Umi ansiáno ñanderayhueterei, ñaneñeʼẽrendúkena chupekuéra

“Peneñeʼẽrendúke pene sãmbyhyhárape ha peñemoĩ ipoguypekuéra.” (HEBREOS 13:17.)

1, 2. Mbaʼe téystopa ohechauka Jehová ha Jesús ñanderayhu ha oñangareko porãha ñanderehe?

 JEHOVÁ ha itaʼýra Jesucristo ningo ñanderayhu ha upévare oñangareko porã ñanderehe. Isaías heʼivaʼekue: ‘Og̃uahẽma Ñandejára ipokatu reheve ha pyapy mbaretépe opa mbaʼe ipoguýpe omoĩ. Ovecha rerekuáicha ogueraha ijovechakuéra omongarúvo, ohupi umi ovecha raʼy, ogueraha ijyva ári ha oñangareko ovecha imembyramóva rehe’ (Isaías 40:​10, 11).

² Ko profesía oñekumpli umi hudío oho jeýrõ guare Judápe 537-pe Jesús ou mboyve (2 Crónicas 36:​22, 23). Ha oñekumpli jey 1919-pe Jesucristo oguenohẽrõ guare ‘Babilonia Guasúgui’ umi kristiáno yvágape ohótavape (Apocalipsis [Revelación] 18:2; Isaías 44:28). Jesús rupive Jehová oisãmbyhy umi ovechápe, ombyaty ha oñangareko hesekuéra. Jesús voi heʼivaʼekue: ‘Che haʼe pe ovecha rerekua imbaʼeporãva. Che aikuaaháicha che ovechápe, haʼekuéra chekuaa chéve’ (Juan 10:14).

3. Mbaʼéichapa jaikuaa Jehová ojepyʼapyha ijovechakuérare?

³ Isaías 40:​10, 11 heʼíva ohechauka mbaʼeichaitépa Jehová ohayhu isiervokuérape ha oñangareko porã hesekuéra (Salmo 23:​1-6). Jesús oĩrõ guare ko Yvy ape ári ohechauka avei ohayhuha opaichagua tapichápe (Mateo 11:​28-​30; Marcos 6:​34). Avei Jehová ha Jesús omongavaju umi Israel mburuvichakuérape ipyʼahatã ha oreko asy haguére umi héntepe (Ezequiel 34:​2-​10; Mateo 23:​3, 4, 15). Jehová opromete: ‘Che aháta aipytyvõ umi che ovecha ha haʼekuéra noĩmoʼãvéima peñemboharaipa hag̃ua hesekuéra: che ambohovakéta ovecha ovecha ndive. Amoĩta che ovechakuéra renondépe che rembiguái David, ha haʼeñoite oñangarekóta hesekuéra. Haʼéta iñangarekoha’ (Ezequiel 34:​22, 23). Koʼã ára pahápe Jehová omoĩ Jesucrístope “ñoite” oñangareko hag̃ua isiervokuérare. Haʼe oñangareko umi yvágape ohótavare ha ‘ambue ovechakuérare’ (Juan 10:16).

Yvágagui oñemeʼẽ rregálo kongregasiónpe g̃uarã

4, 5. a) Mbaʼe rregálo iporãitereívapa omeʼẽ Jehová isiervokuérape? b) Mbaʼe rregálopa Jesús omeʼẽ kongregasiónpe?

⁴ Jehová omeʼẽ kongregasiónpe peteĩ rregálo iporãitereíva. Omoĩ Jesucrístope “ñoite” oñangareko hag̃ua hesekuéra. Isaías 55:​4-pe oñeñeʼẽ ko mbaʼére: “Che amoĩ chupe mbaʼe rechaha ha mbaʼe renduháramo tetãnguérape g̃uarã. Huvicha ha hekomboʼeháramo”. Umi kristiáno yvágape ohótava ha pe “aty guasu” ningo osẽ opa tetãgui (Apocalipsis [Revelación] 5:​9, 10; 7:9, BNP). Haʼekuéra oĩ “peteĩ atýpente” ha ‘peteĩnte herekua’, upéva hína Jesucristo.

