Ñamombaretékena pe kongregasión

“[Umi kongregasión] oiko hikuái pyʼaguapýpe, ha oñemombareteve avei.” (HECHOS 9:​31, JMP.)

1. Mbaʼépa jaikuaase Ñandejára kongregasióngui?

 UPE ÁÑO 33-pe Pentecostés jave, Jehová ohechauka oiporavohague Jesús remimboʼekuérape imbaʼerã, oñehenóiva ‘pe Israel Ñandejára mbaʼéva’ (Gálatas 6:​16). Koʼã kristiáno ohótavape yvágape la Biblia ohenói avei ‘Ñandejára kongregasión’ (1 Corintios 11:22). Mbaʼépa heʼiserakaʼe upéva? Mbaʼéicha vaʼerãpa Ñandejára kongregasión? Mbaʼépa ojapovaʼerã ko Yvy ape ári, oikóramo jepe heta henda rupi koʼã kristianokuéra? Ha mbaʼéichapa jaikóta upévare javyʼa hag̃ua?

2, 3. Mbaʼéichapa ohechauka Jesús oñembaʼapotaha pe kongregasiónpe?

² Jahechahaguéicha pe artíkulo ohasavaʼekuépe, Jesús heʼíma hemimboʼekuéra ohótava yvágape oĩvaʼerãha peteĩ kongregasiónpe. Upévare heʼi apóstol Pédrope: “Ko ita ári [haʼéva Jesucristo] amopuʼãta che [kongregasión]; ha pe mano jepe ndaipuʼakamoʼãi hese” (Mateo 16:​18, BNP). Ha oĩrõ guare Jesús ijapostolkuéra ndive, heʼi mbaʼéicha ha mbaʼépa ojapovaʼerã pe kongregasión omoñepyrũtava.

³ Jesús heʼi ha ohechauka oĩtaha umi oisãmbyhýva pe kongregasión, ha umíva oservitaha hapichakuérape. Heʼi: “Peẽ niko peikuaa mbaʼéichapa mburuvichakuéra po pohýipe oisãmbyhy umi hetã, ha mbaʼéichapa poguasukuéra avei oguereko vai chupekuéra. Pende apytépe katu ndaupeichaivaʼerã. Pe tuichaséva oikovaʼerã uvei tembiguáiramo. Ha pe itenondeséva pende apytépe, toiko opavave rembiguáiramo” (Marcos 10:​42-44). Péicha jahecha Ñandejára kongregasiónpe umi kristiáno nombaʼapomoʼãiha haʼeño reínte mombyry ojuehegui. Upéva rangue, ombaʼapóta oñondivepa ha oñopytyvõta hikuái.

4, 5. Mbaʼérepa pe kongregasión oikotevẽta oñemboʼe ojapo hag̃ua Ñandejára rembipota?

⁴ Pe omoakãtava Ñandejára kongregasión omombeʼu ijapóstol ha ambue hemimboʼekuérape mbaʼépa oñehaʼãrõ chuguikuéra. Mbaʼépa umíva? Omboʼevaʼerã katuete Ñandejára Ñeʼẽ iñermanokuérape. Ñanemanduʼami Jesucristo oñemoingove jey riréma heʼihague Pédrope umi apostolkuéra renondépe: “Nde Simón, Juan raʼy, ndépa cherayhu?”. Ha Pedro heʼi: “Upéicha, che Jára, nde niko reikuaa rohayhuha”. Jesús heʼi chupe: “Aipóramo eñangareko chéve che ovechakuéra rehe. [...] Aipóramo emongaru che ovechakuéra” (Juan 21:​15-​17, BNP). Ajépa tuichaite mbaʼe ko tembiapo!

⁵ Kóicha Jesús ombojoja umi oĩva kongregasiónpe peteĩ ovecha aty rehe. Koʼãva apytépe oĩ kuimbaʼe, kuña ha mitã ipyʼaporãva, ha tekotevẽta oñehekomboʼe ha oñeñangareko porã hesekuéra. Jesús heʼivaʼekue avei hemimboʼekuérape omboʼe hag̃ua koʼã ipyahúvape ojapo hag̃ua avei ko tembiapo (Mateo 28:​19, 20).

