [34:​4, NM].) David omombaʼeterei Jehová ohenduhaguére chupe. Haʼe heʼi avei:“Che, tekove poriahu, Ñandejárape añemboʼe. Haʼe cherendu ha chepeʼa jejopy vaígui” (Salmo 34:7 [34:​6, NM]). Ñañembyatývo ñane ermanokuérandi rreunionhápe ikatu ñamombeʼu mbaʼéichapa Jehová ñanepytyvõ jagueropuʼaka hag̃ua provlemakuéra. Koʼã mbaʼe omombarete ñane ermanokuéra jerovia. Upéicha avei David omokyreʼỹvaʼekue iñirũnguérape. “Umi Ñandejára rehe ojeroviáva vyʼágui ojajaipáne, ha hova noñomichéne ñemotĩgui” (Salmo 34:6 [34:​5, NM]). David irũnguéra okañýramo jepe rréi Saúlgui, notĩri upévare. Ojerovia hikuái Ñandejára oipytyvõha Davídpe ha ojehecha hesekuéra ovyʼaha. Upéicha avei ovyʼa umi oserviramóva Jehovápe ha umi aréma oservíva Chupe. Ha ohechávo mbaʼéichapa Jehová oipytyvõ chupekuéra oñehaʼã iñeʼẽrendu chupe ára ha ára.

Javyʼa umi ánhel ñanepytyvõhaguére

16. Mbaʼéichapa ñanepytyvõ Jehová anhelkuéra?

¹⁶ ‘Ñandejára ánhel oñangareko ha oguenohẽ jejopy vaígui opa umi chugui okyhyjévape.’ (Salmo 34:8 [34:​7, NM].) David nopensái Jehová oñangarekoha hesénte. Jehová ningo oiporavo chupe rreirã, péro David oikuaa Ñandejára anhelkuéra oñangarekoha entéro isiervokuérare. Koʼág̃a rupi avei Jehová oñangareko ñanderehe. Heta tetãme oñehundisemoʼã testigos de Jehovápe. Upéva oiko Alemániape umi nazi tiémpope, avei Angola, Malaui ha Mozambíquepe. Péro ndaikatúi oñehundi chupekuéra. Ha koʼág̃a katu hetavéntema umi testígo upérupi ha oñondivepa omombaʼe hikuái Jehová réra. Mbaʼérepa upéva? Jehová ningo oñangareko hesekuéra hiʼanhelkuéra rupive (Hebreos 1:14).

17. Mbaʼéichapa ñanepytyvõ Jehová anhelkuéra?

¹⁷ Avei umi ánhel ombaʼapo ani hag̃ua oñemongyʼa Jehová organisasión. Haʼekuéra oipytyvõ oñemosẽ hag̃ua kongregasióngui umi hembiapo vaíva (Mateo 13:41; 18:​6, 10). Jepe ndajahechakuaái, heta vése ñanepytyvõ jagueropuʼaka hag̃ua provlemakuéra. Avei umi ánhel oñangareko ñanderehe ani hag̃ua ñañemomombyry Ñandejáragui. Iñimportantevéva katu, ñanepytyvõ hikuái japredika hag̃ua opavavépe pe “marandu opaʼỹva”; oĩramo jepe tapicha oikóva ipeligrosohápe (Apocalipsis [Revelación] 14:6). Ñane puvlikasionkuérape hetaiterei vése oñemombeʼu mbaʼéichapa umi ánhel ñanepytyvõ. Upévare ikatu jaguerovia koʼã mbaʼe oikoha. *

18. a) Mbaʼépa tekotevẽ jajapo umi ánhel ñanepytyvõ hag̃ua? b) Mbaʼépa jahecháta pe párte oúvape?

¹⁸ Umi ánhel oñangareko hag̃ua ñanderehe, tekotevẽ ñamombaʼeguasu tapiaite Jehová réra jajejopy vaíramo jepe. Ñanemanduʼákena Jehová ánhel oñangarekoha ‘umi Jehovágui okyhyjévare’. Mbaʼépa heʼise ko mbaʼe? Mbaʼéichapa jakyhyje Ñandejáragui? Mbaʼérepa Ñandejára ñanderayhúramo oipota jakyhyje chugui? Pe párte oúvape jahecháta koʼã mbaʼe.

[Nóta]

Mbaʼépa ere chupe?

• Mbaʼépa ohasavaʼekue David imitãme?

• David ojapohaguéicha, mbaʼépa ñamotenondevaʼerã?

• Mbaʼéichapa jahechauka ñamombaʼeha ñane rreunionkuéra?

• Mbaʼéichapa Jehová anhelkuéra ñanepytyvõ?

[Porandu ñahesaʼỹijóva]

[Nóta oĩva taʼanga ndive páhina 23]

(Emaña pe kuatiañeʼẽre rehecha hag̃ua osẽ hagueichaite ko párte)

Ramá

Gat

Ziqlag

Guibeah

Jerusalén

Adulam

Queilá

Hebrón

Zif

Hores

Maón

Nob

Belén

En-guedí

Carmelo

Mar Salado

[Roagradese]

Mápa: ojeporu Pictorial Archive (Near Eastern History) Est. and Survey of Israel mbaʼéva

[Nóta oĩva taʼanga ndive páhina 23]

Oikóramo jepe okañy Saúlgui, David omombaʼeguasu Jehová réra

[Nóta oĩva taʼanga ndive páhina 25]

Umi mbaʼe porã oñemombeʼúva rreunionhápe ñanemokyreʼỹ