Mbaʼépa ojapo ñanderehe umi ánhel

“Koʼã mbaʼe rire, ahecha oguejy yvágagui ótro ánhel tuicha autorida reheve [...]. Ha hatã osapukái ha heʼi: ‘Hoʼáma, hoʼáma Babilonia, pe siuda tuichaitéva’.” (APOCALIPSIS [REVELACIÓN] 18:​1, 2, BNP.)

1, 2. Mbaʼéichapa jahecha Jehová oiporuha umi ánhelpe ojapo hag̃ua hembipota?

 OÑEMONDO rire pe ísla hérava Pátmospe, apóstol Juan ohecha ikeperõguáicha umi mbaʼe Ñandejára ojapótava. Ñandejára ohechauka chupe ijespíritu rupive hetaiterei mbaʼe oikótava ‘Karai árape’. Upe ára oñepyrũ oñemoĩrõ guare Jesucrístope oisãmbyhy hag̃ua 1914-pe, ha ipukúta mil áño (Apocalipsis [Revelación] 1:10).

² Ñandejára Jehová ojevale peteĩ ánhel rehe ohechauka hag̃ua koʼã mbaʼe apóstol Juánpe. Apocalipsis [Revelación] 1:1 heʼi: “Koʼã mbaʼe [...] Ñandejára ohechaukavaʼekue Jesucrístope, Haʼe oikuaauka hag̃ua hembiguaikuérape umi mbaʼe voi oikovaʼerã. Jesucristo oikuaaukavaʼekue koʼã mbaʼe hembiguái Juánpe hiʼánhel rupi”. Jesús rupive, Jehová oiporu peteĩ ánhel oikuaauka hag̃ua Juánpe umi mbaʼe guasuete oikótava pe ‘Karai árape’. Upe riréma, Juan ohecha avei ‘ótro ánhel oguejýva yvágagui tuicha autorida reheve’. Mbaʼépa ojapo ko ánhel? La Biblia omombeʼu: “Ha hatã osapukái ha heʼi: ‘Hoʼáma, hoʼáma Babilonia, pe siuda tuichaitéva’” (Apocalipsis [Revelación] 18:​1, 2, BNP). Ko ánhel ikatupyrýva omombeʼu hoʼahague Babilonia Guasu, ojeʼeháicha opaichagua rrelihión japúre. Upéicha jahecha Jehová oiporuha umi ánhelpe ojapo hag̃ua heta mbaʼe haʼe oipotáva. Upéicharamo jepe, jahecha mboyve mbaʼérepa Ñandejára ojaporakaʼe umi ánhelpe ha mbaʼépa ikatu haʼekuéra ojapo yvyporakuérare, jahechami mbaʼéichapa koʼã tekove yvagapegua oiko ñepyrũ vaʼekue.

Mbaʼéichapa oiko ñepyrũ vaʼekue umi ánhel?

3. Mbaʼépa ndoikuaaporãi heta ñande rapichakuéra umi ánhel rehegua?

³ Koʼág̃a rupi, hetaiterei ñande rapicha oguerovia umi ánhel oĩha. Upéicharamo jepe, heta oĩ ndoikuaaporãiva mbaʼépa ojapo hikuái ha moõguipa ou. Heta oĩ oimoʼãva omano vove peteĩ hogaygua, Ñandejára oguerahaha oiko hag̃ua chugui peteĩ ánhel. Omboʼépa upéicha Ñandejára Ñeʼẽ?

4. Omombeʼuháicha Ñandejára Ñeʼẽ, moõguipa ou umi ánhel?

⁴ Pe ánhel ikatupyryve ha imbaretevéva héra Miguel, haʼéva peteĩ arkánhel (Judas 9). Upe ánhel hína Jesucristo (1 Tesalonicenses 4:16). Ojapóma millones de áño, oñepyrũ ypýrõ guare Ñandejára hembiapo, ko Taʼýra raẽvete ojapovaʼekue (Apocalipsis [Revelación] 3:14; 19:11). Upéi, ko Taʼýra rupive, ojapo ambue anhelkuérape (Colosenses 1:​15-17). Imanduʼávo hesekuéra itaʼyraha, Jehová oporandu Jóbpe: “Mamo piko nde reiméraʼe che amopyenda jave ko yvy? Ere chéve, reikuaapáramo añete. Mávapa omoĩ pe ita tenondegua, opurahéi aja [...] umi mbyja koʼẽ, [umi Ñandejára raʼykuéra yvagapegua] vyʼa paʼũme?” (Job 38:​4, 6, 7). Upéicha hesakã porã Ñandejára ojapohague umi ánhelpe, ha haʼekuéra oĩmahague yvypóra ojejapo mboyve.