6. Mbaʼépa ohechauka koʼã mbaʼe oñemombeʼúva Ñandejára kongregasión pyahúre?

⁶ Oñepyrũ rire Ñandejára kongregasión, umi kristianokuéra oñembyaty meme vaʼekue oikuaave hag̃ua Ñandejára rembipota ha oñomokyreʼỹ hag̃ua hikuái. Ñandejára Ñeʼẽ heʼi: “Ha oñemohatã hikuái umi apostolkuéra omboʼévape chupekuéra, ombojaʼóvo oñondive umi oguerekóva, oñembyatývo [okaru] ha oñemboʼe hag̃ua” (Hechos 2:​42, 46, 47). Jahechakuaa avei ojeporavohague umi kuimbaʼe ikatupyrývape ojapo hag̃ua umi tembiapo. Ndojeporavói chupekuéra iñarandu, térã ojapokuaahaguére peteĩ mbaʼe. Upéva rangue oje poravo “kuimbaʼe ikatupyrýva ha henyhẽva Espíritu Sántogui”. Umíva apytépe oĩvaʼekue Esteban, ‘kuimbaʼe ojeroviáva Ñandejárare ha henyhẽva espíritu sántogui’. Kóicha ojejapo rupi Ñandejára “ñeʼẽ iñasãive ohóvo ha umi ogueroviáva oñemboheta Jerusalénpe” (Hechos 6:​1-7).

Ñandejára omeʼẽ hembiaporã kuimbaʼekuérape

7, 8. a) Mbaʼépa ojapovaʼekue umi apóstol ha ansianokuéra oĩva Jerusalénpe? b) Mbaʼépa oiko ojekuaa rire umi kongregasiónpe mbaʼépa ojejapovaʼerã?

⁷ Umi apóstol omoakãvaʼekue pe kongregasión iñepyrũme, péro ndahaʼéi haʼekuérante. Pe lívro hérava Hechos omombeʼu Pablo ha umi iñirũnguéra oho jey hague Antioquía de Síriape. Pe kapítulo 14, versíkulo 27-pe [BNP], heʼi: “Og̃uahẽ rire Antioquíape ombyaty hikuái pe [kongregasión] ha omombeʼu ichupekuéra opa umi mbaʼe [...] Ñandejára ojapovaʼekue ipo rupikuéra”. Oĩ jave upépe, oñeporandu tekotevẽpa oñesirkunsida umi kristiáno ndahaʼéiva hudío. Ojekuaa hag̃ua mbaʼépa ojejapovaʼerã, omondo hikuái Pablo ha Bernabé “Jerusalénpe oñeʼẽvo ko mbaʼére apostolkuéra ha myakãharakuéra” ndive. Koʼãva hína umi omoakã ha oisãmbyhýva kongregasionkuéra, oñehenóiva Cuerpo Gobernante (Hechos 15:​1-3).

⁸ Santiago, Jesús ermáno péro ndahaʼéiva apóstol, omoakãvaʼekue ‘umi apóstol ha ansianokuérape oñembyatýrõ guare oñeʼẽ hag̃ua ko mbaʼére’ (Hechos 15:6). Ñandejára oipytyvõ chupekuéra Iñeʼẽ ha ijespíritu rupive og̃uahẽ hag̃ua peteĩ ñeʼẽme haʼe oipotaháicha. Upéi oskrivi ha omondo hikuái upéva umi kongregasiónpe (Hechos 15:​22-32). Umi kristiáno oikuaávo koʼã mbaʼe oguerohoryeterei ha ojapo ojeʼehaguéicha chupekuéra. Ha mbaʼéichapa oñeñandu upe rire? Ikyreʼỹ ha imbareteve hikuái. La Biblia heʼi: “Upéicha ára koʼẽre umi [kongregasión] oñemombarete ijeroviápe ha oñemboheta hetave ohóvo” (Hechos 16:​5, BNP).

