Ñaneñeʼẽrendúkena Crístope ha hembiguái jeroviahápe

“Pe óga jára omoĩne ipoguýpe opa oguerekóva.” (MATEO 24:​45-​47.)

1, 2. a) Heʼiháicha la Biblia, mávapa ñande ruvicha? b) Mbaʼépa ohechauka Jesús omoakãha kongregasionkuérape?

 PETEĨ jevy Jesús heʼi: “Ani peñembohéra mburuvicha, Cristo añóntegui pende ruvicha” (Mateo 23:​10, BNP). Koʼápe Jesús ohechauka yvypóra nomoakãmoʼãiha hemimboʼekuérape. Haʼe añoite omoakãta chupekuéra yvága guive, Ñandejára voi omoĩgui chupe upearã. Jehová ningo ‘omoingove jey Crístope omanóva apytégui. Ha ichupete voi omoĩ kongregasión akãramo. Pe kongregasión niko Cristo rete’ (Efesios 1:​20-23, BNP).

² Crístope ningo ‘oñemoĩ kongregasión akãramo’, upévare opaite mbaʼe ojejapóva kongregasiónpe oĩ ipoguýpe. Haʼe ohecha mbaʼéichapa oĩhína umi kongregasión. Upéva ojehechaukavaʼekue apóstol Juánpe. Opakuévo primer síglo, haʼe ohai Apocalipsis ha upépe Jesús oñemoñeʼẽ siete kongregasiónpe. Cinco vése heʼi oikuaaha ‘opa ojapóva’ hikuái, mbaʼépa ojapo porã ha mbaʼépepa ojavy. Jesús omokyreʼỹ ha oñemoñeʼẽ koʼã kongregasiónpe oñekotevẽháicha (Apocalipsis [Revelación] 2:​2, 9, 13, 19; 3:​1, 8, 15). Ha katuete Jesús oikuaa porã avei mbaʼéichapa oĩ umi ótro kongregasión Asia Menor, Palestina, Siria, Babilonia, Grecia, Italia ha ambue hendápe (Hechos 1:8). Koʼág̃a piko upéicha avei?

 Peteĩ tembiguái jeroviaha

3. Mbaʼérepa iporã ñambojoja kongregasión Cristo retére ha jaʼe Cristo kongregasión akãha?

³ Oñemoingove jey rire ha oho mboyvemi yvágape Itúva rendápe, Jesús heʼi hemimboʼekuérape: “Oñemeʼẽmba chéve autorida yvágape ha Yvýpe”. Ha upéi heʼi: “Peikuaa, che aimeha penendive opa árape ko múndo paha peve” (Mateo 28:​18-20, BNP). Jesús omoakãta hemimboʼekuérape ha péicha oĩta hendivekuéra. Apóstol Pablo ohaírõ guare umi kristiáno Éfeso ha Colosasguápe ombojoja kongregasión ‘Cristo retére’ ha Crístore katu heʼi kongregasión akãha (Efesios 1:​22, 23; Colosenses 1:18). Ko ehémplo ojeporu ‘ojehechauka hag̃ua pe kongregasión oikotevẽha Cristo omoakã chupekuéra. Ha avei Cristo ojevaleha kongregasiónre ojapo hag̃ua hembipota’ (The Cambridge Bible for Schools and Colleges). Oñepyrũ rire ogoverna 1914-pe, mávarepa ojevale Jesús ojejapo hag̃ua haʼe oipotáva? (Daniel 7:​13, 14.)