⁵ Jesús omeʼẽ avei peteĩ rregálo neporãva kongregasiónpe. Omeʼẽ umi pastór  imbaʼeporãva oñangarekóva ovechakuérare haʼe ha Jehová ojapoháicha. Apóstol Pablo oñeʼẽ ko mbaʼe porãitére ohaírõ guare umi kristiáno Efesoyguápe: ‘Haʼe ojupírõ yvágape heta prisionéro oguerahavaʼekue, ha yvypórape heta mbaʼe omeʼẽ. Oĩ omeʼẽvape oiko hag̃ua apóstolramo ha ambuépe katu profétaramo. Oĩ omoĩva omoherakuã hag̃ua pe marandu porã, ambuépe katu oisãmbyhy hag̃ua umi Ñandejárare ojeroviávape ha omboʼe hag̃ua chupekuéra. Haʼe péicha ojapo ombosakoʼívo umi Ñandejárare ojeroviávape ombaʼapo hag̃ua hapichakuéra rehehápe, omombarete hag̃ua Cristo rete’ (Efesios 4:​8, 11, 12).

6. Mbaʼépa ojeʼe Apocalipsis 1:​16, 20-pe umi superintendénte yvágape ohótavare? Mbaʼéichapa jahechavaʼerã umi ansiáno ojeporavóva ambue ovechakuéra apytégui?

⁶ Koʼã rregálo niko umi ansiáno, Jehová ha Jesús oiporavóva espíritu sánto rupi oñangareko hag̃ua ovechakuérare (Hechos 20:​28, 29). Yma ningo umi kristiáno yvágape ohótava añoite oñangareko kongregasionkuérare. Apocalipsis 1:​16, 20-pe heʼi Cristo orekoha ipo deréchape ‘estrélla’ térã ‘ánhel’. Koʼãva hína umi ansiáno oĩva ipoguýpe. Koʼã ára pahápe saʼíma oĩ umi superintendénte ohótava yvágape. Upévare ojeporavo heta superintendénte térã ansiáno ambue ovechakuéra apytégui. Haʼekuéra oĩ avei Jesús po deréchape (térã ipoguýpe). Pe Cuerpo Gobernante oiporavo chupekuéra espíritu sánto rupi (Isaías 61:​5, 6). Umi ansiáno kongregasionpegua oñemoĩ Cristo poguýpe, upévare ñaipytyvõvaʼerã chupekuéra (Colosenses 1:18).

Ñaneñeʼẽrendu ha ñañemoĩ ipoguypekuéra

7. Mbaʼépa heʼi apóstol Pablo jajapovaʼerãha?

⁷ Jehová ha Jesucristo oipota ñaneñeʼẽrendu umi ansiánope ha ñañemoĩ ipoguypekuéra. Haʼekuéra voi omoĩ chupekuéra oñangareko hag̃ua kongregasión rehe (1 Pedro 5:5). Apóstol Pablo heʼivaʼekue: ‘Penemanduʼáke umi penesãmbyhyvaʼekuére, ha umi omog̃uahẽvaʼekue peẽme Ñandejára marandu. Pejepyʼamongetamína hekovekuéra rehe ha peñehaʼã peiko haʼekuéra oikoháicha. Peneñeʼẽrendúke pene sãmbyhyhárape ha peñemoĩ ipoguypekuéra. Haʼekuéra niko oñangareko penderehe kaneʼõʼỹre, oikuaágui omombeʼuvaʼerãha Ñandejárape opa ojapovaʼekue. Peñehaʼã taivevúi chupekuéra hembiapo, ani ipohýi. Peichaʼỹrõ naiporãichéne peẽme’ (Hebreos 13:​7, 17).

