Javyʼákena jakyhyjévo Jehovágui

‘Pekyhyjéke Ñandejáragui peẽ penemarangatúva! Ndaipóri tekotevẽ umi ichugui okyhyjévape g̃uarã.’ (SALMO 34:​9, Salmokuéra.)

1, 2. a) Omboʼépa umi rrelihión jakyhyjevaʼerãha Ñandejáragui? b) Mbaʼépa jahecháta koʼág̃a?

 HETA rrelihión omboʼe jakyhyjevaʼerãha Ñandejáragui. Haʼekuéra heʼi Ñandejára okastigaha iñañávape peteĩ tatarendýpe opa ára g̃uarã. Péro ko mbaʼe noĩri la Bíbliape. Ñandejára Ñeʼẽ heʼi Jehová ñanderayhu ha hekojojaha (Génesis 3:19; Deuteronomio 32:4; Romanos 6:23; 1 Juan 4:8). Oĩ avei rrelihión omboʼéva natekotevẽiha jakyhyje Ñandejáragui. Haʼekuéra heʼi Ñandejára imbaʼeporãitereiha ha oguerohoryha opavavépe iñañáramo jepe. Péro la Biblia ndeʼíri upéva (Gálatas 5:​19-21).

² La Biblia ñanemokyreʼỹ jakyhyje hag̃ua Ñandejáragui (Apocalipsis [Revelación] 14:7). Upévare jaikuaase koʼã mbaʼe: Mbaʼérepa Ñandejára ñanderayhúramo oipota jakyhyje chugui? Mbaʼéichapa jahechauka jakyhyjeha chugui? Mbaʼérepa iporã upéva? Salmo 34 ñanepytyvõta jaikuaa hag̃ua koʼã mbaʼe.

Mbaʼérepa jakyhyjevaʼerã Ñandejáragui

3. a) Iporãpa ndéve g̃uarã jakyhyje Ñandejáragui? b) Mbaʼérepa ovyʼa umi okyhyjéva Jehovágui?

³ Jehová ningo Mburuvicha yvága ha Yvýpe ha opa mbaʼe Apohare. Upévare jakyhyjevaʼerã chugui (1 Pedro 2:17). Péro upéva ndeʼiséi Jehová ipyʼahatãha ha jaikovaʼerãha kyhyjepópe chugui. Heʼise  guei ñamombaʼeha Ñandejárape ha ndajajaposeiha mbaʼeve ombopochýva chupe. Jakyhyjévo Ñandejáragui ñañeñandu porã ha ñanekyreʼỹ. Jehová ningo ovyʼa ha oipota ñande javyʼa avei (1 Timoteo 1:11). Péro upearã jajapovaʼerã Haʼe heʼíva ha oiméramo noĩporãmbái jajapóva ñakambiavaʼerã. Umi oñehaʼãva ojapo Ñandejára oipotáva ohecha añeteha David heʼíva: ‘Pehaʼã, ha pehecha Ñandejára imbaʼeporãha! Ovyʼarasa pe kuimbaʼe Hese ojeroviáva. Pekyhyjéke Ñandejáragui peẽ penemarangatúva! Ndaipóri tekotevẽ umi ichugui okyhyjévape g̃uarã’ (Salmo 34:​8, 9, S). Umi okyhyjéva Jehovágui noikotevẽi mbaʼeve oĩ porãgui Hendive.

4. Mbaʼéichapa David ha Jesús ohechauka ojeroviaha Jehováre?

⁴ Jahecha David omombaʼeha iñirũnguérape heʼívo hesekuéra ‘imarangatuha’. Ha ndeʼireíri, haʼekuéra ningo Ñandejára puevloygua ha hiʼariete haimetemete omano David rehehápe. Oikóramo jepe kañyhápe Saúlgui, David ojerovia Jehová omeʼẽtaha chupekuéra oikotevẽva. “Umi opa mbaʼe oguerekóva ág̃ante imboriahu ha iñembyahýine. Umi Ñandejárape oñemboʼéva noikotevẽichéne mbaʼeve” heʼi David (Salmo 34:11 [34:​10, NM]). Jesús omokyreʼỹ avei hemimboʼekuérape ojerovia hag̃ua Jehováre (Mateo 6:33).