5. Mbaʼéichapa Jehová omohenda umi ánhelpe?

 ⁵ ‘Ñandejára ndoikói sarambípe, oiko uvei pyʼaguapýpe’, heʼi 1 Corintios 14:33. Upéicha rupi, Jehová omohenda itaʼyrakuéra yvagapegua mbohapy atýpe: 1) serafínes, oservíva Ñandejára renondépe, omoherakuãva imarangatu ha oñangarekóva ani hag̃ua ikyʼa iñorganisasión; 2) keruvínes, omombaʼeguasúva Jehovápe, ha 3) umi ótro ánhel ojapóva Jehová oipotáva (Salmo 103:20; Isaías 6:​1-3; Ezequiel 10:​3-5; Daniel 7:10). Mbaʼépa ojapo yvyporakuérare koʼã ánhel yvagapegua? (Revelación 5:11.)

Mbaʼépa ojapo umi ánhel?

6. Mbaʼépa ojapouka Jehová umi keruvínpe hardín de Edénpe?

⁶ Génesis 3:​24-pe oñeñeʼẽ ñepyrũ koʼã anhelkuéra rehe. Upépe heʼi: “Omosẽ rire [Jehová yvypórape], omoĩ yvaty Edén renondépe kuarahy resẽ gotyo, tekove ipepóva [keruvín, nóta] ha kyse puku tata joguaha ovava mantéva, omboty hag̃ua yva oporomoingovéva rape”. Koʼã keruvín ndohejái Adán ha Évape oike jey pe hardín de Edénpe. Upéva oikovaʼekue yvypóra oñepyrũramóme. Mbaʼépa ojapo umi ánhel upe guive?

7. Mbaʼépa heʼise “ánhel” evréo ha griégo ñeʼẽme, ha mbaʼépa upévare ojapo avei hikuái?

⁷ La Biblia imanduʼa haimete cuatrocientos hendápe umi ánhel rehe. Evréo ha griégo ñeʼẽme “ánhel” heʼise “temimbou” térã mensahéro. Añetehápe, umi ánhel rupive Ñandejára oñemoñeʼẽ yvyporakuérape. Jahechahaguéicha umi mokõi párrafope ñañepyrũrõ guare, Jehová oiporuvaʼekue peteĩ ánhel omomarandu hag̃ua apóstol Juánpe.

8, 9. a) Mbaʼéichapa oñeñandu Manóah ha hembireko pe ánhel ohórõ guare hendapekuéra? b) Mbaʼépa omboʼe tuvakuérape Manóah ojerurevaʼekue Ñandejára ánhelpe?

⁸ Jehová avei ojokuái umi ánhelpe oipytyvõ ha omokyreʼỹ hag̃ua umi chupe oservívape ko Yvy ape ári. Oĩrõ guare umi hués Israélpe, Manóah ha hembireko oipotavaʼekue peteĩ mitã, péro hembireko ndaikatúi imemby. Upémaramo Jehová omondo peteĩ ánhel heʼi hag̃ua chupe: “Péina ápe nderyeguasúta ha nemembýta peteĩ mitãkuimbaʼe ha kyse haimbéva ndohasavaʼerãi iñakã rehe, péva pe mitãkuimbaʼe ningo Nasaréota hína. [Ñandejárape] g̃uarã yvy apére ouha ára guive, ha haʼe oñepyrũta onohẽ Israélpe umi Filisteaygua poguýgui” (Jueces 13:​1-5, ÑÑM).