8. Mbaʼe rehépa Pablo oipota ‘jajepyʼamongeta’, ha mbaʼépa heʼise ‘peneñeʼẽrendúke?

 ⁸ Jahecha Pablo heʼiha ‘jajepyʼamongetavaʼerãha’ umi ansiáno rekove rehe ha ñañehaʼã jaiko haʼekuéraicha. Avei heʼi ñaneñeʼẽrendu hag̃ua chupekuéra ha ñañemoĩ ipoguýpe. Peteĩ karai arandu hérava R. T. France heʼi pe ñeʼẽ griégo ojetradusíva ‘peneñeʼẽrendúke’ heʼise “jahejaha ojeʼe ñandéve mbaʼépa jajapovaʼerã ha kyreʼỹme jajapo”. Ñaneñeʼẽrendu ansianokuérape Ñandejára Ñeʼẽ heʼígui upéva, ha jagueroviágui haʼekuéra ojepyʼapyha ñanderehe ha oñangarekoseha opa mbaʼe Jehová omoĩvare ipoguypekuéra. Katuete javyʼáta ñaneñeʼẽrendúramo chupekuéra.

9. Mbaʼérepa tekotevẽ ñaneñeʼẽrendu, ha avei ñañemoĩ umi ansiáno poguýpe?

⁹ Ha oimérõ ndajagueroviapái oĩ porãne hag̃ua umi ansiáno heʼíva, mbaʼépa jajapovaʼerã? Upéicharõ jepe ñañemoĩvaʼerã ipoguypekuéra. Ndahasyirasáningo ñaneñeʼẽrendu ñantende porã jave mbaʼérepa ojejapo peteĩ mbaʼe. Péro nañantendéiramo jepe ñañemoĩvaʼerã ipoguypekuéra ha jajapo heʼíva hikuái. Upéicha ojapo Pedro. Haʼe oĩvaʼekue umi 12 apóstol apytépe (Lucas 5:​4, 5).

Mbaʼérepa ñaipytyvõsevaʼerã umi ansiánope

10, 11. Mbaʼéichapa umi superintendénte omog̃uahẽrakaʼe Ñandejára marandu síglo primérope? Ha koʼág̃a rupi?

¹⁰ Hebreos 13:​7, 17-pe apóstol Pablo oñeʼẽkuri cuatro mbaʼe ñanepytyvõvare ñaneñeʼẽrendu hag̃ua ansianokuérape. Ñepyrũrã haʼekuéra ‘omog̃uahẽ ñandéve Ñandejára marandu’. Ñanemanduʼákena Jesús omoĩha koʼã kuimbaʼépe oñangareko hag̃ua kongregasiónre, ha ‘ombosakoʼi hag̃ua umi Ñandejárare ojeroviávape’ (Efesios 4:​11, 12). Síglo primérope, Jesús ojevalevaʼekue umi ansiánore okorrehi ha ohekomboʼe hag̃ua umi kristiánope. Upearã oĩ ansiáno ohaíva kárta umi kongregasiónpe, ha koʼã kárta oñemoĩ la Bíbliape. Koʼã superintendénte rupive, Jesús  oipytyvõ ha omombarete umi kristiánope (1 Corintios 16:​15-​18; 2 Timoteo 2:2; Tito 1:​5).

¹¹ Koʼág̃a Jesús ñanemoakã ‘tembiguái jeroviaha ha iñarandúva’ rupive. Cuerpo Gobernante ha umi ansiáno kongregasionpegua orrepresenta pe tembiguáipe (Mateo 24:45). Ñamombaʼégui Jesucrístope jajapo Pablo heʼivaʼekue: ‘Rojerure peẽme pemombaʼe hag̃ua umi ombaʼapóvape pende apytépe, ha penemotenondéva Ñandejára rérape ha penerekomboʼéva’ (1 Pedro 5:4; 1 Tesalonicenses 5:​12; 1 Timoteo 5:17).

