Ñamombaʼeguasu Jehovápe kongregasiónpe

“Che aikuaaukáta nde Réra chepehenguekuérape, pe [kongregasiónpe] amombaʼeguasúne nde Réra.” (HEBREOS 2:​12, JMP.)

1, 2. Mbaʼérepa ñamombaʼevaʼerã pe kongregasión, ha mbaʼépa ojejapo upépe?

 YMAITEREI guive, yvyporakuéra oheka mborayhu ha pyʼaguapy hogapýpe. Péro Ñandejára Ñeʼẽ ohechauka avei hetaiterei tapicha ojoayhu ha oñeñandu porãha Ñandejára kongregasiónpe. Jaiko porã térã nahániriramo jepe ñande rogapýpe, ñamombaʼevaʼerã opa mbaʼe Ñandejára omeʼẽva ñandéve kongregasión rupive. Ha ñaimémaramo testigos de Jehová kongregasiónpe, katuete jaʼéta javyʼa ha ñañeñandu porãha upépe.

² Kongregasiónpe ndajahái javyʼa hag̃uánte, térã ñañembosarai hag̃ua ñande rapichakuéra ndive. Upépe ñande aty ñamombaʼeguasu hag̃ua Jehovápe, ha ymaiterei guive ojejapóva upéicha ohechaukaháicha ñandéve umi salmokuéra. “Maymáva rovake romombaʼeguasúta, ha rogueropurahéita opavave apytépe”, heʼi Salmo 35:18. Upéicha avei heʼi ñandéve Salmo 107:​31, 32: “Perohory Ñandejárape, oporoporiahuverekógui ha ojapógui mbaʼe hechapyrãva yvypóra rehehápe. Tojererohory [kongregasiónpe]”.

3. Heʼihaguéicha apóstol Pablo, mbaʼépa avei ojapo pe kongregasión?

³ Apóstol Pablo ohechauka mbaʼépa avei ojapo pe kongregasión oñeʼẽrõ guare Ñandejára rógare. Upéva hína Ñandejára kongregasión, “ojokóva ha omopyendáva” pe añetegua (1 Timoteo 3:​15). Mbaʼe kongregasión rehépa oñeʼẽ Pablo? Mbaʼéichapa oiporu la Biblia pe ñeʼẽ kongregasión? Ha mbaʼéichapa jaikovaʼerã ñaimehaguére kongregasiónpe ha mbaʼépa jajaposevaʼerã upévare? Jahechami raẽ mbaʼéichapa la Bíbliape ojeporu pe ñeʼẽ kongregasión.

4. Mbaʼéichapa oiporuve Ñandejára Ñeʼẽ evréope ojehaivaʼekue pe ñeʼẽ kongregasión?

⁴ Pe evréo ñeʼẽgui ojetradusíva “kongregasión” heʼise “ñembyaty” (Deuteronomio 4:​10; 9:​10). Salmokuérape ojeporu oñeñeʼẽ hag̃ua umi ánhel yvagapeguáre ha avei umi kuimbaʼe iñañáva atýre (Salmo 26:5; 89:​5-7). Upéicharõ jepe, Ñandejára Ñeʼẽme ojeporu hetave hendápe oñeñeʼẽ hag̃ua umi Israelgua rehe. Ñandejára heʼi Jacóbpe oikotaha chugui peteĩ kongregasión guasu, ha upéicha oiko (Génesis 28:3; 35:11; 48:4). Israélpe ojeporavo oiko hag̃ua chugui ‘Jehová kongregasión’, ‘Ñandejára añetegua kongregasión’ (Números 20:4; Nehemías 13:1; Josué 8:35; 1 Samuel 17:47; Miqueas 2:5).