⁹ Manóah rembireko imemby ha ombohéra Sansón, pe kuimbaʼe herakuã guasuetéva Ñandejára Ñeʼẽme (Jueces 13:24). Pe mitã onase mboyve, Manóah ojerure upe ánhel ou jey hag̃ua ha ohekomboʼe chupekuéra omongakuaa hag̃ua pe mitãme. Upémaramo oporandu chupe: “Mbaʼéicha romongakuaavaʼerã upe mitã ha mbaʼéicha haʼe oikovaʼerã?”. Ombohováivo, Jehová ánhel heʼi jey chupe umi mbaʼe heʼimavaʼekue hembirekópe (Jueces 13:​6-14). Katuete pe ánhel heʼivaʼekue tuicha omokyreʼỹ Manóahpe. Nog̃uahẽvéimaramo jepe koʼág̃a umi ánhel yvyporakuéra rendápe, iporã vaʼerã tuvakuéra ojapo Manóah ojapohaguéicha  ha oñehaʼã omongakuaa ifamiliakuérape Jehová oipotaháicha (Efesios 6:4).

10, 11. a) Mbaʼépa ojapovaʼekue Eliseo umi sírio ehérsito omongorárõ guare chupekuéra, ha mbaʼépa ojapo hembiguái? b) Mbaʼéichapa ikatu ñanepytyvõ upe oikovaʼekue?

¹⁰ Jahecha avei mbaʼeichaitépa ombaʼapo umi ánhel pe proféta Eliseo oĩrõ guare táva Dotánpe. Peteĩ jave, Eliseo rembiguái opuʼã pyharevete ha ohecha mbaʼéichapa umi soldádo ha imbaʼyrukuéra omongorapaitéma pe táva. Pe rréi oĩva Síriape ombou peteĩ ehérsito tuichaitereíva ojagarra hag̃ua Eliséope. Mbaʼépa ojapo upe hembiguái ohechámaramo upéva? Oñemondýi tuichaiterei, ha osapukái: “Ha, che jára. Mbaʼéiko jajapóta[?]”. Chupe g̃uarã, ivaipaitéma, péro Eliseo heʼi: ‘Ani rekyhyjétei, hetaiteve oĩ ñanendive, hendivekuéra oĩvagui’. Mbaʼérepa heʼi upéicha? (2 Reyes 6:​11-16, ÑÑM.)

¹¹ Eliseo oikuaa umi ánhel oĩha hendivekuéra. Upéicharamo jepe, hembiguái ndohechái chupekuéra. Upémaramo Eliseo oñemboʼe Ñandejárape ha ojerure chupe: “[Jehová,] ehesapeʼamína tohecha”. La Biblia heʼi Ñandejárare: “Ohesapeʼa hembiguáipe, ha omaʼẽvo ohecha; péina pe yvyty [térã montáña] henyhẽ tapicha kavaju ariguágui, ha [umi kárro] tataguiguáva Eliseo jere rehe” (2 Reyes 6:​17, ÑÑM). Upéicha pe tembiguái ohechakuaa umi ánhel oĩva hendivekuéra. Ñande avei, jajeroviágui Ñandejárare, jahechakuaa mbaʼéichapa umi ánhel ombaʼapóva Jehová ha Jesucristo poguýpe, oipytyvõ ha oñangareko Ñandejára siervokuérare.

Mbaʼéichapa oporopytyvõ umi ánhel Jesucristo oikórõ guare Yvy ape ári

12. Mbaʼéichapa oipytyvõ pe ánhel Gabriel Maríape?

¹² Ñapensamína mbaʼeichaitépa oipytyvõneraʼe Maríape ohendúrõ guare ko notísia: “Nde ryeguasúta ha nemembýta, ha pe mitã rembohérata Jesús”. Ojeʼe mboyvemi chupe ko mbaʼe, Ñandejára ombou ánhel Gabriélpe heʼi hag̃ua chupe: “María, ani rekyhyje, [Ñandejára] nde rerohory” (Lucas 1:​26, 27, 30, 31). Mbaʼeichaitépa oiméne omokyreʼỹ ha omombarete chupe oikuaávo Ñandejára oĩha hendive!