4. Heʼiháicha Malaquías, mbaʼépa otopa Jehová ha Jesús oúvo ohecha itémplope ojejapóva?

⁴ Malaquías heʼi ‘Ñandejára’ ha ‘pe oñemboúva ha oguerúva’ marandu (Jesucristo oñepyrũ riremi ogoverna) ouha ohecha mbaʼépa ojejapo ‘itémplope’. Umi mbaʼe oikóva ohechauka 1918-pe ‘og̃uahẽhague ára oñepyrũ hag̃ua pe huísio Ñandejára rogayguakuéragui voi’ (Malaquías 3:1; 1 Pedro 4:​17). * Upérõ Ñandejára ou ohecha mbaʼépa ojapo umi heʼíva oadoraha chupe haʼe oipotaháicha. Oñemboyke umi rrelihión heʼínteva kristianoha, omboʼe rupi heta mbaʼe omongyʼáva Ñandejára réra. Ha oporomokyreʼỹgui ojeho hag̃ua oñeñorairõ primera guerra mundiálpe. Ñandejára avei omopotĩ umi kristiáno yvágape ohótavape, oñemopotĩháicha pláta ha óro tatápe. Upéi ‘haʼekuéra ikatúma ombaʼekuaveʼẽ hekópe Ñandejárape’ (Malaquías 3:3).

5. Heʼihaguéicha Jesús hemimboʼekuérape, mávapa pe “tembiguái” jeroviaha?

⁵ Jesús omombeʼu hemimboʼekuérape heta mbaʼe oikótava. Upéicha haʼekuéra ohechakuaáta haʼe ‘ou ag̃uimaha ha opatamaha ko múndo’. Malaquías heʼihaguéicha, Jesús heʼi outaha ohecha hag̃ua mávapa ‘hembiguái’ tee. Jesús heʼi: ‘Mávapa hína pe tembiguái jeroviaha ha iñarandúva? Péva hína pe ijára omoĩva ipoguýpe ambue hembiguaikuéra omongaru hag̃ua oikotevẽ jave. Ovyʼaitevaʼerãpa pe tembiguái ijára og̃uahẽ vove ojuhúvo ojapopaha hekópe hembiapo. Añetehápe haʼe peẽme, pe óga jára omoĩne ipoguýpe opa oguerekóva’ (Mateo 24:​3, BNP, 45-​47). Mbaʼépa otopa Cristo ‘og̃uahẽvo’ ohecha hag̃ua ‘hembiguáipe’ 1918-pe? Haʼe otopa umi kristiáno yvágape ohótava ombaʼapoha ‘omongaru hag̃ua hapichakuérape oikotevẽ jave’. Upearã ojapo hikuái 1879 guive, ko rrevísta ha heta lívro. Upévare Jesús oiporavo chupekuéra ‘hembiguairã’ ha 1919-pe omoĩ ipoguýpe opa oguerekóva ko Yvy ape ári.

Pe oñangarekóva umi mbaʼe Cristo orekóvare ko Yvy ape ári

6, 7. a) Mbaʼépa heʼi avei Jesús hembiguáire? b) Mbaʼépa peteĩ ‘majordómo’ rembiapo?

⁶ Omombeʼu mboyve hemimboʼekuérape umi mbaʼe oikótava, Jesús oñeʼẽmavaʼekue peteĩ ‘tembiguáire’. Upe heʼivaʼekue ñanepytyvõ ñantende porãve hag̃ua mbaʼépa ojapo ko tembiguái. Jesús heʼi: ‘Mávapa pe majordómo iñakã porãva ha hekoitépe ojapóva hembiaporã? Pe óga jára omoĩvaʼerã ichupe oñangareko hag̃ua hogayguáre, ha omeʼẽ hag̃ua ichupekuéra hembiʼurã hiʼárape. Añete haʼe peẽme opa oguerekóva pe óga jára omoĩvaʼerãha ipoguýpe’ (Lucas 12:​42, 44).

 ⁷ Koʼápe Jesús heʼi pe tembiguáire “majordómo”, griégope heʼiséva ‘oñangarekóva peteĩ óga térã kokuére’. Upéicharõ pe majordómo ndahaʼeihína peteĩ kuimbaʼe aty iñarandúva ha oikuaánteva heta mbaʼe la Bíbliagui. Ko majordómo ningo ‘omeʼẽvaʼerã hembiʼurã hiʼárape’ Cristo remimboʼekuérape. Avei oñangarekovaʼerã ‘opa oguerekóvare’ Cristo ko Yvy ape ári. Ha mbaʼe mbaʼépa koʼãva?

