Konsého iporãvéva

UMI lívro heʼíva mbaʼéichapa ikatu ñasolusiona umi provléma ohechauka mbaʼéichapa ñaipytyvõvaʼerã umi tapicha ojejopy vaívape. La Biblia katu oñeʼẽ hetave mbaʼére. Ñanepytyvõ ani hag̃ua voi jajapo mbaʼe vai ikatúva ñanembohasa asy.

La Biblia oipytyvõ ‘umi mbaʼeve oikuaaʼỹvape iñarandu hag̃ua, ha mitãrusúpe, imbaʼekuaa hag̃ua’ (Proverbios 1:4). Rejapóramo la Biblia heʼíva “ne arandu rupi reñangarekokuaáta ndejehe, ne mbaʼekuaa nepytyvõta. Péicharõ ndereikomoʼãi tape vaíre” (Proverbios 2:​11, 12). Jahechami mbaʼéichapa la Biblia heʼíva ñanepytyvõ ñaneresãive hag̃ua, javyʼa hag̃ua ñande rogapýpe ha ñambaʼapo porãve hag̃ua.

Ani jaʼurasa vevída

La Biblia ndeʼíri ivaiha jaʼu vevída. Apóstol Pablo heʼi víno ojapo porãha ñanderehe. Upévare heʼi Timotéope: “Nde rasýgui sapyʼapyʼa nde pyʼápe, ani reʼu ýnte, heʼu mimi avei víno” (1 Timoteo 5:23). La Biblia heʼi Ñandejára nomeʼẽiha víno pohãrãnte. Heʼi avei ‘víno ombopyʼaroryha’ yvypórape (Salmo 104:15). Péro la Biblia heʼi ani hag̃ua ‘jakaʼu’ (Tito 2:3). Heʼi avei: “Ani rejeheʼa ikaʼúvare ha ikarúvare. Umi ikaʼúva ha ikarúva, imboriahupa” (Proverbios 23:​20, 21). Mbaʼépa oiko nañapenáiramo ko mbaʼére? Jahechami oikóva koʼã tetã rupi.

Pe Organización Mundial de la Salud ojapo peteĩ infórme hérava Global Status Report on Alcohol 2004 ha kóva heʼi: “Irlándape káda año ojegasta 3 mil millones de dólares umi okaʼúva káusare”. Ko infórme ohechauka avei hetaiterei ojegastaha umi okaʼúvare “pohãme (350 millones), ojapohaguére aksidénte (380 millones), oñorairõhaguére (126 millones), ha ndohoihaguére ombaʼapo (1300 millones)”.

Ha ivaiveha katu umi okaʼúva ombohasa asy hetaiterei tapichápe. Pór ehémplo Austráliape un áñope 500 mil tapicha  rupi omombeʼu oinupãhague chupekuéra okaʼúva. Fránciape 30 pór ciento umi ñorairõ ogapýpe oiko ojekaʼuhaguére. Jahechakuaápa péicharõ añeteha la Biblia heʼíva ko mbaʼére?

Ani ñamongyʼa ñande retepy

Áño 1942-pe umi opitáva ojehecharamoiterei. Ko rrevísta katu upérõ heʼimavaʼekue ivaiha japita ndojoguerahái rupi la Biblia heʼívare. Peteĩ párte osẽva upe áñope heʼi ñambovyʼa hag̃ua Ñandejárape ‘tekotevẽha ñañemopotĩ opa mbaʼe ikatúvagui ñanemongyʼa, ñande retépe ha ñande espíritupe’ (2 Corintios 7:1). Koʼág̃a ohasáma 65 áño, ndépa ere la Biblia ojavyhague?

Áño 2006-pe, Organización Mundial de la Salud heʼi petỹ ‘oĩha segundo umi mbaʼe oporojukavéva apytépe’. Káda áño cinco millones tapicha rupi omano opitahaguére. Ñambojojami hag̃uánte, umi omanóva sídagui ohupyty tres millones káda áño. Síglo véintepe 100 millones tapicha rupi omano opitahaguére, haimete ohupyty umi ojejukavaʼekue gerrahápe upe síglo aja. Upéicha jahecha ivaiha japita.

“Pejehejántekena pe teko vaígui”

Heta tapicha ndojaposéi la Biblia heʼíva teko potĩre. Oĩ heʼíva la Biblia omboʼeha kuña ha kuimbaʼe ndovaleiha oiko oñondive. Péro la Biblia omombeʼu mbaʼéichapa jahechavaʼerã ko mbaʼe. Heʼi kuña ha kuimbaʼe omendavaʼerãha oiko hag̃ua oñondive (Génesis 2:​24; Mateo 19:​4-6; Hebreos 13:4). Péicha umi omendáva ohechauka ojupe ojoayhuha (1 Corintios 7:​1-5). Ha umi mitã orekóta túva ha sy oñangarekóva hesekuéra (Colosenses 3:​18-21).