12. Mbaʼéichapa umi superintendénte ‘oñangareko ñanderehe kaneʼõʼỹre’?

¹² Avei, ñaneñeʼẽrenduvaʼerã ansianokuérape ‘haʼekuéra oñangareko rupi ñanderehe kaneʼõʼỹre’. Ohecháramo ñanekangy térã jaguata karẽha, pyaʼe oñemoñeʼẽ ñandéve (Gálatas 6:1). Ojeʼe hesekuéra ‘oñangarekoha kaneʼõʼỹre’ térã ‘ndokeiha’. Peteĩ karai arandu heʼi: “Oñangareko hikuái ku pastór ojesareko memeháicha ijovechakuérare”. Heta vése ningo umi ansiáno ndokéi anga ojepyʼapýgui ñanderehe. Umi ansiáno oñehaʼãmbaite oñangareko ñanderehe ojapoháicha Jesús, ‘pe ovecha rerekua guasu’. Upévare, iporãitéta jajapóramo haʼekuéra heʼíva (Hebreos 13:20).

13. Mbaʼépa omombeʼuvaʼerã Ñandejárape umi superintendénte, ha avei enterove kristianokuéra?

¹³ Jajapo avei umi superintendénte heʼíva jaikuaágui ‘omombeʼuvaʼerãha Ñandejárape opa ojapovaʼekue’. Koʼã pastór oikuaa ombaʼapoha Jehová ha Jesucrístope g̃uarã (Ezequiel 34:​22-​24). Jehová ojoguavaʼekue umi ovecha Jesús ‘ruguy tee rupi’. Upévare umi superintendénte omombeʼuvaʼerã Ñandejárape opa ojapóva ijovechakuérare (Hechos 20:​28, 29). Añetehápe, enterove ñamombeʼuvaʼerã Jehovápe mbaʼérepa jajapo térã ndajajapói haʼe heʼíva (Romanos 14:​10-​12). Ñaneñeʼẽrendúramo umi ansiánope jahechauka ñañemoĩha Cristo poguýpe. Haʼéngo omoakã kongregasión (Colosenses 2:19).

14. Mbaʼe jajapóramopa ikatu ipohýi umi ansiánope hembiapo, ha mbaʼépepa osẽta upéva?

¹⁴ Pablo omombeʼuve mbaʼérepa ñañemoĩsevaʼerã umi ansiáno poguýpe. “Peñehaʼã taivevúi chupekuéra hembiapo, ha ani ipohýi. Peichaʼỹrõ, naiporãichéne peẽme.” (Hebreos 13:17.) Umi ansiáno ningo heta hembiapo. Haʼekuéra oporomboʼe, oñangareko ermanokuérare, omotenonde predikasión, oñangareko ifamíliare ha ohecha umi provléma oĩva kongregasiónpe (2 Corintios 11:​28, 29). Ndajajaposéiramo umi ansiáno heʼíva ijetuʼúta chupekuéra hembiapo ha vyʼaʼỹme ojapóta. Nañaipytyvõséiramo chupekuéra Jehová ipochýta ha ikatu ñasẽ vai. Péro, ñamombaʼéramo ansianokuérape ha kyreʼỹme jajapo heʼíva, haʼekuéra vyʼápe ojapóta hembiapo. Upéicharõ enterove ñaime porãta oñondive ha vyʼápe japredikáta (Romanos 15:​5, 6).