5. a) Mbaʼeichaguápa rakaʼe umi tapicha ohendúva Jesúspe? b) Mávaguipa heʼi Jesús jakyhyjevaʼerãha?

⁵ Umi Jesúspe ohendúva apytépe oĩ vaʼekue heta tapicha imboriahuetereíva. Upévare haʼe ‘oiporiahuverekoiterei chupekuéra. Ohechakuaa haʼekuéra ikaneʼõ ha ikangypaha ku ovecha herekuaʼỹvaicha’ (Mateo 9:36). Osegínepa Jesúspe koʼã tapicha mboriahumi? Upéva ojapo hag̃ua okyhyjevaʼerã Jehovágui ndahaʼéi kuimbaʼégui. Jesús heʼi: ‘Ani pekyhyje umi ñande rete ojukávagui, ha upéi katu ndaikatuvéima ojapo mbaʼeve. Che haʼéta peẽme mávaguipa pekyhyjevaʼerã: “Pekyhyje oporojuka rire ikatúva oporomondo Gehénape. Upévagui pekyhyjevaʼerã”. “Noñemeʼẽingaʼu piko 5 guyraʼimi mokõi viru akytãʼimíre? Upéicharõ jepe, Ñandejára ndahesaráiri chuguikuéra. Peẽ katu, mboýpa pene akãrague jepe haʼe oikuaa. Aipórõ, ani pekyhyje. Peẽ penderepyve heta guyraʼígui” ’ (Lucas 12:​4-7).

6. a) Mbaʼépa heʼi Jesús omombaretéva kristianokuérape? b) Mbaʼérepa Jesús ikatu ohechauka mbaʼéichapa jakyhyjevaʼerã Jehovágui?

⁶ Heta vése ojejopy umi okyhyjévape Jehovágui oheja hag̃ua Chupe. Upéicha jave iporã imanduʼa hikuái Jesús heʼihague: ‘Oimeraẽ heʼíva opavave renondépe cherehe ojeroviaha, che Ñandejára raʼy ajuvaʼekue yvypóraicha, añeʼẽne avei hese Ñandejára  anhelkuéra renondépe. Ha oimeraẽ heʼíva opavave renondépe ndachekuaaiha, che avei haʼéne Ñandejára anhelkuéra renondépe, ndaikuaaiha chupe’ (Lucas 12:​8, 9). Jesús heʼíva omombarete heta kristiánope, koʼýte oikóramo hikuái umi tetã ojepersegihápe chupekuéra. Haʼekuéra ikatumiháicha omombaʼeguasu Jehovápe umi rreunión ha predikasión rupive ojapóva ñemihápe (Hechos 5:29). Jesús ohechauka ñandéve umi mbaʼe ojapovaʼekuére mbaʼéichapa jakyhyjevaʼerã Ñandejáragui (Hebreos 5:7). Ñandejára Ñeʼẽ heʼi Jesús rehe: ‘Jehová espíritu oguejyvaʼerã hese, okyhyje Ñandejáragui ha ovyʼaiterei’ (Isaías 11:​2, 3, NM). Upévare Jesús ikatu ñanemboʼe mbaʼérepa iporã jakyhyje Ñandejáragui.

7. a) Mbaʼépa ojapohína umi iñeʼẽrendúva Jesúspe? b) Mbaʼéichapa tuvakuéra ikatu ojapo David ojapohaguéicha?

⁷ Umi oikóva Jesús oikohaguéicha ha iñeʼẽrendúva chupe ojapohína ko mbaʼe David heʼivaʼekue: ‘Peju che raʼykuéra ha pehendu: pomboʼéta pekyhyje hag̃ua Jehovágui’ (Salmo 34:12 [34:​11, NM]). David heʼi iñirũnguérape ‘che raʼykuéra’, haʼekuéra ojeroviágui hese. Haʼe katu oipytyvõ chupekuéra oñemoag̃ui hag̃ua Ñandejárare ha oiko porã hag̃ua oñondive. Péicha omoĩ ehémplo neporãva tuvakuérape g̃uarã. Chupekuéra ojeʼe omongakuaa ha ohekomboʼe hag̃ua ifamíliape “Ñandejára oipotaháicha” (Efesios 6:4). Oñemongetáramo hikuái Ñandejárare ha ostudia meme la Biblia oñondive, umi mitã okyhyjéta Jehovágui ha ovyʼavéta (Deuteronomio 6:​6, 7).