Teko vaíre la Biblia heʼi: “Pejehejántekena pe teko vaígui” (1 Corintios 6:​18, JMP). Mbaʼérepa? Upéi heʼi: ‘Opaichagua mbaʼe vai ojapóva pe yvypóra ndojái hete rehe. Ha pe oikóva máva ndive mendaʼỹ rehe katu pe hete voi omongyʼa’. Mbaʼépepa opa ndojejapóiramo la Biblia heʼíva koʼã mbaʼére?

Jahechamína mbaʼépa oiko Estados Unídospe. Umi tetã tuichavéva apytépe ko tetãme hetave umi mitãkuña hyeguasúva. Ohupyty 850.000 rupi káda áño. Oĩ umi mitãkuña oityukáva imemby ha heta imembýva omendaʼỹre. Heta mitakuña ningo oñehaʼã omongakuaa porã imemby ha osẽ porã. Péro koʼã mitã apytépe hetave umi ikariaʼy rire ohóva kárselpe térã umi  mitãkuña imembýva omendaʼỹre. Ohecha rire umi infórme oñembyatyvaʼekue heta áñore, karai Robert Lerman heʼi: “Hetave rupi umi família oĩháme túva térã sy haʼeño hetave provléma oĩ. Hetave umi mitã oheja reíva ijestúdio, okaʼúva, ojedrogáva, mitakuña hyeguasúva ha umi patotéro”.

Hetave mbaʼasy oĩ umi heko vaíva apytépe. Pór ehémplo pe rrevísta hérava Pediatrics heʼi: “Umi infórme ohechauka hetaveha depresión ha suisídio umi mitãkuña ha mitãrusu heko vaíva apytépe”. Oñeʼẽvo mbaʼasýre pe American Social Health Association heʼi: “Ohasáta 50 pór ciento (Estados Unídospe) umi hasýtava heko vai haguére”. Hetaite provléma ndaiporivaʼerãmoʼã ojejapórire la Biblia heʼíva ko mbaʼére.

Ñamombaretékena ñane família

La Biblia heʼi ñamboykevaʼerãha umi mbaʼe vai péro ndopái upépe. Jahechamína mbaʼéichapa ñanepytyvõ jaiko porãve hag̃ua ñande rogapýpe.

Ñandejára Ñeʼẽ heʼi: “Menakuéra ohayhuvaʼerã hembirekokuérape, haʼekuéra ojehayhuháicha ijupe voi” (Efesios 5:28). Menakuéra omombaʼevaʼerã hembirekópe, ojeʼéningo chupekuéra ‘ohendukuaavaʼerãha hembirekópe, ombojeroviavaʼerãha ohechakuaávo haʼekuéra ikangyveha’ (1 Pedro 3:7). Ha oiko vaíramo sapyʼa hikuái, ojeʼe menakuérape: ‘Tohayhu hembirekópe ha ani iñeʼẽ pohýi chupe’ (Colosenses 3:​19, BNP). Peteĩ ména ojapóramo koʼã mbaʼe katuete hembireko ohayhu ha omombaʼevéta chupe.

La Biblia heʼi tembirekokuérape: ‘Peẽ kuña pemendáva, pejapóke pene ména heʼíva peẽme, pejapoháicha Ñandejára heʼíva peẽme. Menakuéra niko tembireko akã, Cristo haʼeháicha pe kongregasión akã. Tembirekokuéra tomombaʼe iménape’ (Efesios 5:​22, 23, 33). Tembirekokuéra ojapóva koʼápe heʼíva oñeʼẽ jave iménape térã imanduʼa porãvo hese ojehayhúta katuete.

Oñehekomboʼe hag̃ua mitãnguérape, la Biblia heʼi tuvakuérape oñemongeta hag̃ua hendivekuéra ‘hógape, tape rehe, oñenonguévo ha opuʼãnguévo’ (Deuteronomio 6:7). Tuvakuérape ojeʼe omboʼe hag̃ua ifamiliakuérape mbaʼépa oĩ porã ha mbaʼépa oĩ vai ha okorrehi hag̃ua avei. “Tuvakuéra, ani pembopochy rei pende raʼykuérape. Pemongakuaa ha pehekomboʼe uvei Ñandejára oipotaháicha” heʼi Ñandejára Ñeʼẽ (Efesios 6:4). Mitãnguérape katu ojeʼe: ‘Peneñeʼẽrenduvaʼerã pende rúpe’ ha ‘emombaʼe nde ru ha nde sýpe’  * (Efesios 6:​1, 2, BNP).

