Jaikuaase koʼã mbaʼe

Mbaʼéichapa ikatu ñaneresãive?

Mbaʼépa ikatu jajapo jaiko hag̃ua vyʼápe ñande rogapýpe?

Mbaʼépa jajapovaʼerã ani hag̃ua japyta travahoʼỹre?

NDÉPA avei reñeporandúma koʼã mbaʼe? Ha oñemombeʼúmapa ndéve? Káda áño osẽ 2000 lívro pyahu oñeʼẽva koʼã mbaʼére. Gran Bretáñape umi hénte ogasta 150 millones de dólares ojogua hag̃ua umi lívro heʼíva mbaʼéichapa ñambohovaivaʼerã provlemakuéra. Estados Unídospe katu ãichagua lívro repykue ohupyty 600 millones de dólares. Hetaiterei tapicha ningo oikuaase mbaʼépa ojapovaʼerã oiko porãve hag̃ua.

Hetaʼimi ningo umi lívro osẽ pyahúva, upévare peteĩ karai ohaíva livrokuéra heʼi: “Heta lívro osẽ pyahúvape jatopa umi mbaʼe osẽmavaʼekue ótro lívrope”. Upeichaite ningo, heta mbaʼe oĩva koʼã lívrope oĩma voi peteĩ lívro ymaguarépe. Ndaipóri lívro peichaite peve oñemosarambíva ko múndo jerére. Ojetradusíma peteĩ párte jepe 2400 ñeʼẽme ha ojejapóma 4 mil millones rupi. Ko lívro hína la Biblia.

La Biblia heʼi: ‘Ñandejára Ñeʼẽ niko henyhẽ Ñandejára puʼakágui, ha iporã ñamboʼe ha ñañemoñeʼẽ hag̃ua ñande rapichápe, japorohekomboʼe ha ñaporomoarandu hag̃ua hekopete’ (2 Timoteo 3:16). La Biblia ningo ndojejapói oporohekomboʼe hag̃ua. Ojehai katu omombeʼu hag̃ua Ñandejára oipotáva yvyporakuérape g̃uarã. Upéicharõ jepe, heʼi heta mbaʼe ñanepytyvõva ñambohovái hag̃ua ñane provlemakuéra. La Biblia opromete avei jajapóramo heʼíva ipype ñasẽ porãtaha (Isaías 48:​17, 18). Opaichagua tapicha katuete osẽ porãta ojapóramo la Biblia heʼíva. Jahechamína pe párte oúvape mbaʼépa heʼi la Biblia tesãi, família ha traváhore. Upéicha ñandete jahecháta iporãpa upe heʼíva.