5. Mbaʼe ñeʼẽ oĩva griégopepa ojetradusi jepi “kongregasión”, ha mbaʼépa heʼise?

⁵ Griégo ñeʼẽme ojeporu ek·klē·sí·a, oúva mokõi ñeʼẽgui heʼiséva “okápe” ha “oñehenóiva”, térã peteĩ aty oñehenóiva okápe. Sapyʼánte ojeporu avei oñeñeʼẽ hag̃ua umi aty ndoadoráivare Ñandejárape. Upéva oikovaʼekue Éfesope Demetrio ‘ombyatýrõ guare’ umi tapichápe Pablo kóntrape (Hechos 19:​32, 39, 41). Upéicharõ jepe, la Bíbliape ojeporu pyʼỹive oñeñeʼẽ hag̃ua kristianokuéra kongregasión rehe. Oĩramo jepe Biblia otradusíva “iglésia”, pe Nuevo Diccionario Bíblico Ilustrado heʼi “ko ñeʼẽ arakaʼeve ndeʼiséi peteĩ óga guasu térã peteĩ lugár ojeporúva ojeadora hag̃ua Ñandejárape”. Upéicharõ jepe, Ñandejára Ñeʼẽ ojehaivaʼekue griégope oiporu pe ñeʼẽ kongregasión cuatro hendáicha.

 Pe kongregasión oĩha umi ojeporavovaʼekue oho hag̃ua yvágape

6. Mbaʼépa ojapovaʼekue kongregasiónpe David ha Jesús?

⁶ Oñeʼẽrõ guare Jesús rehe, apóstol Pablo imanduʼa David heʼivaʼekuére Salmo 22:​22-pe: “Che aikuaaukáta nde Réra chepehenguekuérape, pe [kongregasiónpe] amombaʼeguasúne nde Réra”. ‘Upévare Jesús oikovaʼerã iñermanokuéraicha opa mbaʼépe, oiko hag̃ua chugui peteĩ saserdóte guasu ijeroviaháva ha oporoporiahuverekóva Ñandejára renondépe’ (Hebreos 2:​12, 17, JMP). David omombaʼeguasuvaʼekue Ñandejárape Israel kongregasiónpe (Salmo 40:9). Péro mbaʼe kongregasión rehépa oñeʼẽvaʼekue apóstol Pablo heʼírõ guare Jesús omombaʼeguasuha Ñandejárape ‘kongregasiónpe’?

7. Mbaʼéichapa ojeporu pe ñeʼẽ kongregasión ojetradusíva griégo ñeʼẽgui?

⁷ Hebreos 2:​12, 17 heʼíva omyesakã ñandéve Jesucristo oĩhague peteĩ kongregasiónpe ha upépe oikuaaukahague Ñandejára réra iñermanokuérape. Mávapa hína umíva? Umi oĩva “Abrahán ñemoñare” apytépe, umi Jesucristo ermáno oĩtava hendive, umi ‘oñehenoivaʼekue yvágape g̃uarã’ (Hebreos 2:16–​3:​1, JMP; Mateo 25:40). Pe kongregasión ojetradusíva griégo ñeʼẽgui ojeporu raẽ oñeñeʼẽ hag̃ua Jesucristo remimboʼekuéra yvágape ohótavare. Umíva hína 144.000, oñehenóiva Ñandejára raʼykuéra kongregasión, ha herakuéra oĩma yvágape (Hebreos 12:23).

8. Mbaʼéichapa heʼivaʼekue Jesús oñemopuʼãtaha ikongregasión?

⁸ Jesús heʼimavaʼekue omoĩtaha ikongregasión. Haimete un áño omano mboyve, heʼivaʼekue peteĩ apóstolpe: ‘Nde hína Pedro. Ko ita ári amopuʼãta che kongregasión, ha mbaʼeve ivaíva ndaipuʼakamoʼãi hese’ (Mateo 16:18). Umi apóstol Pedro ha Pablo ohechakuaavaʼekue Jesús haʼeha upe ita. Pedro heʼi umi kristiáno ojoguáva ‘ita oikovévape’ ojeporuha oñemopuʼã hag̃ua peteĩ óga ijojahaʼỹva Ñandejárape g̃uarã, ha ‘omoherakuã hag̃ua umi mbaʼe porãita haʼe ojapóva’. Upéva oñemopuʼã pe “ita” ári, haʼéva Jesucristo (1 Pedro 2:​4-9; Salmo 118:22; Isaías 8:14; 1 Corintios 10:​1-4).

