Mbaʼéichapa ñañemoĩkuaa demoniokuérare

“Ha umi anhelkuéra oikoʼỹvaʼekue[...] heko ypykuépe ha oheja hogakuéra yvagapegua, [...] Ñandejára oguereko préso ñeñapytĩháme tapia g̃uarã pytũnguýpe pe juísio ára guasuetépe g̃uarã.” (JUDAS 6, BNP.)

1, 2. Mbaʼépa oñeporandu jepi Satanás ha umi demóniore?

 “PEIKOKUAÁKENA ha peñeñangareko pe mbaʼepochy pene rairõva oiko rehe león okororõvaicha pende jerekuévo oheka mávapepa hoʼúta.” (1 Pedro 5:​8, BNP.) Upéicha heʼivaʼekue apóstol Pedro Satanás rehe. Ha oñeʼẽvo umi demóniore, apóstol Pablo heʼi: “Ndaipotái peẽ pereko mbaʼeve mbaʼepochy ndive. Ndaikatúi peʼu pe Ñandejára kópagui ha mbaʼepochy kópagui avei, ndaikatúi pekaru pe Ñandejára mesápe ha mbaʼepochy mesápe avei” (1 Corintios 10:​20, 21, BNP).

² Mávapa hína Satanás ha umi demónio? Mbaʼéicha ha arakaʼépa oñepyrũvaʼekue hikuái? Ojapópa chupekuéra Ñandejára? Mbaʼépa ikatu ojapo yvyporakuérare? Ikatúpa ñañemoĩ hesekuéra?

Mbaʼéichapa oñepyrũrakaʼe Satanás ha umi demónio?

3. Mbaʼéichapa peteĩ Ñandejára ánhelgui oiko Diablo ha Satanás?

³ Omoĩ ypýrõ guare Ñandejára yvyporakuérape hardín de Edénpe, peteĩ ánhel opuʼãvaʼekue hese. Mbaʼérepa? Nomombaʼéigui pe tembiapo omeʼẽvaʼekue chupe Ñandejára amo yvágape. Ojejapo ypýrõ guare Adán ha Évape, ko ánhel ohecha ikatuha ojapo hikuái haʼe heʼíva ha omombaʼeguasu chupe Ñandejárape rangue. Opuʼãvo Ñandejárare ha ojapouka mbaʼe vai Adán ha Évape, ko ánhel ojapo ijehegui voi Diablo ha Satanás. Upe riréma, heta ánhel omoirũ avei chupe. Mbaʼéicha rupípa oiko ko mbaʼe? (Génesis 3:​1-6; Romanos 5:12; Apocalipsis [Revelación] 12:9.)

4. Mbaʼépa ojapovaʼekue heta ánhel pe Diluvio mboyve?

⁴ Ñandejára Ñeʼẽ omombeʼu ñandéve ou mboyve pe Diluvio oĩhague umi ánhel apytépe oñepyrũva omaña hatã umi kuñáre. Ojaposégui ivaíva, “ohechávo Ñanderuete raʼykuéra [yvagapegua] iporãitereiha umi yvypóra rajykuéra, ojapyhy hikuái  hembirekorãnguéra, oiporavo ijapyteguikuéra oipotáva guive”. Koʼã ñemenda oĩvaʼekue hendapeʼỹ, ha umi mitã onaséva tuichaiterei ha oñehenói chupekuéra nefilim (Génesis 6:​2-4, ÑÑM). Upéicha, umi ánhel naiñeʼẽrenduivaʼekue Ñandejárape opuʼã avei hese ojapohaguéicha Satanás.

5. Mbaʼépa ojehu umi ánhel añáme omboúrõ guare Jehová pe Diluvio?

⁵ Oguerúrõ guare Jehová pe Diluvio, umi nefilim ha isykuéra omanombaite. Umi ánhel aña ohejámante hete ha ojevy yvágape. Upéicharamo jepe, ndojehejavéima chupekuéra oiko “heko ypykuépe” Ñandejára ndive. Upéva rangue oñekondena hikuái Tártarope, térã oĩ hag̃ua “pytũmbýpe” mombyry Ñandejáragui (Judas 6; 2 Pedro 2:​4, NM).