13. Mbaʼéichapa umi ánhel oipytyvõvaʼekue Jesúspe?

¹³ Jahechakuaa avei upéva umi ánhel oipytyvõrõ guare Jesúspe. Upéva oiko ohasa riremi umi mbohapy tentasión Satanás omoĩvaʼekue chupe oĩrõ guare de siértope. La Biblia heʼi mbaʼépa oiko upe rire: “Upémaramo pe aña oheja ichupe, ha og̃uahẽ Jesús rendápe anhelkuéra oservi hag̃ua ichupe” (Mateo 4:​1-11, BNP). Upéicha avei oiko pe pyhare Jesús omano mboyve. Ojepyʼapyetereígui, oñesũ ha oñemboʼe kóicha: “Che Ru, reipotáramona eipeʼa chehegui ko jepyʼapy asy arekóva; opáichavo, ani oiko che rembipota, pene rembipotánte toiko”. Heʼipa riremi upéva, “ojechauka ichupe peteĩ ánhel yvagapegua omombarete hag̃ua ichupe” (Lucas 22:​42, 43, BNP). Péro mbaʼéichapa ñanepytyvõ koʼág̃a umi ánhel?

Mbaʼéichapa oporopytyvõ umi ánhel koʼág̃a

14. Mbaʼéichapa ojepersegi testigos de Jehovápe, ha mbaʼépepa osẽ upéva?

¹⁴ Ñamañávo mbaʼéichapa testigos de Jehová ombaʼapo opárupi, ndohechaukáipa upéva umi ánhel oipytyvõha avei chupekuéra? Jahecha upéva Alemania ha Európape oikovaʼekuére. Jehová siervokuéra ombohovái pe nazismo segunda Guerra Mundial oñepyrũ mboyve guive opa peve, 1939 guive 1945 peve. España, Italia ha Portugálpe katu areve ombohasa asy chupekuéra umi goviérno katóliko fascista. Unión Soviéticape ha umi tetã oĩvaʼekue ipoguýpe, heta árare avei ohasa asy hikuái. Ha ñanemanduʼavaʼerã avei mbaʼéichapa Testigokuéra ojeguereko asy vaʼekue heta tetãme Áfricape. * Ha ramove, Jehová siervokuéra ojepersegi mbarete avei upe tetã Geórgiape. Añetehápe, Satanás oñehaʼãmbaite ombyai testigos de Jehová rembiapo. Upéicharamo jepe, koʼã mbaʼe ndojokói chupekuéra ha ombaʼapo kyreʼỹve. Ha upéva oiko avei umi ánhel oipytyvõhaguére chupekuéra (Salmo 34:7; Daniel 3:28; 6:22).

15, 16. Mbaʼéichapa umi ánhel oipytyvõ testigo de Jehovápe opredika hag̃ua opárupi?

 ¹⁵ Testigos de Jehovápe g̃uarã, tuichaiterei mbaʼe opredika opárupi pe notísia porã Ñandejára Rréino rehegua. Upéicha avei, oñemboʼe la Biblia umi oikuaasevévape oiko hag̃ua chuguikuéra Jesús remimboʼe (Mateo 28:​19, 20). Upéicharamo jepe, oikuaa porã ndaikatuiha ojapo ko mbaʼe noipytyvõiramo chupekuéra umi ánhel. Upévare, Apocalipsis [Revelación] 14:​6, 7 heʼíva tuicha omokyreʼỹ chupekuéra. Upépe heʼi: “Ha ahecha ótro ánhel ovevéva pe yvága mbyte rehe, oguerekóva pe [marandu] salvasión rehegua tapia g̃uarãva omoherakuã hag̃ua yvyporakuérape, opa tetãnguéra, trívu, ñeʼẽ ha tetãyguápe. Ha hatã heʼi: ‘Pekyhyjéke [...] Ñandejáragui ha pemombaʼeguasúke ichupe, og̃uahẽmagui pe oporohusga hag̃ua ára; ha pemombaʼeguasu pe ojapovaʼekuépe yvága ha yvy, pe már ha umi yvukuéra’” [BNP].