8, 9. Mbaʼe mbaʼérepa oñangareko pe tembiguái?

⁸ Pe tembiguái ojapovaʼerã heta mbaʼe. Oñangarekovaʼerã umi edifísio ha óga oiporúvare testigos de Jehová ojapo hag̃ua hembiapo. Koʼãva hína umi ofisína sentrál, sukursál, Salón del Reino ha umi Salón de Asamblea. Ha iñimportantevéva katu pe tembiguái oñangareko ñande jeroviáre, opreparávo pe ojestudiáva rreunión ha asambleahápe. Koʼã rreunión ñanemboʼe mbaʼéichapa oñekumpli umi profesía ha ñanepytyvõ jajapo porãve hag̃ua la Biblia heʼíva.

⁹ Pe tembiguái ohecha avei mbaʼéichapa ojepredikáta opa tetã rupi ‘pe marandu porã Ñandejára rréino rehegua’, ha mbaʼéichapa oñepytyvõta hentekuérape oiko hag̃ua Jesús ‘remimboʼéramo’. Upearã omboʼe hikuái chupekuéra mbaʼépa Cristo oipota jajapo koʼã ára pahápe (Mateo 24:14; 28:​19, 20; Apocalipsis [Revelación] 12:17). Ko predikasión rupi oñembyaty peteĩ “aty guasu” oipytyvõva umi yvágape ohótavape. Koʼãva hína umi ‘mbaʼeta oguerúva tetãnguéra’. Haʼekuéra Cristo mbaʼe ha oĩ hembiguái jeroviaha poguýpe (Apocalipsis [Revelación] 7:9, BNP; Ageo 2:7).

Cuerpo Gobernante orrepresenta pe tembiguáipe

10. Mávapa odesidivaʼekue ojejapótava kongregasiónpe síglo primérope, ha mbaʼéichapa upéva oipytyvõ kongregasionkuérape?

¹⁰ Ojapo hag̃ua hembiapo pe tembiguái jeroviaha odesidivaʼerã heta mbaʼe. Síglo primérope umi apóstol ha ansiáno oĩva Jerusalénpe orrepresenta pe tembiguáipe. Haʼekuéra odesidi mbaʼépa ojejapóta kongregasionkuérape (Hechos 15:​1, 2). Pe Cuerpo Gobernante oguerahauka kárta ha omondo ermáno kongregasionkuérape, oikuaauka hag̃ua umi mbaʼe odesidíva. Umi kristiáno omombaʼe ha ojapo pe Cuerpo Gobernante heʼíva, ha péicha ombaʼapo oñondivepa pyʼaguapýpe (Hechos 15:​22-31; 16:​4, 5; Filipenses 2:2).

11. Mávarepa ojevale Jesús omoakã hag̃ua kongregasión, ha mbaʼéichapa ñaipytyvõvaʼerã chupekuéra?

 ¹¹ Ymaguaréicha, koʼág̃a oĩ avei peteĩ Cuerpo Gobernante. Koʼãva ningo peteĩ atyʼi ojeporavóva umi yvágape ohótava apytégui. Cristo omoakã kongregasión ha oipytyvõ koʼã ansiánope omotenonde hag̃ua predikasión. Upearã Jesús oiporu ‘ipo derécha’ (ipuʼaka) (Apocalipsis [Revelación] 1:​16, 20). Omano mboyve pe ermáno Albert Schroeder oĩvaʼekue heta áño Cuerpo Gobernántepe. Haʼe heʼi: “Pe Cuerpo Gobernante oñembyaty káda miércoles ha oñepyrũvo ojerure Jehovápe ijespíritu. Oñehaʼãmbaiténingo hikuái entéro mbaʼe odesidíva oĩ porã Ñandejára Ñeʼẽ heʼívare”. * Jajeroviavaʼerã koʼã ermánore. Upearã tekotevẽ jajapo Pablo heʼivaʼekue: “Peneñeʼẽrendúke pene sãmbyhyhárape, ha peñemoĩ ipoguypekuéra. Haʼekuéra niko oñangareko penderehe kaneʼõʼỹre” (Hebreos 13:17).

