Ñembyasy ndohasáiva péicha rei

RAMOITÉNTE peteĩ karai oñemoĩ ostudia mbaʼéichapa oñeñandu umi túva ha sy, mése ha áño omano rire peteĩ ifamília. Upearã haʼe oporandu umi tuvakuérape mbaʼéicha oñeñandu ha naentéroi omombeʼu chupe. Peteĩ túva hérava Vladimir heʼi ijetuʼuha chupe oñeʼẽ hag̃ua itaʼýrare, jepe ojapóma cinco áño omanohague. *

Péicha oñeñandu heta sy ha túva itaʼýra manóva. Ojapóma 10 áño dón William raʼy orekóva 18 áño ojahogahague. Haʼe heʼi: “Koʼág̃a peve che añembyasýiti upévare, ha araháta chendive amano meve”. Ña Lucy memby katu hasy sapyʼa ha omano. Upéva ojapóma cinco áño ha haʼe heʼi: “Che memby omano riremínte haʼe chejupe: ‘Ndoikóiningo mbaʼeve’. Asoña vaínteko ha apáyta sapyʼa. Péro upe rire ahechakuaámante haʼe ndoumoʼãveimaha. Cinco áñoma ningo che memby omanohague ha sapyʼánte cheaño jave cherasẽ gueteri hese”.

Mbaʼérepa oñeñandu péicha koʼã tuvakuéra? Jahechamína mbaʼérepa.

Mbaʼérepa oñembyasyete hikuái

Peteĩ mitã onase jave itúva ha isy ovyʼaiterei, ndaipóri ombovyʼavéva yvyporakuérape ko mbaʼégui. Ohupívo pe mitã, omañávo hese oke aja, ohechávo opuka, haʼekuéra ovyʼaiterei. Tuvakuéra ningo ohayhueterei itaʼyrakuéra. Omboʼe chupekuéra heko porã ha otrata porã hag̃ua hapichakuérape (1 Tesalonicenses 2:​7, 11). Umi mitã oñehekomboʼe porãva ombovyʼa ituvakuérape.

Túva ha sy heta ombaʼapo omoĩ hag̃ua ifamiliakuérape oikotevẽva. Haʼekuéra oñongatu jepi pláta térã ohecha mbaʼépa omeʼẽta itaʼyrakuérape oipytyvõ hag̃ua chupekuéra omendaha óra (2 Corintios 12:14). Haʼekuéra ningo oñehaʼãmbaite ifamiliakuéra rehehápe. Upévare pe mitã omanóramo sapyʼa, haʼete ku opyta reíva ituvakuéra rembiapo, ha opa rei umi mbaʼe oipotáva  hikuái chupe g̃uarã. Pe mitã ohayhuetéva ndaiporivéima ha ndaikatúi ojapo mbaʼeve. Avave nomyengoviamoʼãi chupe. Oñeñandu vaietereíko hikuái ha péicha péichante ndohasamoʼãi iñembyasy.

La Biblia ohechauka mbaʼeichaitépa oñeñandu vai tuvakuéra omanóvo peteĩ itaʼýra. Omombeʼu mbaʼépa oiko Jacob oikuaávo ojejukahague itaʼýra Josépe. La Biblia heʼi: ‘Jacob omondoro ijao ñembyasýgui, oñemonde ao vosakuépe, ha are oiko péicha ombyasýgui itaʼýra mano. Itaʼýra ha itajyrakuéra oñehaʼã ombopyʼaguapy chupe. Haʼe katu ndoikuaaséi mbaʼeve ha heʼi: “Añembyasýne che raʼýre, amano meve” ’. Heta áño ohasa rire Jacob oñembyasy gueteri itaʼýrare, haʼe oimoʼãva omanohague (Génesis 37:​34, 35; 42:​36-​38). La Biblia oñeʼẽ avei Noemí rehe. Chugui omano mokõi imemby kariaʼy. Haʼe ndovyʼakuaavéi, ha ndoipotavéi oñehenói chupe Noemí heʼiséva “heʼẽva”, oipota guei oñehenói chupe Mará heʼiséva “iróva” (Rut 1:​3-5, 20, 21, nóta).

La Biblia noñeʼẽi tuvakuéra oñandúvarente omanóvo chuguikuéra itaʼyrakuéra. Heʼi avei Jehová omombareteha chupekuéra. Pe párte oúvape jahecháta mbaʼéichapa Ñandejára okonsola umi oñembyasývape ifamília omanohaguére.

[Nóta]