Mbaʼéichapa jahechauka jakyhyjeha Ñandejáragui

8, 9. a) Mbaʼérepa iporã jakyhyje Jehovágui? b) Mbaʼépa jajapovaʼerã ani hag̃ua ñande jurúgui osẽ mbaʼe vai?

⁸ Jahechámakuri ikatuha javyʼa jakyhyjévo Jehovágui. David oporandu: “Oĩpa oiko pukuséva? Oĩpa vyʼápe oikoséva?” (Salmo 34:13 [34:​12, NM].) Jakyhyjevaʼerã Jehovágui jaikove are ha javyʼa hag̃ua. Ndahasyirasáningo jaʼe: “Akyhyje Ñandejáragui”, péro jahechaukavaʼerã upéva umi mbaʼe jajapóvare. Upévare David omombeʼu mbaʼéichapa ikatu jajapo ko mbaʼe.

⁹ “Anítei nde jurúgui osẽ mbaʼe vai ha anítei ndejapu.” (Salmo 34:14 [34:​13, NM].) Omokyreʼỹ rire kristianokuérape ojoayhu hag̃ua oñoermánoicha, apóstol Pedro oñeʼẽ ko salmo heʼívare (1 Pedro 3:​8-12). Ani hag̃ua ñande jurúgui osẽ mbaʼe vai, ndovaléi ñamosarambi chísme. Ivaieterei ningo ñañeʼẽ ñande rapicháre. Ñañeʼẽvaʼerã ñamokyreʼỹ hag̃uáicha ñande rapichápe ha ani jakyhyje jaʼe hag̃ua añetegua (Efesios 4:​25, 29, 31; Santiago 5:16).

10. a) Emombeʼu mbaʼépa jajapovaʼerã jaheja hag̃ua mbaʼe vai. b) Mbaʼéichapa jajapo iporãva?

¹⁰ “Eheja mbaʼe vai ha ejapo iporãva, eñehaʼã pyʼaguapýpe opa árape reiko.” (Salmo 34:15 [34:​14, NM].) Umi kristiáno tee ndojapói umi mbaʼe ombopochýva Jehovápe. Haʼekuéra ndahekokyʼái, nomañái taʼanga tieʼỹre, nomondái, ndojapói paje, noñorairõi, ndokaʼúi, ha ndojedrogái. Avei ndohechái pelíkula ha nohendúi músika omoporãva koʼã mbaʼe (Efesios 5:​10-12). Oñehaʼã katu hikuái ojapo iporãva. Japredika Ñandejára rréino ha ñamboʼe ñande rapichakuérape haʼehína pe iporãvéva ikatúva jajapo. Upéicha haʼekuéra ikatúta ojesalva (Mateo 24:14; 28:​19, 20). Iporã avei jastudia jaha hag̃ua rreunionhápe, ñameʼẽ kontrivusión, ñañangareko salónre ha ñaipytyvõ ermanokuéra oikotevẽvape.

11. a) Mbaʼéichapa David oñehaʼãvaʼekue oiko porã hapichándi? b) Mbaʼéichapa jaikóta ‘pyʼaguapýpe’ ñane ermanokuérandi?

¹¹ David oñehaʼãvaʼekue oiko porã hapichándi. Dos vése opyta porã chupe ojuka  hag̃ua Saúlpe, péro haʼe ndojaposéi upéva. Oñehaʼã guei oñeʼẽ porãnte pe rréipe jahechápa ndoikoporãjeýi hendive (1 Samuel 24:​8-11; 26:​17-20). Oĩ jave peteĩ mbaʼe ikatúva ombopochy ñane ermanokuérape, mbaʼépa iporã jajapo? ‘Ñañehaʼãvaʼerã jaiko pyʼaguapýpe opa árape.’ Upévare, oimérõ jajoavyʼimi peteĩ ermánondi tekotevẽ jajapo Jesús heʼivaʼekue: ‘Eñemoĩ porã raẽ ne ermánondi’. Upéi ae ikatúta jaservi porã Jehovápe (Mateo 5:​23, 24; Efesios 4:26).

Umi mbaʼe porã jahupytýva jakyhyje rupi Ñandejáragui

12, 13. a) Mbaʼe iporãvapa ohupyty umi okyhyjéva Ñandejáragui? b) Mbaʼépa omeʼẽta Jehová isiervokuéra iñeʼẽrendúvape?