Ñamombaʼékena tembiguái jeroviahápe

12, 13. Mbaʼéichapa la Biblia ohechauka ñamombaʼevaʼerãha tembiguái jeroviahápe?

¹² Ñamombaʼe tembiguái jeroviahápe jaikuaágui upéicha ñamombaʼeha Jesucrístope. Pablo ohai umi kristiáno yvágape ohótavape: ‘Pe ndahaʼeivaʼekue tembiguái oñehenóiramo guare, koʼág̃a Cristo rembiguái. Ñandejára pendejoguavaʼekue’ (1 Corintios 7:​22, 23; Efesios 6:6). Upéicharõ ñaneñeʼẽrendúvo tembiguái jeroviaha ha Cuerpo Gobernántepe, ñañemoĩñaína Cristo poguýpe, haʼégui pe tembiguái Jára. Ñamombaʼévo pe tembiguái Jesús oiporúva oñangareko hag̃ua opa orekóvare, jahechakuaa Jesús rupive ‘oñemombaʼeguasuha Ñandejára pe Túvape’ (Filipenses 2:​11, BNP).

¹³ Oĩve peteĩ mbaʼe ñanemomýiva ñamombaʼe hag̃ua umi kristiáno yvágape ohótavape. La Biblia heʼi haʼekuéra Ñandejára ‘rogaha’, ha Jehová oikoha ipypekuéra “ijespíritu rupi”. Upévare haʼekuéra ‘imarangatu’ (1 Corintios 3:​16, 17; Efesios 2:​19-​22, BNP). Jesús omoĩmbaite ko tembiguái poguýpe opa mbaʼe orekóva. Ojeʼéningo hesekuéra Ñandejára rogaha ha upévare oĩ heta mbaʼe kongregasiónpe haʼekuérante ojapovaʼerã. Upéicharõ iñimportanteterei ñaneñeʼẽrendu tembiguái jeroviaha ha Cuerpo Gobernántepe. Katuete ‘ambue ovechakuéra’ ovyʼaiterei ikatuhaguére oñangareko hendivekuéra umi mbaʼe Jesús orekóvare (Juan 10:16).

Jajapopaitékena heʼíva ñandéve

14. Isaías heʼihaguéicha, mbaʼéichapa ambue ovechakuéra oho tembiguái jeroviaha rapykuéri, ha mbaʼérepa ojeʼe hesekuéra ombaʼapoha ojehepymeʼẽʼỹre?

¹⁴ Peteĩ profesía ohaivaʼekue Isaías ohechauka ambue ovechakuéra oñemoĩtaha umi yvágape ohótava poguýpe. Haʼe heʼi: ‘Péicha heʼi Ñandejára: Egiptoygua ombaʼapóva ojehepymeʼẽʼỹre ha Etiopiaygua mbaʼerepy vendeha, ha umi Sebapegua hete rusúva, oúta ne rendápe ha nde pópe oñemoĩta. Nde rapykuéri ohóta, kadénape ojepykuáta, ne renondépe ojayvýta ha ojerure asýta ndéve: “Nendive ñoite oĩ Ñandejára, ndaipóri ambue. Ndahaʼéi mbaʼeve umi ñandejára guaʼu”’ (Isaías 45:14). Mbaʼéichapa ambue ovechakuéra oho tembiguái jeroviaha ha Cuerpo Gobernante rapykuéri? Ojapóvo haʼekuéra heʼíva. Ha mbaʼérepa ojeʼe hesekuéra ombaʼapoha ojehepymeʼẽʼỹre? Omeʼẽgui hikuái opa orekóva ojejapo hag̃ua Cristo heʼivaʼekue, ha ndojeruréi mbaʼeve hekovia (Hechos 1:8; Apocalipsis [Revelación] 12:17).