9. Mbaʼéichapa ikatu oipytyvõ umi kristiáno ojapóva Ñandejára ojeruréva chuguikuéra?

⁹ Ha mbaʼéichapa ombaʼapovaʼerã kongregasionkuéra? Upearã jahechami mbaʼépa oiko umi kongregasiónpe oĩvaʼekue ísla de Crétape. Ojeʼéramo jepe hesekuéra heko vaiha, oĩvaʼekue umi ohejáva hembiapo vaikue ha oikóva chugui kristiáno (Tito 1:​10-​12; 2:​2, 3). Isarambi hikuái opárupi, ha oiko mombyry pe Cuerpo Gobernante Jerusalénpe oĩvagui. Péro upéva ndahaʼéi mbaʼeve, oĩgui umi kongregasiónpe ‘ansiáno’ ojapóva Ñandejára ojeruréva chuguikuéra omoakã hag̃ua umi kongregasión. Koʼã kuimbaʼépe ojeporavo oiko hag̃ua chuguikuéra ansiáno térã superintendénte. Haʼekuéra ikatuvaʼerã “omokyreʼỹ hapichakuérape, [o]hekomboʼe añeteguápe, ha ogueroviaukakuaavaʼerã umi hese oñemoĩvape” (Tito 1:​5-9; 1 Timoteo 3:​1-7). Oĩ avei umi kuimbaʼe ikatupyrýva oñemoĩva siérvo ministeriál, térã diákonoramo  oipytyvõ hag̃ua kongregasiónpe (1 Timoteo 3:​8-10, 12, 13).

10. Heʼiháicha Mateo 18:​15-​17, mbaʼépa ojapovaʼerã peteĩ kristiáno ojoavy vaíramo iñermáno ndive?

¹⁰ Jesús heʼimavaʼekue mbaʼéichapa oñembaʼapovaʼerã kongregasiónpe Mateo 18:​15-​17-pe [BNP]. Ko téysto ohechauka peteĩ kristiáno ikatuha ojoavy iñermáno ndive ojapógui hese ivaíva. Upéicharõ pe ipochýva oñeʼẽvaʼerã hendive haʼeñohápe ha ‘ohechauka chupe ojavyhague’. Nog̃uahẽiramo hikuái peteĩ ñeʼẽme, ikatu ohenói mokõi térã mbohapy hapichápe oikuaáva pe oikovaʼekue oñemongeta hag̃ua pe ojavyvaʼekue ndive. Péro, mbaʼépa ojapóta ndopáiramo upe provléma? Jesús heʼi: “Ohenduʼỹramo chupekuéra katu, emombeʼu [pe kongregasiónpe], ha ohenduseʼỹramo pe [kongregasiónpe] jepe katu, pereko ichupe pendereheguaʼỹvaramo térã impuésto kovraháramo”. Jesús heʼírõ guare koʼã mbaʼe, umi hudío ‘Ñandejára kongregasión’ gueteri. Upévare, koʼápe Jesús oñeʼẽ hesekuéra. * Péro, Jesús heʼivaʼekue ikatúta ojeporu avei kongregasiónpe upe rire. Upéva ohechauka avei Ñandejára puévlope umi kongregasión ombaʼapo porãtaha omombarete ha ohekomboʼe hag̃ua umi kristianokuérape.

11. Mbaʼépa ojapovaʼerã umi ansiáno oĩ jave provléma?

¹¹ Umi ansiáno, térã superintendénte, oñatendevaʼerã kongregasión rérape umi provlémare térã umi mbaʼe vai ojejapovaʼekuére. Upéva jahecha Tito 1:​9-pe heʼívare. Añetehápe, umi kuimbaʼe iñimperfékto, Tito iñimperfektohaguéicha. Upéicharõ jepe, Pablo omondo chupe ‘omoĩ hag̃ua hekopete umi mbaʼe oñekotevẽva’ (Tito 1:​4, 5). Koʼág̃a rupi, umi oservítava ansiánoramo tekotevẽ ohechauka raẽ imborayhu ha ijerovia Ñandejárare. Upévare, umi oĩva kongregasiónpe ojeroviakuaa haʼekuéra omoakã porãtaha chupekuéra.

12. Mbaʼépa ojapovaʼerã umi ansiáno kongregasionpegua?

¹² Pablo heʼi umi ansiánope oĩva Éfeso kongregasiónpe: “Peñangareko pendejehe, ha peñangareko opa ovecha atýre Espíritu Sánto penemoĩhaguépe herekuárõ Jesucristo [kongregasión], haʼe ojoguavaʼekue huguy teépe” (Hechos 20:28). Upéicha avei koʼág̃a rupi, ojeporavo umi ansiánope ‘oñangareko hag̃ua Ñandejára kongregasiónre’. Ha ojapovaʼerã upéva mborayhúpe, oñemombaʼeʼỹre Jehová ovechakuérare (1 Pedro 5:​2, 3). Haʼekuéra oñehaʼãvaʼerã omombarete ha omokyreʼỹ enterove ermanokuérape.