¹² “Ñandejára oñangareko umi ijoheipyréva rehe, ha ohendu umíva ñemboʼe.” (Salmo 34:16 [34:​15, NM].) Ñandejára oñangarekovaʼekue David rehe ha péicha ohechauka añeteha ko mbaʼe. Jaikuaa rupi Jehová oñangarekoha ñanderehe javyʼa ha ñandepyʼaguapy. Jaguerovia haʼe omeʼẽtaha ñandéve ñaikotevẽva jajejopy vaivéramo jepe. Jaikuaa avei koʼẽrõitéma outaha ñande ári Gog de Magog ha og̃uahẽtaha Jehová “ára ipohyietereíva, avave ndaikatúiva ogueropuʼaka” (Joel 2:​11, 31; Ezequiel 38:​14-18, 21-23). Ijetuʼúramo jepe jahasátava upérõ, David heʼíva oikóta ñanderehe: “Ñandejára ohendu umi ijoheipyréva ñemboʼe ha og̃uenohẽ chupekuéra upe jejopy vaihágui” (Salmo 34:​18, [34:​17, NM]).

¹³ Javyʼaitéta jahechávo Jehová ombotuicha héra! Ajépa tuichaite mbaʼe koʼã jahechatavahína, arakaʼeve ñanderesaraiʼỹ hag̃uáicha! Umi oñemoĩva ñanderehe katu oñehundipáta. “Heko vaívagui katu [Jehová] ndoikuaaséi mbaʼeve, umíva opavaʼerã tesaráipe” (Salmo 34:​17, [34:​16, NM]). Mbaʼeichaitépa javyʼáta jahechávo Ñandejára ñandesalva ha jaike pe múndo pyahúpe.

Promésa ñanemokyreʼỹva ñaaguanta hag̃ua

14. Mbaʼépa ñanepytyvõta ñaaguanta hag̃ua?

¹⁴ Jajapo hag̃ua Jehová heʼíva ko múndo iñañaitévape ñanembaretevaʼerã. Jakyhyje Ñandejáragui tuicha ñanepytyvõ ñaneñeʼẽrendu hag̃ua chupe. Jaikógui koʼã ára ijetuʼúvape heta Jehová siervokuéra ohasa asyeterei ha upévare oñeñandu vai ha ikangy. Péro oñembojáramo Jehováre haʼe katuete oipytyvõta chupekuéra oaguanta hag̃ua. David ñanemokyreʼỹ heʼívo: “Ñandejára oñemboja umi ohasa asýva rehe ha og̃uenohẽ umi ikangypávape jejopy vaígui” (Salmo 34:​19, [34:​18, NM]). Ha heʼi avei: “Heta mbaʼe vai rupi imarangatúva ohasa, ha Ñandejára og̃uenohẽ  chupe umívagui” (Salmo 34:20 [34:​19, NM]). Jahasáramo jepe heta jejopy vaíre Jehová ñandepeʼakuaa umívagui.

15, 16. a) Mbaʼe ivaívapa oikuaa David oikohague ohaipa riremi Salmo 34? b) Mbaʼépa ñanepytyvõta jagueropuʼaka hag̃ua umi provléma?

¹⁵ Ohaipa riremi Salmo 34, David oikuaa peteĩ mbaʼe ivaietereíva oikohague táva Nóbpe. Saúl ojukaukapaite umi hénte oĩva upépe, ijapytépe umi saserdóte. David oikuaa upéva oikohague ikáusare ha oñeñandu vai upévare (1 Samuel 22:​13, 18-21). Katuete David oñemoag̃ui Jehováre ipyʼaguapy hag̃ua ha oñeñandu porãve opensávo oñemoingove jeytaha umi hekojojávape (Hechos 24:15).