6. Mbaʼéichapa umi demónio ombotavy yvyporakuérape?

⁶ Ohejárõ guare ‘heko ypykue’ umi ánhel, oñemoĩ ombaʼapo Satanás ykére ojapo hag̃ua ivaíva. Upe guive, umi demónio ndaikatuvéima oñembohete yvypóraicha. Upéicharamo jepe, ikatu ojapouka kuimbaʼe ha kuñáme opaichagua mbaʼe tieʼỹ. Ha avei ombotavy yvyporakuérape espiritísmo rupive, ojapoukávo chupekuéra paje, omoñeʼẽguaʼu omanovaʼekuépe ha hetave mbaʼe upeichagua (Deuteronomio 18:​10-13; 2 Crónicas 33:6). Umi demónio ha Satanás opáta peteĩcha: oñehundietéta hikuái opa ára g̃uarã (Mateo 25:41; Apocalipsis [Revelación] 20:10). Og̃uahẽ aja upe ára, ñañemoĩ mbarete vaʼerã hesekuéra. Upévare, iporã jaikuaa mbaʼépa ikatu ojapo Satanás yvyporakuérare ha mbaʼéichapa ikatu ñañemoĩ hese ha umi demóniore.

Mbaʼépa ikatu ojapo Satanás?

7. Mbaʼépa ojapo Satanás ko múndore?

⁷ Satanás oñeʼẽ vai Jehováre hetaiterei árarema (Proverbios 27:11). Avei, ipuʼakáma haimete opavave yvypórare. Ndareíri 1 Juan 5:​19-pe [BNP] heʼi “ko múndo oĩmbaha aña poguýpe”. Upévare, Satanás heʼivaʼekue Jesúspe omoĩtaha ipoguýpe “opa tetã yvy arigua” (Lucas 4:​5-7). Oñeʼẽvo Satanás rehe, apóstol Pablo heʼi: “Ha pe marandu porã romyerakuãva oñemíramo, upéva umi oñehundívape g̃uarãnte. Haʼekuéra ndogueroviái, ko yvy arigua [ñandejára] guaʼu ombohesa ypytũgui chupekuéra, ohechaʼỹ hag̃ua Cristo heko mimbipáva, marandu porã hendy jajaipáva. Cristo niko peteĩchante [Ñandejára] oikovéva ndive” (2 Corintios 4:​3, 4). Satanás ijapu “haʼégui japu ruvicha”, péro “oikóva ánhel omimbipávaramo” (Juan 8:​44, JMP; 2 Corintios 11:​14, BNP). Imbarete ha oikuaa mbaʼéichapa ombotavýta umi mburuvichakuérape, ojapoháicha umi ipoguýpe oĩva rehe. Ombotavy yvyporakuérape umi propagánda, japu ha heta mbaʼe rei ogueroviaukáva rupive.

8. Mbaʼéichapa la Biblia ohechauka Satanás imbareteha?

⁸ Satanás imbareteha ojehechamavaʼekue proféta Daniel oikórõ guare, cinco síglo Jesús ou mboyve. Omondórõ guare Jehová peteĩ ánhel oñeʼẽ hag̃ua Daniélpe, “Persia retã ruvicha [espirituál]” ojoko chupe. Ko ánhelpe ojoko veintiún día rehe, og̃uahẽ meve “Miguel, peteĩ [Ñandejára] remimbou imbaretetéva”, oipytyvõ hag̃ua chupe. Upépe avei oñeñeʼẽ “Grecia ruvicha guasu” rehe, haʼéva peteĩ demónio (Daniel 10:​12, 13, 20). Ha Apocalipsis [Revelación] 13:​1, 2-pe oñehenói Satanáspe “pe dragón [NM]”, omeʼẽva pe mymba ñarõme, térã umi goviérno polítikope, “ipuʼakakue ha itróno ha omanda guasu hag̃ua [BNP]”.