 Aníkena jaheja pe kongregasión

13. Mbaʼépa ikatu oiko peteĩ kongregasiónpe, ha mbaʼérepa?

¹³ Entéro ñaiméva kongregasiónpe ñaneimperfékto, umi ansiáno jepe. Upévare sapyʼánte ikatu oĩ ojoavýva oikohaguéicha síglo primérope, umi apóstol oĩrõ guare (Filipenses 4:​2, 3). Ikatu peteĩ ansiáno térã ambue ermáno haʼetévaicha iñeʼẽ pohyiʼimíva ñandéve, itieʼỹ, térã ijapuʼimíva. Ikatu avei ñaimoʼã ndojejapoiha Ñandejára Ñeʼẽme heʼiháicha, ha umi ansiáno oikuaáramo jepe ndojapoiha mbaʼeve. Péro ikatu oime ojehecháma térã ojehechahína mbaʼépa heʼi la Biblia upe mbaʼére, ha oĩ heta mbaʼe ñande ndajaikuaáiva. Upévare, ñande jaʼéva añetéramo jepe, ñanemanduʼavaʼerã pe oikovaʼekuére Coríntope. Upe kongregasiónpe ojehejavaʼekue oiko peteĩ mbaʼe ivaietereíva. Péro Jehová oñatendégui hese, heʼi porã mbaʼépa ojejapovaʼerã ha hendapete (1 Corintios 5:​1, 5, 9-​11). Upévare ñañeporandumi: “Aikórire yma Coríntope, mbaʼépa ajapovaʼerãmoʼã upe jave?”.

14, 15. Mbaʼérepa oĩvaʼekue ndohosevéimava Jesús ndive, ha mbaʼépa ñanemboʼe upéva?

¹⁴ Jahechami peteĩ mbaʼe ikatúva avei oiko. Peteĩ tapichápe hasy ontende hag̃ua peteĩ mbaʼe la Biblia omboʼéva. Ikatu oime ohesaʼỹijóma la Biblia ha umi puvlikasionkuéra. Avei oporandúma umi ansiáno ha ermanokuéra ikatupyrývape. Upéicharõ jepe, hasy gueteri chupe ontende ha oasepta hag̃ua upe mbaʼe. Mbaʼépa ojapovaʼerã upe tapicha? Upéicha oikovaʼekue un áño Jesús omano mboyve. Upérõ heʼi: “Che haʼe pe pán oporomoingovéva”, ha heʼi avei oikoséva opa ára g̃uarã ‘hoʼuvaʼerãha hoʼo ha huguy’. Upe heʼivaʼekue ombopochy heta hemimboʼépe, ha oñehaʼãrangue ontende porã hikuái térã ojerovia Jesús rehe, ‘ndohosevéima hendive’ (Juan 6:​35, 41-​66, BNP). Upévare ñañeporanduvaʼerã: “Aimérire upépe, mbaʼépa ajapovaʼerãmoʼã?”.

¹⁵ Koʼág̃a rupi, oĩ ohejáva kongregasión, oimoʼãgui ojetrata vai hague chupe. Ikatu avei heʼi ndojejapoihague mbaʼeve oikórõ guare peteĩ mbaʼe ivaíva, térã oĩha umi mbaʼe oñemboʼéva hendapeʼỹ. Umichagua oimoʼã ikatuha oservi Ñandejárape haʼeño reínte. Péro, iporãpa jajapo upéicha? Añete, enterove kristiáno oñehaʼãvaʼerã oĩ porã Ñandejára ndive. Péro jaikuaa avei Haʼe oiporuha umi kongregasión, ojapohaguéicha yma umi apóstol oikórõ guare. Jehová oiporu ha ovendesivaʼekue umi kongregasiónpe ha omoĩ ansiáno ha siérvo ministeriál oipytyvõ hag̃ua chupekuéra. Upeichaite avei ojapo koʼág̃a.