9. Arakaʼépa oñepyrũ Ñandejára kongregasión?

⁹ Arakaʼépa Ñandejára oñepyrũ oiporavo umi kristiáno oĩtava upe kongregasiónpe? Omeʼẽrõ guare ijespíritu Jesús remimboʼekuérape, umi oñembyatyvaʼekue Jerusalénpe Pentecostés jave áño 33-pe. Upéva oiko riremi, Pedro oñemoñeʼẽ porãiterei umi hudío ha umi oĩvape hendivekuéra. Heta umi oĩva upépe oñembyasy Jesús ojejukahaguére, upévare ojevy hembiapo vaikuégui ha ojevautisa. Omombeʼuháicha la Biblia, tres mil tapicha oike Ñandejára kongregasión pyahúpe (Hechos 2:​1-4, 14, 37-47). Heta hudío ha umi oĩva hendivekuéra ohechakuaa umi Israelgua ndahaʼeveimaha Ñandejára kongregasión. Upéva rangue koʼág̃a oĩha pe ‘Israel espirituál’, umi kristiáno ohótava yvágape (Gálatas 6:16; Hechos 20:28).

10. Mbaʼe tembiapópa oñemeʼẽ Jesúspe Ñandejára kongregasiónpe?

¹⁰ Ñandejára Ñeʼẽme pyʼỹi ojeʼe ‘Jesucristo ha kongregasión’ oñeñeʼẽ jave Jesús ha umi kristiáno ohótavare yvágape. Jesús omoakã ko kongregasión. Apóstol Pablo omombeʼu Ñandejára omoĩhague Jesucrístope omoakã hag̃ua pe kongregasión (Efesios 1:​22, 23; 5:​23, 32; Colosenses 1:​18, 24). Umi ohótava yvágape ndahetavéima ko Yvy ape ári. Ha katuete jaʼekuaa Jesucristo ohayhuha chupekuéra ojeʼeháicha Efesios 5:​25-pe: ‘Cristo ohayhuvaʼekue kongregasiónpe ha oñemeʼẽ hesehápe’. Ohayhueterei chupekuéra oñehaʼãhaguére omombaʼeguasu Ñandejárape ha oikuaauka héra haʼe ojapohaguéicha (Hebreos 13:15).

Mbaʼéichapa ojeporu avei pe ñeʼẽ kongregasión

11. Mbaʼéichapa avei ojeporu pe ñeʼẽ kongregasión Ñandejára Ñeʼẽme griégope ojehaivaʼekue?

¹¹ Sapyʼánte pe ñeʼẽ kongregasión ndojeporúi oñeñeʼẽ hag̃ua umi 144.000 yvágape  ohótavare. Ojeporu avei oñeñeʼẽ hag̃ua peteĩ aty michĩvévare. Upéva jahechakuaa Pablo ohaírõ guare peteĩ kristiáno atýpe: ‘Ani pemoñepysanga avavépe tahaʼe isrraelitakuérape, térã isrraelitaʼỹvape, térã Ñandejára kongregasiónpe’ (1 Corintios 10:​32, BNP). Upéicharõ, peteĩ kristiáno oĩva Coríntope hembiapo vaíramo, ikatu omoñepysanga hapichápe. Péro, ikatútapa omoñepysanga umi griégo, hudío ha umi yvágape ohótavape? Ndaikatumoʼãi. Upévare, ojeʼévo Ñandejára kongregasión, oñeñeʼẽhína umi kristiáno oikóvare peteĩ tiémpope. Upévare, ikatu jaʼe Ñandejára omboʼe, oñangareko térã ovendesiha ikongregasiónpe, ñañeʼẽvo enterove kristiánore oikóva peteĩ tiémpope, toĩ oĩhápe. Térã ikatu jaʼe mbaʼeichaitépa koʼág̃a ovyʼa ha ipyʼaguapy pe kongregasión, ha upéicha ñañeʼẽñaína enterove kristianokuérare.