9. Mávandipa oñorairõhína kristianokuéra?

⁹ Ndareíri apóstol Pablo heʼivaʼekue: “Nañañorairõiniko hína yvyporakuéra ndive. Ñañorairõ uvei umi yvategua mbaʼepochykuéra ndive, imbarete ha oguerekóva ipoguýpe koʼã ára jaikoha” (Efesios 6:12). Koʼág̃a peve, umi demoniokuéra oĩva Satanás  poguýpe ombaʼapo ñemihápe. Ipuʼaka umi mburuvicha ha opaichagua tapicháre, ha omomýi chupekuéra oporojuka ha ojapo hag̃ua opa mbaʼe ivaietereíva. Upéicharamo jepe, jahechami mbaʼéichapa ikatu ñañemoĩ koʼã tekove añáre.

Mbaʼéichapa ikatu ñañemoĩ hesekuéra

10, 11. Mbaʼéichapa ikatu ñañemoĩ Satanás ha idemoniokuérare?

¹⁰ Ndaikatúi ñañemoĩ Satanás ha idemoniokuérare ñandejehegui reínte. Pablo heʼi ñandéve: “Peñemombarete peñemopeteĩ rupi Ñandejára ndive, pe ipuʼaka mbaretekuépe”. Añetehápe, ñaikotevẽ Ñandejárare. Pe apóstol Pablo heʼive: “Pemonde pe ekípo [armadura completa, NM] [...] Ñandejára omeʼẽva peẽme, ikatu hag̃ua peime hatã ani hag̃ua penembotavy aña. Upéva rehe, pemonde pe ekípo [...] Ñandejára omeʼẽva peẽme, ikatu hag̃ua peropuʼaka ivai jave peẽme ha pejapopa rire ikatu hag̃ua pepyta hatã” (Efesios 6:​10, 11, 13, BNP).

¹¹ Pablo heʼi jey umi ermanokuérape omoĩ hag̃ua pe “ekípo” térã armadura completa oúva Ñandejáragui. Upéva heʼise nañamoĩmbáiramo pe armadúra ndaikatumoʼãiha ñandepuʼaka umi demóniore. Upévare, kristianokuéra koʼag̃agua oikotevẽ omoĩmbaite ijehe pe ekípo térã armadúra omeʼẽva Ñandejára. Mbaʼe mbaʼépa oĩ umíva apytépe?

Mbaʼéichapa ikatu ñañemoĩ Satanás rehe?

12. Mbaʼéichapa ikatu kristianokuéra ojopy porã ilómo pe añeteguápe?

¹² Pablo heʼi: “Peime hatãkena pe añeteguápe pejekuʼa jopyramoguáicha, ha pe teko potĩme, ku ekípo gerrahapeguáicha omoʼãva soldádo pytiʼa” (Efesios 6:​14, BNP). Umi mokõi mbaʼe ojeʼéva koʼápe oĩ pe armadúrape: peteĩ sínto guasu ha pe mbaʼe omoĩva umi soldádo ipytiʼa omoʼã hag̃ua. Pe soldádo ojopy porã vaʼerã pe sínto guasu omoʼã hag̃ua chupe ilómo (ikuʼa ha hyeguy) ha ojoko hag̃ua ijespáda. Upéicha avei, jaʼekuaa pe añetegua oĩva la Bíbliape jajopy porã vaʼerãha ñandejehe, ikatu hag̃uáicha jaiko heʼihaichaite. Ñamboykémapa peteĩ tiémpo jalee hag̃ua la Biblia koʼẽ koʼẽre? Ñanemoirũpa avei ñane família? Jajepokuaápa ñahesaʼỹijo pe téysto káda diagua ñane família ndive? Avei, jahechakuaápa umi mbaʼe omyesakãva ñandéve ‘pe tembiguái jeroviaha ha iñarandúva’ [esclavo fiel y discreto]? (Mateo 24:45.) Jajapóramo upéicha, ñañehaʼãñaína jajapo Pablo heʼivaʼekue. Jareko avei umi pelíkula oĩva vidéo ha DVD-pe ñanemboʼéva heta mbaʼe la Biblia heʼíva. Ñañekarama hatãramo pe añeteguáre ñanepytyvõta jadesidi porã hag̃ua ha ñandejokóta mbaʼe vai apógui.