16. Mbaʼérepa imanduʼavaʼerã oĩramo ohejaséva kongregasión?

¹⁶ Peteĩ kristiáno oimoʼãramo haʼeño reínte oñemoĩ porãtaha Ñandejára ndive, omboykehína umi kongregasión Ñandejára omoĩvaʼekue. Ikatu haʼe oadora Ñandejárape haʼeñónte térã omoñepyrũ peteĩ aty. Péro, mbaʼerãpa oñemoĩta upéicharõ umi ansiáno ha siérvo ministeriál? Iporã ñanemanduʼa Pablo heʼihague ‘ñañembohapo ha ñañemopyenda hatã vaʼerãha Crístore’. Upéva heʼi ohaírõ guare peteĩ kárta umi Colosasguápe ha heʼi ojelee hag̃ua avei umi Laodiceaguápe. Upéicharõ, umi oĩva kongregasiónpe añoite ikatu oñeñandu péicha, ndahaʼéi umi osẽvaʼekue chugui (Colosenses 2:​6, 7; 4:16).

Pe añetegua ojoko ha omopyendáva

17. Mbaʼépa heʼi kongregasión rehe 1 Timoteo 3:​15?

¹⁷ Pe kárta ohai ypy vaʼekuépe Timotéope,  apóstol Pablo heʼi mbaʼe mbaʼépa ojapovaʼerã umi ansiáno ha siérvo ministeriál. Upe rire, heʼi Ñandejára kongregasión haʼeha “pe añetegua ojokóva ha omopyendáva” (1 Timoteo 3:​15). Síglo primérope, umi kristianokuéra kongregasión omopyenda mbarete pe añetegua oñemboʼéva. Ha jahechakuaa umi kristianokuérape oñemboʼehague pe añetegua kongregasión rupive. Ipype añoite oñemboʼe ha oñedefende pe añetegua, ha upévare, upépe añoite avei ikatúta oñomokyreʼỹ hikuái.

18. Mbaʼérepa ñaikotevẽterei umi rreunión kongregasionpegua?

¹⁸ Koʼág̃a upeichaite avei oiko. Pe kongregasión kristianokuéra oĩha Ñandejára róga hína, “pe añetegua ojokóva ha omopyendáva”. Tekotevẽterei jaha meme rreunionhápe ha japartisipa upépe ñamombarete hag̃ua ñande jerovia, ha ñañembosakoʼi jajapo hag̃ua Ñandejára rembipota. Ohaívo pe kongregasión oĩva Coríntope, Pablo omokyreʼỹ chupekuéra opa mbaʼe heʼíva oñembyaty jave hesakã ha oñentende porã hag̃ua, ikatu hag̃uáicha omokyreʼỹ enterovépe (1 Corintios 14:​12, 17-​19). Ñande avei ikatu ñañemokyreʼỹ jahechakuaáramo Ñandejára Jehová oñangareko ha oipytyvõha umi kongregasión ñaimeha.

19. Mbaʼérepa ñamombaʼevaʼerã pe kongregasión ñaimeha?

¹⁹ Upévare, ñamombareteséramo ñande jerovia, ñaimevaʼerã kongregasiónpe. Ymaite guive Ñandejára oiporu pe kongregasión ñanemombarete ha oñangareko hag̃ua ñanderehe, ha ani jaguerovia umi japu oñemboʼéva. Oiporu avei oikuaauka hag̃ua opárupi pe notísia porã oñeʼẽva Igoviérnore oĩtava Jesucrísto poguýpe. Péicha jahechakuaa mbaʼeichaitépa Ñandejára oiporu pe kongregasión ojejapo hag̃ua haʼe oipotáva (Efesios 3:​9, 10).

[Nóta]

Ñanemanduʼápa?

• Mbaʼérepa jaʼekuaa Ñandejára oiporuvaʼerãha umi kongregasión ko Yvy ape ári?

• Mbaʼépa ojapo umi ansiáno kongregasión rehehápe, iñimperféktoramo jepe hikuái?

• Mbaʼéichapa ñanepytyvõ pe kongregasión ñaimeha?

[Porandu ñahesaʼỹijóva]

[Nóta oĩva taʼanga ndive páhina 13]

Umi ansiáno ha siérvo ministeriálpe oñembokatupyry ombaʼapo porãve hag̃ua kongregasiónpe

[Nóta oĩva taʼanga ndive páhina 14]

Umi apóstol ha ansiáno oĩva Jerusalénpe omoakã ha oisãmbyhyvaʼekue kongregasionkuéra