12. Mbaʼéichapa ojeporu avei pe ñeʼẽ kongregasión la Bíbliape?

¹² Pe ñeʼẽ kongregasión ojeporu avei la Bíbliape oñeñeʼẽ hag̃ua enterove kristianokuérare oikóva peteĩ lugárpe. Upéicha rupi la Biblia oñeʼẽ umi kongregasión rehe oĩva “opa Judea, Galilea ha Samaria rupi, oiko[ha] pyʼaguapýpe” (Hechos 9:31). Umi lugárpe oĩvaʼekue heta kristiáno aty, ha enterovetépe oñehenói ‘pe kongregasión’. Hetaiterei tapicha ojevautisavaʼekue áño 33-pe Pentecostés jave, ha upe riremi avei. Upévare ikatu jaʼe Jerusalénpe ha ijerére oĩhague avei heta kongregasión (Hechos 2:​41, 46, 47; 4:4; 6:​1, 7). Herodes Agripa I oisãmbyhy Judea omano meve áño 44-pe, ha heʼiháicha 1 Tesalonicenses 2:​14, pe áño 50-pe g̃uarã heta kongregasiónma oĩ Judéape. Upévare, Ñandejára Ñeʼẽ heʼi vove Herodes oñepyrũhague ‘opersegi umi kongregasionguápe’, ikatu oñeʼẽhína umi kongregasión oñembyatyvaʼekuére Jerusalén jerére (Hechos 12:​1, BNP).

13. Mbaʼéichapa ojeporu pyʼỹive la Bíbliape pe ñeʼẽ kongregasión?

¹³ Pe ñeʼẽ kongregasión ojeporu pyʼỹive la Bíbliape oñeñeʼẽ hag̃ua kristianokuérare oĩva peteĩ kongregasiónpe, oñembyatýramo jepe hikuái ogahápente. Apóstol Pablo heʼivaʼekue mokõi hendápe ‘umi kongregasión Galáciape oĩva’, oñeʼẽrõ guare umi kongregasión rehe ombaʼapóva ko lugárpe oĩva Roma poguýpe. Antioquía, Derbe, Listra ha Icóniope ojeporavovaʼekue umi kristiáno ikatupyrývape oservi hag̃ua ansiánoramo, térã omoakã hag̃ua umi kongregasión (1 Corintios 16:1; Gálatas 1:2; Hechos 14:​19-23). Enterovetépe la Biblia ohenói ‘Ñandejára kongregasionkuéra’ (1 Corintios 11:16; 2 Tesalonicenses 1:4).

14. Mbaʼépa jaʼekuaa jahecha rire mbaʼéichapa ojeporu la Bíbliape pe ñeʼẽ kongregasión?

¹⁴ Oĩvaʼekue avei umi kristiáno oñembyatýva ogahárupi. Ndahetáiramo jepe hikuái, oñehenói avei chupekuéra kongregasión. Upéicha vaʼekue umi oñembyatýva Áquila ha Prisca rógape, ha avei Ninfa ha Filemón rógape (Romanos 16:​3-5; Colosenses 4:15; Filemón 2). Upéicha avei umi kongregasión michĩva oĩva koʼág̃a ha oñembyatýva ogahárupi ovyʼavaʼerã. Jehová oguerohory ha omeʼẽ chupekuéra ijespíritu, yma ojapohaguéicha umi kongregasión michĩva rehe oĩvaʼekue síglo primérope.

Umi kongregasión omombaʼeguasu Jehovápe

15. Mbaʼépa ojapovaʼekue Ñandejára espíritu heta kongregasiónpe síglo primérope?

¹⁵ Jahecháma Jesús ojapohague Salmo 22:​22-pe heʼíva, omombaʼeguasúvo Ñandejárape kongregasiónpe (Hebreos 2:​12). Hemimboʼekuéra iñeʼẽrendúva ojapovaʼerã avei upéicha. Síglo primérope, ojeporavovaʼekue umi ohótava yvágape oiko hag̃ua chuguikuéra Ñandejára raʼy ha Jesucristo ermáno. Umíva apytépe oĩvaʼekue orresivíva Ñandejára espíritu ojapo hag̃ua umi mbaʼe ijojahaʼỹva. Pe espíritu rupive haʼekuéra iñaranduve térã oikuaave heta mbaʼe, oporomonguera, oikuaa umi mbaʼe oikótava ha avei oñeʼẽ umi idióma ndoikuaáivape (1 Corintios 12:​4-11).