¹⁶ Koʼápe jahecha porã mbaʼéichapa umi ánhel oipytyvõ ha omoakã pe tembiapo ojapóva opárupi testigos de Jehová. Ñandejára oiporu umi ánhelpe ikatu hag̃ua umi tapicha ipyʼaporãva og̃uahẽ Itestigokuéra rendápe, ha avei haʼekuéra og̃uahẽ hag̃ua umi tapicha oĩháme. Upéicha rupi, hetaiterei vése testigokuéra og̃uahẽ umi tapicha oĩ vaive jave ha oikotevẽ oñepytyvõ chupekuéra.

Pe mbaʼe guasuete ojapótava hikuái koʼẽrõite

17. Mbaʼépa ojapo asiriokuérare peteĩ ánhel añónte?

¹⁷ Oikuaaukáramo jepe Ñandejára rembipota ha oipytyvõ Jehová rembiguaikuérape, umi ánhel rembiapo ndopái upépe. Jehová oiporuvaʼekue chupekuéra yma ohundi hag̃ua umi iñañávape. Jahecha upéva peteĩ mbaʼe oikovaʼekuére síglo VIII-pe, Jesús ou mboyve. Upérõ umi soldádo asírio ojagarramoʼã Jerusalén. Péro Jehová heʼi: “Ko távape amoʼãta ha anohẽta jejopy vaígui, che rembiguái David, ha Chete voi rehehápe”. Upéi la Biblia heʼive: “Upe pyharépe voi Ñandejára remimbou [térã pe ánhel] oho asiriokuéra rekohápe ha upépe ojuka 185.000 kuimbaʼépe; upe ára ambuépe ikoʼẽjoa heʼõngue” (2 Reyes 19:​34, 35). Ikangyetépa yvyporakuéra peteĩ ánhel rovake!

18, 19. Mbaʼépa ojapóta koʼẽrõite umi ánhel, ha mbaʼéichapa oñandúta upéva yvyporakuéra?

¹⁸ Koʼẽrõite, Jehová oiporúta umi ánhelpe ojapo hag̃ua avei upéicha. Upe jave, Jesús oúta hiʼanhelkuéra ndive ‘tata rendýpe okastiga hag̃ua umi oikuaaʼỹvape Ñandejárape, ha iñeʼẽrenduʼỹvape upe marandu porã Jesús rehegua’ heʼívape (2 Tesalonicenses 1:​7, 8). Mbaʼeichaitépa yvyporakuéra oñemondýita oiko vove ko mbaʼe! Upépe oñehundipáta umi ojaposeʼỹva Ñandejára goviérno ojeruréva ha ojekuaaukavahína opárupi. Umi ohekáva Jehovápe ha oguatáva tape potĩre ha heko pochyʼỹva añoite oñeñomíta Jehová “ipochytaha árape” ha noñehundimoʼãi (Sofonías 2:3).

¹⁹ Javyʼavaʼerã Jehová oiporuhaguére umi ánhel imbaretetévape oipytyvõ hag̃ua umi chupe omombaʼeguasúvape. Avei, jahechakuaávo mbaʼéichapa oiporu Jehová umi ánhelpe koʼýte ñanemokyreʼỹ, jaikuaágui oĩha avei ánhel iñañáva opuʼãvaʼekue Jehováre ha oñemoĩva Satanás poguýpe. Pe artíkulo oúvape jahecháta mbaʼéichapa kristianokuéra ikatu oñemoʼã Satanás ha idemoniokuéra puʼakágui.

[Nóta]

Mbaʼépa ñaaprende?

• Mbaʼéichapa oiko ñepyrũ vaʼekue umi ánhel?

• Mbaʼe mbaʼépa ojapovaʼekue yma umi ánhel?

• Mbaʼépa heʼi Apocalipsis [Revelación] 14:​6, 7 ojapohahína umi ánhel koʼág̃a?

• Mbaʼépa ojapóta koʼẽrõite umi ánhel?

[Porandu ñahesaʼỹijóva]

[Nóta oĩva taʼanga ndive páhina 13]

Peteĩ ánhel oipytyvõ Manóah ha hembirekópe

[Nóta oĩva taʼanga ndive páhina 14]

‘Hetaiteve oĩ ñanendive, hendivekuéra oĩvagui’