¹⁶ Ñande avei ñandepyʼaguapy jaikuaávo oñemoingove jeytaha umi omanovaʼekuépe. Upéicha rupi ikatúta oñemyatyrõ oimeraẽ mbaʼe vai ojejapóva ñanderehe (Mateo 10:28). David ohechauka ojeroviaha Jehová oñangarekoha hekojojávare heʼívo: “Oñangareko ikangue rehe, peteĩnte jepe nopẽichéne” (Salmo 34:21 [34:​20, NM]). Koʼápe heʼíva oñekumpli Jesús rehe. Haʼe heta ohasa asy omano hag̃ua péro ni peteĩ ikangue ‘noñemopẽi’ chugui (Juan 19:36). Salmo 34:21 (34:​20, NM) oñekumpli avei umi yvágape ohótavare ha ‘ambue ovechakuérare’. Arakaʼeve ndoikomoʼãi hesekuéra mbaʼeve ikatuʼỹva oñemyatyrõ. Jaʼe porãsérõ g̃uarã, ni peteĩ ikangue noñemopẽmoʼãi avei (Juan 10:16).

17. Mbaʼe ivaívapa oikóta umi oñemoĩvare Jehová siervokuérare?

¹⁷ Umi iñañáva katu osẽ vaíta, ojeréta hiʼarikuéra umi mbaʼe vai ojapovaʼekue. “Iñañávape ojuka iñañangue, ha oñemyengoviáne umi ndaijaʼéivape imarangatúva rehe.” (Salmo 34:22 [34:​21, NM].) Umi oñemoĩva Ñandejára siervokuérare ohupytýta peteĩ mbaʼe nde vaipa jepéva. Jesucristo ou jey vove ‘ohundíta opa ára g̃uarã’ umi iñañávape (2 Tesalonicenses 1:9).

18. Mbaʼérepa pe “aty guasu” oĩ porã Jehová renondépe, ha mbaʼépa ohupytýta hikuái?

¹⁸ David heʼi koʼã mbaʼe porãite omohuʼãvo ko salmo: “Ñandejára onohẽ jejopy vaígui hembiguaikuérape, ha mbaʼeve ivaíva ndojejapoichéne umi hendápe og̃uahẽva rehe” (Salmo 34:23 [34:​22, NM]). David ogoverna cuarenta áñore. Omohuʼãvo igovernasión heʼi: ‘Ñandejára chepeʼavaʼekue opa jejopy vaígui’ (1 Reyes 1:29). David ojapohaguéicha, umi okyhyjéva Ñandejáragui koʼẽrõitéma imanduʼáta mbaʼéichapa Jehová oipeʼa chupekuéra jejopy vaígui. Heta Jesús ermanokuéra ohóma yvágape. Umi opytáva gueteri ko Yvy ape ári ombaʼapo pe “aty guasu” ndive oúva opa tetãgui. Ko aty guasu oĩ porã Jehová renondépe ojeroviágui Jesús ruguy oñeñohẽvaʼekuére. Cristo ogoverna aja Mil Áñore oñemopotĩta chupekuéra pekádogui ha ohupytýta hikuái perfeksión (Apocalipsis [Revelación] 7:​9, 14, 17; 21:​3-5, BNP).

19. Mbaʼépa ojapose pe “aty guasu”?

¹⁹ Mbaʼérepa ohupytýta hetaite mbaʼe porã pe “aty guasu” oservíva Ñandejárape? Okyhyjégui Jehovágui, omombaʼeguasu rupi Chupe ha ojapógui opa mbaʼe haʼe heʼíva. Añetehápe javyʼa koʼág̃a jakyhyjégui Jehovágui. Avei upéva ñanepytyvõ ñañakarama hatã hag̃ua pe ‘jeikove añeteguávare’. Upéva hína jaiko opa ára g̃uarã Ñandejára múndo pyahúpe (1 Timoteo 6:​12, 18, 19; Apocalipsis [Revelación] 15:​3, 4).

Nemanduʼápa?

• Mbaʼérepa jakyhyjevaʼerã Ñandejáragui ha mbaʼépa heʼise upéva?

• Mbaʼéichapa jaikovaʼerã jakyhyjéramo Jehovágui?

• Mbaʼe iporãvapa jahupyty jakyhyjégui Ñandejáragui?

• Mbaʼe promésapa ñanepytyvõ ñaaguanta hag̃ua?

[Porandu ñahesaʼỹijóva]

[Nóta oĩva taʼanga ndive páhina 28]

Umi okyhyjéva Jehovágui omombaʼeguasu chupe umi tetã ojepersegihápe chupekuéra

[Nóta oĩva taʼanga ndive páhina 30]

Japredikávo ñande rapichápe pe marandu porã jajapoñaína pe iporãvéva