16. Mbaʼerãpa omeʼẽvaʼekue Ñandejára ijespíritu?

¹⁶ Imanduʼávo ikatuha oñeñeʼẽ pe espíritu rupive ambue idiómape, Pablo heʼivaʼekue: “Apurahéita [Ñandejára espíritu reheve], ha aikuaáta avei mbaʼépa apurahéi” (1 Corintios 14:​15, BNP). Haʼe oikuaa hapichakuéra nontendéiramo pe heʼíva ndoikuaamoʼãiha mbaʼeve. Ha omombaʼeguasuségui Jehovápe heʼi umi espíritu sánto orresivivaʼekuépe: ‘Peñehaʼã pereko hetave umi mbaʼe penepytyvõtava pemombarete hag̃ua Ñandejára kongregasión’ (1 Corintios 14:​4, 5, 12, 23). Pablo ojepyʼapy umi kongregasión rehe, oikuaa rupi umi kristianokuéra ikatutaha upépe omombaʼeguasu Ñandejárape.

17. Mbaʼépa jaʼekuaa umi kongregasionkuérare?

¹⁷ Jehová oiporu ha oipytyvõ koʼág̃a peve ikongregasiónpe. Ovendesi umi ohótavape yvágape, omboʼévo hetaiterei mbaʼe porã ombovyʼáva chupekuéra (Lucas 12:42). Ovendesi oparupigua ermanokuérape ha avei umi oĩva kongregasiónpe. Upépe ñamombaʼeguasu chupe umi mbaʼe porã jajapóva ha jaʼéva rupive. Avei kongregasiónpe ñañehekomboʼe ñamombaʼeguasu hag̃ua Ñandejárape oimehápe, nañaiméiramo jepe upépe.

18, 19. Mbaʼépa ojapose umi kristiáno ohayhu añetéva Ñandejárape oĩva enterove kongregasiónpe?

¹⁸ Ñanemanduʼavaʼerã mbaʼépa heʼivaʼekue apóstol Pablo umi kristiáno Filiposguápe: ‘Ajerure che ñemboʼépe tapenerenyhẽ tembiapo iporãvagui Jesucristo rupi, oñemombaʼeguasu hag̃ua Ñandejárape’. Upéva heʼise omombeʼuvaʼerãha hapichakuérape umi mbaʼe porãita ohaʼarõva hikuái ha ojeroviaha Jesucrístore (Filipenses 1:​9-11; 3:​8-11). Upévare Pablo heʼi iñermanokuérape: ‘Jesús rupive ñameʼẽ tapia vaʼerã alavánsa Ñandejárape, omombaʼeguasúva Héra’ (Hebreos 13:15).

¹⁹ Javyʼápa avei ñamombaʼeguasu jave Ñandejárape ñaime jave kongregasiónpe, Jesús ojapohaguéicha? Ha ñamombaʼeguasúpa Jehovápe japredikávo umi chupe ndoikuaáivape? (Hebreos 2:12; Romanos 15:​9-11.) Jajapo hag̃ua upéva jahechakuaavaʼerã mbaʼépa Ñandejára oipota ojapo pe kongregasión ñaimeha. Pe artíkulo oúvape jahecháta mbaʼéichapa Jehová oisãmbyhy ha oiporu umi kongregasión ha mbaʼéichapa ñande avei jahechavaʼerã.

Ñanemanduʼápa?

• Mbaʼéichapa oñepyrũvaʼekue ‘Ñandejára kongregasión’ oĩha umi ohótava yvágape?

• Mbaʼéichapa la Bíbliape ojeporu avei pe ñeʼẽ kongregasión?

• Mbaʼépa ojaposevaʼekue David, Jesús ha heta kristianokuéra kongregasiónpe, ha mbaʼépa ñande avei jajaposevaʼerã upévare?

[Porandu ñahesaʼỹijóva]

[Nóta oĩva taʼanga ndive páhina 10]

Koʼã kristiáno Beningua ojapoháicha, ñande avei ñamombaʼeguasuvaʼerã Jehovápe aty guasúpe