15. Mbaʼéichapa Isaías 61:​5, 6 ohechauka ambue ovechakuéra oipytyvõtaha umi yvágape ohótavape?

¹⁵ Ambue ovechakuéra vyʼápe oservi  Jehovápe tembiguái jeroviaha ha Cuerpo Gobernante poguýpe. Ohechakuaa hikuái umi kristiáno yvágape ohotáva ‘Israel Ñandejára mbaʼeha’ (Gálatas 6:​16, JMP). Ambue ovechakuéra ningo ‘umi mombyrygua’ oipytyvõva chupekuéra. Vyʼápe ‘oñangareko kokue ha parraltýre’. Umi yvágape ohótavare katu ojeʼe ‘Ñandejára saserdóte’ ha ‘Ñandejára rembiguái’ (Isaías 61:​5, 6). Ambue ovechakuéra kyreʼỹme opredika pe marandu porã ha omboʼe hapichakuérape opa tetã rupi. Haʼekuéra oipytyvõ tembiguái jeroviahápe oñangareko hag̃ua umi tapicha ipyʼaporãvare otopáva predikasiónpe.

16. Mbaʼérepa ambue ovechakuéra iñeʼẽrendu pe tembiguái jeroviaha ha iñarandúvape?

¹⁶ Ambue ovechakuéra ohechakuaa pe tembiguái jeroviaha oñangareko porãitereiha hesekuéra, omeʼẽvo chupekuéra opa mbaʼe oikotevẽva omombarete hag̃ua ijerovia. Pe tembiguaiʼỹre ndajaikuaaivaʼerãmoʼã mbaʼeve la Bíbliagui. Haʼekuéra ningo ñanepytyvõ jaikuaa hag̃ua Jehová añoite ogovernavaʼerãha, oñemombaʼeguasuvaʼerãha Héra ha mbaʼépa Ñandejára Rréino. Avei, mbaʼépa yvága ha Yvy pyahu, mbaʼépa yvypóra ánga, mbaʼépa oiko umi omanovaʼekuégui ha mávapa Túva, Taʼýra ha espíritu sánto. Ñamombaʼetereígui koʼã mbaʼe ñaneñeʼẽrendu Cristo ermanokuérape oĩva gueteri ko Yvy ape ári koʼã ára pahápe (Mateo 25:40).

17. Mbaʼépa ojapo Cuerpo Gobernante oñangareko hag̃ua Cristo orekóvare, ha mbaʼépa jahecháta pe párte oúvape?

¹⁷ Mbovymíntema oĩ umi kristiáno yvágape ohótava ha ndaikatúi oñangarekopa umi mbaʼe Cristo orekóvare ko Yvy ape ári. Upévare pe Cuerpo Gobernante omoĩ ermáno ambue ovechakuéra apytégui oñangareko hag̃ua umi sukursál rehe ha avei kongregasionkuérare, oñembyatýva sirkuíto ha distrítope. Ñande ningo ñamombaʼe ha ñaneñeʼẽrendu Cristo ha hembiguái jeroviahápe. Upévare, mbaʼéichapa jahechavaʼerã koʼã ermánope? Upéva jahecháta pe párte oúvape.

[Nóta]

Ñanemanduʼápa?

• Mávapa ñande ruvicha ha mbaʼérepa jaʼe haʼe oikuaaha opa mbaʼe ojejapóva kongregasiónpe?

• Ñandejára ou rire ohecha ‘itémplo’, mávapepa otopa ojapoha pe tembiguái jeroviaha rembiapo ha mbaʼépa omoĩ ipoguýpe?

• Heʼiháicha la Biblia, mbaʼérepa ñaneñeʼẽrenduvaʼerã pe tembiguái jeroviahápe?

[Porandu ñahesaʼỹijóva]

[Nóta oĩva taʼanga ndive páhina 24]

Pe “majordómo” oreko ipoguýpe heta mbaʼe ojeporúva ojepredika ha oñemboʼe hag̃ua tapichakuérape

[Nóta oĩva taʼanga ndive páhina 26]

Ambue ovechakuéra kyreʼỹme opredika ha upéicha oipytyvõ pe tembiguáipe