Ñañemoĩke ipoguypekuéra

15. Mbaʼéichapa jahechauka ñaneñeʼẽrenduha umi ansiánope ha ñañemoĩha ipoguypekuéra?

¹⁵ Heta mbaʼe ikatu jajapo ñaipytyvõ ha g̃ua umi ansiánope. Pór ehémplo, ikatu ohecha hikuái iporãvetaha okambia día ha óra oñesẽ hag̃ua predikasiónpe. Ñane rembiapóramo jepe upe ára térã upe órape, ñañehaʼãtapa ñamohenda ñasẽ hag̃ua? Ñañehaʼãramo jajapo umi ansiáno heʼíva ikatu jahupyty heta mbaʼe porã. Avei, superintendénte de servísio ovisitáramo ñande Estúdio de lívro, mbaʼépa ikatu jajapo? Ñasẽ meme japredika upe semánape. Ha oñemeʼẽramo ñandéve peteĩ tembiapo Eskuéla dél Ministério Teokrátikope, mbaʼépa jajapovaʼerã? Ñañehaʼãmbaite jajapo porã. Ha pe ermáno omoakãva ñande estúdio de lívro heʼíramo ñamopotĩvaʼerãha salón? Ñañehaʼãmbaitevaʼerã ñaipytyvõ. Jajapóramo koʼã mbaʼe jahechaukáta ñañemoĩha umi ansiáno poguýpe. Jaikuaa Jehová ha Jesús omoĩha chupekuéra oñangareko hag̃ua kongregasiónre.

16. Mbaʼérepa naiporãmoʼãi ñapuʼã peteĩ ansiánore ndojapoporãiramo jepe hembiapo?

¹⁶ Ikatu peteĩ ansiáno ndojapói tembiguái jeroviaha ha Cuerpo Gobernante heʼíva. Nokambiáiramo Jehová ohusgáta chupe. Haʼe ‘oñangareko ha omaʼẽ ñanderehe ovecha rerekuáicha’ (1 Pedro 2:​25). Péro naiporãmoʼãi ñapuʼã peteĩ ansiánore, jepe ojavy térã ndojapoporãi hembiapo. Jehová arakaʼeve ndoguerohorýi umi naiñeʼẽrendúiva térã opuʼãvape umi omoakãvare (Números 12:​1, 2, 9-​11).

Jehová ñanevendesíta ñaipytyvõséramo ansianokuérape

17. Mbaʼéichapa jahechavaʼerã ansianokuérape?

¹⁷ Jehová oikuaa umi superintendénte haʼe oiporavóva ikatuha ojavy. Upéicharõ jepe ojevale hesekuéra ha omeʼẽ chupekuéra ijespíritu oñangareko hag̃ua kongregasiónre. Jehová siervokuérare ‘ojehechauka pe puʼaka guasuete Ñandejára mbaʼenteha, ha ndahaʼeiha ñanembaʼe’ (2 Corintios 4:7). Upéicharõ, jaagradesevaʼerã Jehovápe omoĩhaguére umi ansiáno oñangareko hag̃ua ñanderehe. Ha ñaipytyvõsevaʼerã chupekuéra.

18. Mbaʼépa jahechauka ñañemoĩvo umi superintendénte poguýpe?

¹⁸ Umi superintendénte oñehaʼã ojapo ko mbaʼe Jehová heʼivaʼekue: “Ameʼẽta peẽme penesãmbyhyhára che arohorýva. Haʼekuéra penesãmbyhýta mbaʼekuaa ha arandúpe” (Jeremías 3:​15). Katuete umi ansiáno ojapo porã hembiapo. Haʼekuéra oñangareko Jehová siervokuérare ha omboʼe chupekuéra. Ñaipytyvõkena umi ansiánope, ñaneñeʼẽrendu chupekuéra ha ñañemoĩ ipoguypekuéra. Upéicha jahechaukáta ñamombaʼeha ojapóva hikuái ñanderehehápe kaneʼõʼỹre, ha avei ñamombaʼeha Jehová ha Jesucrístope.

Ñanemanduʼa hag̃ua

• Mbaʼéichapa Jehová ha Jesús ohechauka oñangareko porãha ñanderehe?

• Mbaʼérepa tekotevẽ ñaneñeʼẽrendu, ha avei ñañemoĩ umi ansiáno poguýpe?

• Mbaʼéichapa jahechauka ñañemoĩha umi ansiáno poguýpe?

[Porandu ñahesaʼỹijóva]

[Nóta oĩva taʼanga ndive páhina 28]

Umi ansiáno oñemoĩ Cristo poguýpe

[Nóta oĩva taʼanga ndive páhina 29]

Oĩ heta mbaʼe ohechaukáva ñañemoĩha umi ansiáno poguýpe