13. Mbaʼéichapa ñañangarekokuaa ñande pyʼapýpe oĩvare?

¹³ Pe soldádo orekovaʼekue avei peteĩ mbaʼe omoʼãva ipytiʼa, ha upéicha oñangareko ikorasõre ha hetave mbaʼére. Pe kristiáno ikatu omoʼã térã oñangareko ipyʼapýpe oĩvare, ohayhúvo Ñandejára heʼíva ha ojapóvo umi mbaʼe Jehová ojeruréva. Jarekóramo pe ‘pytiʼa moʼãha’ nañamboykemoʼãi Ñandejára Ñeʼẽ heʼíva. ‘Nañandejaʼéirõ pe ivaívare, ha jahayhu  pe iporãva’, ñandejoko ani hag̃ua jaguata “tape vai rehe” (Amós 5:15; Salmo 119:101).

14. Mbaʼépa heʼise ñamoĩ pyreheguáramo pe “Marandu porã pyʼaguapy rehegua”?

¹⁴ Umi soldádo rrománo ipyrehegua porãvami, oguata puku hag̃ua umi tape iñasãivare haʼekuéra ogovernahague rupi. Mbaʼépa heʼise kristianokuéra omoĩvaʼerãha ipyreheguáramo pe “Marandu porã pyʼaguapy rehegua”? (Efesios 6:​15, JMP.) Heʼise oñembosakoʼivaʼerãha oñeʼẽ hag̃ua, omombeʼu hag̃ua pe notísia porã Ñandejára Rréino rehegua oimeha rupi (Romanos 10:​13-15). Japredika meméramo ñañemoʼãta umi ñuhã Satanás oiporúvagui (Efesios 6:​11, NM nóta).

15. a) Mbaʼépa ohechauka iñimportantetereiha pe eskúdo guasu jerovia rehegua? b) Mbaʼeichagua ‘mbaʼe rendýpa’ ikatu omokangy ñande jerovia?

¹⁵ Pablo heʼive: “Ha hiʼariete, pereko pe jerovia pende rekove moʼãháramo [pe eskúdo guasu, NM], pemboguepa hag̃ua [umi mbaʼe rendy opoíva Satanás]” (Efesios 6:​16, BNP). Heʼi mboyve Pablo jaiporuvaʼerãha pe ‘eskúdo guasu’ ñande jerovia rehegua heʼi “ha hiʼariete”, ohechauka hag̃ua ko mbaʼe iñimportantetereiha. Ñande jerovia naikangyvaʼerãi. Peteĩ eskúdo guasúicha, pe jerovia ñanemoʼã umi ‘mbaʼe rendy’ Satanás opoívagui. Mbaʼépa hína umíva? Umíva apytépe ikatu oike jejaʼo, japu ha umi mbaʼe ojeʼe reíva ñanderehe ñanemokangy hag̃ua. Koʼã mbaʼe opoi umi ndaijaʼéiva ñanderehe ha umi omboykevaʼekue Jehovápe. Ikatu avei jaipotaiterei umi mbaʼe jahecháva,  ha ñañehaʼã jajogua heta mbaʼe ojapoháicha umi ojechaukaséva. Ãichagua tapicha ikatu oiporu heta viru omoporãve hag̃ua hóga térã imbaʼyru, ha oiko avei ohechauka umi jeguaka térã ao hepy oiporúva. Upéicharamo jepe, tojapo ojapóva umi tapicha, ñande jerovia imbaretevaʼerã ñamboyke hag̃ua umi ‘mbaʼe rendy’ opoíva Satanás. Mbaʼéichapa ikatu ñamombarete ñande jerovia? (1 Pedro 3:​3-5; 1 Juan 2:​15-17.)

16. Mbaʼéichapa ikatu ñamombarete ñande jerovia?

¹⁶ Ñañemoag̃ui Ñandejárare jastudia memévo la Biblia ha ñañemboʼévo ñande pyʼaite guive. Jajerurekuaa Jehovápe tomombarete ñande jerovia, ha upéi ñambaʼapo umi mbaʼe jajerurévare. Upévare, jajeprepara porãpa káda semána ikatu hag̃uáicha ñakomenta ojestudia jave Ñemañaha? Jastudiáramo la Biblia ha umi puvlikasión oñerenohẽva chugui, ñande jerovia imbaretevéta (Hebreos 10:​38, 39; 11:6).