Ndépa ere familiakuéra osẽ porãtaha ojapóramo koʼã mbaʼe? Ikatu repensa oipytyvõtaha chupekuéra, péro ndaiporiha ojapóva upéva. Roipotaiténingo rehomi peteĩ Salón del Reino de los testigos de Jehovápe hiʼag̃uivéva nde rógagui. Upépe retopáta umi família oñehaʼãva ojapo la Biblia heʼíva. Eñeʼẽmína hendivekuéra. Emañami mbaʼéichapa ojotrata hikuái. Rehecha porãta mbaʼéichapa jajapóramo la Biblia heʼíva jaiko porãveha ñande rogapýpe.

Ñambaʼapo kyreʼỹkena ha ñamombaʼe ñande rapicha rembiapo

Ñanepytyvõpa la Biblia ani hag̃ua japyta travahoʼỹre? Katuete ñanepytyvõ.  La Biblia heʼi jajapo porãramo ñane rembiapo jajeguerohory ha ñasẽ porãtaha. “Rehechávapa kuimbaʼe ikatupyrýva hembiapópe?”, oporanduvaʼekue rréi Salomón. “Upéva ombaʼapóne umi mburuvicha guasu ndive.” (Proverbios 22:29.) Péro “iñateʼỹva” katu “tesa koʼõ” ipatrónpe g̃uarã (Proverbios 10:26). La Biblia heʼi ñambaʼapo kyreʼỹ vaʼerãha ha ndovaleiha ñaporombotavy. “Pe imondavaʼekue, anive omonda ha toñemoĩ tombaʼapo. Toheka hembiaporã hekópe ombaʼapo hag̃uáme.” (Efesios 4:28.) Upéva jajapovaʼerã ñane patrón nañanderecháiramo jepe. ‘Peneñeʼẽrendúke opa mbaʼépe umi ko Yvy ári pende járavape, ndahaʼéi omaʼẽ aja penderehénte, pepyta porã hag̃ua hendivekuéra, pende pyʼaite guive katu, pekyhyjégui Ñandejáragui.’ (Colosenses 3:22.) Oĩramo ombaʼapóva ndéve g̃uarã, nderevyʼamoʼãipa péicha ombaʼapóramo?

La Biblia omomanduʼa patronkuérape: “Ombaʼapóvape oñemeʼẽvaʼerã imbaʼapo repykue” (1 Timoteo 5:18). Ñandejára Léi heʼivaʼekue umi Israelguápe ani hag̃ua ohaʼarõ opaga hag̃ua hapicha ombaʼapóvape chupekuéra g̃uarã. “Ani rejopy nde rapicha ndive térã reipeʼa imbaʼéva. Ani reheja koʼẽrõ g̃uarã ñehepymeʼẽ hembiapokue rehe” ohai Moisés (Levítico 19:13). Ndajavyʼamoʼãipa ñane patrón ojapóramo la Biblia heʼíva ha opaga hiʼaraitépe?

Arandu ijojahaʼỹva

Mbaʼérepa peteĩ lívro ymaguare ñanepytyvõ koʼág̃a peve? Heta lívro ymaguare ndojeporuvéima, péro la Biblia heʼíva iporã koʼág̃a peve. Ha péicha hína ndoúi rupi yvypóragui, ‘Ñandejára ñeʼẽ’ hína (1 Tesalonicenses 2:13).

Iporãitétapa remopaʼũramo ne rembiapo reikuaa porãve hag̃ua Ñandejára Ñeʼẽ heʼíva. Rejapóramo upéva rehayhuvéta la Biblia Apoharépe, haʼe hína Jehová. Rejapóramo Haʼe heʼíva rehecháta mbaʼéichapa nepytyvõ reiko porã hag̃ua. Péicha ‘reñembojáta Ñandejárare ha haʼe oñembojáta nderehe’ (Santiago 4:8). Ndaipóri lívro peichaite peve ñanepytyvõva.

[Nóta]

[Nóta oĩva taʼanga ndive páhina 4]

Ndépa ere oĩ porãha la Biblia heʼíva vevídare?

[Nóta oĩva taʼanga ndive páhina 5]

Oĩ porãpa ndéve g̃uarã la Biblia heʼíva petỹre?

[Nóta oĩva taʼanga ndive páhina 7]

Jajapóramo la Biblia heʼíva jaiko porãvéta ñande rogaygua ndive

[Roagradese oĩva taʼanga ndive páhina 5]

Yvy raʼanga: Ojeporu fóto oguenohẽva NASA