17. Mbaʼéichapa ñamoĩ pe salvasión “ñane akã reheguáicha”?

¹⁷ Omombeʼupa hag̃ua mbaʼe mbaʼépa oreko pe armadúra omeʼẽva Ñandejára, Pablo heʼi: “Pereko pe salvasión pene akã reheguáicha, ha pejagarra pe [...] Ñandejára Ñeʼẽ ku espáda Espíritu Sánto omeʼẽva peẽmeicha” (Efesios 6:​17, BNP). Umi soldádo orekóvami iñakãre peteĩ kásko térã yelmo oñangareko hag̃ua iñakã ha iñapytuʼũre. Upéicha avei,umi mbaʼe porã ñahaʼarõva ñanepytyvõ jadesidi porã hag̃ua (1 Tesalonicenses 5:8). Ñamyenyhẽrangue ñane akã umi mbaʼeta ko múndope oĩva reheve, jajesarekovaʼerã pe esperánsa Ñandejára omeʼẽvaʼekuére, ojapohaguéicha Jesús (Hebreos 12:2).

18. Mbaʼérepa jastudia meme vaʼerã la Biblia?

¹⁸ Ha ipahápe, Ñandejára ñeʼẽ oĩva la Bíbliape ñanemoʼã Satanás ha idemoniokuéragui. Upéicha jahechave mbaʼérepa jastudia meme vaʼerã la Biblia. Jaikuaa porãramo Ñandejára Ñeʼẽ ñañemoʼãta umi japu ha ñeʼẽ rei oúva Satanás ha idemoniokuéragui, ha avei umi apóstata heʼívagui.

“Peñemboʼe ha pejerure tapia”

19, 20. a) Mbaʼépa oikóta Satanás ha idemoniokuérare? b) Mbaʼépa omombaretéta ñande jerovia?

¹⁹ Satanás, umi demónio ha ko múndo aña koʼẽrõitéma oñehundíta. Añetehápe, Satanás “oikuaágui hiʼára mbykymaha” ipochyeterei, ha oñorairõ umi iñeʼẽrendúva ndive [...] Ñandejára [heʼívape] ha ojeroviáva Jesucristo rehe” (Apocalipsis [Revelación] 12:​12, 17, BNP). Upévare tekotevẽ ñañemoĩ Satanás ha idemoniokuéra rehe.

²⁰ Javyʼaitereivaʼerã ojeʼehaguére ñandéve ñamoĩmba hag̃ua pe “ekípo” térã armadúra omeʼẽva Ñandejára. Oñeʼẽmba rire Pablo pe armadúra Ñandejára omeʼẽvare, heʼi ñandéve: “Pejapo opa koʼã mbaʼe orasión reheve, peñemboʼe ha pejerure tapia Espíritu Sánto rupi. Pemaʼẽke, ha ani pende pyʼa kangy, ha peñemboʼe opa umi [...] Ñandejára[re] ojeroviáva rehe” (Efesios 6:​18, BNP). Ñañemboʼéramo imbaretevéta ñande jerovia ha ñanepytyvõta ñañatende porã hag̃ua. Upévare, ñamombaʼevaʼerã Pablo heʼivaʼekue ha ñañemboʼe meme, ikatu hag̃ua ñañemoĩ mbarete Satanás ha idemoniokuérare.

Mbaʼépa ñaaprende?

• Mbaʼéichapa oñepyrũrakaʼe Satanás ha idemoniokuéra?

• Mbaʼépa ikatu ojapo Satanás?

• Mbaʼéichapa ikatu ñañemoĩ Satanás ha idemoniokuéra rehe?

• Mbaʼéichapa ñamoĩkuaa pe armadúra omeʼẽva Ñandejára?

[Porandu ñahesaʼỹijóva]

[Nóta oĩva taʼanga ndive páhina 17]

‘Ñandejára raʼykuéra ohecha iporãitereiha umi yvypóra rajykuéra’

[Nóta oĩva taʼanga ndive páhina 19]

Jaikuaápa ñande umi seis mbaʼe orekóva pe armadúra omeʼẽva Ñandejára?

[Nóta oĩva taʼanga ndive páhina 20]

Mbaʼéichapa ñanepytyvõ koʼã tembiapo ñañemoĩ hag̃ua Satanás ha idemoniokuéra rehe?